LUNGSET MELIN NALANG JING NALAIYE(Part-II)
–Lelen Kipgen
Kakihei le-le leh kakom’a chun kanu leh kanaonu anatou lhon e. Katahsa ana cheh chuh in kadang achah e. Chuin kanu jah ah “Henu, kadang achah e” kati le twi eidonsah in “Janlhah a chu ipiti nahim? napot doh lam lah akihe pon, napot jong le in majot ding ngaito ji tang” tin eihouse in “henu, nei ngaidam o” tin ngaidam kakithum in ahile chomkhat jouvin in-lam a bu la dingin ache in kei leh kanaonu bou eidalha lhon e.
Doctor ho hung phat, jingkah lam nidan 9.30am vel’in Doctor ho ahung uvin, kakisuh khah na a serious lou jeh chun nilhah lam le kapot thei dingin eiseipeh uvin, kanaonu damdoi la dingin asol uve. Doctor ho che doh jouvin kachangin kana umin ahile Alina ahungin, kiphatlam tah in kakom’ah ahung touve. Chuphat in kei jong kakihei mangin achom lang kave in houpi ding jong kago poi.
ALINA: “Heulen, nakiha suhkhah em?”
ALINA: “Heulen, ibola nei hou lou ham? kei jeh a hichangei nathoh hi nei ngaidam in. Ken kalungset lou jong nahipoi, chapang lungmol akihi jeh in ajo khat leh lhisona, gentheina bep hung hikha ding ham, tia nei lungsetna kasan ngamlou joh ahiye. Heulen, chuchan geiya nei lungset ahile ken jong kahin lungset e”
Kahoupi lou beh phat chun thu aseichai chaiyin akipatdoh tai. “Alina khongaiyin” kati leh ahung kileheiyin “Heulen, jing nilhah leh ground langa kana nga ding nahiye” atin ache peitan ahi. Nilhah lang in Doctor hon discharge eibol tauvin, keiho jong in-lam kahin jon tauve.
A-jing in nilhah hung lhun a Alina toh kimuto ding chu kangahlel lheh jeng e. Sun in kakisutheng in, nilhah lamin matah in ground lang kajontan ahile kana nga ding nahiye, ti-nu sangin kaga lhung masa jo’e. Sot thim kanga jouvin ama jong ahung tai. Ground pam a chun katou lhonin Ball kichem ho kave lhon e. Chomkhat kakihoulim jou lhonin,
ALINA: “Heulen, ichan geiya nei lungset ham? kahet nom e”
KEIMA: “kalungsetna ichangei ham? tia nei doh chu chung’a simseng lou Ahsi ho khu ijat ham? simin, kiti tobang in kagel’e. Alina, lungset kahet patna nahiye, nang tailou lungset dang aneiyin jong neikit taponge”
ALINA: “Heulen, chuchan geiya nei lungset ahileh kakipah’e. Kei dinga jong ka first love nahiye, ken jong nang tailou lungset dang nei taponge. Heulen, eini vang kikhan poite na?”
KEIMA: “um, chun le jo in ipi sei henlang khenna ding thimthu-lel hungtam jong leh ipandet jing ding chuo?”
ALINA: “umm… Heulen, keivang nei hetthem ji lou le numei lunglhom kahin nalung jong kahin-to joulou meithei ahiye”
KEIMA: “mihem koi achamkim kium ding ham? khat le khat ikihet them to jing ding ahi”
Hitichun lungset thimthu kahin-sut lhontan, dongma nei chu kahung hitai. Alina toh lungset hinkho kahin mang lhontan, anom lheh jenge. Kilungset hinkho iman laiya khat leh khat kihomtho tah leh kingailu tah a ihung-um thei lai khu anom lheh jeng e. Kei jong Phai langa kathemjilna banjop dingin kaumtan, kalungset Alina kalhalel lheh jenge. Hijong leh alou theilou ahitah jeh in ngai lheh jong leng kalungset-nu dalha’n kathemjilna mun kahinjon kittai. Nilhah leh Phone in kakihou ji lhonin, lungset thimthu khaobang kasut khom ji lhon’e. Ahinlah melmu louna kumkho asot phat in nopna achamkim tapon, lunghelna’n hinkho kahin mang jing tan ahi.
Kum leh Lha achal in Christmass kon ahitan, Alina jong akho lang’u thinglhang langa Christmass mang dingin a-inko uvin ache tauvin ahi. A-kho’u hi network umlou ahin, network umna a ahung’a aman ahin call lou leh ki-call doh jou ji lou ahi. Thinglhang langa aum vangin Sunday niseh leh ahin call ji’n kakihou ji lhon’e. Sunday nikhat hi akho uva golhang khat, thingnoimi khat in adeichat thu aseiyin kalung anommo lheh e. Ahinlah aman jong lungset dihtah a eilungset ahijeh chun kasonglel pon ahi.
Hitichun kakihou jing lhontan, Christmass leh New year kikah sunday nikhat hin kakihou lhonin, hiche ni’a akamchang nukhah pen chu “Heulen, kan ngaiye!” hiche asei chaiyin network hoilou jeh in kakihou thei lhon tapon ahi. Akit Sunday ni chu New year ahitai. Ahin call kit ding ham, tin kinemin kangah in ahinlah ahin call tapoi. Message tone ahung gin leh kinemin kave ji’n ahinlah kalungset-nu message anahi ji pon, lunggim lungdon nan ka-nilhum tan ahi. Akit Sunday ni’n jong ahin call ding kinemin kangah in ahinlah call ahung deh poi. Network hoilou jeh a ahin call theilou hinte, tin keima leh keima kakilhem lungmong ji’e.
New year jong akichai tan, ahinlah Alina a konin message khatcha jong kamu kha tapon, kalung agim lheh tan, alo-naji lah kahe chom tapon, chuphat in School kaidinga Lamka ahung diu chu kangah kittan ahi. Phatsot thim khat jouvin Lamka langa ahung thu u kaja in kei jong Ccpur kahinjon tai. Ccpur kalhun nilhah in kinemtah in Alina lamto dingin a-in’u kajontan ahi.
A-in u kaphah konin anaonu nehthei-cho dinga dukan ahung chu kamu in, chuin ken jong nehthei kachohpeh in “nao na-u in ibola phone ahin bolkhah lou hitam?” tia kadoh le “ka-u jinei ta chula” tin eidonbut tan ahi. Hitia eidonbut phat chun lhaset nan kadimin, kamit’a konin kamitlhi acham louvin ahung long doh e. Chuphat in inlam kajon in Alina in eibolna kalha ase val’in jalkhun chunga kakap tan ahi. Ajinei ahitah jong leh kamdam o-nem a eivailhah a iti ham? A-kamchang a akitepna kalungin aging jinge, kimaito’a khenlou dia kitepna lungin alang jinge. Lungkhat thakhat a lenkhom lai lungmit lhan alang in, jan khovah in imu theilouvin kakap khovah e.
Aman hitin eibol jong leh, kamchang tah in lhahna thu kisei thei tahih jong leh ponve khat beh in gakivailhah hen, tin ajingin ponve khat kachoiyin a-in u kajontan ahi. Insung kasunglhah le anu anaum in, chuin ken jong ponve kachoi chu kape in
KEIMA: “Heno, hiche ponve hi Alina kalhahna ahi. Aman vailhahna kamchang khat beh jong dalha louva lengdang eisan-san hita jong leh aphung channa ah hung vangpha mei tahen” tin kap pumin kaseiyin ahile ama jong alhisoh in Alina chu ama nop a jinei ahilou dan ho aseiyin, chuleh kei jong eilhamon in, hitichun keijong kahung pot tan ahi.
Kei jong Ccpur kaum tan, akum kit Christmass konin Bazar kache in ahile Old bazar lamlen a khun Alina tobang khat kamu in kathim jui leh Alina ahi chu kahedoh tan ahi. Naosen khat akipoh in ajipa toh kipah tah in bazar akaiyuve. I-lungset pen nu a-ji toh a-cha toh kipahtah a hinkho aman kamu chu ka-lonlhi’n eidonbut e. Hijong leh a-ji a-cha toh kipahtah a hinkho aman thei jeh in kalung among e. Kihetsah ding kanop lou jeh chun kadalha tan ahi.
Alina, hiche thusim hi nangin jong nana sim ding kakinem e! Nunlui hitajong leh chun LUNGSET MELIN NALANG JING NALAIYE!!! Hijong leh tunvang naji nacha toh kipah in nachengkhom tauve. Nalungset pen kamitlhilon na hi hamjangphat nan hin nei meitan. Lhahna thu kamchang tah in lel man hih jong leng, nachunnu koma mitlhi pum a kalel cheng ana sang meiyin o! Jang-gop dia chung Pathen laitan lou himei tahite.
BEITA.
©2020, Lelen Kipgen, All Rights Reserved
