Home Crosby Haokip KINEPNA 2019 KUMHEI

KINEPNA 2019 KUMHEI

182
0

Based on true story
(kaloipa thusim ahi)

Narrator: Lala Len
Writer: Crosby Haokip

Tahmel in kiki muhih jong leh phat soh tah Kimboi, Singapore a um (min le umna semthu)
toh kahung kihou lhon in, lungset hinkho chan kahin mang lhon e. Social media le phone a pat kihou mat mai mai kihi jong leh munkhat thakhat a umkhom ho sanga kingailut na asan joh na chu kilungset to naleh privacy chan gei lung thengsel a ki share to nachun kitahsan na le kilungset na asudet jo in ahi.

Kum khat bep vel hijong le kei ni din kum 10 val kihe tobang in kagel lhon in, kum lhung a inlam a kimuto ding ngah lel in lunggel suh bulhit a kichen ding plan jong kana gel lhon in ahi. Akinga lel lheh vang in hetman louvin kum ahung lhung in kei jong manipur a dia ticket booking 10 December, 2019 a kakah nikho alhung in inlang kajon masa tai. Ahinla kalungtup nu ahung lhun nailou jeh in lungsung kipana acham kim deh poi. Ama hung lhun ding ngah to kop in muntin a loi le pai le insungmi vil thei thei kavilin kaki mangcha e.

Kanga lel jing lhon ama jong ahung ding nikho nisim 22, December, 2019 alhing tan, phone eihin bol in kajah a, “Ulen, jing le 3:30pm le Imphal hung lhung ding kahitai,” tin thanom tah in ahin seiyin, ahinlah alung gim na chu ama hi moreh lang mi ahin, kile nadia line gari nilhah lang a aum pon, Imphal khopi sung a bel thei insung mi anei lou dan ahi. Achang ahin anu anaopa leh ama bou cheng ahin, inchen hahsat jeh a anaopa le anu kihinso na dia Singapore a sum lo a che ahi chu eihin seipeh kit in ahi. Ken jong ajah a, “Nagel theileh ken Imphal a kainkote koma nalhun na ding ngaito nange, nopmo nasah a hile hotel chan na-book peh thei nange, na inkoten nahung pick thei lou ding jeh in lungneo hih in,” tin kalha mon in, hichan chun kaki houtoh lhon tai.

Jing nikho ahung lhung tan keijong Lamka a pat Imphal winger in kajon tai. Kanga lel jing kalungset pen nu Kimboi melmu ding chu kalung sung thanop nale kipana in adim in, alang khat a kimelmu pat na ding ahi jeh in jachat nale kison lel na lentah jong kaneiye. Hichun kaphone ahung ging in ka pick le, “Ulen, hoilai nahung gei hitam? Airport pamlang a kahin ngah tai,” atin ken jong, “Nambol kan khel tauve, kahung lhung pei ding ahitai eina ngah tadin,” kati.

Amun kaga lhung ta jin, lampi pama kakum chun mi tampi aum jeh in ka-phone le ahin pick in ehin kou tai. Kei jong jum le ja helou bang in kajon lut in, chu in numei ni toh auto in a katou tauve. Auto chung in kaki houlim lhon in, aman kakoma, “Ulen, nop mo sahih inlang, nahung tah tah ding katahsan lou jeh a kaloi teni kana houpi ahin, ama ho ina lhun ding kati ahi tujan. Henge, kahin tahsan tah tah nailouva jong nagel maithei, nang thu ahitan, hijong leh mihem chu seithei hilou,” tiho in a houlim in, ken jong jachat le kiphat lam thim toh ahile akhoh poi, tin kadonbut in Langgol lang kajon tauvin ahi.

Chua chu in khat ahithei dan dan in kageh tauvin jingkho vah in Moreh parking a nahung thah ingkatin chuteng kei jong ccpur langa kile tange, tin kaki hou toh lhon in Moreh parking kalhun lhon in kakoma, “Ulen, nei lungset tah tah ahia, kahin tahsen mong mong dingleh Moreh chan neihung thah pai paiyin,” atin, ken jong det det ngai louvin ticket 2 ka-book in, kajui pai pai tan ahi.

Akhou kaga lhung lhon tan, thinglhang kho mi kihom tho na mun ahi in, phone network ho jong ahoi beh pon, hijeh chun kajah a, “Mong hih jong le chun na in langa kile da inlang christmas keiho kho a mang khom ute, nagel thei le o ulen,” tin eihin jol in ainsung mite le akhosung mite ahung vailhung ho jong chun eihin jol uleh kamoh nervous man hiding ham kanom kit tan, Christmas mang khom din kakigel lha kit tai.

Christmas jong aki chai tan, nisim 27 Dec 2019 lang ahung lhing tan. eihin lho lho jong leu kei jong alouthei louva inlang phah ding kaphut tin ten jeh chun Kimboi le aloihon parking a eihung thah uvin kilha lel tah in New year man din eihin tem kit uvin ken jong, “Henge, new year teng hung kit nange,” tin kahung kikhen tauvin ahi.

Inlang kahung chun inlhun chan geiyin phone call in kakihou lhung kei lhon in Khobang long journey chu itih kah a lhung kahim, jong kahe man pon ahi. Inn kalhung vang in kalungthim vang Kimboi te kholang a kahin dalhah den bang in kamong thei mong mong tapon kile ding kal ngah lel in kaum jing tan ahi.

Nisim 30 nile imphal a kisuh to a shopping bol a New year mang a che pai pai ding a kakihou lhon bang in kaki suto lhon in phai sung a shopping kavah lhon in, OK hotel a bu kane lhon in ama ho kho Moreh lang jon in kache lhon tan ahi.

Bus chunga kahou lim lhon in ken jong kalung opkai na sei lhap sah na ding chance kahin lan ajah a, “Kim, ken lungset na dih tah a kahin peh a kakinep na ho jong atah jeng ahi namu chen tan ken nang lunggel kahe chen nai po e, tah tah a naki gel lhah hinam? Ole kagimpi nacheng nei khoto mai mai jeh a nei ngailut dan ham? Nei deilouva dongma mel a neivet lou, nei gel theilou jong le lhase ponge. Nalung gel kahet chen nom e,” kati tai. Hichun aman eihin donbut na a hoa chun, “Heu, nop mo vang nasah thei lou ding ahi. Henge, abul a pat a aleh chen gei kalung sung a um jouse hin sung lha inge. Na angsung a jachat na le kiphat lam na jong kanei tapo e. Ulen, ahinai kana lunggel chu hiti hi ahi, melmu louva lungset lampi kijot chu mitcho khaogui tuh tobang kahin, ka lunggel ding na confuse tobang chet a chu kei jong ahimai kahiye. Lungset na neihin peh bang in ken jong kahin penan tahsan na vang avat jep e. Lung op kai na kanei jeh a kahung a jong airport a responsibility jouse hinpeh a risk kalah ngam lou ahinai. Kaki gellhah na chu ahile, iti ham tia atah apilhing a gaso lou ding ahile poh nat behseh lou nadia hitia chu um kahin neihetthem ding kaki nem e. Tua kalung gel vang phat chom khat hijong le nakitahna nei vetsah naho joh hin ei ha convince joh in. Tu le tuhin kalungset mong mong e, tin nei hin jol in kanop ding ahi, seiyin Ulen, seiyin,” atin, chu in ahung thip beh in kagah vet phei leh akun in amitlhi ana kitheh chet e. Kei jong kaki hei pheiyin kaveilang khut in kakoiyin ka jetlang khut in akhut ka tuh in abil kom a kahin lungset e, kati e. Midin kitepna le kijol na jan lai cholha vah noi mun hoi mun nom lah la hijong leh keini dia Imphal to Moreh kikah a gari chung chu hinkho milthei lou mun ahi tai.

Hiti chun New year jong nop tah in khosung mi, insung le loi le pai cheng to nop tah in kahin mang chaiyuvin kikhen ding nikho alhing kit tan insung mi cheng in jong kumthah ahito kilhon a kum lhun chan ding plan akisem pan tama bang uvin kei ninjong plan kahin sem go lhon tan, kilhah na jan chun meiphu oi pum in kaki houlim lhon e. Ajah a, “Ven Kimboi, itoh itham nalhon chu aban ban in boipi na hitin masang a pat ina lungtup, ina ngalel jing lhon lungset subulhit tahi te, jing le nei hin jui jing tan,” katile aman kajah a, “Ulen, keilung gel jong hinsei yinge. Nang angsung a pah ding mong kahin tule tua kino henhun a, alouthei louva katoh nalang Singapore kaphah angaiye. Kalo eipeh lhing lou ho ule kavon poimo ho kaga kipoh doh ding ahi. Kahung kisuhfel teng dantheng in kicheng nate. Nang jong natoh na mun Pune jon phot inlang phat chom khat nipen,”tin ei vailhah in, hitia kaki houtoh chai lhon to thon kakile ding nikho jan nisim15, 2020 ahung lhung tai. Airport kalhung in eihung thah lou jeh in kaphone in ahile boina khoh tah anei jeh a ahung thei lou dan thu kiphalam tah in ahin seiye. Ken jong kahethem na e, kati jeng vang in kalungsung vang chu anop mo lheh in ahi.

Kaum na mun kaga lhung in angei bang in hinkho ahung chal in vangphat pin chom lou kah in promotion kahin mun ahi. Ahinla responsibility alen tan toh ding double work le extra hours ho kahin neiyin, kihou mat na jong masang banga phat dei bang in kape theipon ima jouse kasei peh jing in aman jong hinante kahethem e, eihin tin ahi.

Feb 20, 2020 nikho in message eihin thot in khen na thimthu sao tah in ahin jih in eihin thot tan ahi. Message mai maiya hitia khen na thu hung kisei hi atot ham ole ipi agel ham kalung adong lheh in ka-call leh asim akhel in ima ache tapoi. Kalungthim anat dan chu, chang at na koite a ol ol a kalungchang ki at keh abang in, ka lunggel agih dan chu vanchung pumpi hung kileh lha a ka tuhkhuh a kapoh abang e. Anneh tuidon je helou bou hitalou vin na toh je jong kahe tapon, inlang kile ding in ticket ka book go tan achung thu kakhol in ahile ajinei tai, ti thu kahin khol doh in inlang kile ding jong ka nom tapoi. “Thi puldou sang in hing puldou
ana joi” kiti chule “Gul chuh louvin gulgu ahepoi” kiti paocham tuh chu tun ipi kisei na ahi kahechen tai. Ka tahsa pumpi, kathajung ho jong ajeng ji in hai khop lou, hailouvin sot tah kana kigel ji e. Ka vet na jouse muthim ajing in, abang teng lunghel man in jol la jat jatin kana mao doh ji e. Ipi gel a ipi ti hinkho man ding ham, ti jong helouvin lunggel nei louvin kaum den tan ahi.

The End

Previous articleIKI ANGKOI LAINI ACHOM E
Next articleKathilto Gimnei 5