~Story By
Nick Hangshing~
Kho khat ahin pusal chapang khat hi ana um in ahi. Amahin anu tah2 chu ana heman tapon ahi, anu chun athi khum masang chun chapang cha ahi nalai jeh chun alim le amel chu ageldoh thei tapon ahiwang in anu in ana don jidan hochu ahe mang phel phul in ahi. Anu athi jou a pat chun min ahin kivah tan ahi. Aman joh ahin kivah te inn sung chu angai lulheh jeng in ahi. Chuleh akivah te jong chu ama ding in apha thei lheh jeng uvin ahi. Nehle chah phata tan ane in, sil le chen jong hoi tah2 achoh pih un, chuleh achen na inn jong chu inn num tah khat jong ahi. Chuleh ama hi ainn sung mong2 tabang in adei2 in aki mang chajing in ahi.
Amahin ahin kivah anuthah nuhi angai lut lheh wang in “Henu” tia ana kou behset jipon ahi, amahin anuthah nuchu amin a akou tho ji in ahi. Ahiwang in anuthah nu chu alunghang jipon, khoh jong ana sajipon ahi. Hiti hin sot pi amin a akou tho in ahi, chuleh anuthah nu injong amin a akou chu ahetphah lou tabang in aum in ahi. Chuleh anuthah nuhi miphatah leh khat ahi, chuleh anuthah nu lunggel phatdan leh amikhoto dan chu avet leh chapang pa gel dan in ama kivah d hi anuthah nu lunggel akon hiding injong agingmo in ahi. Tv ho avet pet dung jongleh anuthah nu chunga chun aki ngai ji in, chuleh anuthah nun jong lungset na neitah in asam ho atham p ji in, alu hopou ajul p le2 ji in ahi. Hiti ahijeh chu amaleh anu thah chu hi aki ngailut na asang lheh jeng in ahi. Chuleh anuthah nuhin hichi chapang pahi asunga pen acha bang2 in alungset in ahi.
Aban in apathah pa ahin, apa thah pahin hichi chapang pahi ana deibeh seh pon ahi. Hijeh chun chapang pan jong apathah chu “Hepa” tin kikou leh eilungset chom intin, ei ngailu chom inte atin,hepa tia akou ji wang chun achapa tah2 tabang in ngailut nachu amu jou jipon ahi. Apa umchan hoilou tah khat chu ahileh, achaten thol aphalou abol ahilou leh abol khel aum phat jong leh aphoh jipon chuleh koima jong ahil jipon ahi. Chuleh hichi chapang pahin apathah pahi ahouphat jong leh atam jon apa hin adon but le jipon ahi. Apathah pahi mipao beh setlou chuleh akam pao jong ngailou mi ahi.
Achai napen in anao nu ahin, Chapang pahi ahin kivah uva chun anao nu jong neocha bou ahinalai in ahi. Amani hi kum langpang a golkhat tabang ahilhon in ahi. Ahiwang in ama sang in them khat alen jep in ahi. Ahiwang in anao nu tabang inbou agel in ahi. Ucha dang dang ho sang in amani ucha chu aki toh lheh hun in aki ngailu lheh jeng hun in ahi. Amani hi jaan gei tah2 chan alup nachung lhon a atou ji lhon in aki houlim ji lhon in ahi. Aki houlim lim jilhon wang in atam jo in anaonu houlim chu angai pih ji in ahi. Chuleh a inn uva chu bedroom alhom ji jeh chuleh achanga common room a age num jilou jeh chun a ponpha chu anao nu room a aki do lut in, anao nu lupna kom a tol a alum jin ahi. Ahiwang aman hichi joh chu num asan ahi ajeh chu anao nu kom a aum leh num asajin chuleh anaonu kom a aumleh anao nu vetup din jong apang pai2 in ahi.
Ema jouse chu saturday nilhah in ahung kikhel tan ahi. Chapang pahi inna achanga aum jeh chun common room a alum in ahi. Amahin nikho chelam jong ana heji pon ahi, ahiwang in saturday ahi chu anao nu nilhah a Houin a khangthah ho kikhop na akon a ahung kile amu a kona chun ahin hedoh bepseu in ahi. Houinn akon a ahung kile le chun chapang pachu akol in, hichi jouchun anule apa akol in room langa alut pai2 tan ahi.
Hichi jouchun anuthah nun jong ama kom a gaki chol tan tin asol tan ahileh, ama jong anu dai tokop in aluchu aheimang in ahileh hichi pet tahchun apa chun chapang pachu lunghang tahin aven ahi.
Hichi jouchun apa chun chapang pa kom chu “Nanu masang in hita bang umchan chu hinbol kit hih in” lunghang tah in kot chu akhah in ahi.
Apa chun chapang pa atot hepha lou a chapangpa apho jeh chun chapang pachu lungnum mo tah in aphun in ahi. Hichi jouchun a naonu jong room a ding chun achiphei phat in aman jong ajui lut pai2 tan ahi. Room alhun hon chun anao nu chun numei hon abol ngai bang in hichi nikhoa akiman chah dan ho chu asei pih in ahi. Ahiwang in chapang pa chun anao nu kipa nading in thusei chu phatan angai p in ahi. Hichi akihou chai chai hun chun anao nun jong TV vedinga ahin sei in, hichun amani jong TV veding chun achi phei hun tan ahi.
Hiti chun TV ave lhon in ahileh hetman lou in jaan ana sot lheh tan ahi. Hichun anu chu ahung phei in chapangpa toh anao nu kom chun, ageiwal tai emu lhon tan ahung tin ahi. Hichun amanin jong TV chu athat lhon in emu ding in room lang chun achi phei lhon tan ahi. Hitia room langa achi phei pet hon a chun chapang pahin thil khat adih thei lou tabang in ahe in alung thim anum mo lheh in ahi.
Room alut jou lhon achun anao nun jong light chu athat tan ahi. Light atha2 chun chapang pahin a room window pam a thil khat acha loh chu amun ahi. Aman jong phatan ave kit in ahileh ema amu kit tapon ahi, hichun aman jong athil mu chu alunggel leh alungmit a amu hiding in atahsan tapon ahi. Hichi jouchun aman jong e hamkhat ati khah leh atin, anao nu ding gel nan ama jong emu talou in kiging tah in aum in ahi.
Hiti chun ama jong muthim lah a chun emu lou in aum tan ahi. Ema jouse chu athip chet jeng in ahi, aman amu theipen chu ahileh polanga a street light vah room window akon a room sung neokhat asal wah bou chu ahijeng in ahi. Hiti chun chom khat jouhin window polanga kon hin thingbah kiheh bong gin, nado gop kichon gin toh Sangkhol chol hui in amut gin chu ajan ahi. Chuleh hichi sung chun tiul nam toh thisan man aja jing in ahi. Hichun aman jong emu talou in kiging tah in aum tan ahi.
Chomkhat jouin polanga thilgin chu ahung thip lha in, thisan nam jong chu ahung bei tan ahi. Hichun chapang pa jong alung ahung oldom in, kichol ding in amit asing tan ahi.
Sot lou in, inn ninglang khat akon in thil khat ha gin a ahung ging in ahi. Hichun ama jong apet2 in akithou doh in ahi. Aman jong inn sunga thil khat vang aum tai t ahin hetan ahi., hichun apet2 in alup na akon in akithoudoh in anao nu chu alohkhang tan ahi. Anao nu ahung tho2 a lupna chunga ahung tou2 chun ama jong anule apa room lang achun alhaiphei tan ahi….
Anule apa room alut2 chun lupna chung chu avet leh apa chu athisa ana um tan ahi. Apa chu alol ana ki aal p in chuleh alol akon chu thisan chu tuilon in along tho jeng tan ahi. Hichi jouchun anule apa room kot chu ahung kikhah in, aki kha2 chun room pam a chun chapang pan mihem tabang2 khat ahin mutan ahi.
Hichi mihem tabang pachu alen lheh jeng in ahi. Hichun hichi mihem tobang pachu toh chapang pachu akiveto hun tan ahi. Chapang pan amu achun hichi mihem tobang pa chun amit avah in chuleh len jong alen lheh jeng in ahi, chuleh amai a kon a hung kailha akhamul tobang chu thisan adim lha jeng in chuleh amel chu mithi mel apo in ahi. Hichi mihem tobng pachu avonho anen lha jeng in, anam jong anam se in, apum in thisan anam lha jeng in ahi.
Chapang pa amu mu chun aha agel in chapangpa um nalang chu ajon tan ahi. Hichun chapang pa chu aki acha wal in athi dinga bou aki gel tan ahi. Hichi pet tah chun hichi mihem tabang pa chu akinung hei in kitchen lang chu ajon phei in ahi. Hichun chapang pachu akichat wal jeh chun bol ding ema jong ahe tapon ahi. Hichi pet tah chun anunglang kot apat khut khat in aban ahin tuh chun chapang pa jong aki acha wal in ahung moh kaa tan ahi. Chom kht jou ah, ahin tham chu anu ahi ahin kihet doh tan ahi. Hichin hichi mihem tabang pa chu ahung kile kit in amani um nalang chu ahin jon tan ahi. Hichun chapang pa chu anu in ahuh doh nalam in, hichi mihem tabang pa chun anu chu chem tabang thih hem khat in atahsa asat tel p deh tan ahi.
Hichi jou chun chapang pan thil khat ahin jan ahi, ajah chu ahileh aman jong ajah dinga ana gin chat pen anao nu pen gin chu ahi. Hichi anao nu pen gin chu anung langa kon a ajah ahi. Hichun anu asat tel namun akon chun hichi mihem tabang pa chu ahung ding doh in anao nu chu ahin ven ahi. Hichi jouchun aum na akon in ahung dingdoh in amani um nalang chu ahin jon in ahi. Hichi pet tah chun anaonu cu aum na akon in ajam tan ahi. Hichun hichi mihem tabang pachun chapang pa umna chu ahin hopa in, ama don lou a anao nu um nalang achi pai2 chu ama jong alung adong lheh jeng in ahi. Hichun chapng pachun lungdong tah in alung a anule apa atha jou a inna kon a jam lou a innsunga aum chu agel leh alung adong kit in ahi.
Hichun chapang pa jong hichi mihem tobang pa toh anao nu um nalang chu adel phei in ahi. Anule apa jong atha tah jeh chun anao nu jong atha ding in agin chatan ahi. Ahiwang in ana thah pon ahi, anao nu chu asam a aman in room sunga chun akai le2 jeng in ahi. Hichun chapang pan jong anao nu hitia abol chu avet joulou jeh chun alhai in mihem tobang pa chu akhut ape pih in ahileh, hichi mihem tobang pa chun chapang pa chu akhut khat langa aman in bang senan anei in ahi. Hichun upai dang anei lou phat in chapang pa chun ainn kom hon ajah uva akitho pi dinga ahung thei nading uvin a innsung uva thil aging thei leh achoh thei jouse chu asu ging in ahi. Hichun anao nu chu atha lou d leh akai mang lou nading in taona amang in ahi.
Hichun hichi mihem tabang pa chun anao nu akai a ama um nalang a ahin kai achun akom a almerah leh touna umho jouse chu lampi tin na in aban kailhuh in ahi. Hichun hichi mihem tabang pa chun chapang pa chu lunghang tah in ave in, hichi pet tah chun chapang nu chun chapang pa kom a chun “jam tan, neida lhatan, henu teni kom a keijong chi tange” atin, hichi asei jou2 chun anao nu chu room sung khat a akai lut in kot chu anung kha tan ahi. Hichun chapang pan jong kot chu apeh toh atho a hon d ati wang in ahong doh jou tapon ahi.
Hichun chapang pan jong bol ding upai dang anei lou phat in innsunga chun kithing pum2 in akap in amoh tou den tan ahi. Anao nu chu e p alo tadem, anao chu e p ato dem, tin aki chat ding dan ho chu agel p in lhase tah in kot kom achun atou in akap den tan ahi. Hichun chapang pan atou namun chun, kot hi kihon thei hen lang kanao nu beh hi damsel in kila doh thei leh tin agel in amoh tou khovah tan ahi.
Ajingjingkah in ainn kom hon jaan a acho the thu jeh uvin e p thu um ham tia ave a ahung uleh chapang pa anule apa chu athisa a aum chu amu doh un, chuleh chapang pa chu kot phunga atou chu amu tao un ahi. Ahin anao nu wang chu amu po vin ahi. Hichun chapang pan anao nu um nachu asei pih tan ahileh, ainn kom ho chun police ho akou uvin kot chu namphu in akhen hong uvin ahileh anaonu chu atahsa leh alu chu ana kikhen tan ahi. Hichun police hon anule apa tahsa chu avet leh kidang tah khat chu atahsa hon a maha jouse chu ana mang gam tan ahi. Hichun athi dan ahet lou phat un hospital a apo uvin athi dan chu akhol sah uvin ahileh atahsa chunga maha ema aum lou wang in, atahsa sunglang chu ana tel deh hun tan ahi. Hichun e p ti ainn sung miho thi ham tia chapang pa chu adong tao un ahileh. Chapang pan jong thil umdan chu asei in ahileh koiman ana tah san tapo vin ahi. Hichun abang loi chun chapang pa tha ding in ana ging mo uvin ahi.
~BEITA~
Thusim toh kimat hih jong leh thu khat gah hap be leng…
Thinan nainn sung mite toh e t leh nahin khen ding uham koiman asei thei pon ahi. Hijeh chun dam a lei a nalen khom pet un, kitoh del chan, kingailutah leh Mithangset thei ding in cheng khom uvin.
