Home L Seikholen Khongsai LEITHANG AHILOULEH TAMTHANG

LEITHANG AHILOULEH TAMTHANG

48
0
LEITHANG AHILOULEH TAMTHANG
LEITHANG AHILOULEH TAMTHANG

Khankhology Online Textbook

By- L. Seikholen Khongsai,
Tuibong Churachandpur, Manipur
30/07/2022), Saturday

Hiche lima kimu chapang pan Jucha tampi apohna hi Kuki te thaang lah a jat khat ahi. Thang kiti hi lhangpi min (comman name) ahin Thang lah jong jat tampi alen aneo um ahi. Kuki ten Thang kamdan anei hi gah min phah thei dingin

  1. Sakhi thang
  2. Salei thang
  3. Pelthang/Mankhong/thingbongthang
  4. Leithang/Tamthang
  5. Bulong thang
  6. Sachep thang
  7. Mechang thang
  8. Thomthang
  9. Thihthang
  10. Vuithang
  11. Kolbem thang
  12. Ngakoi thang
  13. Twithang
  14. Vaithang
  15. Len thang
  16. Bom chule adang dang inei uve.

Hiche ho lah a chun tunia isei diu hi Leithang ahilouleh kon khat in Tamthang jong atiuvin tehse kon khat vang chun Galngam Thang tin jong aheuve. Hiche thang hi Sa len len ona thei leh pohna thei thang chu ahipoi. Ahin Jucha le Julei ho o-na thei ding kisem thang ahi. Hiche thang hi poh le le thei ahi. Athal pou le akolka hi Go a kisem ahi. Abul lama khu akolka kisem peh a, aleh lama thalpouva hi athal gui akhao kikhit a, apou le akolka kigom ahi. Akolka a khu avaikam neo khat le ajangkam kisuto a ikai kun a ajangkmm ikam a avai kam khu Jucha le Julei hung lut a atoh khah le kipel jeng thei dinga kikam peh ahi.

Hitia akikam chai teng le Jucha Joi lah dunga kikho khum a kikam ji ahi. Hitia chu Jucha hochu ahung va le tengu leh thang ko sunga ahung lut a, avaikam dou asuh khah teng leh ajangkam a kona avaikam kipel doh a, akol kapou chun athang gui aloisal a hitia chu Jucha ho chu ohden pai pai jiu ahi. Tol a jucha joi ho a kikam banga Thinglong chunga jong kikam thei thang ahi.

Hiche Tamthang tia kihe thang hi kon khat in leithang tin aheuvin kon khat in Galngam thang tinjong aheuve. Ajeh chu Kuki te thusim lui (Folktale) ah Pu Galngam kiti khat ana umin ahi. Pu Galngam lal laichun ama hin thusim tampi ananeijin ahi. Twivai Tuilong vadunga hin Bom ana do ji in, Bom ahin vet chaitwng leh hiche langa kon khun Twikang (Loktak Lake) ah Nga changin ahung ji in Inlanga jing-an aledel ji e akiti. Hitia Twilong Twivai langa kona Twikang lang ahung jiteng leh Galngam Ngahmun kiti tua Ningtjiching/Tuikong gama Molchunga khu kicholdo paji ahi. Galngam Ngahmun a Songtum lentah tah jong Tuilong Tuivai langa kona a-Sakhaova ahin poh ji a Ngam mun a hi lukhap a neidinga ahin kipoh ji ahi tin akisei inahi. Ama chu Doithem le thuthem ahijeh a Sakhaova Sailumchang banga ahin poh ji a, amun alhun a akho lhah teng le Songpi chu songpi kisoh kit ji ahi. Hitia Twikang ahung phah jiteng leh Gun dunga Leithang akam jiho chu ave suh peh ji in ahileh Juthal le Julei tampi pi an po ji in ahi tin thusim ah an kiseijin ahi. Pu Galngam chun Gun vadung galkai nathei ding chun Thingphung lentah tah aphuh in, vadung gal lang khat a kona gal khat gal kai nathei chun alhuhsah ji in vadung chunga chun thinglong akijam sah jin ahi. Hiche thinglong ho a chu gamsa le ju le va ten galkai na a anei jiu ahi. Vadunga Ju le va galkai nathei Thinglong chung ho a chu Leithang ahilouleh Tamthang hi anakam ji leh Juthal, Julei chule Sangat le Ailai ho ana oh ji a, Paipeh dimset set a ahin kipoh ji ahi. Tua eihon Leithang ahilouleh Tamthang tia ikam houhi neocha cha hiding dan ahitai. Ahin Pu Galngam thang kam ho vang chu eiho a sanga len jo ahi jeh a chu Juthal hole Ailai ho kisan joh oh thei ahi. Pu Galngam injong hiche thang anakam khah jeh a tehse konkhat chu hiche thang hi Galngam thang tia seijong an um dan ahi. Chule Leithang tia kisei lona hi ibet leh Vadung chunga thinglong kijam a, ju le va ten galkaina a anei nao thinglong chu Lei tobang ahijeh a, hiche chunga kikam thaang khat ahijeh a Leithang tia seiloi jong ana um ahi. Ipi chu hileh thang tamtah um hohi ivet leh ganhing ju le va, ama ama o-natheija Thang kisem ahi jeh a thang min jong achom cheh um ahi tichu inahet them diu ahi.

Thang tamtah umjongleh tunia Tamthang/Leithang chungchanga chomcha inahoulim u ahi. Kakipah e.

©️ copyright: Hiche articles hi asunpa phalna bei a mundang a publish louding in temna ahung kinei in ahi.

Articles hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Thusimbu mobile app ki install nom hon Google playstore a “thusimbu” tia search nabol u le namu lei diu ahi.

Previous articleSINKHUP
Next articleSITWI LEH SIHTWI or TWI PI

LEAVE A REPLY

Please enter your comment!
Please enter your name here