By:-Shonkhogin (Hegin) Haokip
Maranatha Cottage Hebron Veng
Phaipijang Langol Imphal West.
9774096152
Keima mina kikousa kamite chu ahung kineosah theijuva taona aneijuva hitia hi keima angsung ahinhol theijuva, athilse bol naova kona akihei manguva ahileh, keiman jong van na kona kahin ngaija achonset nau ka-ngaidam ding chuleh agamsungu kadamsah a kaphatsah ding ahi. II.Chro.7:14.
Vannoi leiset leh asunga um hojouse mihemte puma, Pathen semsa cheh ihiuvin, asunga thilsoh ho jouse jonghi ama hetlouva soh khatcha jong aumpoi. Aman mihemte hi Eden a thupeh ngailou jehin khatveileh thitei dingin thupeh anaumtan, hijeh chun athijou phatleh ache na ding jong semtohsan akoipih e. Atahsan chate chena din, Vangam asempih in, atahsan loute leh Satan dingin Damun meidil ana sempih e.
Pathenin asemsa mihemte ho jouse hi koimacha damun meidil achesah nompoi. Aman eiho thina dinga achapa ahungthi hi angaina a ingaito lou hel diu ahi. Hiche theiga naneh nini nathi teitei ding ahi atin, Adam le Eve in ana nelhontai. Achutileh athiding ahi lhontan, ahin Pathenin asemsa achate alungsetna kidangtah khat chu ahileh amani thina dinga chun Amajoh thidingin aumtai. Hiche hi Pathen akitahna ahi. Aseisa chu nungkhelmakhel thei hitalou. Hiche pet tah a chu aman tahsaphe(body) aneilou jeh a chu anathi theilou ahin, ahinla satan in alheplhah numeinu naobu akona tahsaphe(body) chu ahinkimu ahi. Hiche a kona chu eiho khella hungthi anahi.
Hijeh chun, Aman nangmahi nitinin nakoujinge, ibola na chuti kichat ham ? Nakichat sang chun Amakoma chun lhailut le chun tahsalam lhagao lama nahin joh ding nop nasah joh ding ahi tihi hangsan tah a kaseipih nahi. Nagentheina hi nasempa koma nakipeh lhah nom lou jeh ahi. Tunin, thina in nahin delin, hoilanga najam ding hitam ? Hoilaijah jamjongle chun olna le lungmona muponate. Pakai koma lhailut in, chutileh nahin delpan nadalha tante. Ah-noute mu-in ahindel phat uleh api lhalimdam noi adelphat uleh mu-in adalhah jibangin, Pathen kom ibeluva ikiselden uleh idel houvin idalhatao vinte.
Pathenin keima mina kikousa kamite chu akineosah uva kahenga ahung taouva, keima angsung ahinbeluva, athilse bolnaova kona akisihuva bolkit taloudinga Pathen angsunga akipeh dohuva ahileh, keiman vana kona ataona leh akisihnao kahin ngaipih a achonsetnao kangaidam pih ding, chutengleh agamsungu dammonaho kadamsah a kaphatsah ding ahi ati. Tunin ikin u kibol leuhen Pathen in ama kin ahin kibol ding, boina ho jouse jonghi kila mangthei ahi. Boinaho jouse kilahdoh nadinghi nangle keijin Pakai kom idel lut thei pou pou uleh Pathen in kilahdoh tante.
Aman eiho hi imoh suh genthei nom u ahipoi. Minu mipan a itih in jong achate suhgenthei ding hi thanopnan alangai poi. Achutileh I-Pao Pathenin asemsa achate suhgenthei iti thanopna a alah thei ding ham. Kikhol u hitin, Pakai kom bel tao hite, hiche tilou lamdang aumpoi. Tunin nahina pumpum in Pakai kom hinbelin, nachonsetna kisih pinlang nungbol kit tahloudingin Pakai koma ngaidam kithumin, atah tah a nathum poupou leh nasanpih tei tei ding ahi. Pathen kom ilutnom lheh vanguva mitamtah kimoh lut theilou ahi.
Hijeh a chu hiche damona Corona Virus hin Pathen koma inop ida umlouva hoilut(drive)na dinga Pathen thilgon jong hida ponte. Ama koma nalhailut thei poupouleh asohcha nahitai. Hijeh chun, aphalou tah hi aphatah a din mang chao hite. Bible in Pathen ngailu te dingin asoh jouse aphatna ding a soh ahi kiti chu hisah tei ding ngaito u hite. Chutihen lang hileh thisoh hi nangdinga kipana joh hiding ahi.
Asim jouse Pathenin phatthei boh tahen.
KAKIPAH-E!
“God Loves You!
And
Wants You To Love Him Back”
