Home Lahkhom KUKITE KHO CHEN DAN

KUKITE KHO CHEN DAN

30
0

-Haopu Changsan

Source: KUKI CUSTOM BOOK(page 11-13)
Published by: Kuki Inpi Nagaland(2017)

A. Khosat dan
(i) Mi-upa/phung bulpi hon bou kho anasat a, thingbul songbul ana nga jiu ahi.
(ii) Mi naopan kho asat mo nading le kho le veng atun theilou ding tina hilouvin, mi naopan kho asat nom le a upa koma salu-belpeng akilahdoh a kho asat thei ahi. Akilah doh lou le chon le jeh abolthei lou ding ahi.

B. KHOSUNG VAIHOM/VAIPO HO
Kho le veng akitun doh teng HAOSApun khosung vaihom le vaipo ding ho alhen ding, hiche ho chu SEMANG,PACHONG,LHANGSAM alhen ding ahi. Chule kho THEMPU le kho THIHSU akisem ding ahi. THI TOHUH jong anakoiji e.

C. KHOTHA LE KAI NEH DAN
Masanga Haosa ho kai nehdan le aneh ding ho chu-
(i) Khotha
(ii)Changseo Samal, Sel Kotkai, Sukai chule Kai dang dang.
(iii) Lho thempu le Kho thihsu, amani jong hi Haosan Khotha kumkhat a khatvei pejin ahi. Ajehchu Thempu hi adammo ho vil’a mi thoi chule Kho thihsupa hin tucha chempong le adang dang ase abal ho abolphat man alahlou ahi.

D. CHANGSEO SAMAL PEH DAN
(i) Changseo chu Vaibenga kite a beng khat chu kipe ahi.
(ii) Samal hi Sakhi a lhah achunglam bou kipe ahin, Insa vang kipelou ahi.
(iii) Thalsa hi amal kipe ahi.
(iv) Sa-nah hi abebulpa chan ahin, hinla gamlengpa hin lhonpi aneileh hichu ama dinga GAMBECHA ahin, asa tha anah chu apeh ding, chule a-om chu abe bulpa apeh ding ahi.
(v) Sakong hi tucha kipe ahi.
(vi) Sa-ngong hi pute kipe ahi.
(vii) Sating-atingphe ajetlam hi U-pa kipe ahi.

E. CHANGSEO SAMAL NE-THEI HO
Changseo Samal hi Haosa ahi man a koipouvin anehlou ahi. Ajeh chu U-pa, Haosalen phungbulpi hon bou anehjiu ahi. Ajeh chu U-pa kijabolna le bulpi jabolna ahi. chule neojon aneh nom le U-pa koma Salu-belpeng akilah doh ding angaiye.

F. SA-PANG NEH DAN
Sa-pang hi asapum chu neo le lenleh Sapi a kisim ho chu ahi.
(i) Sapang neding ho chu Haosan akilhen ding ahi.
(ii) Mousa ahiteng gamkon lama mikhat pang ding/kila ding ahi.
(iii) Gamsa kitha a Sakhi a pat chunglamse chu Sa-pang kijongji ahi.
(iv) Sa-pang hi numei le chapangin ane ngaipon, Haosa hi man’a jong Sapang neding ahipoi. Apa hing nalai, a U-pa dam nalai hon jong sa-pang anehlou ding, ajeh chu U-pa sona, Pa hing nalai sona ahi akiti e.
(v) Sa-pang neho chu Upa tehse, thil mi kidah le tham nomlou, mi sei nomlou, neh jeh khoi jeh asei diu, neh jong aneh diu bou ahi. Sa-pang hi mou sa-pang, Haosa sa-pang aume.
(Gamsa sathin salung hi Haosa hon bou aneh ahi).

G. KHO CHAOLUT DAN
Chaga mikho danga akichaolut ding leh Haosa inna jubel/chabel khat abuh a “NANG HIN BEL TANGE, NA BILHA HAP MA(Nakho tina) NEI CHEN SAH IN,DON LE KAI THA LE JUNG PEH DING DOLSE PENG’E” tia Haosa koma thumna anei ding.

H. CHAODOH DAN
Chaga khat alunglena kho adalhah nom tah le chaodohna jubel/chabel adop a Haosapu koma asei ding, chule achao teng khovah masanga kho chu adalhah ding, hichu Haosa jabolna ahin, chule Haosa’n mi het a achao diu anaphah lou ahi.

I. SA JAMLHAH/SABA
(i) Sa jamlhah/saba hi gal somna ham, sahang delna ham, gam le nam chuna ding ham aum teng le sa kithat a athin, alung kihonna sachanna kihom’a anungchon pen pen tia kihahselna a kibol ahi. Chuls Saba jong akiti e.
(ii) Gal somna ahitengle kho jouse kithot a kithahji ahi.

Articles hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleTILLAI 1960 MASANG CHUN TULAI A FAKE ALHEM KITI HO HI ANA UMPON AHI
Next articleKAKINEPNA JOUSE ABEI NUNGIN-I

LEAVE A REPLY

Please enter your comment!
Please enter your name here