Home Crosby Haokip LEISET NOP MANG JONGLEH CHRISTA KANEIYE

LEISET NOP MANG JONGLEH CHRISTA KANEIYE

16
0

Published by Thusimbu

Crosby HaokipConvenor KWC

Heart touching moral story

Pathen lungset jalin damsel in 2013 in Class 12 kahin chaitan ahi. Lekha them hih jongleng lekha sima kalunglut jehin kanu in maban a Degree course kasim thei na ding lampi eigon pehin CCPUR College a kahung kaitan ahi. Insunga mipa umlou ahijehin kanu in kalekhasim na ding in sumle pai aholin genthei tahin hinkho amange. Hijongle keihet din vang genthei lou bangin aume (oh! minun acha angailut vang hi asang nalom lom jie).

Class 10 kasim kum 2010 April 14 nia chu kapan eina dalhah uva hiche nia pat a chu kanun kalekhasim ban jom thei na dinga genthei tah a Tuibong Bazaar a mi second hand von ajoh son a nikhat le nikho tha 100/- bou alo ji ahi. Hijongle kanu vang leiset gentheina ho jehin alungneo pon Pathen jenga bou akingaiyin niseh a College kache kon seh le taona eiman peh jin College a kona a kahung kile a in kalhun teng jongleh Pathen koma kipa thu aseijin ahi. Hichan a kanun tahsa le lhagaova eina puihoi vangin mivangse keiman kana hethem jipoi. Niseh a loile pai hotoh bou kivop a nungah hel a che che ding bou chu keima thanop na anahin ahi. Jingkah le College che ding bangin kaum jin ahin College che talouvin kaloi hotoh Tuibong Khopi Venga nungah helin kache jiuvin ahi. In kalhun tengle kanun eina lamto jin, “Boi nahung kile hitam,” tin eikoiyin Pathen koma kipathu aseijin ahi. Ahinlah guhthimin kanui jin ahi. Hiti chun kanun eingailutna ho kana hepon ahi. Hitia school kailouva kahung um phat in college langa ka dinmun ana boitan ahi.

Nikhat jong hi kabol ngei bang uvin College kaidin kakilep uvin kaloi hotoh keiya dingin Tuinom ah nungah helin kache tauvin ahi. Kaphat mo lheh vang in kanun Pathen ahet a aphatna ho jehin kaloi hon eingaisang uvin nungah phatah Zia toh kihousah din eigong tauvin ahile kajah achan kanom pon, ahinlah kaloi hon force in eikimuto sah tauve. Zia vang mipha tah le khankho hethem numei phatah ahijehin kalung gel ahethem in kajah, “Heu nahinkho thusim neisei peh o,” atin ken jong kaki gel gel vangin sei ding kahe tapoi. Ken jong chuphat in, “Nao nang hinkho thusim joh hinsei masa o. Lady first,” katin ahile anuiyin eihin son in ahinlah amit a konin lonlhi ahung long dohin ahile nommo kasan, “Nao ibola nalhiso ham nagenthei na ho kahet thei ding ham?” katile aman jong, “Heu, kei hinkho vang leiset a atepi ding ima aumpoi. Kanu le kapa aumtapon, chihna thepna iti le la sumle paiya eikithopi ding koima kanei loujehin lekha kasim tapoi. Hinkho genthei tah mang a kaloi le kapai sille chen otcha bouva hinkho mang kahi bouve. Ken jong kahin lungset e, hijongleh kahina kakivet leh kakisong lel e. Hijongle imalam hinkho lhon Pakai koma pelut hite. Keima vang migenthei kahiye, hijongle kalungset na hohi Christa lampi toh kitoh in nisehin kilhandoh jing nange. Nang jong Pakai koma tao jing in lang hung pangdet jingin,” atin ahile kei jong kakipah valin sei ding kahe vah tapoi. Athusei thep dan hole Pathen a akingaidan ho kagelle kanu lunglheina thei ahiding katahsan in ahi.


Chu jouvin ken jong kadaiyin totna ho kasei le ahung nui doh nah nah in, “Heu koi koi toh naum khom ham? Henu leh hepa dam hinam? Kamu nome. Nalungset nalom lom lhon in tena,” tin eihin daiyin ken jong, “Henge eilungset nai ahivangin hepa aumtapoi,” kati chun ahung kaiku in, “Ahile koiyin hichan geiya school nahin kaisah hinam?” atin ken jong kanun eihin boipi dan ho chu kasei se leh kahung khangdohin kanun hibanga eingailua kei ama deilou lama kachon ho kagelle na kasa valin kalhi ahungsoh mantai. Kanu koma che a ngaidam kithum dingbou kageltai. Ahinlah kalhiso Zia kahet sah nomlou jehin thu imasei be louvin Zia jah a, “Nao henun eingahlel tante, kei che phei tange,” katin ka-phone no kadalhah pehin kaloi ho jong hetsah louvin mitlhi long pum² in kain u kahindel tai.

In kalhun in kot a, “Henu” tia kakou le kanun, “Boi, nahung kile hitam? Itia tuni nahung kima le e,” atin ken jong kanu kakoiyin kap pum in, “Henu, neingaidam o. Nacha keima nadei lou lou thil kana bole. Henu, kahin sugenthei nalom lom e o. Henu, nacha keima school kaiyin kache poe,” katile kanun, “Boi, thiljouse kahe them soh keiye. School nache lou jong kahe nai. Hijongle nang kipana ding lampi ahipou le kahin phoh nompoi. Hijongle school kaiya nache kon le sun nilhum lhum in nangdin taona kamang jie. Pakai kachapa hinkho na kikhelsah jehin kakipah-e,” atin kanu jong akipah behsehin maicham kasem lhon in kanu koma kabolkhel jouse ngaidam kathumin aman jong eitilkhou-vin keini din hiche ni chu revival lhun ni ahitai. Hiche nia patin leiset thil jouse kanungsun in penthahna kahin neitai. Chujongle Christa dia kahinkho kikhelsah Zia jong kalungset lheh jenge. Chuphat in kahung penthah dan ho ban neichan Zia toh kakihoulim na ho kasei le kanu akipah lheh jenge.

Keima kamit moa kanuthu kangailou vangin kanun eilungset in eihouse khapon phaten maicham ah eihil jingin eitao peh jingin ahi.
Kalhiso ding jong aphal pon, kanu banga eilungset ding koima umponte. Hijongle keiman kana hephapoi.

Phat le nikho ahung chalin 2017 kum lhun in kanu ahung ha dammo phat in District Hospital ah kapolut un anatna asan jehin alel lheh jenge. Kanun Zia amunom lheh e. Kanu damlou dan ho kasei peh le Zia jong ahung in kanun, “Boi, naloinu chu ham? Boi, hung kikhin naiyo. Boi nang jeh a kachapan hinkho kikhelna anei ahi. Nachunga kakipah e. Kache nungle na-u Minlal hi ana lhem lungmong in o. Keima vang damjou din kakitahsan po-e, hijongle Pakaiyin nahung vil lhon intin insungnom tah napeh lhon ding ahi. Nisehin Pathen toh kilhon khom jing lhon in lang kilungset totah in um lhon in. Nanu genthei naho hi Pakaiyin nangni aga hin musah hen. Leiset nop mang jongle Christa kaneiye,” atin ka ngailut tah kanun eida lhatan ahi. Kanun eingailutna hohi eidalhah nungin kahe chen cheh cheh in kana sugenthei na ho kapona lheh jengin ahi.

Chuleh ahung lhung ding Christmas kon leh kalungset pen leh Christa dia ka gouman lutah Zia toh marriage kabol lhon ding ahi. Nangle na insung mite jong hung lhacheh din kahin tem-uve.

Thuchai na:

Nang jong tunia patin nanule napa kipana theiyin hinkho mang in lang na kilungset pi nu/pa toh leiset nopsah na lama chon louvin Pakai lungdei bangin hinkho mang lhonin. Chutile Pakaiyin na lungtup lhon hin molso sah in tin phattheina nachan lhon ding ahi.

The End

Previous articlePAKAI KOMA KIPHINNA
Next articleLHOMI NUNGAHNU THUSIM

LEAVE A REPLY

Please enter your comment!
Please enter your name here