BIRTH & BIRTHDAY – WHICH IS MORE IMPORTANT?
[In a lighter vein].
Asun:
N.Lhungdim
Thangting House
Molnom- West
28th August, 2020.
Leiset ahin mi atamjo in apensang in apen nikho joh hi athupi gel in kamun ahi. Ahinlah adihtah achu ihungpen hi thupi jo ahi. Ahung kipenlou leh pen nikho chu umtheilou ding ahi. Keigel dan in ihungpen joh hi lopna kibol henlang pen nikho joh hi athupi jo in kigelda leh katijon ahi. Mi tamtah adeh a Pi le Pute hochun pen nikho koiman ana melchihpo in, amaho pen nikho melchih danchu akum joh himaithei ahi, hiche lang lou lholai tiho tobang, Japan gal masang ti tobang, Japan galjou titobang in ana melchih uh ahibou in ahi. Pen nikho kichehtah a hinnei nahi lekha thepna ahungsan a tulai phat a nu le paten8 in hihenlang, hospital hijongleh achate pen nikho ana melchih akona hi hung kisemdoh ahi. Pi le Pute khang in koima cha Hospital ah anapeng pon ahi ahinlah tulai in numei naonei ding jouse Hospital ah akipui in akimkhat angaina in nao anei in, atamjo hi aki atdoh thon gen ahitan ahi. Doctor hojong hin asummu nading uh ahijeh in angaina a peng dingjong a at thovin ,sum tamtah akisemdoh uvin ahi. Chukitleh numei naonei ding hojong thoh hatna alhahsam in nao sonat tiho nat lah a hahsa penkhat athoh nomlou jeh uvin naonei phatleh operation akibol uvin nao anei uvin ahi.
Keima hinkho ajong kanung vetleh kapen nikho hi kapa in ka uteho a phatah in ana melchih in keia ana melchihpon ahi . Ahinlah leiset a kahungpen hi kanu leh kapa chu nasatah in akipahlhonne ti kahen0 ahi. Ajehpi penchu kei masanga peng ka ute hochu Tuithaphai Bijang kho a anapeng ahiuvin chulai phatchun nat le sat ahat in chapang thi anatam jeh in ka ute jong pasal 3 tah anathi uva chuche keo hiloua ka u tahpen ujong midang bangloua tahsa hahsatna aneijeh a kanu leh kapa chun chapa kinei talou ding ham tia anagel uh himaithei ahi. Chuche jongchu kapa chu 1937 kum in NEIG Mission a Evangelist ding in Loikhai kho anajonlhon in ahi. Bijang kho a kipat akanu le kapa in ka ute numei 3 toh kilhona keng a lam anajot uva Loikhai kho alhunthei uchu tulaia igelleh kipum gelthei talou ding ahi.
2018 March 23 ni in Loikhai Houbung in kum 80 alhinna OAK Jubilee kabolding uh ahi, song hong a nahung ding ahi atiuvin keima jong maruti van gari in kagache in, gari a kache vang in pung tamtah alut in katha jong achol nalai in ahi. 1937 a kipat a Loikhai kho chu gari lhunglou 2018 kum 80 alhin a akho va gari lhailut nah nah ahi.
Kapenni chun kapa in ah aumpon abelsung kholding ah achekah akitin ahi. Ahunglhun in kanu in nao ananeia pasal ahichu akipah behseh in ka inmai uva kemchung ah adingdoh in Pathen thu alhangsap in ahi. Loikhai kho a kachennao inmun chu veng sahlanga mun kido khat a kachen uh ahi, hicheva kona chu isuhvet leh Loikhai kho inho chu Kemchunga thu kisei bailamtah a ajahthei uh ahi.
Ajehchu chelaia chu microphone kitiho umlou Pathen thusei chu kemchunga chu dingdoh a aseijui ahi. Chuche tobang taha akipa vang in kapa in kapenni chetchu amelchih pon ahi. Ahinlah hiche kapenni achu Pr. Ngamjalhun masanga ECA Pastor pa chun Pathen ka oinaipo in ahivang in napa in Pathen oi tobang in eimangcha e, napenni chu naopen toh kimat a kisalai a kanaum ahi. Ama chu Assam a kaumlai in a in ah Christmas kon in woolen sweater khat kachohpen in kagadoh leh 1940 kum a peng nahi ati in kaha tahsan po in, ama in ajinu toh Golden Jubilee alopna a Souvenir achun amachu Dec 29, 1939 Pathen ahin hepan ahi ati akona chu kasutleh Pr.Ngamjalhun Christian ahimasang chang boljou lai chu kapenni ahi. Kapenni chu Pathen ni ahi tia kakhutdoh a kapenni chu kasemtup tho ahi.
Tunia iseinom pen uchu hiche pen nikho hi athupi po in leiset a kahung pen chu kapennia kanu leh kanumei 3 ho kipa dingdan chu kagel a ahileh leiset a kahungpen chu thil poimo tah ahi.Khonung in tulai khangdol a birthday jahding kitichu kanaman ngailou beh ahi in, khonunga ka penni kakhut doh a kasemleh ka chanu tehon abangleh wrist watch ichohpeh uvin ahi. Abangleh sangkhol ichohpeh uvin kum khat chu akitho uvin chair hoitah khat in a katouna ding CHAIR nomtah khat in eichoh peh uvin ahi.
1974 Nagpur a Indian Revenue Service probation a kaumlaia All India Tour Bharat Darshan kiti a IRS batch mi 80 lah a akehkhat South India a October 74 chun kholjin a kachelai uvin Madras, Bangalore,Mysore, Hyderabad kiti ho kaga ve uvin ahi.Ka batch mate ho khat Martin Narayan Nayar kiti South India Brahmin thusei jingkei khat kamelchih chu hiche hi ahi, “ Keiho insung ah Birthday sang in Birth athupi jon ahi”. Hiche aseina chu ama in Brahmin family a pen hi apoimo in a birthday penchu poimo ahipon ahi.Hiche asei hi kiletsahna langa aseijong hinte ajehchu Brahmin hohi India independent joua hi vai anahom uh ahi. Tuthah a jatnim a agel uh ST/SC ho in thuneina sangtah tah ahinnei vangva masanga independent joua chun Brahmin hon vai anahom uh ahi.
Khatvei laia Article khat a Nirmal Kumar Mukarji kitipa jongchu pendol achu Bengali Brahmin ahiding ahi. Hitachu India Govt. pumpi po Central Secretariat Brahmin ho ngen in anapoh ahi. Ka batch mate paovin aseichu Brahmin a ipen chu phakhop set ahi birthday hi apoimo poi atihi aseidoh
khat chu Brahmin louho ding in birthday chu nante, keiho ding in vang pen joh hi apoimo in, pen nikho hi ahapoimo poi anati ahi.
Tulai in nu le pa hihen, chate hijongleh English te boldan in birthday hi ikhohsah uvin thilthah thah ikichoh peh uvin hitichun birthday pen nikho hi inalom juivin ahi. Facebook a ivet ahileh birthday wish bolding aniseh tobang in aum in, ikihet pi ho aumkhah a ahileh Happy Birthday ti a wish a ahileh amahon jong akipah uvin eiding injong kipana ahung hin ahi. Mikhat apenni a wish phatah a ibol a ahileh akipah louding koi umda dingham? Hicheho hi lekhabu a kisun a koiman akoilou ahi. Ahinlah vangphat umtah in tulai in Faebook/ Whatsapp aum in hicheho achun mihon account aneiva ahileh ahinkho imajouse kichentah in akisun in hetthei ahisoh tan ahi.
Hitiho jouse jeh hin tulaia igelding uva kadeichu leiset a ihung pen uva thil kidang dang imu uva ibol houhi poimo jo ahi. Pen nikho thupitah a abol a imala tongdoh lou, imacha la boldoh lou hi khohsah ding leh poimo a igellou diu ahi.
Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.
