Home L Seikholen Khongsai KUKI TE CHOLDOL A LAM (CULTURAL DANCE) HO

KUKI TE CHOLDOL A LAM (CULTURAL DANCE) HO

60
1
KUKI TE CHOLDOL A LAM

Khankhology Online Textbook

By- L. Seikholen Khongsai,
Tuibong Churachandpur, Manipur
(07/08/2022) Sunday

Thuphon:
Kuki te hi ipu ipi khanga pat Chon le khan kicheh tah neite ahiu toh kilhon in, chondan lhongpi hoitah a juite jong ahiuve. Chule Nam khat hinan umna chenna gamkai dungjui in thusei lasah leh paocheng mandan neocha cha kikhehna umjongleh akihou tengu leh kihoumo hel in a umdeh pouve. Namkhat hina in Chonni Hanni, Sa-ai Chang-ai abol nitengu leh nam lam le Nam la hohi khohsah tah leh thupi tah in ana tahlang jiuve. Adeh in Lomju neh nikho leh Lamkol le Lasah hi anaha bol deh uvin ahi. Chon le Han kibol nikho le vang Khankho nunkho ahatho kit uve. Chonbolpa chun a-upa dol, apu pa dol leh ja dinga dol ho jouse jana sangtah anapeh ban ah Pute jana sangtah jong anape ji in chule apu te akon in vang le ham ana kithum jiuvin ahi.

Khopi Juneh ham Lompi Juneh nikho tengle vang Golnop le Lam ho tho nan anamang jiuvin ahi. Tulaijin Christian tahsan ijui phat un Pute Pate chondan hochu Chonset mel in imu un, ithet bol jengun adih lou lam in ikihil un ahileh ipu ipa chondan leh nam khat hina kihet dohna Identity jouse jong not thap in inei gam tauve. Hiche hi dihlou ahin, kin thupi nikho lebou mipi vet mai maidin itho ji un, hinlah atah in inei thei tapouvin aphamo lheh jengin ahi. Ipu Ipi te vang chun neija aneitho jengu ahin, kin thupi khat ananei tengu jongleh kihil thu thu umlouva amilip chun Nam Lakai kiti nangho Lakoila natiu khu asamo beihel a anasah thei soh keiju ahi. Hibanga chu eihon jong koi ihi ikihet nao Identity chu neija ineitho u ngai ahi. Ajeh chu ihina a umsah ngai mong mong ahi. Mikhat in puchon pachon ahin tho leh mingol in imuvin hiche thopa chu ngol ahipon avekhel ho joh chu ngol joh ahiuve tichu amasa pen a ihet diu ahi. Ajat anam chondan khohsah a khantou sah chu miching ahin Pathen in ahinsemna Nam chu achoisang ahi.

KUKI TE LAMHO/PULAM PALAM
Kukite lamho tin sei leuhen dih pen ding ahi. Ajeh chu Pulam Palam tia kisei hi dih jou lou ahi. Pu te Pate bouseh lamthei u ahipon eiho jouse dia jong ilam u, ichon nau ahin pute pate bouseh ipeh doh theiju hilou ahi. Ipu ipa te a hungkon ihisoh keijun ahi. Tulai khangthah ten hiche lam hohi Audio a La lha a lam itho hou hi kipa chu a um nan hinlah dih lou ahi. Lam khat itho ding teng ilam tho chu amin jong het ding chule dih nam dih lou ham tijong vet chil kit ding ahi. Nampi khat lam ho, ipu ipa ten anabol doh hochu suhset theijong ahipon chule donda thei jong ahipon, moh lam lam thei ahipoi. Tulaiya Pulam Palam tia iseiju toh kilhon in NamLam hohi khangthah ten a-umtalou janmol lemsa pute pate ipehdoh dan uvin kamu e. Pute pate seh seh Lam naleh Chondan ahipon, Kuki te Nam Lam le Nam Chonna tithei leuhen ingailut jap diuvin aphai. Hijeh chun Pulam Palam iti sanguvin Namlam tihi dih jo ahi. Namlam ititeng eiho jouse jong ijaovu ahijeh in Khangthah ten jat le nam angailut jeh a ilam dan hou jong ki ngailu jep ahi. Hiche Namlam kiti hi aneilou behseh umponte. Kukite Namlam hi kei het dol in:-

  1. Suhta lam
  2. Sagol-kengkhai/Sagol pheikhai lam
  3. Pheiphit/Theiphit lam
  4. Saipi Khupsuhlam
  5. Vakol lam
  6. Jangcha lam
  7. Vaphol/Pholva lam (Dapa Chon lam)
  8. Thimjin lam
  9. Gosem lam
  10. Lom lam
  11. Sa-ai lam (Hanlho)
  12. Chang-ai lam (Sunglho)
  13. Salulam
  14. Lamkuol-lam
  15. Selpanglap/Seltolnim
  16. Khupsonte kiti aume.

Hichengse hohi aphat leh anikho toh kitoh a kikhieng ji ahi. Hiche Nam lam helou hochu masanglai ipu ipite chu milhing louvin anagel jiuve. Hijeh chun mijousen anangailu cheh uve. Tulaijin ihina dihtah ngailu akitam tapon, eima hina sanga midangte hina ngailute dan in i-umtauvin ichekhel nau lenpen khat in kamudoh tai. Chule kahin sei bangin tulaiya music toh kitho a ibol houhi ichondan u anahipoi. Ahoi hoina a kibol chu atah hilou ahi. Khangthah ten thu atah hetding igelkhoh lou jeh uvin ihinau jong ikimansah gam tauve. Tuapat ipi kin hijongleh kinlen kinneo ibol nauvah Namlam itho teng uleh atahpa chu ahethemho kidoh utin neidoh teija manchah teiding geljou hite. Vannoi midang hon koi ihiu ahetdoh thei nading uchu ichon ilamdan bou ahi.

Chunga kiminphah Kuki te Lam hohi ajeh le akoudoh umsoh kei ahi. Hiche Lam ho hung kipat na thusim le alamdan hohi kisun le saoval ding ahin atum beh in nikhat le Nam Lam (Cultural Dance) inei houhi akipatdan thusim (background history) le lam kibol dan chanchin ho hi kichehsel a ihin sut kit diu ahi. Tuhin achom lam in chomcha chan sei jong leuhen hetna lhongpi (general knowledge) din them cha cha gah sei ngal ute.

  1. Suhta Lam : Hiche Suhta lam hi kon khat in Bamboo Dance natiuvin tukal nasei tah lou diu ahi. 2018 Kum in Khumanlampak Stadium ah Governor nu jaona khat a Suhtalam bolnan kalamkai jin, background history hoitah kasut chu english a translate kabol uva kasei uchun Army Brigadier, CRPF IG, DIG, Manipur Police IG le DIG chule BSF DIG hung jaoho chun Suhtalam kibol na thusim chu kidang asah lheh un ahi. Masanglai Kuki ten Gal abol diu kon leh Khopam a Lhavah noija Suhtum ata uva, hicbe sunga chu Gollhang ho achopsah u ahi. Khong akhet uva khong gin dungjui a lam uva, akeng ohkha kha chu akai doh uva alam gal kai hochu mifel le mihat atiuva gal kon dia analhen doh jiu ahi. Hiche hi Suhta lam kiti chu ahi. Bamboo dance tihon tukal naman tah lou diu ahi tichu kum 10 masanga pat a kana lhangsam jing khat ahi. Mite paocheng sanga eiho paocheng joh iha khohsah diu katina pa chu hiche ho them them jeh hi ahi.
  2. Sagol kengkhai lam: Sagol hi ihet bangun Gamsa te lah a khat ahi. Sagol pi hin nou akai lai leh gamlah a lhakhom jiu ahi. Ijem tia api chun golgin khat ajah teng le khat vei hungbu ji ahi. Api butgin chu anou ten ajah teng uleh kal sonpai louhel a alam jot pet u, jet keng akhai hihen avei keng akhai hijongleh tol chon ging talouva akeng akhaiden uva, api phut gin chu angai soh kei uva, abil kol u atunjang kei uva khothe ngai geh a api in avel a abut/aphut gin chu angai keiju ahi. Api chu O nem a abut lhah le nomtah a lha kit jiu ahi. Ijem tia api chun O sang tah a ahung but gin le api lhai nalanga chu jam soh keiju ahi. Hiche jeh a chu eiho jong itoh ibolna jouseuva ikilungto theina diuva Haosa Upa Khosung lamkai ho vaihom dung jui a ikalse dan u akito thei nading vetsah na a Sagol kengkhai lam hi ibol jiu ahi. Kilungto kithu ngai vetsah na ahi.
  3. Pheiphit ahilouleh theiphit lam: Hiche Pheiphit ahilouleh Theiphit lam kiti jong hi kilungto ding dan le kalse dan kibah theina lam khat ahi. Hiche hi theiphit jong tithei chule pheiphit jong tithei ahi. Theiphit chu ipi ham? Theiphit chu theikhong neocha kimut ging tina ahi. Pheiphit chu ipi ham? Pheiphit chu pheiphung son dan le kal sedan kibah theina chu pheiphit kiti ahi. Lompi vailou kon laileh louma hei akito thei nading le mapoh dan akibah theina din Lom lamkai pu le jet le veija mahei hon (lom lamkai mama) hon theiphit chu amut un , alaija chengsen lung kitoh tah in heijam asam un louma anahei khom jiuve. Ahiloule Changden ni leh chang tumbu poh na a kalse dan akibah theina din theiphit hi ama mut jiuvin adangsen Heijam asam un kalse kibang chet in lam anajot jiuve. Hijeh a chu kalse dan kibah thei ji hat nale machalna ahi jeh a hiche nadingle mahei dan kito theina dia Pheiphit lam hi kibol ji ahi.
  4. Saipi khupsuh lam: Saipi hi bou sanglai khat a kona akum lhah ding tengleh chingthei tah a kumlha ji ahi. Eiho jong nitin hinkho iman nauva kipal lhuhna inei louna diuva chingthei tah a Saipi khupsuh banga hinkho iman diu vetsahna ahi. Hijeh a chu ilam teng uleh olheuva ngan dingdenga chingthei tah a khup kisu a kilam ji ahi. Ala jong ngan heu leh kichom heuva kilam ahi.
  5. Vakol lam : Vakol hi ihet bangun Vacha jat khat ahi. Amuh alen in asaovin chule Vakol te hi alen tengu leh chom lou kah a kinga te hilou ahi. Gam lha tah a kon a hung leng uva gamkhat a kinga pa te ahiuve. Hijeh a chu alen ujong le lhaving kitoh chet a ajap uva ol heuva, kitoh tah a lengkhom dil del u ahi. Eiho jong ichenkhom pi mihem ichankhom oi hotoh kitoh tah a hinkhom ding avetsah ahi. Hijeh a chu Vakol lam ithoteng uleh khut teni hi nemdeh le kitoh chet a kijap a, keng teni jong kitoh chet a kison a kilam ahi. Hiche lam jong hi kilungto dingdan le kitoh chet a lenkhom ding hinkhom ding dan avetsah ahi. Vakol te kilungtoh tah a alen bang uva eiho jong ichenkhom pi, ineh khom pi imihem chanpi te toh kilungtoh tah a lenkhom ding vetsahna ahi.
  6. Vaphol lam: Hiche lam hi Pu Dapa chon bol nia a upa Dathang, Vaphol kisoh pan anaopa Chonpi khin nia abol peh lam chu ahi. Mihem hi ipi kisei jongle sopi sanggam hi kingailutna tailou thildang bat neilou ding vetsah na ahi. Vaphol jong Dapa Chon Kinpi nichun Vaphol mul chu abot doh in anaopa delkop kah ah atah peh, atot peh tan ahi. Hiche toh kilhon chun lhahna lamkol khat akhien peh un mitlhi pum in lamkol anakoijun ahi. Ajeh chu Vaphol chu agam a akile jouteng leh mihem le vacha chu chengkhom thei ahilou jeh chun avel a kimu kit talou dia lhahna anei ding jeh a hiche Vaphol lam chu a upa Dathang (Vaphol) chun lamkol chu anaopa Dapa anabol peh jeh a Vaphol lam kiti ahi. Hiche lam jong banlhang kitoh dildel a kivat a khup kison a kitoh tah a kilam khom ahi. Tuni chan in Pu Dapa’n delkop a anakop Vaphol mul mel chihnan Pon mongvom hi Kuki ten ikichin jingun ahi. Dapa chu koiham tihi tuni chan in ason apah ten thusim jong hoitah in akichin tup uvin Pon Mongvom jong akichin tip jing nalaijun ahi.

Adang dang lam hohi nikhat le achom in ana sun kit tau hite. Hijeh chun kin thupi pi dunga Nam lam itho tengu leh Music lha chohthe thu a bol sanga, alam ding nunghah gollhang hochu avel a kigol uva La asah diu, lailunga cbu alam ding hochu la le khonggin chu akhien diu ahi. Chunga kisei aphat dungjui a kintoh kitoh a lam na La hochu asah uva, alam hochu alailunga lamdiu ahi. Chule suhging thei Selki, Khongcha, Lhemlhai le adang dang manchah inei hou toh kitho a i-Nam la isah uva Nam lam a ilam diu chu atah ahin akitho thu akisem thu sanga thupi jo ahi ti jong isuh mil lou diu aphai. Kakipah e.

©️ copyright: Hiche articles hi asunpa phalna bei a mundang a publish louding in temna ahung kinei in ahi.

Articles hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Thusimbu mobile app ki install nom hon Google playstore a “thusimbu” tia search nabol u le namu lei diu ahi.

Previous articleGULPI LHUNGPIA NEIPA THUSIM
Next articleHEPI HEPI NATAI CHE PHOU AHCHA’N ATHAIJE LE TULAI KUKITE

1 COMMENT

LEAVE A REPLY

Please enter your comment!
Please enter your name here