KHUTSOIYA KIKAP LIH PA LHADAM

Crosby Haokip

Kakho languva thilsoh tah tah thusim ahi.

Kumseh a lou natoh kichai tengle gamnoiya changvaiyin kache jinguve. Khosunga kona upa gollhang kihe lou mitampi changvaiyin kache jiuvin, aloi loiyin mi ni nin kakihom uvin kakhouva kona nikhat lhingset kijotna mun Dingpi mola chun sa changin kache jinguvin ahi.

Kumkhat jong hiti chun changbol kichaiyin khosunga konin pasal mi 10 gamgeh dingin kakigong tauvin ahi. Nikhat lhingset kijot ding ahijeh chun neh le chah po ding mai maiyin pasal 3 kakipuiyun hitichun nilhum keiyin lam kajot tauvin ahi.

Amun kalhung tauvin, hichun nilhahin an tuitahin kakihon un, camp khat kakisah un hichea chun kajan geh tauvin ahi. Ka changvaina ding mun chu camp a kona jong gamla tah ahi. Anilhah in nomtahin kakichol un, ahinlaa hiche nilhah jan kamang chun hiche kage namun uvah chun tehse pu khat kakoma ahungin eihung gihin kajah a, “Kile tauvin, achuti louleh nangho joh nathi diu ahi,” ahung tin ahile kahung kin khangin, kamang kangaito nan kaihmu tapon ahi.

Jingkahin kaloiho koma kamang thu kaseiyin ahile, nato nakisop theng lou pou chu milah lahin seihih in, eitiuvin einuisat tauvin ahi. Ahinla kei chu kalung among thei him him tapoi. Chuin aloi loiyin pan mun kahung kihom tauve. Chua chun kei chu kaval tan ahile mi ni toh eisubeh un kakikhen un kapan mun cheh u jonin kache tauvin ahi.

Keijong kaloi mini toh chun kakilhonin nidan khat sung chun gam mang lah kajot jot tauvin ahi. Hichun keiho thum jong chu pan munding kakihom son kit un, sah le lhanga kakikhen tauve. Kei chu sah langa kachen kaloite ni chu solama ache lhon tan ahi. Hiti chun thip beh chan katou chen kamang phat loutoh chun ahile sa hung jongle kap louding kati ahitai.

Ahinla sa mong mong kamu tapoi. Kaloihon thal long khatbeh jong ahin lhadoh deh pouvin kalung gel a chu sa hi umlou mong mong ahitai, katin ahi. Ahin chutia katou thim beh laiyin noilanga konin thal long khat hatahin ahung gingin kalung thimin kaloite ni hin sa khat akap lhon ahitai, katin katouna muna chun katou den tai. Ahin chutia thipbeh a katou laiyin eikikou kajan keijong thing chunga konin kakum lhan kachen ahileh kaloiteni lah a khatpa chu anahin eimu mu chun kicha tahin thusei thei louvin akap tan ahi. Kenjong ajah a, “Ipi nati lhon ham? Naboi lhon ham?” tia kadoh chun seithei lou sasan kajah a, “Henge, iloipa chu sa melin kanamun khut soiyin kathat kha tai,” ahinti chun kachom mangdeh e.

Chuin apat patin amun langa chun kache lhon tai. Amun kalhun lhon chun akikap khapa chu nakithol tholin thingphung bul khat’a anakingaiyin athisan hung lon dohna aoi chu anakisip in kho helouvin anaum tan ahi. Kalhun chun kalung ana valin amaichang tah kabeh pehin kachil kaset khumin ajah a, “Pasal pi pi hilaiya hi nanatouva naoi nanakisip ham? Najahcha lou?? Pasal hangsan chu hitin aum ngeipoi. Pasal hilou nahi,” katin tehse hon anachepi bangun ahouset toh katho tan ahi. Chuin kaloipa toh chun kakitho lhonin muntheng lah khat’a kakaidoh lhonin angong kathampeh leh alum thim nalaiye.

Hichun thing khatin kahin jong lhontan ahile, vo henu, agih dan dan chu jon but but ahitapon ahi. Hichephat chun munkhat’a katoupi lhontan ahile kho ahung jing tai. Kaloipa chula akicha cheh cheh tan, kache le achen, katou le atouvin kachop chopnaa achom tan ahi. Chuin amuna chun thingkang ho kachom khomin mei katih kong tan ahi. Hiti chun pon khat kakhu khum lhonin jing khovah kangah lhon tai.

Chutia mei kaoi jing lai lhon chun kavel lah lhon ahung poh chah chah tan ahi. Ahin kakoma pan ahepon, kihetsah leh kichaval ding ahijeh chun ima kaseipeh pon ahi. Kho thim ahitan katouna muna konin kaven ahile kavellah lhona chu mikhat ava le le kamun ahi. Pasal hangsan kahi jehin kakicha pon ahi. Hiti chun keini vellah a chu mikhat in eivel le le lhon kamu jing tan ahi.

Jan ahungsot tan kaloipa jong mutsoh tahin kakoma atouvin ahi. Chuin kaloipa chu ihmu dingin kasolin mei koma pon kapha pehin aihmu tan ahi. Chuin kachangin katouvin ja kachep khu the thu tan ahi. Chutia katou lai chun kavellaha mi che ging kaja kittan kavet leh ima kamu kit pon ahi. Ahin gam noilah a mi khat ava le le chu kamun kaloipa lhon lhagao ahiding chu kahen kichatnan jong kaladeh pon ahi. Hiti chun khovah keiyin eilhem tan ahi.

Jing khovah in achangseha dalhah ding anop lou phatin kaloipa jah a, “Nang gachen lang iloite ho gakou tan,” katin amajong ache tan ahi. Ache nung chun keijong umthim mo manin thilong jonna dingin thing kasat tan ahi. Kachem kalap a thing kasat laiyin kagal a naicha khat a chun kei banga thing kiphuh gin kajan, hichun hoitahin kaven ahile athia lum kaloipa chu ahitai. Hichun kalung anom thei pon kakilen ahile kaloipa thilong chu abep bep in anaum thou kit e. Kaloiho la ahung lhung hah val uvin kangah khop tan ahi. Chuin songin eihung kisep jin kavellah a thing ho ahung kiteh poh lah lah jeng in ahi.

Nidan 2 jouvin kaloiho jong ahung lhung tauve. Chuin ajonna dingin thing kasat un inlang che dingin kakigong tauvin ahi. Chutia kakinom le kah uvin ni alhum go tan ahi. Chuin kakipatdoh uvin ahileh lamkim kaphah un kho ajing tan ahi. Chuin khosung jot touna kentou kahinpha tauvin ahile kanunga hungpa chu kachung senan ahung kineiyin kicha tahin kajah a, “Heu, kanunga mivom deh duh khat hunga kati ja vala kahung jam ahiye,” atin chuin kamasanga kache sahin kei anukhah penin kapang tan ahi.

Chutia kache jing laiyun kentou lai tah chun eihung kinung loiyin ahile kakin valin kamoh pen jenga ahileh kamasanga pa chu akin valin ajam leh amasanga che pa to a akitat in ahung nung lhuh chu lamlhang langa akilih mang tan ahi. Akichat ding kahet jehin kagakai dohin ahi. Ahinlah ajo jo nan thilong chu jon but ahitapoi. Agih cheh cheh tan, pasal chujat kakithouva kajon vangun kadom kang jou tapouvin ahi. Chuin kaloihon, dalhau tin jingle gala taute, atiuvin ahinlah kanom pon ahi. Chuin kalung ahang valin kachem cha chu kakimat a kakitom in, “Thilha chavei, gamhoise gamjang se thilha nahiuvam, kinchel in kum tang o,” katin mithipa chung laha chun chemcha kalamin ahile ahung phan ajang tan ahi. Hiti chun anah nahin lamtou chu kakal doh nah nah un ahi.

Chuin lhanmol kahin jot tou tauvin ahile lhanmol langa pat jong chun songin eihung kisep un, kakilhonpi kaloiho chu ahaisam paidiu ahitai. Hiti chun anah nahin khosung kalhung un, anung pena che kahin khosung kachot lut uvin jong eihin sonlhun kakhup kakita koh in ahi.

The End

©2020, Crosby Haokip, All Rights Reserved