Home Crosby Haokip KUM SOM SUNG LONLHI

KUM SOM SUNG LONLHI

125
0
KUM SOM SUNG LONLHI
KUM SOM SUNG LONLHI

Gollui Thusim

Story and Narrated by
Crosby Haokip

Crosby Haokip kwc
Crosby Haokip kwc

Nungah chapang cha kahi na laiyin kiengnei dingin kalungset pen Kol(Burma) langa um ka-u Thangboi kom kajon tai. Chapang cha kahijeh chun kanu le kapan eilunggim pi lhone. Hijongle kanu le kapa kalhamonin kalha lhon tan ahi. Kalhunna katehpi le katehpu jong aum tapon aninun aneova pat a ahin kisin doh ahi. Anin jong jinei louva ka-u Thangboi ahin sin ahin, kakichen lhon chu aninu akum atam lheh tai.

Kakichen lhon phat chun aninun eilhamon lhonin ajingin amajong ajineiyin ahi. Jinei tajongle kanu le kapa bangin kagel lhonin kaboina jousea kasoh lhone. Anin jong koi chom ti um louvin kaboina jouse lhona eikithopi jing lhonin kalung amonge. Chuleh kajipan jong eilungset lheh in, chapang cha jinei hijong leng keidin lunglenna aumpoi. Akoma kakiphin theiyin aman eihe them e. Aji hijong leng anaonu bangin eisin in kalhaset kakana le kakipana jousea aman eihe themin kachunga alung hang khapoi. Hijeh chun kajinei keidin gentheina aumpoi. Eiho Phaigam lang sangin nom kasa jon kalung jong akidange. Amol alhang kavetleh eiho Phaigam Dingpi lhang akimun lunghel hel aum lheh e. Chuleh ka-u Thangboi ninu kangailut jehin katehpi bangin kagel e. Hijeh chun mikoma katehpi tin kasei jin ahi.

Niseh leh kainkote toh kakihouvin kalhunna muna nom kasah dan ho kaseiyin amaho jong alung mong uve. Inchen hahsatna ho achomin kisei taleh kilungsetna aum jehin lungmonna kaneiye. Chuleh katehpi kanu bangin kagelin kakiphin jingin amanjong eilungset lheh jenge. Nikhat katehpin kajah a, “Boi, nang naum jehin kalung amonge. Nangin neilhamon jing jehin kahinkho jong asao chom e,” atin kakipah valin katehpi kakipoh sahin sottah pi kakitot lhone.

Kalhiso kalung nopmo ding jong anom pon, eihomtho lheh jenge. Chuleh Houin a la kasakhom ji lhonin, chuleh maicham teng jongle la kasa khom lhonin mitlhi long pum pumin katao ji lhone.

Nikhat ka-u Thangboiyin keile ani koma, “Kaloi pan Phaigam a che dingin eitemin, kache lhon leh Phaigam thingga chuleh adang dang neh le chah jong kan poh ding ahi,” atin katha anom lheh e. Ajeh chu keijong Phaigam a kon kahi jehin Phaigam gasoh kangaicha lheh e. Ahinla ache ding kagelleh lunghel nan kadim e. Hijongle eilhamonin, ahung kile tengleh thil tampi eihin poh peh ding ahidan aseiyin katha anom kit e. Chuin amajong akigongin avaikon ding konin taona kaman pehin akhut katuhin ajah a, “Heu, nache tengleh kei henu le hepa koma jong hung pan lang nangle henin eilungset lhona lung mong taha kaum dan ho sei tei tei tango,” katin amanjong eilhamonin aloipa toh ache lhon tai. Ka-u Thangboi Phaigam ache chu kanule kapa koma jong kaseiyin amahon jong amunom lheh uve.

Ahinla nilhah langa patin ka-u Thangboi toh kakihou doh thei tapouve. Katehpi toh kalunggim lheh lhon tan keivang kakap tan ahi. Chuin katehpin eilhamonin chuin ajah a, “Heni, ka-u Thangboiyin toset toh kha tale kei ikati mong mong ding ham?” katin kalunggim lheh e. Chuin aman eilhamonin, “Boi, lunggim hih’in. Imati ponte. Damselin lhung tei nante,” atin ahinla jan imu mo helin kakhovah tai.

Lhung tante katin inlanga kanu le kapa kahoupin ahileh amanin jong anahe pha lhon pon alunggim lhone. Ahet phah lhon lou jehin kalunggimna asang tan kanu toh kakihou laiyin phone a kakap tai. Chuin kanun eilhamonin, lunggim a kaum louna dingin eitemin ahi.

Phaigam le kolgam a kainkote jouse kahoupiuvin, gamkaiya organisation chom chom ho kahoupiuvin amahon jong athu ahin khol tauve. Chutia lunggim tah kaum lhon laiyin phone eihung kibolin khamna thei apoh lhon jeha Tamu a kol sepai hon amat lhon ahidan asei tauvin ahile kalai ana valin hakan kakap tai. Apet pet’in katehpi toh Moreh kajon lhon tai. Kalhun lhon chun Eimi organisation jat chom chom lamkai hon eina lamtouvin amaho masanga kakap tan ahi. Chapang cha kahi chu aheuvin apona lheh jeng uve. Chuleh kanu le kapa jong ahung lhonin kakimu muu chun kakap tauve. Chuin kap pum pumin kanu koma, “Henu, ipi kati ding hitam? Ka-u toh chom cha bon kikhen thei louva, tua phat itihchan kakikhen lhon ding hitam?” katin kakap kap tai.

Chuin kainkoten eilhamon cheh uvin eika pi cheh uve. Athu umdan kakhol in ahileh aumdan chu ka-u loipa chun kani kg phabep pi a poh jeha achang a chenom louva kajipa ahung kikou ahidan kahe doh tauvin, kollang dan dung juiya alhon khompi pa jong mat a um a ahitai. Chuin kainkote masanga hakan kakap tan ahi. Chuin eilhamon cheh uvin jail mun kajon tauve. Kalhunun ipi kasei vang un aphachom tapon, ahinla chomkhat kakimupi ding aphal un kachangin kalut tai.

Jail sunga ka-u kamu mu chun kalai ana valin kakap pan tai. Chuin security pan kot ahin hongin kalutin kajipa kakoiyin kakika lhon tan ahi. Sottah pi thu imasei thei louvin achunga kakap in, chujouvin kajipan kajah a,
KAJIPA: “Nao, silung mong mo lou jen o. Hiti dinga chung Pathen laitan ihi lhon tai,” atin alhisohin, chuin amitlhi katheh pehin kalhamonin,
KEIMA: “Heu, leiset mihemin themmo nachan vangin Pakai mitmua themmona bei nahi. Pakaiyin amite adonda poi. Phat chom khat kikhen jongle hen Pakaiyin samang ijal khom lhonna ding phat hin lhun sah nante,” katin, chuin aman,
KAJIPA: “Nao, kahung kile kahin neinangah doh jou nadem?” tin eidongin, chuin ajah a
KEIMA: “Heu, lungneo hih o. Kahaina hu aum laisea nainneipi kahi. Nadalha him him ponge.”
KAJIPA: “Neilungset kahe themin kakipah e. Hijongle nagenthei valin nalunglen ding kahei. Nagenthei sangin ang dang anajon mei to,” atin kanom mong mong pon kakoiyin kakap tai.
KEIMA: “Heu, nadalha him him ponge. Nupa hinan nahin ngaicha lheh nange. Hijongle nangle heni dalhan hoima che ponge.”
KAJIPA: “Nao, hing jong leng nang dia athi tobang kahin, nang jong meithai tobang nahiye. Naman jou mong mong ding hinam?”
KEIMA: “Heu, kamang hihen katah hijongleh nangtoh kikhen ding vang kagelthei him him poi,” katin, aman eilungset jeha asei ahin, ahinla keivang kain a kile ding chu kanom mong mong poi. Chuin kilha lel tahin kakikhen lhonin, chuin jail sunga vaihom pan kajipa kum 10 sung jail a um ding ahidan aseiyin ahile kalai ana valin hakan kakap tai.

Jail a kona kahung potdoh chun katehpin kajah a, “Boi, nang tobang a moupha kanei ding kana tahsan pon, avela nang tobang moupha kamu kit ding jong katahsan poi. Pathen’in nainsung nomtah hinsem intin, na-u Thangboi ngai lheh jongle chun vangset nan nakhen lhon ahitah jehin nahung penna nanu le napa kom jon tan,” atin, ahinla kap pum pumin kakol chah khehin ajah a, “Heni, kajipa thi ahipoi. Dalha jou ponge. Kum 10 che lhung ding hijongleh kanom poi. Ahung potdoh tengleh kei eiholmo ding khu kave ngam poi. Kile mong mong ponge,” katin kakap in kakol chah kheh tan ahi. Ahinla aman kajah a, “Boi, napah hoilai atamjo meithai banga hinkho naman sangin kile tan kati ahi. Nahinkho man ding dan kagelleh kapo joupoi,” atin ahinla kanom mong mong poi.

Chuin kanu le kapa ahungin, chuin kataovin, “Hepa, kum 10 che ding hijongleh ka-u Thangboi dalha jou him him ponge. Inlanga kile dingin neipui lhon hih behin. Kumsang khat che ding hijongle kajipa kangadoh thou thou ding ahi,” katin, chuin kapan eikai dingin lhisoh pumin kajah a, “Boi, chutia najipa nadalhah joulouva ahile lung mongin che tan. Pathenin nakilhon pi hen. Lunggim hih’in, na-u Thangboi jail a kona ilah doh thou thou diu ahi,” atin, kanu le kapa chunga kakipah lheh jenge. Jinei tajong leng kachun le jo manlut dan akidange.

Katehpin ka-u Thangboi aka ka tan kajo chanin kalhamon jing e. Aji kei dingin athoh hah lheh e. Kalaizon cheng ajitoh nom tahin samang ajal khom-un, keivang iti vangse kahi hitam? Janleh kajipa kangaiyin kakap khovah vah e. Chuh le khal, phalbi jan dap laileh kangaicha lhehin kakap kap ji. Kalung monmo ding katehpin ahet tengleh kain uva kakile dingin eitemin, ahinla kanom mong mong poi. Kanop mong mong louva che lou dinga kakitep lhah phatin kahinkho mandan ahethemin eile lhamon jing tai. Meithai bangin hinkho mang jong leng kaji vaikona che bangin kagelin nilhah tengleh hung vailhung tei ding ahi tin kakinem jinge. Kalung alen val tengleh na kasan kajipa kangai vul vul jenge. Ajipa um talou ahin lung lengin te tin mitampin eihel uvin ahinla kanom pon kale houset jiuve.

Lha nga jouvin nao kavop kahin kihet doh tan, katehpi koma kaseile akipah lheh jenge. Nao kavop jeh chun thilgih eidop sah pon, na hahsa jong eitoh sah poi. Hiti chun homtho tahin eijenin boilou helin pasal khat kaneiyin ahi. Aninun naosen amu chun akipah valin akipom pom tai. Sunle naosen kalhimin ajaha, “Nanao, papa angaiyam? Papa ahung tengleh nanao le mama ding ne ne tampi ahin poh ding chu o,” katin kajitoh nomin hinkho mang khom thei hih jong leng kachapa jalin kalung among e.

Ahinla kalhunna te miphabep in kaloipa sopi khattoh suhto ding eigo tauve. Hiche phat chun katehpi koma kakap jing tan, amajong anom poi. Katehpin athu ajah jah chun alung hang valin ahi. Hiche phat chun avelin ima asei tapouve. Chuleh kaloipa sopi pan eideichan eivel le le tai. Hijeh chun kamu da lheh jengin ahi. Keima tahsa thahat nan vang kum 10 ngah doh jou ponge. Koiham asenji khattoh kikhen a mang jou ding! Sepai ji ho bon aset theiyu leh keidin setna anaiye. Hijeh chun keima thahat nan kakisong pon, kalungneo nalou din Pathen koma panpina kathum jinge. Pakai jalin setna tampi kahin thoh in kajo tei ding katahsan e.

Naosen lhagup alhinin aninu toh kajipa koma kacheuve. Kalhun lhon chun kajipan naosen amu chun akipah lheh jenge. Chuleh lungneo lou beha kauma kain a kile louva kaum chu akipah lheh jenge. Chuin jail sunga lamkai pa koma kathumin, “Sir, chomkhat kajipa kakoi nom e, lungset tahin neiphal peh in,” katileh Pathenin alung sunga thu asei hin tin anom tai.

Hichun kakipah valin kot ahon hon chun kalhai lutin kajipa kakoi manchet tan ahi. Oh! Kajipa chomkhat kakoi jongleh kahom tho lheh in, kangai lheh e. Nom kasan katahsa kalungthim adam chom e. Tulaiya nupa kitoh mo a kilungset thei lou ho kagelleh ahethem pouve. Kei dinmunin ding leu hethem tauvin te. Ka-u in eikoi chu nom kasa valin ajah a,
KEIMA: “Heu, nom kasa vale. Nisehin neikoi jing theile chun ichan a kalung mong ding hitam?”
KAJIPA: “Nao, keidin jong anome. Aphat seh a hinkho kaman khompi thei lou jehin ngaidam kahin thum e.”
KEIMA: “Heu, nangle kei themmona aumpoi. Nikho khat leh lung nachim set a ium khom ding ahi. Katahsa nakoma um thei hih jongleh kalungthim nang koma aum jing e,” katin kihom tho tahin hinkho chomkhat kamang khom lhone. Chujouvin kakikhen kit lhonin, lunghel tahin katehpi toh kakile lhon tan ahi.

Kajitoh hinkho nomtahin mang khom thei hih jong leng phat kanei chanin kagavil jing e. Kache tengleh kalhamon jingin ahi. Naosen jong alen tan school kai theiyin aum tai. Hijeh chun school kai dingin kanu le kapa koma kagathah lhonin, amani toh aum khom tauve. Kanu le kapan alungset lheh jengin ahomtho lhone. Hiti chun kajipa ngai pumin kum 9 lhingset changin hinkho kahin mang tai. Mihem thoh din vang ahah lheh jenge. Kakichen lhon chun kum 16 bou kahi na laiyin, tunvang kum 26 kalhing tan adihtahin ahung nungah tiding chu kahi pan e.

Kajipa songkul alut kal kum 10 lhin kum chun kum 26 kalhing bep e. Eimu jousen nungah eihi sah un, kiseiphatna louvin mihon kakichen til lai lhon sang chun tun hoi eisa jouve. Myanmar govt akonin lha doh dinga um jail tang ho min list ahin sodoh uvin ahile kajipa min jong ahung chong tan kakipah vale. Ahinlha doh diu nikhon mitampi kakisutouvin kangah tauve. Kajipa kamu mu chun kadel pheiyin akom kaphah phah chun kakap in kakoiyin achunga kakikhai tan ahi. Amajong akipah valin eikoiyin kajah a, “Nao, lungneo louva thohhat tah a kum 10 sung neinanga doh jehin kakipahe,” atin, chuin kiss kabolin ajah a, “Heu, nang tobang leiset kolkim vel hol jong leng mu jou ponge. Hijeha chu kananga jing nahi,” katin kakipah valin a anga sotpi kakap in chujouvin kipahtahin in kajon tauve.

In kalhun u chun eikipapi mitampi ahung un, kaji kangailut a kathoh hat dan kipathu ahung seiyun eitilkhou uve. Chuin kenjong mitlhi long chut chut in kaji kalungset dan kaseiyin ahi. Chuin kalhunna te insung abonun ahung kikhom un kachunga akipa danu ahung seiyuve. Chuleh masanga nupa kitoh lou taha cheng khom ho keini thusim a konin kikhelna aneiyun kilungset to tahin acheng khom tauve.

Chuin kajipa koma, “Heu, nang koma um chim ponge,” katileh eilungset valin eikoiyin nomtahin ka-imu lhon tai. Hiti chun kum som sung kalonlhi chu atangin kajitoh nomtahin hinkho kamang khom kit lhon tai.

THE END


Kakipahe asim jouse Pathen in phatthei boh tahen.


©️2019 ,Crosby Haokip, All Rights Reserved

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleKAKINEPNA JOUSE ABEI NUNGIN-IV
Next articleREJOINDER TO THE RUBBISH AND MALICIOUS DIATRIBES

LEAVE A REPLY

Please enter your comment!
Please enter your name here