Home L Seikholen Khongsai KUKITE DIA JAILA/THUGIL POIMO DAN

KUKITE DIA JAILA/THUGIL POIMO DAN

72
0
thusimbu lim
thusimbu lim

Chon le Khan

By- L. Seikholen Khongsai,
Tuibong, Churachandpur.

Vannoi gamtin’a mihem’in jatle nam melchih nale Chon le Khan akinei soh keije. Khantou machal najong khangduing juijin akikhel jing theije. Tunia pat in kum ijat hamkhat hi gahnungvet leu hen, tunia ihinkho man tobangu hi ana umlou hel ahi. Tuni hin jihtho le sutdoh thon thil tampi ihin neidoh taovin kipa aume. Igeldiuva dei umkhat chu Jaila kiti hi ipi hia, Kukite’a dinga ipi aphatchomna um’em tihi gellou khoh khat ahi. Jaila akiti le La’a kisah tho a umin, chintho dia kisei Jaila jong a ume. Mite poavin kiseile Songs a umin, Poetry jong a ume. Hiche hi ipu ipa ten iti anaman uva, hichun tukhanga ichan’a pao thudol’a (Literatue) themjil lampang akithopi theijem tihi chomcha gahveo te.

JAILA KIMAN DAN
Pao kiti hi La pao a umin, chule paolhanglhon a umine. Lapao hi paogil jong akiti. Hiche paogil hi phat tin in akimang theipon, chule jalhang hinkho le phatseh a kihoulim nan jong akimang thei behseh poi. Hinlah, thilkhat chu imit tah’a kimulou, ahivanga ilungmit a alim agong umdohsah teiding ngaito’a thucheng hung kigongdoh pa chu paogil beiya sohdoh thei ahilou jeh a, thucheng khat chun thu tampi akopthei hung ngai ahi. Chule hiche thuchenga chu kumsot tah jou jongle melchih’a hung umding, tu le cha khang geiya hiche La hi hiche thusim kiseina ahi tichu anakiching jing ahi. Chuto lhon chun Jaila hi Ipu ipa ten thilkhat melchihnan anamang un ahi. Mikhat chun Kho khat ahiloule gamkhat anasat tengle hiche melchih nachun La khat anaphu peh jin ahi. Ahilou le mikhat chun thilkhat analhun tengle lhasetna ham kipana ham melchihna a chu Jaila kitichu anaphu ji ahi. Ipijeh inem itileh, masang ipu ipate khang chun Lekhajol le Pentwija jihlut nathei thil ana umpon ahi. Hijeh a chu thusim tobanga hung kiseison son melchih najoh chu anaha manchah u ahi. Hiche melchih thei Lasim ho le thusim ho chu ahinsei son son jeh uva tunigeiya hi eihon ihin het thei nah laiyu ahi. Thuguh laguh khat tou ana umkhah jongle amapa hinkho beiding konle insunga atahsan thei pen mikhat kom’a chu hiche thuguh laguh chu anasei peh a anadalhah ji ahi. Vetsah nan noija La hohi tua ihin jihdoh thu’u ahin, masanga chu Thusim lasim’a ahinsei son son uva, ahinchin tup khah u ahi. Hijeh a chu phat tampi chenungsang hijongle hiche Thusim Lasim (Jaila) ho jeh hin, hitobang thu ana ume ti hetdoh thei hung hikha ahi. Tampi kivetsah jou hihjongle tekahna phabep noija bang hin anaveo hite.

  1. Asa lange satin lu lange;
    Phelgo veitunga kachoi satin lu lange;
    Ami Lange, mitin Lu Lange,
    Naamchem jettienga kachoi mitin lu lange,
    Samang khel leh gollel a simlu kakhai” Chunga jaila hi masang laija ipu ipa ten Chon le Han anabol teng uleh asathasa chunga kihanlho/kihanlah na’a ana’oijiu Hanla chu ahi. Hiche hin avetsah chu Ipu ipa te chun Salu ana’ai jiuve ti kicheh tah in mutheijin a ume. Salu keoseh ahipon, mihem lu jong kihanlho na’ah ajaove. Naamchem kiti hi Chemjam kiseina ahin, hem le thal jong ananeijun, jetlam khut’a hangsan tah a anavaikon jingu ahi akilange. Hiche jehchun Sahang Gal-hang, mi thajoulou anatha nahoule Salu analah dan u phate cha aseidoh mutheijin a ume.

02.“Nang kalhimpinu, Kalhimpipa,
Kalhimchalnu Kalhimchalpa,
Kasonvomnu, kasonvompa”
Kalhimpinun lhim in, kalhimpi pan lhim in’
Kalhimchalnun lhimin, kalhimchalpan lhimin,
Lungmoh jing jeng in lha in,
Lungneisa thinneisa, aneilou hinbahsah in
Nang kachol laisan, nang kachol laivom,
kalhahtai kajuning noijah, kataiche mou in neijin”

Chunga Jaila hi thugiltah ahi. Hiche hin avetsah khun, ipu ipa te chun, gallou aneijuve ti mudoh thei ahi. Hiche gallou thu a hin, lungmoh jengjunga ngol na thei thu ajaove ti aseidoh in ahi. Sahing lai le mihinglai khat chu lungneilou thin neilouva ngoljeng thei ding thaneina athumdan akimu e. Chule Chol kiti hi kham nathei gunei khat ahi. Hiche guneithei doi le ai toh thuchu kitho’a gamsa ham galmi ham chunga chu gallou bumna ana um hinte. Hiche Gallouthu ahivanga lungchin’a ahinchinpha thojiuva, Jaila chin’a anachin jiu ahi. Hitobang thuho hi mijouse het theibehseh jong ahikit pon, gallou choipan bou achoithei ahi. Khosung khat a gallou choipa/neipa ham chu ahinkho abei dinga aumtah le Khosunga tahsan thei le thu hethem khat kom’a anadalhah pehji ahi. Ajeh chu doithu ahinai tia ahiloulam’a akiman leh achoipa chung le achilhah te chunga gaophalou lhung thei ahi. Pathen sanga chungnungjo koima aumpoi.

  1. “Pathennu Pathenpan ihinsan,
    Lhoutinnu Lhoutinpan ihinsan,
    Lhochongnu lhongchongpan ihinsan,
    Lenthang laijah hinsan,
    Thanglen laija hinsan,
    Golkhup in ihinsan,
    Paikhup in ihinsan,
    Kumtin ju nape ding umponte,
    Kumtinsa nape ding umponte”. Chunga lungchin Jaila hin avetsah hi, mikhat a Pathenpa henga kilhaina le kipehthengna avetsah e. Hiche hi chondol’a Ahkang tha kiti Hun bolni leh inneipa kilhaina chu ahi. Pathennu le Pathenpan phatthei abohna din ataovin, chule mihaosa mi incheng, milen milalsa ho, ahilou le apu apate phatthei changho minphah in vangle phahtthei anakithum jin ahi. Hiche hohi thu le Jaila’n anachinpha hih ule tunia khangthah eihon, ikhohsah lou dungjui un alahna dingjong ihetlou diu ahitan, thugil lagil tampi inei houhi, patlei laija pahlha’a lengmanghel thei patpah tobang anahi ding ahitai. Christa anamu phah lou vang un thule la kipatna jouse’ah Pathen nule Pathenpa min anapat masatlounao ana umpoi. Hitia chu apu apate phat theina anape Pathennu le Pathenpan amachu phatthei ahinboh a, neile gou, mim le chang tampi ahinnei tengle Kumlhung lhalhungin Maicham sem’ingting, hopsom nape nange tina tobanga Pathen henga kilhaina le kitepna anasem jiu mudoh theijin a ume.
  2. Singmang gao nalheitan, Hangmong gao nalhei tan,
    Thitougao nalhei tan, Touhing gao nalheitan,
    Vumseh gao nalhei tan, Jamjang gao nalheitan,
    Doipi lai, Kaopi lai kachu lal ahitai,
    Lamlhah khomola thamthei ahipoi.
    Nipi lamjot toh, lhapi lamjot toh hinbahsah in.
    Imajousen ana ot in,
    Asa asem Pathennu, Pathenpa,
    Lamlhah khomola thamsah hih in,
    A’engbol umsah hih in. Ipu ipa te chun Thikholkhul kiti, mikhat chu athi tengle alhagao chu mithikho a chu lhungding ahi ti anatahsan un ahi. Hijeh chun hiche mithikho alhungtheina ding chun ajokhat le lamkah tuikah ah boina hahsatna tohkhan tin mahthah khante atiuva, gaopha gaohoi alhah khum uva, Sapi Humpi thatsa apu apate mihangsan ho min pan’a chu alamkot ahonpeh jiu ahi. Hijeh chu lamlhah khomol’a thamden thei nahipon, nipi noi lhapi noija lamjot banga najot ding, imajousen nalam na’ot intin, Pathenpan jong lamlhah khomol’ah hinthamsah hih beh in chule a engbol’a jong hin umsah hih in tia mithi chu akoidoh kon’uleh taona ana manpehjiu thu le la chu ahi.
    (Thusim’a kon)
  3. “Tingo nanungteng,
    Nachun le Najon, Joukho sangthing lhamin eisol’e.
    Kasemgo pantange onthinglel sanga,’
    Tingo dalang kasaimo jen’e.
    Simlam kalham le Sim nungah to kakisai sai je,
    Maal lam kalhamle Maal nungah to kakisai saije”.

Kukite gollui thusim’a suhmangmo Pu Ngambom le Pi Khupting kilungset hinkha kum sottah genthei le jumle ja tincheng thohlhum keija anakingai lhon vanga inchen louchen chule hindan kibahlou jeh a thinan anakhen lhon jouva Ngambom’in Khuptinh nule pa louva Thingjabong alham’a thingchunga alasah chu ahi. Alungset valjeh chun Sim le Maal langkaija thingbah ho alhamna jouse chu alungthim lung gel chun Khupting lim le melbou amujinge ti hiche Jaila hin aseidoh in ahi. Akum le alha kihe tahih jongle kum ijat ham masang chun amani hin kilungset hinkho giltah aneidan jong akimui.

  1. “Nachun thimthu jol’a jopding’anjong
    Athu damdaiya kalel ma’n neibangin,
    Kitoh ing kitoh ing,
    Aimuol lhanga Jonlhin toh kitoh ing,
    Aimuol lhanga Jonlhing toh kakito,
    Sahlhong ka jaitha anemlo taime.
    Aimuol lhanga Jonlhing toh kakito,
    Hungin Sielcha Jonlhingto hung leh’in”

Gollui thusim’a kiseimangmo Nanglhun le Jonlhing injong kilungset hinkho giltah in anamang lhonin thinan akhen loule khenlou ding geijin anakingai lhon ahi. Hinlah Jonlhing nule pan Jonlhing chu aneite Seikam toh kicheng din ana kinopto pitan ahi. Alangkhat’ah, Nanglhun chu Jonlhing man’a khumding Sielkang namu joule nakichenpi ding ahi tin anasei peh un ahi. Neilou vaicha hijongle Nanglhun chu anavai kon in, athuh apa hijong le Jonlhing manding ahipoule tin nah nah a ahinmu Sielkang khat ahinkaija ahungle Aimuol lhanga chun Jonlhing hinpuija hungho toh akitoh un ahileh Nanglhun jong anehlai tha asoh tapon, alunghan toh ajachat toh seiding tomon chung Jaila hi asah khum in a Siel ahikai chu Jonlhing toleh din akoutan ahi.

  1. “Amin thimthu leljongleh
    Katuoi thei’ang asen nalaiye
    Tin lel’o Chun le Kajo” Chunga Jaila akon hin masanglai chondan khandan’a kilahto le kijonto dan neokhat mudoh theijin a umin ahi. Tilchun koima jouse agolngaitah toh ana kicheng umbesh sehlou ahi. Chujeh a thile man toh’ah tantah jong ana umda lou ahi. Sum le Siel ngaichat jeh ham’a achanu nungha lhingchen loulai khat chu dasa sa’a amani gel chutoh kichensah teidign ana ngaito khah lhon jeh a, “Min eithum henlang eidong jongle kachanu jinei thei ahinaipon, akum achapangjep nalaije tilhon tango kanu le kapa” tia kilhaset tah a kana Jaila anakibol khat ahi.
  2. “Kieng kineiya von toh ma kijop ta,
    Gol ngai lunglaiya nahunglah em’e”

Hiche Jaila’n aseidoh nom pen chu, masanglai jin nungha khat le gollhang khat ana kingailhone. Hinlah anute apate phatsah loujeh ham chun ana kicheng lhon tapoi. Khonunga chale nao aneitah vang in numei nu chun pasal chu sumil louvin ageldoh jing nalaiye ti muthei ahi nalaiye.

  1. “Mu khothim noija, gol tholthot,
    Kamom ding hitam! Jang dummom”

Masang chun khantouna analhahsam jeh chun kijahmat tona, kihoumat theina ana umpoi. Hinlah phatkhat chun lekha kithot tona ana umnai. Ana umjong le ipu ipateu chu lekha hebehlou ahijeh un hiti ho jongchu amanchah je anahetlou u ahi. Tulaijin vang hoichan’ah umjongle naichaa um banga kihoutheina, kijahmat tona baikhen in a umtai. Jaila sempa hin kipale lhaset akop dan in akilangin ahi. Galgamla tah’a um ahin, agolngaitah chun gamla tah a kon’a Dummom ahinthot danin aseidoh’e. Hiche Dummom chu jan muthim noija lunghel tah’a aumpet a ahinlah doh’a, gol’o neihin thot Dummom hi janthim noiyah lunghel ban nan momtange tia akilhamon danjong mudoh theijin aume. Hitia angaitah khat in gamla lheh jongle Dummom anathot theichun, amani kikah’ah kingailutna sangtah ana ume ti akilang lheh jenge. Pu Enjakhup Kholhou chu I WW laichun British hon ahaosat chankhompi phabep toh anaman un henkol anakaijun, Sodiya Twikal’ah chomkhatpi ana umuve. Nikhat chu ajinu Pi Chinvah in angaitah ajipa chu angailut vetsah nan Jangdummom anathot in ahi. Hiche anathot chu ajipa’n jong kitup keichan anamu kit ahile lunghel lhaset chu umthei mong ahi.

  1. “Theilou koljang toni banna gingdeng denge
    Japan lenna Huilen kuong,
    Pego Lhemlhai Saigin bang mao deng denge,
    Vantham jol’ah Japan lenna.
    Amaodeng denge Japan lenna khat mongmo
    Vailou kon sunsot selung hemtante.
    Atwi theikhong tobanga gingdeng deng gin
    Ngui heuve Japan lenna vantham jolla”
    Chunga jaila hi lungset umtah khat ahin, leiset a thisoh melchih theitah khat aseidoh theijin ahi. Vannoi Gallen Khat lai thu ahitan, Eimite lah’a jong gal chu ana ume ti photchetna khat jong apehtha’n ahi. Gal le tol ana umjeh chun chunga lasem pa hi lunghel tah le lunghem tah in ana ume ti hetthei ahi. Amachu Sepai pang hamkhat hinte, In le lou adalhah’a hetphah louna gammang noiya a’umlai hin chunga Japante lenna hunglen gin chu ngei asan, Lhemlhai kisai gin toh bangleuvin ngei asan ahi. Ama chun a’insung mite ham ahilou le agoldeinu ham chun aloukon na mun’ah anaja leh amajong keibangin lunghel intin klunghem teijin te tia anagel ahi. Twi kisun gin le Twikan laiya twilon gin banga Huikong gin mangjel jel chu ngui heu heu asa’n alunghelpi lheh jenge.
  2. “Henkol kaiman kolmang hinkho khong intin,
    Than in munjang kom hinlo jonte,
    Chung Pathen sah ihiule lungmol’in vaitham poute” Chunga Jaila hin aseidoh nom penchu, Lasempa le aloiho hin, galpi khat anangun/adou’un, henkol akaijun gentheina sangtah atoh uve ti akimudoh theije. Genthei tah a Henkol ikaiju hi Vannoi gamtin’ah kithang tante. Kitomo na’a neilou ding thilkhat chu hungmon’intin Than hungchu’n te. Ipidia eiho hetphahlou gam’a, igamle igo, chule iji icha kidalha’a migam’a ikitomo diu ham. Chunga Pathen phatsah ihiule moh’a imohmanthah diu ham? tia asei ahi.
    Hiche jaila hi hiti ahi: Vannoi Gallen Masalaijin Pu Enjakhup le Pu Tintong chule aloi mi phabep chun Gamle go huhnan British te khut’ah henkol anakaijun, Sadiya Twikol gam’a ana umlaijun Thang anakam’un ahileh nikhat Sa ahinpou vin, hiche Sa hi tunin Jampipa Pu Kilkhong chang hen atiuvin Kilkhong Sitlhou in’ah alhuh taove. Kilkhong in jong as ting chu alan leitol’a thingleh ‘ah akikhaijin “Kasating Pathen kapeh ahi” atileh, Aisanpa Pu Chengjapao Doungel alung hang in ain lam ‘ah ache tan ahi. Chu in Pu Enjakhup Kholhou chun khat kisei le khat lhasen tin, khat kisei le khat lahsen tin, hitia pihi i umdiu ham ? tia chunga jaila khu anasem khah ahi. Hitobanga hi jaila hin ichan geiham khat a masanglai peh a thilsoh thule la ho chu thusim lasim’a ahinchin peh uva, tunia hi namsunga suhmilthei louding thisoh tampi hi tuni geija michih theija eikoi peh nahlaiju ahi. Phate’a ivet leh ipu ipate chu thule la chintup je anathem lheh un ahi. Tua eiho umdan hi ivet le hiche paogil lapao ho khohsahna inei thei behseh pouvin ahi. Midang neile gou ikhohsah un, eima’a khohsah le semphat ding hi inahsah behseh loudan un akilang jie. Tukhang jeng in jong gah hetthei ding thil tampi vetsah na neileu hen: A’um talou Pu Aneh Chongloi, Khengjang Haosapun agollhang noplaitah a, Pipy Bus, Lenchonghoi, AK Bus” tia la anasem chu ivetleh, chulaiya Kangpokpia pat Imphal gei analhai Bus ho nunggeldohna a umthei kit in ahi. Hiche Jaila hochu ana um tahih le chulaija hitobang Bus ana ume tia koiman geldoh a jogn anei loubeh ding ahitai. Namsunga gunchu tah a Jaila eisem peh jingo Ng. Ncy Doungel in jong tang louhel in Gamngaila, Joldeila le Lunglen la tampi eisemdoh peh taovin ahi. Hijeh chun Jaila khat chun ipi aseidoh nomham tipa chu kholdoh angaijin ahi. Aphat dungjuija thilsoh ho, khonung peh le avel’a eihin geldohsah thei kit ucgu Jaila hi ahi. Chule mihem hi thu jengseh a kiminthei ahipon, Jaila hin ichan gei ham khat a mihem lungthim asuhmin thei ahi. Chubanga khel jong akikhelsah thei ahi. JAILA’N LITERATURE AKITHOPI DAN
    Chunga ihinseima bang un, Jaila hi thucheng khat in thu tampi ahinkaigop thei nadinga hi Lapao le Paogil hung ngai ji ahi. Hiche Lapao le Paogil akiman tengle, thucheng hilchet nadinga chu thucheng tampi hung ngai kit ahi. English te khun Poets ahiloule Poetry akhohsah pen nao khu, thucheng khat’a kon’a thucheng tampi ahung pundoh theipa khu angaisang pen’u ahi. Chujeh a khu thucheng akisembe be jengu va vannoija thucheng haopen te hiuvah ahi. Eihon jong paogil ahilou le Lapao tampi ineihou hi adeh’a tulaiya khangthah eihon pan nasatah a ilah lou ule neile gou thupi tah a ineiju Lapao le Paogil hohi imansah gamdiu ahitai. La’a isah uva, maodeng denga ipen vang un, ipi kiseina ham tia ikidohto tengle koiman kihilchen thei kit lou paocheng tampi ineiju ahi. Hiche hi ilhahsam nao pen khat in kamudoh in ahi. Jaila keuseh ahipon, Paocheng giltah tah ho hi hilchen na (Discription) ipehthei ju angaijin ahi. Hijeh a chu, Jaila le thugil Lagil hohi imanchah uva ikisemhoi uva, ikhantou sah diu hi khonung khang ijat hamkhat a literature lampanga khombul iphu nao khat hung hiding ahi. Midangte pao jong ikhohsah uchu khkantouna khat ahinai, chuto banga chu eima pao le ham, thucheng lacheng hohi ipunsah theina diuva hin, thugil le lagil ho kholthuh angailheh jenge.
    Tekahnan: Isopiu Ncy Doungel in,”Saoson dongkot” tia asei hi ipi kiseina ham ? Thudoh ahi. Ahileh eipaola hingal, ipi ham la kihe lou. Ahia lah La’a isah kit ule angei tave kiti kit nalai ahi. Ipi kiseina bon kihe lou iti ngei isah kit theiju ahidem ? Tun, Saoson Dongkot hi hilchen ding tileuhen thucheng ijat’a hopkhen theiham anaveo te. Saoson- kiti chu paolui khat a iseile Saophei ahilouleh Khummanlhan kiti ahi. Hichu Inn (Home/House), ichennao inn kiseina ahi. In akiti tengle insangson, inn, indansang, inn mai mai, inn neo le inn len jong himai thei ahi. A ipi chu hileh hiche a kisei hi inn kiseina hi ti ihetaove. Ahileh Dongkot- hi Kot kiseina ahikit’e. Kot hi, Kotbeng, Kotphung, Kotkhahphung, kelkot kiti ajat jat a kimang jong aumthouve. Alangkhat’a Dongkot hi Muol khat le Muol khat kisuhto na’a Dienga lampi chepai jong chu Dongkot kiti kit ahi. Hichu ahitengle athugol’in ahinpoh kit ahitai.
    “Naamchem khat in” hiche thucheng hi konkhat in Jat le Nam kiseina dan in agelin ahi. Hinlah hichea kiseipen hi Chemjam/hemto kiseina ahi. Kithuto ding dan chu Galpi vaikon chun achemjam cheh uchu bidoi khat kitoh chet a, galmite lang angetcheh ding tina ahi.
    “Gol lungtoh to ponang kilhong” hiche hi, kapankhompi kagolcheng toh kilungtoh tah le kihanlho tah in, detchet in kapangkhom jinge kitina ahi. Hijeh a chu Jaila le Lasim hi tukhanga Literature thaholpi a pang jing thei ahi. Pathen lungsetna jalin, Kukite lah’ah Lasam themle Lasem them tampi I umdoh thei taovin, simtho keu hilou vin, Sahtho le Lasah le Lim vetthei jong tampi ibol doh taovin, ikhantou nao khat chu ahi. Hijeh chun tulai khangthah ten neile gou thupi tah a ineiju Paogil ho le Lapao ho hi igelkhoh uve ikhantousah diu hi amichang cheh mopohna a ikilah diu dei a umlheh jeng in ahi. Literature khangtousah kiti chu Jat le Nam kihetchen dan khantousah na ahi.

Articles hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleSOTTAH KISEL MANG THEILOU HO CHU IPI PI HAM?
Next articleCHIEFTAINSHIP IS THE BEDROCK OF KUKI NATIONALISM

LEAVE A REPLY

Please enter your comment!
Please enter your name here