KHAINI/SAAJAN NAKICHU LHON SANGIN BIBLE KICHU JO LHONIN

Athupi: “Khamna theiya lop chu miching ahipoi.”

Sun, May 31, 2020 by Crosby Haokip

1. Khamna thei chu ipi ham?

– Khamna thei akitileh ju, WY tablet, heroin, kani, ganja ho bou hi khamna theiyin igel un; khaini, Saajan, Talab, jalda/kuwa, twibuh ho hi nehthei danin igel tauvin adihmo lheh jenge. Tahsa sukha thei neh le don jouse chu aphalou ahi, tin lajeng leu hen dih pen ding ahi.

2. Ibol’a nacha koma, “Khamna thei ne tahih’in, nati ham?”

– Minu le mipa umchan them, mipha le Pathen lama hat mi chun niseh leh achate dingin taona amang jinge. Chate hon khamna thei ahin neh doh u hi koi koma ahinmu masah pen u ham? Aloi le apaiho koma kon ham? Ahinai sai poi! Nachate chun nanga kona ahin hetdoh joh u ahi. Chate hin aneova pat’a anu le apa umchan le pao dan ahin melchih jing u ahitai. Nang naphat leh nachate pha ding ahi. Kelngoipi sunga ngei apeng ngeipoi. Ngapi oisunga konin uicha apeng kha poi. Nangma pha masan lang maicham a nachate hil jingle chun Chate camp a sol ngailou helding ahi.

3. Khamna thei hin suhset theina tha ichan aneiyem?

– Khamna thei hi kichat umtah hemto chemjam le meithal sanga jong hatjo ahi. Chemjam le thalin insungnom asuse poi. Ahin khamna theiyin vang insung atunggop theiye. Khamna thei neh jeh-in insunga ka na le kinah na ahung umpai jitai. Pasal’in ju ahindon tengleh amelhoina beiya ahitai. Pasal ahina umlou ahitai. Khamna theiyin numeipha asusen, anu le apa jeng jong akinahpi jin ahi. Ju le sa a kham kham jeng pasal toh kichen sanga insunga uipi khat kivah nu aincheng jon ahi.

4. Khamna thei chunga numeiho hinkho

– Khangdong cha chan sungnat, numei nat aheuvin; genthei tahin cha le nao ahing jiuve. Nungah hoitah khat chun khamna thei; jalda, kuwa, saajan, talab shikhar, twibuh ahin neh/don tengleh Pakaiyin adinga agotpeh pasal pha chu Pakaiyin midang ape jitai. Hichengse hi nenlang jipha namu nadingin tao jongle chun phachom talou ding ahi.

5. Pakaiyin koitobang chu ajiding ahol peh em?

– Khamna thei nelou neh le chah a kitup
– Aji dinga taojing
– Nu thu pa thu ngaijing
– Mi phattheiboh chang jing
– Bible simjing
– Alung deilama hinkho mang

6. Insunga najitoh khaini nakichu jing sangin Bible simding kichu lhonle chun Pakai phattheiboh nachan lhon ding ahi. Naji’n, “Hiche bol hih’in,” atileh bolda jengin. Moh umsangin, tia games nakichep lhon sangin Bible simkhom lhon le chun nang ni dinga insungnom hipen ding ahi.

7. Khamna thei neh hi uicha eh le than ne tobang ahi

– Society sunga mi hettah ahilou leh lekhathem tah khat chun khamna thei ahinneh tengleh amachu ima ahi tapoi, ti akilang pai jitai. Ichanin ching inlang them lheh jongle chun naneh nadon ahoilou leh pannabei nahitai.

The End