Home Kuki Black Day Story LHUMLAM MOLSANG KHO KIBULU THUSIM

LHUMLAM MOLSANG KHO KIBULU THUSIM

294
0

1992 KUMHEI GOLNOP :

Phat in koima anga lou dingjui in 1992 Christmas chu ahung lhung tan, khosung’a chapang ho chun vonthah ahin ki von’un kholai dung’a thanom tahin alhai lele jengun ahi. Nisim 24 ni ahitan Programme akipan in houin kai lenkhom nomtah in amang un 24 jan nidan 12 in vannoi huhhingpu apengtai tin phondohna thanom tah in anei jun ahi. Jing kho avah masang’in nungah gollhang hon Inchot abolun, thanom tah in Pakai pen lemnan la asaovin akiphalna kham kham u atoh un ahi.

Hiti chun Kumlui Kumthah houin kaina hihen lenkhom bolna hijongleh lathah bu a No.89 kumle lha akem jing’e tila hi asachim thei pouvin, khonunga ipin ahin phah diu jong gelphalou vin nomtah leh lhim tah in kumhei amang chai taovin ahi. Kum hei lai hin Pu Paogin in thupi asei tengleh Phatbei ding thubou aseinomin mipin jong lunglut um asa lheh jiuve.

Kumbul ahung kipat toh kilhon’in kumbul aki thing pan kittan ahi, hiti hin L.Molsang kho miten jong kumdang’a bang’in lou mun ding akivet nun lou avat pan kit taovin ahi. Nungah Gollhang hon Loom akai jun akilom un khonung’a thil ipi hung lhung ding ham? ti jong gelpha louvin nomtah in louna atong pantao vin ahi. Loi khat ma chun sumki lolo a Dam LOKTAK ho gavet ding tin kum lhun ding ngah lel’a jong aum dapon ahi.Hiti hin Louvat mangse betu achai un phatleh nikho ahung kikhel dung jui in lou lhou mite a dingin nople dathu um louva go adou pat kit nadiu phat ahung lhung kit tai.

Phatle ni ahung kikhel in Nipi chuh lai ahung kipan tan Gon chimtih anei theitapon, ahin loulhou miten kumlhun a aga loding kinep na lentah nei pumin gonoi dai noiya thase lou hellin atong jing taove.

Nisim 23 August 1993

GAL THANGKOU

Changpal jong ahung min tan, changgei jong adoh sao sao jeng tan goju hen daikai hen lang aphat dung jui in nisa kimu talou in gon chim tih nei louvin ju jongle kho miten vang kum lhun’a tohga khop tup ding tha nopna jallin thanom tah in ahah sai tilouvin thanom tah in atong jing’ui.

Hiti akipah le thanom a kum lhun ding ngah lel’a kho hepha louva lungmong tah a aum lai tah un Nisim 23 Aug. 1993 nin Pu Lamkholen hi Parlong kiti kho (Milong) kho aga chen ahile aga che na pa chun hiti hi ahin seipeh in ahi.

“Nangin tuni kadamlouna a neijen damin, masang lai Mizo gal lai chun, keihi na khouva V.O. pu Thangmang chun kathi na ding’a kon’a eina huhdoh ahin, ken jong tunia hi athi nading’a konna kahuhdoh ding (ahin’a ding kaseipeh) angai tai, ati. Ajeh chu Naga thingnoimi hon nisim 25-30 Aug. 1993 sunga Tamei Area Kuki kho ho suhmang teitei ding toh gon anei taove. Haosa holeh mipi iti kakham vangun kakham jou tapouve, hijeh chun V.O. pu Thangmang chun ahin na thei lampi ana kingai to tahen” tin gam tin thu ahin hil tan ahi.

Hichi thu hi Pu Lamkholen In ahung le lhun lhun chun Pu Thangmang leh khosung Haosa ho ahetsah tan ahi.

Nilhah kho mite loulhou thachol tah cheh in In lam lungmong tah in ahin jon taove. Mijousen natoh thachol jeh in Nilhah ja an jouva kho miten lung mong tah a kichol do ding angai to lai tah un Mike ahung gingin ajapha chanin, ipi thuhija tutah a mike alhao hija, tia aki houlim chelchul’un, ipi thu asei got u hija, tia angai lhih keo utoh kilhonin mike chu Full a alhao hin tin echo sound bangin Haloo ati le akitol jung jung jengin ahi. Lonjang gam geijin akitol jenge…… Mipi ten ipi thu hita a tia angai lhih lai tah un, Authority ho lah a kholhang sampa pu Khaimang’in themtah in ahin sam tan ahi.

“Hallo Hallo khosung mite jousen naum nao mun cheh a phate chan ana ngai jun tunilhah leh oja pu Pa Haopu te in na khosung mi Pasal kum 15 apat achunglam se ateh akhang iki khop dingu ahi koima ahunglou um theilou ding ahi, tuapat minute 15 sungin hung kikhom loijun, koima ahunglou um theilou ding ahi, iseidiu hi thukhoh tah ahitai. Halloo Halloo hungloi jun hung loijun, ahin kikhop na a hung jaolou ding nu naochapang ho jong naum nao mun cheh a um thim beh un koima pampot hih un, naum nao mun cheh a umthim beh un. Ahung ding’a kikouho hungloi jun hung loijun kakipah e.” tin hiti hin ahin sam’in ahile gimnei tah a thu ahin sei chun kho mipi akhopumpi chun akithing jeng tan ahi. Kikhom dinga kikou ho jong kholhang sampan asap chai kah in akikhom kim taove.

Akikhop kim kim un kihouna apan paingal un ahi. Thil um dan leh athu chu thu hinpo pa Pu Lamkholen a kon’in mipin ngai lhah na aneijun athu um dan ahe soh un mipin kiven na ding toh gon anei pai ngal un ahi.

MOLSANG DEFENCE COMMITTEE : Kiven na ding’in committe khat akisemin, hichu MDC (Moulsang Deference Committe) tin amin vouve, Chairman dingin Pu Haopu alhen doh taove. Chule Duty ding jong group ni in, akhen un Comander ding in Mr. Sehmang leh Mr.Khaikhohen a ki lhengdoh tan ahi.

Adang ki lol na hochu:-

1. Duty post sem ding

2. Ijem tia thu ahung so jengtah a ahijong leh otdoh a go lhadohna ding gamnoija camp sah ding,

3. Khosunga meipum neijousen M.D.C ho khutna apeh lut cheh diu hichu khole veng ven na a manding ahi.

4. Khojet khovei ja Kuki umho thu kija leh thil umdan hetsah ding chua che ding chun mi tah sandom tahsan thei mi angaijeh in Even. Thangmang phatsah ahi.

5. Meilou mei chang sem ding asem dingin Duty Commander leh M.D.C mopoh na peh ahi.

6. Thil le lo seldoh thei chan seldoh ding.

Hitihin kilol na det tah le chelha tei ding toh gon akinei tai. Chuleh kilolnaho leh thu kija ho insung cheh a sei a kiging cheh a um ding tin jan nidan baro velin umna mun cheh a limgeh cheh a um ding tin akikhen jah un Nilhah dang bang louin Pakai in kichol dona dia asem jan muthim satah noija akichol do taove.

PAN MUN KIKHO :

24/8/1993 Jingkah kho ahungvah tolhon in Pasal jouse kihou na dungjui jin, kihou lhah na ho leh thilsoh ho chu a Insung a Insung cheh a nunao chapang ho seipeh ahi cheh tauvin, koimacha louvai kon ding gela jong aki umthei tapon ahi. Phachom ngai akilo se jep ho vang loulam jon jong aum nalai uve.

Jing an nehjouvin, Defence Committee Chairman pu in sahlang leitol chu pasal jouse akikim tan, tohvai anoiya bang hin akiki hom tai.

1. Gamlah a guhthim Camp sah dingloi

2. Guhthim lampi sat dingloi

3. Camp a khuding joulanga Twipon laloi

4. Meilou meichang semloi

5. Panmun (Duty post) semloi

6. Thalpi thalchang semloi

7. Khodanga thusep a cheloi

hiti hin aloi aloi jin tohding leh atongding gontoh ahi to lhonin, atoh mun dingcheh akijot un natoh akipan ngal tai.

Khosunga meipum akidong khomin ahileh Kartoos – 20, Double Barrel – 1, 303 Rifle -2 dondoh ahin, hiche hin khosung gollhang thahat laiho akihop lhinglou jeh chun thalpi thalchang jong phachompi asem uve.

Nilhah in aloi aloi jin, Khosung upa naolhang thahat lai ho leh Gollhang jouse chu Duty post mun 5 tobang sem ahin, Hiche duty post khat a chun mi 5/6 cheh in meipum thalpi kichoi jin, kho sunga nunao chapangho lungmonga kicholdo thei nadingin angah tup taove.

LUNGSET UM MINU HO :

Sun ahi pet chun mipi lunggel chu kichat na aumbeh hih nan, hinlah nilhang kai lam ahung hiphat chun Nupi hon ama in chu lungmon na theiya agellou jeh un, asopi dom apa te dol leh amonpi dom adeh a kholai lam adel saosao jengun, Janpon, ponvai akipoh un aki pel metmu jengun, lunggim na kichat nan, nunao chapang lungsung alodim tan ahi.

Hiche phat laihi Lhajing lha ahi toh kilhon chun chuhgo chun chimtih neilouvin khosung aumpijingin, ni mel lhamel mu in aum tapon, nisa leh lha jengin jong khomi pi te genthei na chu amu ngamlou hitante.

Sun le jan umlou vin, Pathen henga taopumin upa naolhang leh gollhang thahat lai jousen cholngah tih umlou vin khopi chu angah un, mipi adeh a nunao chapangho lungmong lhamong a umsah tei nadin, kho sung achon leng jengun ahi. Duty poho thachol dam nadingin nungah hon cha a omun, kolbu changmai asem un Duty po gollhang ho chu ahu un, akithopi un ahi.

27th August, 1993

KHO KIBULU :

Nikho ahungchalin, akiginmo bang ngeiun Nisim 27th August, 1993 jingkah lam nidan 7 velin, melma ho chun khosung ahin bulu taovin, In ahin halun, Lentol (ground) a mi amat khom houchu alom alomin akankhom un ahi. Hetding khat chu; Khoilammol kiti munhi Naga ho toh gamgi ahin, hiche muna hi Duty ding loikhat um ahiuvin, jingkah danga chu akheldingho amuna cheuva kikhel jiu ahin, hiche jingkah khelkhel chun, duty poho joh chun a duty post u ahin dalhah uva Inlam ahin jot u ahi. Amaho nungnung chu ahin jui u hitantin, Duty po hon Ina avon u agah kikhel uleh hunglhung pai ah ahi taove.

Hiche jingkah chun Duty post tina Duty po umjong leh Naga ho hung tolso nalanga Duty poho chu mi 8 ahiuvin, ama ho hi ahiuve.

1. Paosei 2. Paogin 3. Sehsat

4. Thonglal 5. Khaimang 6 Paolen

7. Lhunkhao 8. Haoseh

Khosung numei chapangho chu; guhthim lampi a chun ajamun, kiseldoh na ding camp mun chu alhung taove. Hinlah pasal atamjo alhung tapon, chu leh numei chapang phabep jong alhungsoh hih lai uve. Akihenho lah a upa khat Pu Vuhkho chu akhut ahung kilhap phat chun milah a kon chun ajam tan ahi. Hiche ajamphat chun a kihenho lah chu melma hon akap un, ahi leh athon in, hichun avella ahin kap kit u leh aphengin alhu taove. Hichun melma ho chu akideldel bangin atuhsao vin, khosung dalhan athi jam taove. Khosung chu meibol satah in atomchah kheh in, lungthim leh tahsa jong lungjin nan atomchah kheh tai. Meipum a ahin kap u chun, Pu Paosei hi akapkhao vin, alengpai pai in Gl. Kaikam chunga achu kit in, ahi leh aki kan khompi hou toh lhukhomah ahi tauve. Akisukha teni hi Pu Jampu te gophung noiya kicha pumin akipolut in, chomkhat jouvin Pu Janglun In ah polut ahi tai. Khosunga umsot thei ahi lou jeh in guhthim Camp langa apophei un, chu leh nunao chapang kicha a moh jamjam ho jong ahin holkhomkhom un, nilhah langtah in akisu khom taove. Kiginna a anchang khopam a ana koidoh hou chu ahin dongkhom un ahi leh Kg.200 valbep ahi tan, hichu khothingin khou nibep a aneidiu ahi phat in, upa hon lung ahin gelun, changchim (Changnoi) a ahonun chapangho se anehsah un, pilhing domsen hiche jan chun an ane tapouve.

Jankhovah in kap le mao pumin, Gonoi dainoi a chun akhothingun aum taovin, kigin na maimai a kisa ahi jeh chun khothing umna dingchun camp chu aneo phat in, khosunga Tin aga kipulhan, camp chu aki sah bebe jengin ahi. Lupna thei dinga semdoh ahilou jeh chun chapang alouthei lou sese ding chun lupna aki sempeh in, mipi chu atoutouna mun a ihmutsoh ho ihmu ding himai, atamjo vang a ihmu tapouve. Jan khangkim go hajuh a ahung juh jeh chun lhanghoh twi ahungsoh tan, chapang ihmu ho chu ahin lonkhum kit tan ahileh hiche pet tah chun nungah gollhang hon chapang khatcheh in akipom un, chapangho ka le pengin chu gammang sung athong jenge. Hiti chun ajing nikhon, gollhang ho ventup nanoiya nupiho leh nungah hon loulai a kolbu changmai aga pouvin, anchang umsun chu selsa leh vohsa bongsa toh anoijin akihon un, ansel neloi changchim neloi chuleh chapang ho vang chu bugum aki honpeh jinge.

Thusep a che ho :

Hiche thusep a cheho Pu Lhunkai, Pu Khaihen chuleh Pu Sehmang ahiuvin, Milongho toh ahung kitoh khadeh chet un, ajam cheh un, kidang tah in munkhat ah akisu khom kit un, hichun thusep a cheloi, chuleh Inlanga thu hunglhut kit loi aum taove. Hiche akito pi hou milongho hi Selsi kho haldingho hidan u ahiye.

Khomipi hin kela thiding akihi phat in upa hon vai ahinsom un, Selsi Phailei buh a Pu Lunlam Lhanghal Anchang bag phabep umchu ahin geldoh un, pod ding ahin ngaito tauve. Hiche mun hi Milong kho toh kinaicha ahin, gamoh lhai lhai a gapoh jengthei ahi lou jeh chun Pasal hangsan phabep daivei in ache masao vin, hichun pasal phabep in aneipa koma thumji aum tah lou jeh chun, acheovin aga mohpoh jeng taovin ahi. Hiche a hin anchang bag 8 aga podoh un, chomcha kihin so nan akineijin ahi. Khonung in anei pa hetlouva kipo ahi jeh in aneipa koma asei un, aman jong ana kipen ahi. Molsang gamkon ho dinga Pu Lunlam Lhanghal hi suhmil theihoi ahi poi.

POLICE HON AHUNG VIL’U:

Nikho ahungchalin, nisim 2 September nikho chun Police ho ahungun, khosung ahung velhaovin ahi. Hiche ni chun gamlah Camp a kon in khothing chu khosunga alelut kit un, police ho chun akisukha teni chu jen dingin apodoh taove. Anchang umkham kham chu Committe ho khut a koi ahin, a Inson in aneh khamkham diu aga kisantho un, In kihalmoh umsun sun a chun aumkhom un maban iti ding ham ti lunggel mumal aneithei tapouve. Hinlah alouthei louvin nilhah seh leh Haosa upa ho akihou khom jiuve. Loikhat in “kapenna thinglhang gam dalha ponge” atiuvin, loikhat in “Kuki ihi jeh uva eiki nodoh u ahin, i um uleh ithigam diu ahi” tin kinel na chu ana umtai.

Hiphat chun hutni tichu Date 3.9.93 leh 4.9.93 teni nikho hin ngai um leh lhah lel umtah Pen nagam Molsang leh gancha neile gou tamtah hinkho a neh senglou gam nomtah chu ahin kidalha tai.

GOOD BYE LHUMLAM MOULSANG

Previous articleSAHNIT-Lhalam 13.
Next articleLUNGSET HI HITIA UMJI HAM???