Crosby Haokip
Leiset hinkho achom nalom lom e,
Jaova molhoipah le twimei bang bou ahi;
Kipa laini jong asot pon,
Bolkhom laini jong chomcha ahiye.
Tunia kipah khoma jingle kikhen ding ihitauve.
Hinkho phat chomcha kaneisung hi,
Nop chonna le keima deilamin
Kamang chai jitai.
Kathina mun ding jong hepha louvin,
Gamsa bangin muntin a kacham lei;
Lei loupina chunga meibang bou ahi.
Chunga pengpalep le
Noilama bu-al in jong,
Agena lhon ding mun akihet cheh lhon e.
Ahin leiset mihem ten vang,
Ahepha pon anop chon nalaiyui.
Ahcha gilkal nukhah pen si-al in alhoh bangin,
Thina le mannan achung’uva vai ahom e.
Insungnom sem dingin lampi chom cheh ijon ui,
Thilse le thilpha kideng ton;
Mu jinga mulou leh,
Ja jinga jalou hon,
Tanggol in nahinna kangai chauve.
Huilhi nunnem nang hung langin.
Kana phaithi hinsem hoh in.
Mipha lou koiham, tia;
Eima le eima ikimu chen tengleh,
Chamna le lungmonna umtan te.
Pohgih namkol tollai jol sep lhan,
Nachonset jong dalha jengin;
Hitin hin thingna banga nahin jing ding ahi.
