By Shonkhogin (Hegin) Haokip
Maranatha Cottage Hebron Veng
Phaipijang Langol Imphal West
9774096152
Ajehchu nangman Pakai chu kiselnan nanei jin, Hatchungnung chu chennan naneitai. Hijeh a chu nachunga thilse hunglhung lou ding, natna hise langhon jong nachenna ponbuh jong hinpha ponte.
Psalm.91:9-10
Tulai khang adeh a hiche Corona virus natna hise ahung lhun kalse jonghi, hiche bible chang hin mi tamtah lungmona le kipana apeh ding ka tahsan in, amavang eiho hi achangdinga lom ihiu hinam hilouham ti geltoh mi alhome. Hitabang nikho dinga hi Pathenin amite achate ana sut sah jong hidingin katahsane. Ajehchu Bible in Genthei nikhon keima neihin kou vin, keiman nahuhdoh ing ting nanghon kalou pina naphondoh diu ahi ati. Psalm 50:15.
Hiche bible chang kineppia a ahi dingdolla phatthei bohna mujoulou ding jong tamtah umdin katahsane. Ajehchu Pathen thu kisun jousehi mijouse dinga kisun ahi nah vangin, achang dinga lomhon bou phatthei bohna a aneipiuva, achangdinga lomlou hon aphatchompih dehji pouve. Hijeh a chu, promise khat ahilouleh phattheiboh channa muding khat aumphat leh amu dinga lom kahi hinam kahi hilouham tihi khol chet angaiji e. Achangdinga lomlou kiti chu, Pathen in sihnei lang anei ahipoi. Achang ding mipa minu kigot le kigot louvin apoh ahi. Mi khat in hiche phatthei bohnaho amoh nga-nga chu vangset umtah ahi.
Hitabang banga chu, Vangam lutna dinga thu tepsa aumjeng vangin aluttheina dinga angaiho chu nanei hitam nanei loulai ham tihi phatecha a kholchil angaiye. Achu ti louleh Pakai Jesun vannoi mite chonset jeh a thi ahi, timana amijou se mot lut thei ahipoi ti hetchet angaije. Achuti leh, vangam lut theina dinga Penthahna dihtah nanei hitam ? Napenthah tah ahileh pengthah cha hina dungjuija hinkho na man hinam ahilouleh napenthah maimai ham ? Nungah som thulema chun, nungah ngaho chu alut thei tapouve. Ipi jeh a lutthei lou uham ? thaomei aneilou jeh uham ahilou leh ipi mitoh akibah lounao umham ? thiljouse akibang soh keijin, nungah ngaho chun, athaomei sunguva thaotwi ana umpoi. Hijeha chu, nga-ho chu lutthei lou ahitaove, tunia jong Pakai ingakhom dingu ahin, ahinla asunga lhagaotheng cheng louho jouse chu dalhah a um diu ahi.
Hijehchun, sopiteho, Pathen thun, nachunga thilse hunglhung louding, natna hise langhon jong naponbuh hin pha ponte atihi ijaothei diu hinam? Hichehohi koima anasa dehset jong ahipouve, amahohi Pathenin mi chonse nahiuve atidung juija achonsetna kihet doh a, achonsetna ho jouse kisihpia nungbol kit taloudinga Pakai koma thichangeija anung jui dinga Pathena kipedoh ho, chuleh aseidungjuija anatoh a podoh ho ahiu ve. Ajehchu, James 2:26 a Lhagao beija tahsa athisa ahibanga, Natoh beija tahsan chu athisa ahi ati . Ipenthah naohin na atohthei angaijin ahi. Kahingtai iti dunghjuijuva ahingho chun ahing na atohdiu angaiye. Bible in Amatoh kiloi kahi itiuva muthima ivale vanguleh thujousei ihiu ahi ati, ajeh chu Pathen chu Vah ahin, ama a chu muthim him him umlou ahi . Pathenin asimho jouse phatthei bohtahen.
Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.
