Home L Seikholen Khongsai Kuki pasal in Them thamdan het angaije.

Kuki pasal in Them thamdan het angaije.

61
0
Kuki pasal in Them thamdan het angaije.
Kuki pasal in Them thamdan het angaije.

KhankhologyMedia

By- L. Seikholen Khongsai,
Tuibong Churachandpur, Manipur
31st July 2022 (Sunday)

Them kiti mipaova Arts tiding ham ahilou le thil boltheina tiding ham hi Kuki pasal hon masanglai thinglhang gam chen nop lai, Doibom khai laileh Khosung kivai hom kitup laija pat ahin bol pat u thil khat ahi. Them iti tengleh akaigop hi atam in, insung thil le lo chule nitin kimanchahna ho a poimo jouse semthei sah thei na khut them hi Them kiti jeng ahi. Them kiti hi keiman mangjong leng gamkai khat a chu Them ana kiti lou mai thei ahi. Them kiti thucheng hi Pasal in asem thei le asah thei thil ho kisemna chunga kimang ahi. Adeh a Beng, Paipeh, Longkai, Pocha, Godal, Kongvo Sinkhup leh Go a kona naang kiso a kimet a kisem doh ho seinan akiha man in ahi.

Hitobang Them tham dan chung changa poimo tah chu ipi ham iti leh tulai in khantou machal dung jui in insung thil tampi hi eiman kisem thei hih jong le sum le pai inei pouleh idei dei neithei chu ahitai. Hijeng jong leh iseidoh nom uchu, masanglai ipu ipa ten Them tham dan ana ngailut uva ana khohsah nau jeh chu ipi ham iti leh, mihem khat in ibol itoh jouse hi eija (own) ahitheija chule eima chondan khankho (Culture and tradition) toh kanbeh thei ahina dinga abul phu doh (foundation) apoimo dan le agil dan anahet jeh uva gunchu tah a thil ijakai chu anabol u ahi. Them a kona kibol doh thil lui hochu tunia eihon eiho hi koi ihiu kihet doh theina (Identity) a hung pangkha kit ahi. Hijeh a chu sum le pai neijeh a ichondan ho donda ding tina hilou ahi. Masanglaija ananei lou jeh uva ipu ipa te Pathen in alhohbu le alungthim u aman chah a, nei le gou tampi le bol theina tampi anapeh hochu tunia vannoi mite angsunga eiho hin, keiho hi Kuki te kahiuve tia kin thupi pi ibol tengu leh hiche ipu ipa ten eina lamdoh peh u nei le gou Cultural Identity hochu iman chah uva milah a idin doh theiju ahi.

Hiti ahijeh chun tunia jong Kuki te adeh a pasal hon ipu ipa te bol thei Themtham hohi ithah gel lhoh kit uva bol thei teiding igot diu angaije. Jat dang namdang ten eiho nei le gou ho ahin sem doh uva, eiho koma ahung joh jiu akimu teng imitmo nau le ilhahsam nau akilang doh jin jachat a um jilheh e. Ole nangin iti nagel em? Tu masang kum 5 jouva pat chun Churachandpur a kon in Saipikhup, Kom pon, Ponve tampi hi muntin a supply akibol in koi hon akhon a hibang ninglhing tah a muntin a supply ham tia ikhol leh munchom lang peh a kona hunguva, Ccpur khopi a hitobang pon hochu akhon jiuva hiho chu Kuki te lah a ajoh jiu ahi. Hiti ho tobang chu igel jiteng leh i-kinop sah nau le thil igel khoh lou jeh uva hungsoh doh ahidan akilang in ahi. Kukite hi nei lou kineisah te leh bol thei lou kibol thei sah te ihiu ahi. Bol thei lou khat bol thei ding gelsanga mi a khat nomphu ham ahilou leh doha lungthim ham a lah peh ngap chat te ihiu ahi. Hitobang lunggel hi dih lou ahi. Hijeh chun tun Kuki khangthah ten avel in ana gel kit u hite. Ipu ipan ana bol thei sa jouseu bol theina din pan lakit ute. Ama ho lekha sim lou tia inelpeh vangun hinkho mandol ah ama ho ipha jou pouve katinom ahi.

Kuki pasal hon Themtham dan igel khoh diuleh bol thei tei dia ingaito diu chu insung thil le lo a ikipat diu ahi. Numei ho atamjon vang numei toh ding akitoh thei thouve. Ponkhon dan, twi khai dan leh insunga numei toh ding jouse atongthei thou nauve. Hoija hoija amimo chu Pasal ho kihi ahi. Imitmo nalou diuvin Themtham dan noija thil hohi anagel khoh kit u hite.

Hiche noija ithil min houhi akikoudan gamkai dungjui in chom jep jep umjong leh alhangpia noija kitah langa bangin kisei jong leh hethem naute ti kinep aume..

  1. Bengkong
  2. Vailambeng
  3. Bengpi
  4. Longkai
  5. Tingbeng
  6. Paipeh
  7. Kongvo
  8. Namchang, Namkol
  9. Lopi ahilouleh Doup chule Godal
  10. Pocha
  11. Bem
  12. Lelpi/ Thul
  13. Sinkhup
  14. Sengke
  15. Sangpai
  16. Ahbom
  17. Chemkung semdan
  18. Tukung sem dan
  19. Ngabom, Sabom
  20. Gosem
  21. Pengkul
  22. Theile
  23. Lhemlhei
  24. Soh teleng
  25. Sohpi
  26. Khongbah
  27. Kengke chule adang dang tampi ahi. Hiti ho jouse semdoh theina din khut them kithem chuh masat angaijin ahi. Chunga kiminphah thil le lo hohi atamjo lang Go (bamboo) akona kisem doh jeng ahiuve.

Beng, longkai Pocha kiti langho hi Gopi ahiloule Gongel ahilou le go lah a alhou pen a igel khat chu Naang banga kimet a chuteng kisa ji kisem ji ahi. Hiche Beng a sah ding go chu imet dan akibah loule Beng isah ding chu leng thei soi thei ahi. Asa apa umlouva kitoh chet a met toh chet a chujou teng le isah nom khat, Beng ham, Longkai ham Pocha ham chu hinsah pat ngai ahi.

Tekah nan Beng sah dan thu gahsei leuhen:
Benga sah dia go ham ting hamkhat chu kimet nemji ahi. Beng alet aneo ding dungjuiya go kila chu adung kikibahsah chet ji ahi. Akimet chaiteng bengto kipan ahitai. Beng ipatchai teng atovel ding kisuija bengto dingchu avel a chu kikam ji ahi. Chuteng le kikaitouva alehlang kikan ahi. Hiche a kona chu kisatou touva isah chaiteng agei kiheh ji ahitai. Beng hi amin chom cheh a kihethei ahi. Bengkong hi alhangpia Beng lailah ho kiseina ahi. Vailambeng ahileh pohjangkhai ledinga kisa, lom kiloplai leh lomnu in buchun mechun poh naleh lompa tucha chempong chuleh heicha poh lena a kimangji khu kiseina ahi. Hichu Vailambeng kiti ahi. Bengpi ahileh Beng lentah tah a kisa a, Kolbugo koina ho a kimabg ji ahi. Ahilouleh Kolbubeng jong akitiji e. Bengbit ahile jatchom deu kit a hichu Longkai jong kiti ahi. Chuleh Tingbeng kiti hi Tinga kisa ahin alen aneo a umkit e. Tinga kisa ahijeh a Tingbeng miti ahi. Hiche tingbeng hi Go a kisa ho sanga lhoujo ahi.

Longkai jong Pocha jong chule adang dang khut them a kona kisem doh chu them kiti ahi. Langkhat a hitobang sahdoh theina nei michu khut them tia jong kihe ahi.

Hitobang Them tham hi Kuki pasal hon ikhohsah uva bol thei ding igel diu apoimo tan ahi. Midang hon hin bol bol uleh kum 50/100 jou langleh hiche hi keiho a ahi tin sei ujongle amaho a hijeng thei ahi. Ajeh chu ama hon sah jong asa theijun chule neijong anei thei u ahi. Eiho kom a chu kum 50/100 jou langle insung jenga jong Beng, Pocha Longkai kito hojong an um talou mai thei chule sah jong ikisah thei lou tah jeh uva cbu eiho a hithei lou ahitai. Hiche ho chengse chun ihet lou kah uva, dinlou dailouva ikoi jeh uva eina dalhah u ahitai.

Masang lai ipu ipa khanglai chun Kuki pasal hochu Som ana geh jiuvin ahi. Hiche asom ge nauva chu tua ihin sei jouse hi jan seh leh kihilna anei uva, khat le khat kiseipeh touva hitia chu pasal jouse chun hiche themtham hi ana bol thei soh keiju ahi. Tunin jong pu le pate hitobang bol thei adam nalai ho umpet a hiche hohi ikhohsah lou uleh nikhat le hung mang ding ahi tia kasei chu hung lhung ding ahi. Hijeh a chu tunia themtham khohsah ding dan thua chom cha ngaidan kahin sei ahi. Kakipah e.


©️ copyright: Hiche articles hi asunpa phalna bei a mundang a publish louding in temna ahung kinei in ahi.

Articles hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Thusimbu mobile app ki install nom hon Google playstore a “thusimbu” tia search nabol u le namu lei diu ahi.

Previous articleKUKI TE KHOCHEN DOL A THIHSU/ THIH KHEN POIMO DAN
Next articleJoumol Vangkho munkai kum 7 analhingtai

LEAVE A REPLY

Please enter your comment!
Please enter your name here