Home L Seikholen Khongsai LIM LE MEL, JAT LE NAM’A KITHET BOL LOU DING

LIM LE MEL, JAT LE NAM’A KITHET BOL LOU DING

38
0

Khankhology Online Textbook

By- L. Seikholen Khongsai,
Pantha Chowk, Srinagar,
August 9, 2022 (Tuesday)

India hi Vannoi chamlhatna lah a alenpen ahi. Hinlah asunga cheng mihem te kikah ah kihet khelna leh kithet bol n hi abei thei pon ahi. Jat le nam, lim le mel, gamkqi leh gamkai, General le OBac, Schedule Caste le Schedule Tribe ho kikah jenga jong kimu neo naleh kimit thipna hohi phat tin in a umjingin ahi. Hiche hin avetsah chu India kivai hom na ah chamlhat na dihtah a um naipoi ti avetsah e. Keima tah in jong New Delhi a hitobnng thilsoh kana toh kha in ahi. Hiche kathil to chu ken jong anilhah mama in kasun doh in “My Diary in Delhi” tin kmminvo e.

MY DIARY IN DELHI

Kum 2007 April chu ahitai. Karol Bagh, New Delhi’ah kana umin, Super Market a nisim 18 April nilhah lang pung thum (3 pm) chun keijong kaloi hotoh Duty napot doh uvin hiche Karol Bagh Super Market Bazar achun duty kabol uve. Kaduty bolna komcha achun Mobile Dukan lentah khat a umin, mi kisaogin lah lah chu kaja in kenjong ka umna konin kaven ahileh nungah mini hin Mobile thah achoh lhon a, hapta khat jong lhinglou laiya Mobile se a complain ahung bol lhon ahichu akinel baotam naova konchun kahedoh tan ahi. Hiche kum May- June lha leh DMC election umding ahijeh in Para-Military Force hochu thaneina le mopohna eikipeu ahi. Keijong akiha nahset diu phat chun Dukan chu kanaiphei jin ahi. Kavet leh nungah teni lim le mel chu ei North-East mi ahiding kagingcha in ahi. Hitichun English le Hindi pao kichopol leuvin akina khulah lah jengun akinel dan uleh akiboi nau chu kavst leh nungah teni chu dih jo in kamutai. Hichun Dukan neipa komah ipi thu ham tia kadoh le Mobile akichoh lhon in aset phat in ahung nungpeh lhon in jijeh a chu kanop lou ahi atitai. Hichu nungah teni komah mobile nachoh nalhon receipt (lekha) chu nachoi lhon em katileh henge atilhon e. Eivetsah lhon in, alekha a kisun dungjui in, One Year Warranty akititan ahi. Hiche dungjui a chu Mobile johten alediuva lom ahitai. Chuphat chun kenjong dukan pakomah, Bhai, na receipt dungjuiya mobile choteni hi sum nald diham, mobile tbah napeh diham khatjo jo nabol ding ahi katileh amapa jong anom tapoi. Asesa ken laponge, he jong kahepha poi tin eidon but e. Chuphat in dan dungjuiya adih kasei ahin nanop le apha nanop louleh aban kabolding ahi katin minute 10 kangah tai. Hiche kahchun nungah teni kahoulim pin, hoija na umlhon ham katileh amanin Manipur mi kahilhon e tin adonbut lhon e. Keijong Manipur mi kahidan kaseipeh lhon leh akipah behseh lhon e. Ipi na natoh lhon ham katileh Nurse Training bola hung kahilhon e atilhone. Aminlhon kadongin Mobile kichoh nuchu Abesana Devi kahi atin aloinu chu Langlenbi Chanu ati lhone. Abesana chu a umna lhani jong lhing loulai ahi. Hichun amanin “Tamo, nahakna khara pangbiyu, natradi, eikhoi ima paba khoina yam thina cheibi gani” atilhon in hichu “Heu, neikithopi lhon louleh kanu kapaten eihouset diu ahi” atilhon ahi. Kenjong dan dungjuiha themmo nahi lhon poi, hithei nante katioeh e. Amonga Delhi lahdunga Kol hohin ei North-east langho hi einoie dan u kidang ahi. Nursing School a payment jong kibol lhing loulai ahijeh chun Abesana chu hiche thilsoh chu anu apa ten ahetdiu akicha lheh in ahi.

Hicbun Dukan neipa komah kache kit in amani sum chu hin lepeh in tin kaseipeh in, Receipt dungjuiya Rs. 11,507/- aleding ahi. Dukanpan jong leponge tin aseitai. Hichun keijong kalung ahangtan, nale louding leh aphai, nommo sahih in tin ka I-Card kaladoh in, kigon Police a iche ding ahi. Khatvei kisei ngai louchu ikivet ding ahi tin kaseitai. Kaloi mi 4 toh dukan neipa leh nungah teni chu kahin puijun Karol Bagh Police Station adin kahin kaijun ahileh amajong ahung kicha tan, “Sir, police ah cheda taute, nasei chu kanom tai ahintin, hichun nungah teni chu sum lesah louva Mobile thah khat apeh dingin kahung kihou lha tauve. Hinlah nungah teni chun Sum mong mong angeh kit lhon tai. Hiphat chun kakithah housah kit un, akihou lhah lou phat un, nungah teni komah, ven hahsa tah a sum jong mobile jong nungmu louding dinmum’a na umlhon ahin ipi hileh Mobile phone thah chu kilah lhon inlang che jeng lhonin. Chuti lou le kei jong kakile nading phat lhingding ahitan neh loutoh natolhon ding ahi tin kaseipeh tai. Hichun Mobile phone kilahdingchu ahung nom lhon in, nah nah in kakihou chai uve. Amanin jong Phone thah chu akilah lhon tai.

Kakomah kipa thu aseilhon in kakikhen tauve. Kaseinom pen chu, gamdanga ipotdoh teng leh thuseidan umchan dan thep ding ngai ahi. Chule inu ipa hetlouva eima deidei bolding kiti jong boina ito khah le alangto a kichatna kidim kiti jong vangset na khat ahi. Lamdih a lam ijot le iboina ajong eikithopi thei Pathenin anakoiji ahi. Amani chu numei chapang ahilhon in keichu ana um hih le sum 10000/- chu mohseh a mang ding ahitai. Hichun insung atoh khah ji ahi.

Hitobang dinmun sanga khoh jo jo hi India sunga phatseh a thilsoh umjing ahi. Kon khat chu seidoh ngam lou thilsoh jong tampi umda lou ahi. Adeh a Kol hohin eiho North East mi hohi eimu neodan u kidang ahi. Kichep nading le daithang ding nou, sum a choh tjo a adei dei uva eibol u, chule bol jing ding eigot u ahi. Eiho jong India Khopi lenlen, Delhi, Mumbai, Kolkata, cbule mundang dang lah a um phabep numei hihen pasal hijongleh sum le pai imu pouleh kahinkho kathu thu tia gel a ahina manthah ding khoh salou jong dimset nalai ahi. Mihem in idei dei a hinkho manthei ahinai, ahin khonunga agui kilhung the, agamkai aloipa apaite hinlho gei ja tongkha thei ding thil ahi teng kigel jep ngai ahi. Langkhat a hitobanga mi muneo na neiho leh mi engbolna nei hojong vangpha deh deh lou ahiuve.

Delhi mama a um Private Co. Neipa Mukesh Khandarwar kiti pa chu mi kiletsah tah khat ahi. Ama co.a natong chu North-east a Manipur nungah khat jong jao ahi. Ahin ama nu chu Khandarwar chun amu nom lou ahi. Nungah Esther vang chu mipha tah le kitah tah chule atohna gunchu tah a tong mi ahi. Assistant Manager pa Sandeel Kulhari chun nungah nu hindan le dignity neitah a hing ahidan ahet ahi. Hijeh chun Sandeep chun toh ding bol ding a umteng ama nu chutoh atoh molso ji lhon ahi. Hinlah Mukesh chun Manipur nungah nu mel amu jongleh lung hang jeng, amitmo na umhih jong leh ahouset a apho pho jeng thei ahi. Nalim jong Chinese ho dan a jingkah lailai leh kama sang sanga um le le hih in tipou chun ahouse tan ahi. Nikhat Mukrsh in Sandeep kom a Project khat sem din ape tan ahi. Sandeep in jong Esther toh project chu aboipi lhon in hoitah achai lhon tai. Project briefing dingin ahin kou tan ahile Sandeep le Esther chu chamber ah alut lhon in ahileh Mukesh in Esther amu chun, “Sandeep, ipidia amanu hi nahin pui ham, het na neilou, alim amel jong India mi toh kilou lou, , puidoh in tin ahin sen tong tan ahi. Sandeep in, Sir, Esther mi miphatah le gunchu tah ahi. Hitia nagel chu nagel khel ahi tia aseipeh vangin nang jong kasei nangai lou pan ham tin ave sal tan ahileh khat pen jong, sory sir….tin apot doh tai.

Sun in ama ho Co. Chu kum nga lhin nikho ahitoh kilhon in nehkhom anei diuvin neh le chah aki order tauve. Mukesh in Esther kom ah, “Esther, nang an neh na ah hung da tan, na room a kahubg thahsah ding ahitai” tin aseipeh in ahi. Esther jong a boss pa sei bang chun atohna office room akon chun pot doh louvin angah tan ahi. Hinlah party anneh na ho chu kkichai tan, mi hojong akikhen gam tauve. Hinlah Esther neh ding ngah a umnu koima neh ding siki man jong ahung thah peh tapon ahi. Sandeep in, “Esther an naneh tam tia adoh le, adonbut in sirpan kahung thah peh diu ahi atin kanga ahi tin adon but e. Hichun Sandeep jong a Boss pa koma achen, sir Esther koma hitia naseija an jong kithah peh louva an nelouva um nalai khu la, aga ti leh, Hett, nonsense, ama ho tobang toh ipida an kine khom ding ham, alim amel jong India mi nahisah ham, mingol nu hibou chu, nalai nakeijin..tin adon but in ahi. Hichun Mukesh in Esther akouvin, hung teh,.. atin amanu jong ipi ham Sir tin alhai jel in ahileh ipi nabol a mi jouse inlanga che jou ta a nangin ipi nabol den ong,,tin ahouse tan ahi. Ading den nalaijin, cha ka order peh diham, najah chalou kiche doh tang, jinga pat Office a nahung tah lou ding ahi tin akham tan ahi. Esther in jong, Sir ipi jeh a kahung lou ding ham, kasuh khel kabol khel ipi um ham tin afong tan ahi. Mukesh injong nei hou ngam nah lai ham, jibga pat anlim namel jong nei kimusah hih in, nahung lou ding kati le nahubg lou ding tin ahouse kit tan ahi.

Hichun, Esther jong lungthim nommo tah in akaiku in, ok Sir,,tin inlam ahung kile tan ahi. Ajingin Esther jong a in ah a um in inlanga a insung mite akinep piu toh ama natoh na kisuh lou toh agel le alungthim anom mo val in anjong ane tapon ahi. Office a amel akimu lou phat in Sandeep in Esther a call in adoh le, sir pan hublng talou dia asei chu aseipeh tan ahi. Sandeep injong nommo asa lheh in hinlah bol thei ima jong anei chom pon ahi. Hiche nikho chun Mukesh Office a um laitah in a call ahung in avet London a um achapa Ravindra Khandarwar ahitan ahi. Acha pa chun kap lha pum pum in, ahinnhoupi in, hepa ka umna gam ah ka umnom tapoi neihung pui doh tan kagen thei val e tin ahinseipeh tan ahi. Apa chun, boi ipi itia ong, lung lentah in pangin lang course nachai vah ding ahitai atipeh in ahi. Hinlah achapa chun, ahipoi hepa, Londan ka umna Hostel a agam neiten, einoise val uvin, mivom, Indian, mipha lou, nang tobang ipi nakijil doh ding ham tin niseh in class a jong eilut sah pouvin eithet bol un, ka umsot le kathi ding ahitai ati phat chun apa jong athip chet in chom khat akigel tan ahi. Hitia akigel laitah chun Janhi langa Esther ahouset naho leh amuda na, anoise na kamcheng alha ho jouse chu alungah ahung kilang tan ahileh, bolkhel akisa maman ahi. Hichun achapa kom ah henge Boi, jinga din Fkight ticket kahinkah a nahung ding ahitai tin akilha doh lhon tai.

Hichun Mukesh in jong Sandeep chu Office ah akou lut in, jingle Esther chu kou tei tei in kaseipeh nom a um e tin asei tai. Sandeep injong henge sir tin Esther chu a call in, jinga hung din atem in ahi. Ajingin Esther jong Offixe ah ahung tan ahi. Mukesh in office ah akou lut in, akom ah abol khel naho, amuda naho jouse le ahouset naho jouse ngaidam akithum in, ama Co.a atoh jon jing din atem in ahi. Esther in adon but in, Sir, nang le nang nathemmo na nkkihet kal a thupi ding a umpoi. Ahin ken vang na com. A kathoh thei tah lou ding ahi tin asei tan ahi. Mukesh in avel in atem kit in atao tho tan ahi. Hinlah Esther jong sir, nommo sahih in, tunia pat a avel a na Office kiti kachot lut tah lou ding ahi tin ahung doh tan ahi.

Hijeh a chu mihem kiti hin itoh ibol jouse aga chu eima man kine ahi. Mukesh injong ama Coy.a anoija natong ho anoise a jat le nam , lim le mel a avet a athet bol banga ama cbunga jong chu chet a athoh lel kei ahi. Pathen in mihem hina kibanga eisem u ahin imihem chanpi muneo leh demset taitom kiti hi bol lou ding ahi. Hiche toh kilhon in ahithei leh Nam sunga mihao ho, sum le pai nei hon khangthah ho natoh nathei gamsunga itun doh uva self employees type a atoh nadiu ihol peh diu hi khonung geija dia thilpha hiding ahi.

©️ copyright: Hiche articles hi asunpa phalna bei a mundang a publish louding in temna ahung kinei in ahi.

Articles hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Thusimbu mobile app ki install nom hon Google playstore a “thusimbu” tia search nabol u le namu lei diu ahi.

Previous articleKEI HOTEL AH KALHUNG NGAI POI
Next articleVacha hinkho akon kihilna

LEAVE A REPLY

Please enter your comment!
Please enter your name here