Home L Seikholen Khongsai KUKI TE CHONDOL’A GOLCHA KITHANGKHONG THU

KUKI TE CHONDOL’A GOLCHA KITHANGKHONG THU

50
0
kuki traditional attire
kuki traditional attire

Chapter- 88

By- L. Seikholen Khongsai,
Tuibong, Churachandpur.

July 02, 2020 (Thursday)

THUMAKAI (INTRODUCTION)
Kuki te inchen khosah kivaipohdol leh insah inlhang chule golcha kivop dan hi jat chom chom tampi a ume. Hiche kivopdan kisamkai nahi aboncha Khankho kiti hin akankhom soh kei ahi. Khankho beijin Kukite achengkhom thei pouvin, hiche kingailut kihetthem leh kikhoto naho jouse chu Khankho a kingam sohkei ahi. Khosung khat a chengkhom jouse jong pendol’a ucha mong mong anahitahih jongleh nupa pipu, tucha becha a kikankhom ahiuve. Hiche a kikankhom loujong Jol le gol’a kikankhom thou thou ahiuve. Kukite achenkhom nau Khojol sunga hin Lompi Lomlhang kaija natoh loulho abol jengseh u hilouvin kiloikhom naleh thaje khomna jong lamchom chom in abol jiuvin ahi. Hiche lah achun Thangkam khom (Thangkhong) kiti jonghi khat ahi. Kukite hi Sahang lu le Gal-hang lu simte anahiu ahi. Thangkam kiti hi aminin Sakhi thang tin anaheuve. Sakhithang hi mikhat injong achang abolmo ahipoi. Hinlah Khosunga loicha golcha le Jolcha kingailutna apilhinsah a, kihet them naleh kingalut achun amani khang jengseh hilouva, atu achate khanggeija hiche nehkhom tohkhom le kithokhom jeh a kilungset kingailut nachu a-umjing theina dinga Kithangkhong hi anabol jiu ahi tihi tukhanga khangthah ten ahetding angaijin ahi. Tuhin Kithangkhong dan chomcha cha anaveu hite.

KITHANGKHONG DAN
Kithangkhong dan hi Golcha kithangkhong a umin, Jolcha kithangkhong a umin chule Ucha kithangkhong a umin ahi. Hiche lah achun inni inthum kithangkhong a umkit in, inli in-nga kithangkhong a umkit e. Akithangkhong ho atamchan in Tahngdung jong asaosah un, thang tampi pi akam jiuvin ahi. Inli innga kithangkhong vang hoitapouvah a umpoi. Kah lah a khosung khat a khat le ni a umleh ahat tah ahi. Ahin, Golcha le Jolcha kithang khong vang Khosung khat ah li le nga cheng a-umda poi. Ipi hileh kithangkhong dan hi Khankho ahin gahkheh a juiteidinga DAN kisem tum jong aum deh pon ahi. Hinlah Intamtah kithangkhong dan le Golcha Jolcha (mini bou) kithangkhong kikheh dan noija bang hin anave kit ute.

JOLCHA GOLCHA KITHANGKHONG
Jolcha le Golcha kiti chu mini bou seh tina ahi. Amani chun Thang akam lhon’a vangphat pia Sa ahinpoh lhon leh amani kihoutoh dungjuiya khatjoh joh in’a alhut lhonding ahi. Tekah nan Ngamtong le Hemjil te golcha hi akithangkhong lhon tai. Sa ahinpoh masat lhon chu Ngamtong in’a alhut lhondia kihoutoh lhon ahitai. Ahileh hiche Salu chu Ngamtongin akisim ding ahi. Aban ahinpoh kit lhon tengleh Hemjil in’a alhut lhon ding, hiche salu chu Hemjil in akisim ding ahi. Hitia Sa kilhutna pachun alu akisim jeh a Sakin a cheding jouse jong mo akipoh ding ahi. Hiche a amoh moh chu a-in niuva anehkhom diu, kibangchet a kihom lhon ding ahi.

INTHUM INLI KITHANGKHONG DAN
Inthum inli kithangkhong hovang hi Sa ahinpoh tengu leh amaho lah a ahanpen pa in’a chu Sa alhut jjiu ahi. Mi atam jeh uvin Sakin kiboldan abolji tapouve. Ahin Sa ahinpoh chan uva Salu kisim vang chu aban ban a kihom diu ahi. Tekah nan amaho – Otngam, Toljang, Hen-ngul chule Semngam, amaohocheng hi akithangkhong tauve tiute. Amaho lah a chu Otngam chu ahanpen ahi jeh in, Khankho dol chun Otngam maija nachun Sa masa chu Otngam in’ah alhut uvin, hiche Salu jongle chu lenhen neo jong leh Otngam chun akisim ding ahi. Aban a ahinpoh kit tengu leh Toljang, aban’a Hen-ngul aban’a Semngam, hitia chu asa poh uchu Otngam in’ah lhut jongleur Salu chu min kigollha banga kihom soh keidiu ahi. Hiche a amaho kihoutoh dungjui a chu koivang lenpen em chu seithei hitalou ahi. Avangtoh pa pa chu Salen Samang lu chang ding ahivuin hiche a hi koiman nopmo asah thei lou diu ahi. Salu kisim chu hiti chu ahitan, hinlah asa poh uchu inli tah hochun a-inko kouva aneh khom diu, aneh moh chengsu jong chu kibangchet a kihom kit diu ahi.

KITHANGKHONG HO MOPOHNA
Kithangkhong ho mopohna kiti khat umkit ahi. Seithei louva vangset pia kithangkhong hochun khat gancha- Loi le Sel, Bong le gancha dang dang apohlih khah tah leh aman amol kibang chet a adit khom diu ahi. Mihem apohlih khah u jongleh kibang chet a leo diu ahi. Hiche thu hi aboi amah ahung um tengleh Haosa upa, Semang Pachong hon thu atanlhah dungjuiya kibang chet a leo diu ahi tihi Kukite chondol’a Kithangkhong chung thu’a hetlouva pomo phabep, het theidia kahinsut doh ahi. Seidinga kilom jong um nalaiding ahin aphat dungjui in ana update kit thei ahi. Kakipeh e.

Articles hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleKANGAI CHULLOU ZOUZAM-II
Next articleKAKINEPNA JOUSE ABEI NUNGIN-VI

LEAVE A REPLY

Please enter your comment!
Please enter your name here