Home N Lhungdim KIPUMKHAT SANGA KIKHENTEL JOH HI HATNA LEH MACHALNA JOH HIDING HAM?

KIPUMKHAT SANGA KIKHENTEL JOH HI HATNA LEH MACHALNA JOH HIDING HAM?

37
0

United we stand Divided we fall

Asun
N.Lhungdim
Thangting House
Molnom-West

n lhungdim
N-Lhungdim

17th Sept. 2022

Masangin English phrase khat in United we stand Divided we fall ati in ahinla phat kikhel dungjui in tulai in abang leh United we fall Divided we stand atitoh ahung kiloujui in ahi. Vetsahna dingin akitoh theiloi beh nupa ni akicheng lhonin ahileh Pathen min a pastor mai a thinan eikhen tokah a ding tin kitepna ana nei jongleh mihem hi akitoh theilou beh court a kidana a nupa hon asei jingkhat uh IRRECONCILABLE DIFFERENCE seitoh theilou beh kitolouna ati tobang in ani ni dingin ahinkho lhonchu gotmun a um tobang ahin ahi. Hijeh chun kathusei hi Bible toh akitohpoi tiloi umjongleh keigel dan in hitobang nupa hi akichen cheh lhon a ani ni lhonding a hahsatna lentan ahisangin akikhendoh lhon a ahileh amani dingin aphajoi katin ahi. Mihem in leiset a ihol uhi apha pen kihol ahi in political science hin podoh Greek miching Aristotle in Ideal state kiti chu ahi theilou leh Next to ideal state del ding ahi tobang in aphapen kidei henlang kidel jongleh abang bangleh mujou leh deljou ahilou jehin aphapen bana chu muding leh nei ding gel in aphajon kati in ahi. Hinkho hi practical a kihing ahi in theory a hinthei ahipoi. Ihin na dinga aphajo penchu lhen in aphajon ahi. Theology itiu Pathen thu jonghi athucheng a jui ding igot leh thil hitheilou ngen ahi. Ahinla ipi ako ham tijoh asymbolic meaning chu holdoh a jui johding ahi. Min na ngeiphei langkhat abeh leh langkhat jong do in ati chu atah tah a athucheng dungjui a juiding ahipo in ipi aseina ham ipi ako ham tijoh a lah a juiding ahi.

Tuni a iseinom pen uchu phatche dungjui leh leiset khantouna dungjui in alen leh agun hi kidei jongleh alen leh agun a loupi tah a umsangin abang bangleh kikhen tel a eima leh eima khantou nading machalna ding igel leh malam akimuthei joi katin ahi.

Vetsahna dingin Christian hitil lai in Churachandpur ah North East General Mission kiti noi ah jat le nam tamtah Kuki pao tho, Paite pao tho, Hmar pao tho, Gangte pao tho, Vaiphei pao tho, Zou pao tho leh Simte pao tho ho ana umkhom uvin hiche phatlai chun akhoh behseh pon English Missionary hon inapoh uh ahijeh chun chuleh aching athem hetna nei ana lhom jehin kitona theology sim jong Din Weedy Memorial Bible School tia sapten Missionary Paul Rostad in class-viii chan simho dingin Diploma Certificate ana simsah in tulai a B.D, M.Th, Doctorate kitiho khatcha ana um naipon ahi. Ahinla 1952 kum in English American Missionary nukhah pen Royal C. Paddock in thucheng khat ana seichu napao dungjui a achom chom a nakipohmo uh ahipoi tia ana sei jehin NEIG Mission chu ana kehin pao dungjui in Houbung chom chom ah ahung kikhen in Paite pao tho hon Manipur Christian Church kiti Rev.H. Nengzachin in ana lamkai dungjui in akipo uvin Kuki pao tho hon Kuki Christian Association tin ana kiminvo uvin ana kipo uvin ahi. Hiche bangchun Gangte hon Gangte Synod Church ana tiuvin ahinla kum ija ham jou in hiche ana keh jongchu akehson kitin Paite pao thoho laha jong Reform Evangelical Church kiti Rev. Khen P Tombing lamkai na in ni ahung kiso in tun adang ni le 3 jong akiso be tan ahi. Vetsahna dingin Gangte ho jong khat a akipoh uchu ni ahungsoh in Gangte Baptist Association kiti ahin phutdoh uvin hiche akon jongchun adang dang UPC loi aumkit in akikhen teldeh tan ahi. Manipur pumpi ajong sahsolang ah Houbung 2 KBA leh NEKBAM kiti ana um in amani chu ana kigom in KBC tin ana kihe in KBC chu alen behseh e atam behseh e atiu ham chuleh Theology sim leh hegil atam dungjui in ahung kikeh sokit in KBC akon in KCC ahung umdoh kitin hiche keo hilou in Thadou Baptist Association ahung umdoh kit in adang neocha cha jong ahung umdoh kittan ahi.

Hitiho hi phatche dungjui in ahung kikhel in aphalang a isei leh mi tamtah dinga natoh muna ahung hi in aphatna khatjong ahung um in ahi. Ahinla Churachandpur langa kamu khat chu Hmar pao thoho laha hiche Houbung kiti hi akiphutil a Independent Church of India tia thakhat a umchu 1970 jouchun Pu Rochunga Pudaite lamkai na in EFCI kiti akeh in EFCI akon in Assembly of God church kiti ahung um in aban ah UPC loi ahung um in chukit leh NEIG Mission ke a Assembly tia ana kipoloi ahung umkit in ahi. Hiti jehchun khokhat ah Houbung 6 leh 7 ahung umdoh in vetsahna dingin Molnom kho in 300 val ah ECA leh KCC aum in Khomawi leh Saidan ah Houbung 6 leh 7 aum in akho jongchu Molnom sanga lhomjo ahilhon in ahi. Hicheva aphatna khatchu Pastor hinom leh Houbung upa hinom hodingin panmun phatah tah amulo uvin ahi.

Hitiho hi ivetleh leiset hi kitolou tah a tamtah chenkhom sangin kikhen jah jah henlang ama ama cheh in khantou machalna kidel leh aphatna ding tampi aum in ahi. Politics langa sei lehen India gam jong hi state 30 lhingdeh leh Union Territory 8 tah aum in ahinla North India aho lunggel leh South India aho lunggel akipum topon North India hon National Language a Hindi manding atiuleh South India ahon keiho pao Kannada, Malayalam, Tamil, Telegu kitiho jong Hindi sanga pao haojo atiuvin akipum topon khantou machalna punbe sangin akinah lo uvin akidelto lo uvin ahi.

Anaipen a seidingin British te in George Abraham Grierson in Linguistics Survey of India a recommend abol dungjui in Kuki language hi Notification 10,000 dated 3rd Sept. 1907 in Frontier Province a Kuki pao compulsory hiding ahi England akon a ICS officer SDO dinga hung Songpi SDO B.C Gasper, Ukhrul SDO L.L Peters leh Tamenglong SDO William Shaw hochu Kuki pao ana kithemchuh uvin posting a ahung uvin Kuki haosa hotoh Kuki pao in ana kihou uvin ahi. Ahinla 1950 kum a Indian Constitution in Any Kuki Tribe tia ana hetchu The ST & SC Tribe Modification Act 1956 a Tribe Modification ah Any Kuki Tribe a Paite, Gangte, Zou, ho tilou in Chandel leh Tengnoupal langa Anal, Maring, Chothe kitiho jong Tribe Recognition ahung kipeh chun Kuki pao tho hochu Kuki adeilou hon dalha ujongleh nampi kigopna ahi in Kuki tin Tribe Recognition ana umleh kipumkhatna ana umding phalheh jengding ahi. Ahinla chulai jallhang leh office langa thunei leh thanei Pu Thangkhopao Kipgen leh Pu S.L Lunneh Motbung haosapu leh Mangpithang Kipgen kitiho in Kuki khel in Thadou tribe recognition dinga recommend ana bol uleh tulai a Kuki paotho ho kitomona kei ahung sohdoh in ahi.

Achunga isei bang uvin aphapen chu ana kidei jongleh abang bang leh aphalou jong umlou theilou ahijehin tuhin Kuki pao thoho hi group 2 in akikhen in Thadou Group leh Kuki Group aum in hicheva kadetmo leh kadettheilou pen chu Thadou hi abultil a mi min ahin aban ah phungmin ahung sohdoh in phungmin akon in chun tulai hin Thadou hi phungmin keo hilou a nam min in agel uvin tulai a Manipur Chief Minister N.Biren Singh Divide & Rule policy advantage la in ama komah maipha akihol uvin sum le pai leh minister kisan akiboldoh uvin ahi.

Achaina kei in iseinom uchu apha leh ahoi kidei henlang hijongleh aphalou tojong iti hinding ham tihi kithem chuh ding angaitan ahi.

Articles hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleBIBLE NEW TESTAMENT MATTHEW 25:14-30 KIKAH A LHACHA 3 THULEM
Next articleSUM HI IPI MONG MONG HAM?

LEAVE A REPLY

Please enter your comment!
Please enter your name here