( Thusim Lui)
Masanglai pile pute chun,Thusim ana hao uvin, hinla tulai khangthah hon eja egelta pouvin e,eman sah gam taove,Thusim luiho hi, eimi ho adinga Gou khat ahin, ekichin jing dio ahi. Chule asim kha nailou ho dinga kahin jih ji ahije.
📘✍ Smartmyn Doungel
Masang laijin, Gamkhat nahin, Gamsa tampi ana um min ahi,Hichi lai munchu gam nomtah ahin, hampa hingsit set nin akeh in ahi.Hichi mun na chun, Lhopi khat le anou chuleh Bongpi khat leh anou khat ana cheng ngun, Niseh leh, Lhopi leh Bongpi chu neh hol lin avai konji lhon nin, anou teni chu ana dalha ji lhon nin ahi. Lhopi hin gamsa ho amanjin athat jin, kivah nan ana neijin, hinla Bongpin vang, hamhing, phoi ho anejin ahi. Niseh leh api teni Neh hol la avaikon jing jeh lhon nin, anou teni chu, anaki gol ngai lhon nin,hinla amani kigol ngai na chu anu teni ahetsah lhon pon ahi.
Nikhat hi nidang bang ngin anu teni chu neh holdin avaikon doh kit hon tan, vangset umtah in hichi nikho chun, Lhopin gamsa mat ding aki mujou tapon, Bongpi chu athat nin ahin nechai doh tan ahi.
Nilhah in Bongpi ahung vailhun lou phat nin, Bongnou alungkham tan, Lhopi kom ma chun, henu Lhopi, kanu khojing tadinga ahung nai poi atileh, Lhopin jong adon but nin, nangnu miki lose nu khun, Lamsah Lamlhanga hamhing ahin kineh khol hinah tah ati peh tai.
Jan ahung hitan Bongnou jong anu ngai nan akap tan, Lhopi jah a asei kitnin, Henu Lhopi kho ajingtan kanu ahung naipoi ati leh, Lhopin jong asei kitnin, nanu chu adang chah val la atui don na tuikhuh a hunglha lut den hitan te atipeh kit tai.Bong nou jong an neh nom talou vin anu ngai nan akap kho vah tai.
Ajing ngin, Lhopi avaikon doh phat nin, Lhonou vin, Bongnou kom ma aseitan, Gol keigel dan nin kanun nangnu chu ahin tha doh hitan te achuti louleh tugeija eti hunglhung dading ham, nangnu beija naum ma kei kanu angsung nga nomtah a kakol ji nom kasa poi, keinu jong that doh hitin, eni hon nin nubei jin umta hite ati.
Hinla bongnou anom ta pon, gol keinu umlou bon hibanga kipo na a, keinu umhih jong le nang nu aumle ei veng hon ding um ahije ati. Hinla Lhonou vin aseijin , kanu etha doh jeng louleh nehding amu lou nikho leh nang nahin tha kit ding hiteng chuleh kadou joulou ding ahije ati kit tai.
Hichun Bongnou vin ahileh nanu khubang nga hat khu einin eti etha ding ham ati, Lhonou vin olmo hih in gol, egal la Loubuh akhun lounei pan Ganhing thina thei Louvom akoijin, Janleh kanu kamsunga leh lut lehen thiding ahitai atin Louvom chu aga la hon tan ahi.
Jan nin Lhopi emut phat nin akam sunga Louvom chu ase lutpeh hon leh jingkah in Lhopi chu ana thidoh tan ahi. Lhopi athi phat nin, Lhonou leh Bongnou chun kitep na khat asem lhon nin, ethi leh ethi khom ding ehin leh hinkhom ding ti ahi.
Nikhat hi Lhonou leh Bongnou jong aneh achah hon kito loujeh in, munchom cheh a neh kihol din avaikon doh hontan ahi. Hichi nikho chu Pasal ni Gamleng sakap min ahung hontan ahileh Bongnou chu ahin mudoh hon tan aki mat hon nin thadin ahin kai hontan ahi, Bongnou jong hapen na apen leh, Gal la kon nin, Lhonou vin Bongnou pen gin ahin jan ahin deltan ahileh, amun ahung lhun chun mihem teni chun Bongnou chu ana that man hontan asa ana kisem pet tah hon ahin toh khatan ahi.
Hichun Lhonou jong alha ase behset nin akaptan, aki tep nahon ahin geldoh in, mihem teni kom chun asei jin, keijong nei that hon nin lang kathi nung leh, Bongnou gu leh kei gu hi munkhat thakhat nin hin vui khom hon nin ati.
Hichun mihem tenin Lhonou jong chu athat kit hon nin Lhonou sei bang2 ngin agu hon chu gamlah achun avui khom lhon nin ahin dalha hon tan ahi.
Phat chom khat jouhin, amani ma2 chu hichi munchun aga che kit hon nin ahileh, Bongnou leh Lhonou gu avuina lhon na chun, gopi toi jangpet nin, ni ana keh in ahi.
Hichun amanin jong kidang asa behset lhon nin gophung chu ave ve jeng hon tan ahileh, aloipa chun go chu hoi asa vallin inlang nga ki poh ding atin, achemjam ahin sat doh in, phung khat chu agah sat leh, gophung nga kon chun thisan ahung longdoh in ahileh aki cha beh set hon nin, jamding aki got hon lai tah in gophung chu ahung pao vin hitin ahin seitai.
Nei sat ngal ahi tah leh, kani lhon nin nei satlhu lhon nin lang ka bul lhon hi po hon ninlang lengpa kelkot sunga neikoi hon tan ati.hichun mi tenin jong gophung sei bang2 chu ani in aphuh lhulhon nin, abul akaldoh lhon nin, lengpa kelkot phunga jan nin agakoi hon nin ahin dalha lhon tai.
Jingkho ahung vahtan ahileh, Lengpa lha chapan, lengpa kelkot na naosen pasal ni kisai sai aga mudoh tan, atijan Lengpa kom ma kicha tah in aga seitan ahileh, lengpan, kenla goulo ding cha kanei pon, apha jenge Leng inpi sunga hin domlut nun lang kacha dingin vah khang tao vin tin thu ape tai. Hichun Lhacha pan naosen teni chu ahin dom lut nin hoitah in ahin vah khang tao vin ahi.
Chapang teni jong ahung khang2 hon nin, sakol chung touthei ahi lhon tan ahi. Hichi laitah chun, Lengnu nasa tah in ahung dam mo tan, Leng gamsunga Louthem jousen ajen nun hinla adam mong2 tapoi, hichun Thempu khat akou vun avet sah taovin ahileh, Na dam mo nahi Chapang teni naki vah jeh u ahije, Hichi Leng inpi akon nin solmang taovin chuti leh nadam ding ahitai ati peh tan ahi.
Lengpa leh Lengnun, Chapang teni chu a it lheh jeng lhon nin, hinla it hon lheh jong leh asol doh lou je aum tapon, hichun lengpan alha cha te asollin, gam mang lah a aga thah mangsah tan ahi.
Chapang teni jong gam mang noija chun ache che lhon leh gam mang lah achun agam mang lhon tai, hichun khat pa chun aseijin, golpa kei hichi lhemlhung chunga hin kal doh ing kating gamle go hin ve le inge atin, lhemlhung chunga chun akaldoh tan ahileh, Lhemlhung hita louvin saipi chung joh anahitan, saipi chun apotan ahi.
Hichun saipi chunga toupa chun agolpa kom ma, golpa ka delchen kabot tel2 lin lampi a kathe thang nge, hichi nung2 chu hinjuitan ati. Aloipan jong ponhal um2 nalam chu ajui jui jin ahileh, Leng inpi khat aga jui lut tan aloi pa toh aga kimuto hon tan ahi.
Hichun saipi jong aki nung lekit nin, chapang teni chu ada lhatai.
Chapang teni chu insunga avah lut hon nin ahileh, lekha bu aluija luikhat amu hon tan asim hon leh, hichi leng inpi chu amani dinga kikoi ahidan ahedoh hontan aki pah lheh jeng lhon nin ahi. Jan ahung hitan, Mengcha khat nin jucha khat ahin dellin ahileh jucha chu kohom sung khat na ajam lutnin, chapang tenin jong jucha chu thading ati hon nin kohom chu ajan lai hon tan ahileh, kohom sunga chun sana danga ana dimset jengin, ama nin jong hichi sa na ho chu ahin kijoh pan hon tan ahileh ahung hao doh lhon tan, hichun amani kom ma nehle chah thum mi ahung pan tan, ahao na hon ahung kithang cheh2 tan, ani anin, agamsung lhon na chun mi ahung kitol lut2 jengin ajo nan lengvai ahin po hon nin, hichun gamsunga nungah hoi cheh jidingin akipui lhon nin nomtah in acheng lhon tan ahi.
Nasim chai jeh in kaki pah e.
The End.
————————————
