(Fiction Love story by: Joychand Kuki
ALA NGAI TO ATHUSIM KOP MAI UTE BOL DI AUM PO
Setlei khankho aheisa bang pal lou lungvul nan, toidon lai noplen ni jeng jong echinleh toi cheng to mang man lou khop in, themjil na malam non hinkho Kaman jing e.
Lungset epi hija Ngailut epi ham ti jong helou, numei lunglhom leh lumsong bang mol den jeng bang in mihemkhat lungset chen ding lung vul in jong kana ngai to kha poi.g
Ahinlah chungmangpa khan kho hei, kei din adang lam ta ngei je.
Lungset nahi, khat din kipa na kol ni aso sah jin, khat din lungdon meipi bang kana le mao na kolni ahei ji e, hibang chun tun vang keidin lungset hi lonlhi masa twibang lonna ding in kolni ahung kikeu tai, hintin lah asem sa mihem kei man, eti lamdol in kagen thei na lel jeng ta leng phatchesa golto kingai laini, agam toui bang don thah kit dem ti-a laa mang kadot jing vang in, mol pang lepta sa nungkou kit thei lou khan kho leh thim thu cheng lonlhi twibang lon na ti lou ei dong ding dang kavai mo jen e.
Date 02/05/2006 ni lhaah lam in Chungtoni jong alhangkai tan, thangvan sang lam a kon in thonggo ahung phin e, hichun nam sepai dang chah kaheng a ahung in donding twi themkhat beh hijong leh neipen tin ahung tao ve.
Kin jong lunga khoto na dimset pum in donding sihtwi dap chu kana pen, kami khoto na sihtwi dap chu tunin vang lonlhi masa thongo joh in einung le tai.
Kangai pen Kau Lalboi in, kaheng a lungset thimthu alal ni jan, lunga mangmon ahung lang e, lung vang kalungset lheh nai, ngai jong kangai lheh jeng e, ahinlah lungset kachan ngam loudan, kana sei nan hijeng jong leh kalungset na twipi bang kinong chun, numei kam mol keima hinan nang jou talou in, Henge heo kahin lungset e tin lungset na sangpen kana chen tai.
Ahin lah kalung lai gil la thilkhat mang mon aging jing e, ami hi nan kalungset nai, ahin lah, nam sepai ahi nan vang lung sa ih na kanei je, namsepai kadei lou ahipoi, koi ham setlei chunga nampi khankho ding gel a kipe doh golhang lungset chen lou ding? Koi ma um him him ponte tin kagel e, ahinlah tu Nampi din mun in vang namspai nampi khankho ding gel mihem kamu loou jeh in Anjou khat leh, hui ja vaibang tham den na ding leh, lonlhia phungtha bang vul na ding bep hinkho mang khang katem ti gal gin nan meibang eibom e.
Lungset na eichen hocheng kasang nom poi tin nol jong leng, eba kalo ding ham ken jong kalung set e, hijeh chun hinkhoa insung khat semkhom pi din kana kigel lhan lungset na dih tah chu kana pe tai.
Ahinlah anjoukhat khat leh, lomlou khulsin nan sam gibing eikhen khan tin, kilungset lamlhung joulou in huibang sum den jeng khadem ti gal gin nan,sun tin ka gim pin, jaan tin kaka pi ji e.
Hichun, keiman jong “Heo, kalungset nahe nai, kangai dan jong nahai poi, ajaan khat cha jong namel mu lou in kacham jou poi. Tun nanghi lomlou khulsin na cheng jeng le chun etobang hinkho kahin man ding jong nahai poi, ajeh chu namsepai, hinkho jingdaitwi leh hampa pah, phatchom cha dei um tah a hung pah tobang hinkho ahi, tunin naobang kinou jong le hen jingkho hung vah leh lungdon meipi jing in tin hiche hinkho hi nalungset pen keiman hinkhoa che pi jing jeng ding vang kajou poi.”
Tin aheng a katao tai, hichun aman jong ei don but in “Boi, nam sepai kahin, nampi ponlap noija kaki tep na mitphet kah lou a palkeh jeng thei ding kahi poi, ahin lah ven, tua pat ni sot talou jou leh kagal von ka tol koi ding kalungset pen nang to hinkhoa lungset subulhit dia hung vai kon ding kahi, hiche kah chun lunglhadai lou hel in nei na ngah jing in” tin kabeng achop in eida lha tai.
Kangaipen ka u Lalboi jin, eidahah nia pat in, ajaan jong cham jou lou asun toni beh jong lhum jou lou in hinkho kahin mang e, jaan nidan 11:00 pm vel in, call ahung in, keiman jong kagah dom in, ahileh, “Boi” ahin tin, epi ham heo, nadam jing hinam? Tin kadong pai tai, “henge kadam e nangla nadam hinam?” atin, “nang ngai puldou na leh lungnat na tilou adangse vang aphanai” katin, ahileh aman jong, tujaan galkon ding kahin, kahinkho kakhut a kichoi thoding kahitai, ahin la ven, ekitep na vang kasuh mil lou hel ding ahi,atin kin jong, koi to ham?? Tin kadong tai, ahinlah aman asei nom ta poi, hichun kadong kit in, koi to kikap dinga gal kon ding nahim? Tia kadoh kit phat chun aman jong koi dang hiding ham ei mi mama hina lou dingham?
Boi, nahet them ding kadei je, kei jong katha anom poi ahin lah alou thei lou ahi, lamkai kahi poi, lamkai thu ngai mai mai a vaikon ding kahi, ahin lah ven hung kile kit ding kahi hiche hi sumil hih in, tua kahung kile kit leh, lungtup emolso ding ahitai, tin asei je.
Ahinlah kalung nat na aki be lap in, kasei tai, heo, nampi sepai nahi kaki thang at pi mama e, nampi ngailu namgolhang khat in lungset eichan a kaiman jong lungset kachan kal a vangpha ding koi ma umdin kagel poi, ahin lah, na pumei long leh namei chang galmi chung joh hilou nanam mi mama ang sung leh na nam mi mama chunga achuh ding kagel thei him him poi,
Ven, nang in vangset na nato leh, nalungset pen keima leh I insung mi din kana hin tin, na ki kap pi hon vangset na ato jong leh koi dang hipon te, na nam mi mama hiding hichea lainat na leh puldou na mitlhi kaa cheng lo na jong koi dang pao hideh ding ham eipao mama hin tin, hichea chu epi ham kaki thang at pi diu?
Nagal mi hileh, ohh, nampi a dinga ahin kho phal pasal hang san ahi tin nampi leh na singsung chuleh keiding kana kolni soh nama jong leh kithang att na hiding hilou ham? Tua nanam mi mama chunga khut lha ding leh vaikon ding a nakigel u hi naki oi mong hinam? Tinn kakap jah tai.
Ahin lah chunga kon a order ahijeh in ema abol thei aumpo, kangai pen ka u lalboi jong a nam mi mama chunga khut lha dia akigot jeng vang in alung a oi deh poi, ahinlah eba alo ding ham akon ding lheh vang hitan tin phone akoi tai.
Ajing in message ahung in, “boi, ka kon tao ve, ana dam sel in, keijong kadam nai, ahin la emu man lou leh nelou don man lou in kaum in, kagil akel lheh e, epi hileh, lungtup emolso niding vang sumil hih in kin jong kasu mil poi ahin tin,
Kin jong, henge heo, hung loi loi jo kangai je, koi man jong nangma chunga akhut lha da hen hibang chun nangman jong koima chunga nakhut hinlha dan tin, kale thot in hiche chu keini kihou na achai na ahung hitai.
Hiche chu, kahinkhoa, kalungset pen kamcheng kajah na achai na himai tadng hinte, ajing in, avangset thu kajan, tun vang gal gin a Kagin ka chen dinga kagel lou jaan manga jong mat dia kadei lou, kanam mi ten jong achen dia kadei lou vangset na chung nung pen kachunga ahung chu tai.
Kangai e heo hungthou in tin kakap kap kap jong leng eba elo ding ham? Chung mangpa laitan lou ehimaije, lhase hih in, gilkel dang chah a naumding kana phal poi, ahinlah tun vang na sungil kel thu kajan ahin lah oiva man lou in mol pang nalep tai, nei ngai dam in heo,
Chungtoni bon alhang kai leh, jingkho avah teng ahung soh thah kit ji me, agam toiva bon adon thah kit ji me, eding kei lungdei, toidon theilou khulsin nachan hitam? Setlei nadam sung in nkhat beh nom in lai tol jeng jong naleng man poi nei ngai dam in damsung khel naho, Nalai tan thu kana jah ni chun, nalungset kei ma leh sing sung mi te lon lhin achup soh tai, na dam lai thim thu leh nakhut so, vengam lou in nao bang kakap kap e, heo lhase hih in, naloung chung lonlhi twi bang along e.
Phat chomkhat a dinga vaikon nahilou ham? eding ka u ngai kachan lo hitam? Kathoh joupoi gamgil laija lung gel hi, nahung kile kit ding ding kinem a kasan lai lungnem banjal hi kham tan te ti nagel phah lou hel hitam? Nalai tan thu kajh nin amol le lhang phaicham hin pal in lonlhi pum in kahin del lhung e heo, tong nei hin don in hung thou in heo keivang chang in kamong jou poi.
Kasen ngai nahi nahet hilou ham? Eding hibang lom a neiengbol jeng hitam? Hiti khan te tin lungset na kana pen gam poi, lungset jong nang in eihil doh ahi, puldou lhiso jonng nanga kon jeng bou ahi, tun kei epi titang katem? Kumkho a puldou va phungtha bang nei vul jeng hi naki oi mong hinam?
Tunin vang LONLHI MASA a long e heo nalong chunga,
Lonlhi masa, keidin adam joi, hingel kit tem mo khankho hi, naselung lai oi mong naimo.
KASANG NOM POI TIN NOL JONG LENG, EBA KALO DING KIN KALUNGSET E, NGAILUT THIL PEH A NEI GON PEH LEH GOUTHIL LU BANG SANG DING HIMAI TANG E.
