Home N Lhungdim KUKI CHIN ETHNIC FAMILY HOLEH NAGA HOLEH MEILHEI HOTOH KIKHEHNA LENPEN CHU...

KUKI CHIN ETHNIC FAMILY HOLEH NAGA HOLEH MEILHEI HOTOH KIKHEHNA LENPEN CHU HAOSA NEI ENGLISH A CHIEFSHIP KITI HI AHIPEN IN AHI.

71
0
KUKI TE KHO MUN LHEN DAN
KUKI TE KHO MUN LHEN DAN

HAOSA NEI

Asun
N.Lhungdim
Thangting House
Molnom-West

n lhungdim
N-Lhungdim

28th November, 2022

Adih taha chu tribal hohi haosa nei ahi tia kihetna lenpen khatjong ahi. Naga hon Goanbura kiti anei uvin hiche chu tribal ahinao kihetna khat ahi. Tribal hilou Meilhei honvang haosat anei pouvin ahi.

Churachandpur District a masanglai in 1910 kum chun Senvon kho chu kholentah ahiuvin in 300 aum e akitin ahi. Ahinla tulai in Churachandpur adeh a Tuithaphai ahin kholen tah tah ni le thum ahung umdoh tan ahi. Tutu a Tuithaphai area a kholen pen chu Rengkai kiti hi ahin ahi. Aban a alen a kahet chu D.Phailen kho hinte. D.Phailen kho jong in 1000 lang hitaleh akilom in ahi.

Tuni a iseinom uchu Tuithaphai area a kholen pen a kihe Rengkai thusim sei ute. Rengkai khopi hi amasapen in amin hi Rengkai ahipon Tlanbung joh ahi akitin ahi. Aphutdohpa min hi Kailiana ahi in ama hi Tuithaphai a ahungtil in Saikot koma Khopibung ah ana cheng in ahi. Amaho hi akisei dan in Tipaimukh a Hmunlet kho a kipat a hung kichau (1857-1945) chun Khopibung ah chuhlai khat aumjou uvin khosem dingin 1911 kichai langin a inko Ainah phapui acheng a insung mi 5 ahinpui in Lingsiphai leh Mata kho sahlang mun nomtah khat ah kho ana satpan in ahi. Hiche mun hi Meilhei hon Kailien Ching tia ana kihe munchu ahi. Amun hi anom in ama ho jong akihul lheh jeng uvin ahi. Chomkhat kahin in 20 ana lhing uvin Govt. of Manipur dan a in 20 alhin leh khosem thei ahi ti ahetjeh uvin Manipur lengpa phalna aga thum uvin ahi. Ahinla hiche gam hi masang a Haokip Reserved tia declaration ana bol ahijehin Songpi Haosa Pu Semthong Haokip in akho apuntul tul jehchun ana huphul in phalpeh na ana pepon ahi. Ahivangin achapa Letjatong noi a um dingin Kailiena leh aseijui hochu ana koi kigo in ahi. Ahivangin Kailiena chun kum 7 achen jouin Tlanbung chu adalha in Thingkangphai ah Hleia ho lamkai na a achen naochun amaho belding in ana kisontan ahi.

Tlanbung adalhah chun Pu Kailiena chun siel minthang tah khat achenna lui Hmunlet akon in aga kai in Hmar ho chedan a SESUN INCHONG neina dingin ana gongin ahi. Hiche siel hoitah chu amin Chalmawi asah in ahi. Hiche siel ho ahoidan chu a ki asao in a ki teni chu inch 30, 30 ahi akitin ahi chuleh a ki teni kikah chu inch 50 ahi akitin ahi. Vangset umtah in Pu Kailiena chu kum 7 tah kho le veng neilou a ana um vangin Thingkangphai a umden dingchu adetthei hih in hijeh chun 1920 laichun Sugnu kal a Serou phaicham ah kho aga sat in ahi. Hiche mun achun in 85 tah ahunglhing taovin ahinla vangset umtah in Gundung ahunglet leh atui lahna mun uchu tui in asuhset peh jehin kum 18 lang achenjou uvin ahin dalha kit taovin ahi. Ajehchu thahsem nading sum le pai aneilou jeh uh ahi. Hiti chun Tuithaphai lang ahin jon kit uvin kum 20 masang a gam ana thum uh Pu Semthong in ana phalpeh lou chu Pu Semthong jong ana mollem tan ahi. Hijeh chun mun chom chom a khosem ding khapna jongchu ana um tapon ahi. Hiche lai chun 1929 in Zenhang Varte in kho ana sempan tan ahi. Akho min chu Bijang Loubuk ana tin achung lang ah Pu Phungkhothang Guite in kho ana sem in hichu 1930 donchu ahi. Hiche achung a isei uh haosa ho kom ah Pu Kailiena chun khosem ding ana thum in ama hochun apha e hungloi loi in tia ana lamto jeh uvin March 23, 1938 chun Rengkai kho kiti chu ahinlo pan in ahi. Hiche hi kum 84 lhingding ahitan ipi dinga Rengkai kitiham itileh Manipur lengpa ngaman a ahungdoh namun ahi tia leng hungdoh namun Rengkai tia ana kiminvo ahi. Pu Kailiena tupa leh Sailianluanga chapa Pu J C Chongkholien hi tulai a Rengkai a haosa ahi laitah ahi. Pu J C Chongkholien kiti hi amin bul a J.C akoihi Joute Chonghau Chongkholien tina ahi. Ama hi Churachandpur a kholah a kholenpen in 2000 val umna a haosa ahi in Churachandpur Tuithaphai a haosa lah a in tampen hiding ahi. Atah tah achu Rengkai ahi in incheng 2200 val um ahi akitin ahi. Ahinla phabep khat hi mi in a cheng ahijeh uva 2000 val ahi tia kisei ahibou in ahi.

Khopibung leh Rengkai kikah hi Km 5 don ahi in Bible a Jerusalem leh Bethlehem kikah tobang a kinai ahi. Ahinla Kailiana Rengkai phutdoh pa hi Khopibung akon a Rengkai a ahunglut nadingin kum 27 alut e akitin ahi. Hiche hi detmo ding ahipon ahi. Ajehchu Kitepna Lui a Juda te jong Egypt akon a Canan gam alhun nading in kenga iche leh hapta khat a lhun nathei ahi akitivang in Canan gam alhun uchun kum 40 tah alut e ana kitin ahi. Hiche hi ache koi koi uva gam hahsa tamtah ahin jotpa jeh uva Tuipi san kiti hojong ahin kanjeh uva hunglhut bep uh hiding dan ahi.

Achaina in Khopibung a pansa a Rengkai kho semna dinga abultil a akhomin Tlanbung ati a chomkhat jou a Mata leh Lingshiphai kikah a ga tham a chomkhat jou a Thingkangphai a hung cham a chomkhat kitjou a Serou langa gacheng a Serou langa kipat a hungkit a ajo jo na a Rengkai ahung kisatdoh hi kum 27 alut e akitin ahi. Ahinla Khopibung akipat a Rengkai hi Km 5 hambou ahin in ikeng in kiche jongleh nidan 30 val lutlou ding ahi.

Achaina kei in Churachandpur Tuithaphai a kho tamtah umlah a akho a mi 2000 val chenna Pu J C Chawngkhawlien damsot hen. Pu Chongkholien jinu hi aum talou Pi Kholpi Gangte ahi in Pi Kholpi Gangte hi masang a Advisory Council a Advisor a ana pang Pu L.Kampu Gangte chanu tahpen ahi. Tun Pu Chongkholien hi kum 90 alhing kigotan Pathen in damna pehen lang umpi jing tahen tihi itaonao ahi.

(Hiche Article hi Pu L.Keivon lekhasun them minthang koima phah joulou in Zoram Khawvel asut Volume 2 na a kon a kiladoh input a base ahi.)

Articles hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleBIBLE: PATHEN LEKHABU THENG
Next articleMr Mobi Gambling establishment Is Ranked 2 https://mobilecasino-canada.com/5-deposit-bonus/ 5 Out of 5 Inside 2022 Comprehend Comment

LEAVE A REPLY

Please enter your comment!
Please enter your name here