LAICHAPET LUNGGEL
(Heart touching Story)
Story By:
Naocy Haokip (9957110489)
Lenna setlei jatam lah-a golcheng noma laitol lenga genthei cha kei idinga lung ngapna ding neilouva lha lengvai tah-a hinkho mang kahim….!
Leiset chunga mi jouse hi kidongleh kapa sangin kanu kangaijo-e, tihi jakhat lah-a somko ho hiteiyinte, tin kagingcha e, chubang chun keijong kapa sangin kanu hi gamcheng’in kangaijon ahi.
I-pa hi iti kingai jongle numei dingin i-nu hi, igolphapen, lunggel seina pen, lungmonna pen chule kingaina pen ahi jingin ahi, hijeh chun kapa hin eilungset lheh ji vangin kadei dei kasei ngampon, kadei dei kathum ngampon, kanu koma kakiphin ji bangin kapa koma kakiphin ngam jipoi.
Kum nga ho bep kahung hichun kanu le kapa in eilungset ji lhondan chu huise cha mut din jong eina phal ji lhonpoi, ajeh chu kei kanapen chunga hin kanu chu numei nat ti ding ham, jeh-in anaobu analadoh tauvin adamsunga kei tailou cha dang neitalou ding ahijeh ahi.
Kapa injong kanu chu alungset lheh jengin, ahinla kapa hi a gollhan laiya pat genthei tah-a thagum so a natong jing anahi jeh-in, tahsa damna ding tin ju anadon jin, hichu ahung khohse cheh cheh-in ajonan janseh le ju ahungkham lut jingtan ahi.
Hitia ju akham jing vangin khatvei cha jong kanu ahin kei kahin O sang tah le lunghang tah-in eihouse kha lhonpoi, kanu vang chu kapa ahunglut’a konle aphun tan theiji pon, alunghang jingin, hijongle kapa chun donin aneiji poi, iti lunghang jongle kei chu eidal bol deh kitji pon, anitah lhonin eilungset thou thouji lhonin ahi.
Kum ko kalhin geiyin jong kanu in school uniform eivonpeh ji nalaiyin, inna konin school inn chan eipo lhung thojin, nilhah jongle school kikhen masangin school compound a konin eihungpo kit jin kengin eichesah ngaipon ahi.
Kapa vang pasal ahijeh-in jingkah an neh joule natongin achejitan, kapa toh kaum khom sangin kanu toh kaum khomna atamjon hijeh chun kanu bouseh kangayin, toilet achekah jengin jong kaholmo jin kanu mulouvin phat chomkhat jong kamong jouji pon ahi.
Kum som vel kahung hichun khatvei hatah-in kahung dammo tan, sunlejan umlouvin kanu in eipo po jengin agim lheh vangin eilhakang khapon, kapa jong natoh chol lheh ji jongle kanu chu jochanin akithopi jin kei chu eivet hu jingin ahi, hospital a eipui lhonin Pathen lungset jal’in keijong kahung damtan ahi.
Phat le nikho akihei jingin keijong kum som le ni kahung hitan, class five (5) kahin sim tai, insung genthei te akihin, jingkah nilhah neh ding kichoh thu jingte akihi jeh chun sum le pai lutna ding ahungtam jep jep tan, hiche phat chun kanu le kapa chu ahung kitoh mo cheh cheh jeng lhontai.
Nilhah khat kapa angai bangin anatohna mun’a konin ahung khamlut kit tan, kanu jong angai bangin aphun pan kit tai, keijong khohethei set kahitah jeh chun akinah na lhon chu phatah in kangaiyin ahile hiti hi ahi.
Kanu: Bemnupa itia jong hiti behseh a asun ajan tilouva kham kham jeng nahi ham? Nachanu school fee jong peh loulai tampi umta, najudon nangah doh vah loule kachanu kakipuiya kadalhah ding nahitai.
Kapa: “Katei, Chongboi hiti ho chu seiji hih-in, anungjam dinga kakipui nahipoi, keijong anoma don don jong kahipon, angaiya um joh kahitan hethem jeng ji-o.
Kanu: Hichu O, kingah doh-in kati nanahsah loule eina kivet ta, kasei hohi thon lou ding ahi.
Kapa: Bemnunu, hung kihambol nange, ipi chu hile kalel toh moh lunghan han hih-in lang neh ding an neihin sempeh tan.
Kanu: Nadu le chenlang gakisem jengo, kalungkham toh kalunghan toh, thu akiseile hoilam ham jong gelpha lou, kham let lut’in lang nalim lim toh kon nanghi hitia nasin sah sah jeng ding ham? Ahinti chun kapa chu alunghang thim tan.
Kapa: Numei nahi e, houlim dan themdom dom ji in, ajole kalunghang doh khale thohlo in nate.
Kanu: Najah chalou chu o, nahat le ka chunga khut hinlha tang.
Kapa: Seitam louvin an hinsemin, kagil kel ahi, nilhuma twi beh jong donlouva na kitong nilhuma khotona jong hi nei neidom ji o.
Kanu: Ipi twi don don ngai nalai onk..? Najudon chu nganse kom tang, ahinti kit chun keichu room sunga konin kitchen lang chu kajonin kapa dingin an kagasem peh tan ahile kanu chu alunghang cheh kit’in hitin eihin house tan ahi.
Kanu: Bemnu, nangneh ding bon nakisem ding kiphal louva hiche judupa dinga an nagasema soh-a nagapan ham? Gang chelin ganung koiyin.
Kapa: Chongboi naham val behseh tai, thip chet’in galumtan, kacha hichula keineh ding asem chu ipi soh le sohlou nasei ham? Chapang chu ahou ding dol bep’a hou ding ahi.
Kei: Henu, Hepa kinana lhon hih-o, kei kakicha jie, tin kakap’in kanu kom kajonin ahile.
Kanu: Chubanga napa toh kihouthei nahile napa khu gakol tango, kasei bon ngailouva ipi dinga kakoma nahung kit ham? Ahin ti kit phat chun kapa chu ahung ding doh-in kanu chu itih kah-a abeh ham jong kaheman pon kanu chun akoma chair chu abo jengin, keivang chu kakicha val’in kichatah-in katouvin kakap kap tan ahi.
Kapa hi milungnem, mipha lunghang vahlou mivo ngailou ahijeh-in alunghan hi aloubei ahi, hitia kanu ahin beh jou chun an kasempeh jong chu kanu senan aneiyin chuin hitin aseiye.
Kapa: Chongboi, kalung hi kahansah nomlou ahi, numei nahin vo jong kavo nompoi, hijongle hitih chan Onem heuva kaseipeh jinghi ipi atile ngailouva nanop nagot naseilhah jing ham? Keijong hi alunghang moa neigel ham? Ju kadona kakham vanga ipi aseloma kabol ham? Niseh a kalodoh jat hop thuma hop keh man beh jong hilou, moh-a katahsa damna dinga bou kadonji ahin, nga in neiti jongle Onemin seitang, ipi ham gamtin khomol nakai khoma khohelou chapang kisan nagot tha…! Tukal kichih theiyin, tin kisil dingin bathroom lang ajontai.
Kanu: Hadonin donin lang thipi tang, nanghi ka inkote kabolchah sah ding nahi, kalungset jeh-a hi nei noise ahi, eina kivet tang neihin nung koudoh joulou ding ahi, atin aphuntan mo in ipi pi asei ham jong kakichat jeh chun kahe tapon ahi.
Hichun kanu chu akap’in room sunga alut’in apohthe thu jengin keijong kanu koma kachen.
Kei: Henu, ihmu tate ka ihmut asoh te.
Kanu: Chen lang analum ta, ajole kahung lup ding ahitai.
Kei: Henu, hungo kangaiye, thakhat’in lum tate.
Kanu: Napa ngah-in lang napa hung teng napatoh analum lhontan, Kei napute koma kache ding ahi.
Kei: Henu, che hih-o, jan ahite, henu eidalha hih-o, ken nangbou kangaiye, tin kap pumin kanu kakol chah kheh-in ahile, eipomin amajong alhisoh soh in, kapa jong akisil jouvin kitchen a chu an aneh hile akilomin, kanu in lupna chunga eipoma eilhim lhim chun keijong kana ihmutai.
Jingkah kahungtho chun kanu holmo in, kitchen a kalut le kapa in an anahonin.
Kei: Papa kanu la em?
Kapa: Bemnu, nahungtho hitam? Kanao chu anungah tave, tin kasam ho eikanpeh in, brush eipen maiphet’in eisolin.
Kei: Papa kanu hoiya che ham?
Kapa: Bemnu, nanu chu hol hol tahih-in, boi napute koma che ahi.
Kei: Papa ipi agabol ham? Itih le hungkit ding ham? Ibol’a keijong eipui lou ham? Tin kakap tan ahi.
Kapa: Boi, kap hih-in, janlhah a kalunghan val jeh-a kavoh khah jeh-a chu lunghanga eidalhah lhon ahitai, kei themmo jong ahinai, hijongle Bemnu, nangin jong thil umdan nahet soh kei ahin, eingaidamin lang Boi, nanu ngai tahih-in o, tin eipomin kamitlhi eitheh peh-in ahi.
Kei: Papa, kanu aumloule kei koi koma kaum ding hitam?
Kapa: Boi, kritoh i-um ding ahi, ken nang kadalhah lou ding ahi.
Kei: Papa kanu kangaiye, tin hiche nikhoa pat chun kanu ngaiyin sun le jan kakap jengtan ahi.
Kapute kho chu gamlha matah ahin, nikhat kapa in school kache kah-in kanu puidin kapute kho chu anajon tan ahile, kapute chun kanu chu ahinsol nom tapouvin kanu hinsol malah-in kapa chu ahin house deh uvin, kapa jong lhase tah-in ahung kiletan ahi.
Nilhah chun kei koma hitin aseiye.
Kapa: Bemnu, nang hinkho ding kagelna jeh-in, nanu puidin nivei kache tai, hinla nanu jong nungah thah lih leh ho bangin akisemin, eini hinkho ding agelpha tapoi, chule napute hon jong kacha kanaovu nangho khut thah lhaona ding ahipoi, tukal nahung kit leh phalou ding ahitai tichan geiya gihna einei phat’uvin keijong nung koukit talou dia hung kile kahitai, Bem, napa kei silungmol jeh-a nanutoh hibanga kingaiya nakikhen lo lhonhi kathoh jou hih-e, nanu le nang nakikhen sanga keijoh anathi hileng phajo ding ahi.
Tichangei kapa in ahin seiphat chun kalhase behseh in, kapa themmo akichan jing jeh chun kanu kangai lheh vangin ale langin kanu themmo kahin chantan, kapa chu kakol chah kheh-in kakap kap jengtan hitin kaseiye.
Kei: Papa kanu in eingailou jeh-a eidalhah ahi, Papa nang nathi le kei koi toh kaum ding ham? Papa kanu kangailou dite, nangbou kangaiye Papa, tin kapa chu kalungse behseh in kakap-in ahi.
Hiti chun kanu puldouvin niseh-in kana jengin bou hinkho kahin mangtan, hijongle kapa themmo akichan jiteng kalungse kitjin kapa het louvin guhthimin kanupul kadou jingtan ahi, kadei kangai atamjin hinla kapa koma kathum ngam jipon, hitia lunggel seina ding phat, deile ngai kanei phat ho dehset jitengle kanu kangai dehset jin ahi.
Nikhat kapa jong inn aumin, keijong exam jouva suty lai kahi, kanun eidalhah jou lhathum val achetan kapa komin hitin kaseiye.
Kei: Papa kanu lekha thot hite, koi kapohsah ding ham?
Kapa: Hinjih ta Boi, ken mi ache ding kahet tengle pohsah nange, atin
Kei: Papa kajih chaisa ahite, hungo Papa sim hite tin, letter chu kapa kapen aman ka lekhathot jih chu ahin sim tai.
Kangaipen Henu,
Nadam jing hinam? Nangin nei ngailouva neidalhah vangin kahin ngai ji val’e, Henu itihle nahung kile ding ham? Nahung umsot val taiye, sun tengle kagil keljin nahonsa bu le me kaducha jin, jan tengle dap kasajin, kol dingin kahin hol jie, Henu, hungloi loiyo, ka Papa toh kagenthei valtai, nang tailou lunggel seina ding le kiphinna ding kaneipoi, Henu kangaidan hi muthei hile chun ka LAICHAPET LUNGGEL jengin jong nangbou nalange, Henu nahung ding ngah lel’in nilelha kasim sim jenge
Nangaipen kei Bemnu.
Hichan chu kajih in kapa in ahin sim chai phat’in eikol’in Bem, lhase hihta o, Boi, nanu hi silungmol din jong amol val’e, hijongle nikhat le hung kile kit thou ding ahi, kanaocha chu Hand-Writing jong ahoimong mong tai, tin amitlhi vachet chut’in lekhathot chu alhep tup’in Bem, mi ache ding aumteng ipohsah ding ahi o, atin kenjong henge Papa tua jong ache ding aumle pohsah hite, katile Bem, tua vang kahepon jing ho leh joh o, atin ahi.
Hiti chun kapa toh hahsa tah-in hinkho kahin mang lhonin, kapa in na atoh loule hitheilou ahin kanu umlai bangin nilhah seh-in ju chu anam jing thouvin hijongle jukhama kitom lele lunghang hang jeng ahijilou jeh-in anam kajah loule ajudon kahepha jipon ahi.
Kenjong kanu hung kile kit nadingle kapa judon ngahna din niseh le kataopeh jin, sun le kapa natonga ache tengle kachangin kaumjin lunghel’in kakap kap jengjin ahi.
Nilhah khat kapa hunglhun phat jong lhingnailou alhangpia kapa hi jan pung sagi ho leh inn hung lhungji ahin, nilhah pung nga vel’a kachanga inna kaum pet’in bu le me ho kahon min jouvin lupna chunga chun Bible kasimin taona kamangin ahi.
O Pathen, nangman van chung sanga konin jong kataona nangaiyin naja jinge, ti kahen kakipah-in nang kahin thangvah e, O Pathen, ka insungu kavet teng sopi Ulenao jong kaneipoi, kanu le kapa dingin keijong laigilga khatseh kahi, hijongle kapa judon jeh le kanu silungmol jeh-in keijong chaga kasoh tan, kapa jong pagong ahitan, kanu jong meithai asoh tai, hijeh chun neilungset uvin lang kapa judon ngah theina din alungthimin thu hin seiyo, chule kanu silungmol jong alung hinhei peh-in lang chonnemna lungthim kineosahna aneina din nangin ka insung uva chamnan vai hin homtan, tin mitlhi longpuma katao jing laiyin kapa ahunglut’in kap pumin eikol’in.
Kapa: Bem, tukal ju kadon kit lou ding ahitai, Boi, neingaidam ta onk boi, kajudon jeh-in nanu ilhaso tan, nang genthei nathoh lo in Boi, tunia hin nakoma kitep kahi, kadam lai sungin ju donkit taponge, nanu in hiti hin taona eimanpeh henlang Onem heuchan einahil tave leh hichangei igenthei lou diu hija o Boi, thil jouse kei themmo ahijenge, tin laina tah-in akap’in ahi.
Hiche nikhoa pat chun kapa in ajudon ahin ngatan, kakipah lheh jengin ahi, kapa toh genthei lheh lhon jongleng kapa in eilungset in, ka genthei kalhiso ding aphal jipon ahi.
Kanu in eidalhah jou kum thum ahung che tan, kanu kangaina vang amangdeh poi, kapa natong jing ahijeh in kanun eidalhah jou lhona pat sun le nagil kel teng naneh ding tin kapa in sunbu tiffin neocha khat’in eikoipeh jin, hichu kanejin, kanun eidalhah kum lhon chun kum somleni kalhin tah vangin bu le me jong kahon thei naipon, naosen banga um nalai kanahin, kapa chu agim jilheh jengin nilhah le kino tah-in inn ahindel jin bu le me ahon toh kavon asop toh kei eipoh toh akiboi jilheh-in ahi.
Hijongle kapa gimna ho kavejou jipon, kanu iti kakou lhon vanga keini eihet phah lhon tahlou jeh chun kanaosen lunggel chu ol ol’in kahin pai tan, kapa gimna ho kalungset val ji jeh chun natoh neucha cha ho kahung kijil’in kahung themdoh tai, sun le school kakikhen teng insung ho kasutheng jin, kapa le keivon anen ho kasopjin, bu le me kahonjin, kapa jong a ol lheh jengin eikipapi mamajin ahi.
Nikhat kapa natonga ache kit tan keijong school kajon tai, jingkah pung som donin kalu anan, kati asajap jap’in, kakhosih ahin, ka Sir ho koma permit kalan kakile tai.
Nilhah in kapa ahunglhunin kho jong kahe tapon kapa chu lunggim tah-in hospital a eina puiyin ahi, kho kahin het chun kakoma aumpon, ICU ward a kachanga kaumpet ahi.
Hichun kanat chu kalel lheh jengin, ka tahsa hoilaipen naa ahijong kahepon, kanu in kadammo laiya eipoh puma eina oi lele jiho chu abanchan kalungin ahung langin, kanu kangaival behseh jengin Kanatna ahungsan jep le kalai ahung chat pan tan, hichun keijong dam dinga kakigel lou phat’in kanu dingin lekhathot kajih tai.
“LAICHAPET LEKHATHOT”
Kangaipen ka chunnu, Nacha kei khankho ding gel louvin hinkho nomin namang jinge, ti thu kaja jingin kakipah e, Henu naki lom poiye, hibang lom’a silungmol din kahin gel poi, hin ven nacha kei khankho hi..! nangin vang janmang jeng cha mat phah-in jong nei nei tapoi, hijongle nacha ken “LAICHAPET LUNGGEL” jengin jong ka chunnu nang tailou ngaidang kanei poi, nasilung mol lheh jongle “LAICHAPET LEKHATHOT” hi namu tengle nalai gilga changkhat keima vang haina hu beiyin anaum tange, hijongle kajo ngaipen kapa adin nasilung hin heiyin lang hung kile kit tan.
Hichan kajih chun thumvei lhinna ka lai ahung chat kit tan, hiche pet chun nurse khat’in eihin mun eihin del lut’in oxygen eibu peh-in, phat chomkhat jouvin kho kahin hekit’in ka lekha jihban kajom kit’e.
“Henu, kahaina hu tan ding koncha ahitai, kalaicha thumvei lhinna ahitai, “LAICHAPET LUNGGEL” jengin jong nangbou kahin galdot jing nalaiye, nasilung mol lheh jongle kasei hohi neihin ngaipeh ding kakinem’e, Henu.
Numei hi lungnem ding, thoh hat ding ahi, na pasal chol le nang’a ahung vailhun teng lungdam heuchan vailhun jingin, jindot them’in, lunglhan lhaisel’a kihoulim jing ding sumil hih-in, ven, kapa judon jeh-in nakinahpin, nahousen, nasamsen, namuda e, hiche najahda chu thilpha ahinai.
Hijongle Henu, na aw-so dan angeipon adih poi, ipi hijongle amasan Pathen khut’a kipedoh masan, nangma thuneina a imacha najo ding aumpoi, Pathen toh napan khom jing angaiye, Pathen nagin lou jeh le, Pathen toh pan nalahkhom lou jeh-a nalungtup namolso joulou ahi, thil jouse ase ding aumpoi, hijongle thil jouse hi abol dingdan umsoh kei ahi, tekahnan bu le me jeng jong atui le atuilou hi ahon ho joh-in apoh ahi, abu ame in apoh ahipoi.
Tunin nacha keiman Pathen koma taona toh thoa kapa judon ngahna dinga katao jing jeh-in, tun kapa ajudon louna kumni aval tai, nangma din jong katao jinge, Henu nasilung hin hei kit’in lang Christian insung nom semdoh loiyute, phat aum tapoi.
“LAICHAPET LUNGGEL’ leh LAICHAPET LEKHATHOT” hi namu tengle ana kihoulim pitan, Pathenin avantil te keipuidin ahin sol tai.
Nasilung nahin hei nikho tengle vang leiset’a geuchau tah-a umding nahi lhon tai, ti kagel’in kahin khoto lheh lhone, hijongle leiset’a lengvai lhon jongle chun Van a van vouva ilenkhom diu kinem’in ana ngah mai lhon tange, leiset hinlai damsung chomcha sungin Pathena din thilpha bol’in chimtih neilouvin hung pang jing lhontan.
Hichan kajih jouvin kalai ahung chat kit’in, aban kho kahe tapon, kamit kasingin kapa ka Ogin kajan, hitin aseiye.
Kapa: Bemnu Boi, nei dalha hih beh-o, nanu bou nangaiya kei khankho ding nagel doh lou hitam? Boi, kam khatbeh’in nei vailhah masa tangem,
Ati kajah chun avel’in kalai ahung chat kit’in, keijong kalungthim’in Pathen koma kataovin kapa kahoupi nomlheh in ahile phat chomkhat jouvin kamit ahung hahdoh in kapa kamu chun mitlhi pumin ahung nuiyin keijong kangchan kathoudoh in kapa chu kakol’in anakol’ah hitin kaseiye.
Hepa, kahin ngai val’e, hijongle kei che ding koncha kahitai, Hepa, naphatna ho jal’in nachunga kakipah e, tunvang tonsot hinna lampi nakimu ahitan kalungkham tapoi, Hepa leiset’a laigilga chang khatseh a nei nei jeh-in neihin it’in neihin homtho lheh jenge.
Hinla Pathenin keima eipui tou ding ahitai, Pathenin hitin aseiye “kacha leiset gimna jouse hin dalhan lang gim le genthei umlouna kakom’a hungtan eiti” Hijeh chun ngailheh jongleng leiset’a kimu lou dinga kadalhah ding nahitai, Hepa lhase hih-in, chung gam noma tonsot’a ilen khom diu kinem’in ngah jingute, kache nung tengle “LAICHAPET LEKHATHOT” hi silungmol ka chunnu anapen lang “LAICHAPET LUNGGEL” navonchoiyin nahin vailhahna ahi, anatipeh tan, chule Leiset’a vangam nom Christian insung nom chu hin semdoh lhon teiyin, Hepa na chunga kakipah lheh jenge.
Hichan hin kapa nakhang’a thu kaseiyin kalai ahung chat kit’in aban vang thoukit talou din ka ihmu mil tai.
♾ MORAL ♾
Insung boina hung kipatna ho jong numeiya kon ahin, insung nom hung kipatna jong numeiya kon ma ahi, pasal chu phamo jongle numeiyin lungnem heucha semphat theina dinga pan ahin lah tengle pasal chu abaisa ahi, hijeh chun hiche thusim simdoh jouse numei panlah dingdan le numei lungset them ding kijilnan mang cheh-u hite.
“LAICHAPET LUNGGEL” fiction story lunglut tah-a simchai jouse chunga kipathu kahin seiye, asim jouse Pathenin phatthei naboh cheh-u hen.
Thusim chung changa lunggel ngaidan naneileh nahin share jing thei ahi.
♾♾ THANK YOU ♾♾
Www.thusimbu.com
