–Crosby Haokip
PART 1
Nikhat kanun kajah a, “Boi, chen lang Themnu nu koma, ‘Keihin tunile thinglhang louvah anme akhai, anong ho holin che hite,’ tin gasei tem o,” atin, kanun eisol naa kache tan ahi. Kachen ahile, Themnu nun chaksang ah an anahon in anakiseimo lheh jenge. Kalhunin ajah a, “Henu, kanun hitin aseiye,” katin, kanun aseibang chun kaseiyin ahile, amajong anomin, kile dinga kakinung heile, Themnu nun achanu akouvin, “Keilungset Them, hung thouvo. Mi na-u Lalneo bon kholai lenga hung taa, nang numei pen pen tuchan ihmu nahim?” atin, anun alungset dan chu kagelle, katha anom lheh jenge.
Chomkhat jouvin Themnu jong ahung thouvin chaksang langa ahungin, chuin kei eimu phat chun eihin houvin: “Heu, nomtahin thouvo, hung kisutheng tadinge,” atin, kemlanga amai agakiphet in ahi. Chuin anun kajah a, “Lalneo, tunile ipi nabol ding ham?” atin, kenjong ajah a, “Henu, ima bol ponge. Tunile loujaova loi chinga kache ding ahi,” katin, chuin kolcha ahin sungin kadon tan ahi. Chuin Themnun bongnoi cha ahin om kitin, eipen kadonin, chujouvin kain-u kajon tan ahi.
Kanutoh an kaneh chai jou lhonin Themnu le anu ahungin, kanu teni lhon thinglhang louva che dingin akigong lhonin, ache lhon tan ahi. Ache nung lhonin Themnun kajah a, “Heu, sunle hung o. Tusun le kain uvah hai nekhom hite. Tua hi von kasop ngai ding ahi,” atin, kakitem toh lhonin amajong ache tan ahi. Ache nungin kakigelin, Themnun sunle hai nenkhom dinga eitep phat chun kachen ajah a, “Them, kei sunle loi chinga kache ngai ding ahiye,” katile aman kajah a, “Chuti ahile, von hinsop chaiying ting, chujoule hai neh ding kibol hitin, loi chingin jong che khom hite,” atin, hiti chun kakitem toh lhonin, avon kasop khom lhonin ahi. Von kasop chai jou lhonin ain uvah hai tampi kalou lhonin, kahet lhonin; chi le malcha toh tuitahin kakisem lhonin, loi chinga che dingin loi chungah katou khom lhonin Naakol gam kiti, loujao lang kajon lhon tan ahi.
Amuna chun Mongphung lentah khat aumin, kalhun lhon chun loi ho kalha lhonin keini hiche Mongphung noiyah chun katou lhonin kakihoulim lhonin ahi. Chuin Themnun kajah a,
THEMNU: “Heu, na-school kaina muna nom nasah sah hinam?”
KEIMA: “Anome, tiding ahijenge, nao. Nangla ina ipi nabol ji ham?”
THEMNU: “Lekha sim talou chun ipi kibol ding ham, niseh a loukon hijeng. Lou kakon lou ni le insunga toh thei thei katoh ji ahiye.”
KEIMA: “Ibola school kai nanangah ong? Nga hih laiyin, tia kahin hil hil jeng hilou?”
THEMNU: “Kisim nom jongle insung hahsa vala, insungmi ten eichom jou talou.”
KEIMA: “Thanop na ineileh, alampi aum e. Lekhasim nangah a tua ipia naphat chom ham?(Lung hang thim tahin kaseiyin ahile, eihin ven nommo asalheh jenge).
THEMNU: “Heu, hiche vanga chu nalung ham mo? Kenjong kasim nomlouva nagel ham?”
KEIMA: “Kalung hang hih ding ham? Hibang kahin kineppi laiya lekhasim nangah hi pamai kasah hichu.”(Kalungnop mo ahet phat chun ahung kiheiyin kakhut atuhin).
THEMNU: “Heu, kanutoh kakikhen jou lou jeh ahiye, adih taha sei din.”
KEIMA: “Hiham? O, naosen tobang nahilam kahet lou chu o. Hiche jeha chu ba nanun nakou tengle, ‘Kei lungset Them,’ tia nahin kou ji hinte na?”
THEMNU: “Henge, kanu behin eilungset loule, eilungset ding dang kinei jou louva,” atin, chuphatin kadaiyin:
KEIMA: “Kei lungset them, kei lungset them!” tin avel avelin kaseiyin kadaiyin ahile, mol khat ahin kilahin, hiti chun kakisun tot lhonin ahi. Kalel lhon phat chun lhem lhung ah kakingai lhonin kakichol lhonin ahi.
Chujouvin kahin poh lhon haithei chu kane lhonin, chule agama um theiga phabep toh kalou lhonin kane lhonin ahi. Chuin Themnun kajah a, “Heu, tuni chu kahinkho man anop vale,” atin ahile, kipanan kadime. Hiti chun niseh tobangle loi chingin kache ji lhonin ahi. Abangle ama aong jipon, aon seh le vang amajong kaloi chinna muna ahung jingin ahi. Chule loi chinga kache seh lhonle aman me ahinpo jin; ken bu kapo jin; hiti chun sunle thingphung noiyah kane ji lhonin ahi. Nilhah lamle akoma vadungah chun kisil in kache ji lhonin ahi.
Phat le nikho ahung chalin ahile, ka-suty kichai dingkon ahitan, lunghel nan kadim e. Chule, Themnu guhthimin lungsetna kahin neidoh tan ahi. Hiche lai chun Sugnu a school kakaiyin, Class 12 kasimin ahi. Kache ni ding nikho ahung nai phat chun lunghel nan kadimin, nikho homtho tahin kamang pan tan ahi. Thinglhang khomi lhom akihijehin houbungle khosunga lamkai kahin tuh pan pan tan ahi. Chule hinkho phatah a kaman jehin, milungset le tahsanna kachangin, chule mihon dohle tun in eineiyun ahi. Chule Themnu anun jong eison jehin achanu, Themnu phataha kavet suiya kakivoppi dingin aseiyin ahi.
Nikhat Themnu te inah kachen ahile, achangin anaumin an anahonin ahi. Eihin mu chun touna ahinla dohin kajah a, “Heu, hung touvo,” atin katouvin ahi. Chuin kenjong Themnu jah a:
KEIMA: “Nao, kache nungle kei henu koma anache ji ji tango. Ajeh chu kei kapotdoh tengle alunghel val ji e,” katile, kathusei chu alungnommo lheh jengin kajah a,
THEMNU: “Heu, hoiya nache got ham?”
KEIMA: “Suty akichai tan, ka-School kaina mun kajot vah kit ding ahitai.”
THEMNU: “Lunghel aumna dinge, napotdoh nungleh. Hijongle heu, hoitahin lekha hinsim tango.”
KEIMA: “Henge, nangin jong akoi chom, tin gellouvin henu teni anakithopi jing o.”
THEMNU: “Henge heu, nache nungle kachanga hinkho iti kaman ding ham?”
KEIMA: “Kenjong iti hinkho kaman ding ham, kalung adonge.”
THEMNU: “Heu, nang simlai nahin chuti hih o. Hiche sang chun hoitahin lekha hinsim le chun, nanao keidin jong nikhat le kakisemdohna hitheiyin te.”
KEIMA: “Nao, ilenna lhang ho kavet le lunghel louvin umthei ponge.”
THEMNU: “Heu, chutin seihih o. Genthei te ihiuvin nangin hoitaha lekha nasim loule agenthei ding itam-uve.”
KEIMA: “Henge, hoitahin hinsim nange.”
Lunghel nan vang kadime. Hijongle Themnun hoitah-a eilhamon jehin kalung amonge. Chule aman eithumopna thupi pen chu ahile, kakoma, “Heu, kabon-uva nang chunga kingai kahiuve. Kahin kineppi cheh-un, nangin hoitaha lekha nasim loule nang henu keo hilouva, keile kanu jong kagenthei ding ahiye,” atin, athusei chun hatahin kalung asukhan kitilkhounan kamangin ahi.
Suty kichai masang, nikhat Themnu toh loi chingin kache kit lhon tan ahi. Tunile vang Themnu koma kalungsetna thu seidoh tange, tin hatahin kakitom lah jengin, chule kakipatdoh lhona patin asei ding dan kakigel pan tan ahi. Chuin loi chungah katoudoh lhonin loujao lang kajon lhon tan ahi. Neh le chah kakipoh ning lhingset lhonin ahi. Chule hiche lai chu chang akiphu jou ahung hin del del laitah ahi.
Chuin loi kalha lhonin keini thingphung noiyah katou khom lhonin ahi. Chuin akoma kalungsetna thu sei ding kagot vangin kaseidoh thei mong mong pon; thu choma pat ding, kati jongle athupi kalhung theipon, thudang seiyin kamah thah ji tan ahi. Chuphatin kenjong Themnu jah a,
KEIMA: “Nao, tulah hi ka-ka jeng ding kanome.”
THEMNU: “Ibola ong heu?”
KEIMA: “Kalunggel ho hi guilhung thei ding hihen; khatin kalungthim ahet them ding hile, kanome.”
THEMNU: “Heu, henu toh nahung kilungnop mo lhon ham? Koitoh nakinah ham?”
KEIMA: “Ahipoi nao, mihemin ilungthima ipohnat khat iphon lhah theilou khu ahahsa vale.”
THEMNU: “Nalung thima ipi pohnat na nanei ham? Cheho tobang chu gellou ding ahi.”
Chuphatin kenjong seithei lou sasan Themnu jah a:
KEIMA: “Nao, lungset naume.”
THEMNU: “Heu, kakipah e, neilungset chu.”
KEIMA: “Nao, dongma nanei khah tam?” katile eihin phoh in:
THEMNU: “Hett! Che ho chu sei lou ding hichu.”
KEIMA: “Nao, sei tango, kahet nom chu me?”
THEMNU: “Ashh, heu, ken hoilah dongma kakilah ding ham? Dongma nei sanga ka-u nangtoh ikivop hi nom kasa jo e. Ale nangin nanei hitam leh?”
KEIMA: “Ken kanei tah chu,” tia ka-enghou le alungnom mon:
THEMNU: “Heu, dongma nanei chu kipa aume. Keitobang honla kinei jou lou. Ale koitoh nakingai ham?”
KEIMA: “Keitoh kinaiya um pen pen hi hinah ta?” tin katot in ahile, kajah a:
THEMNU: “Hett! Che ho chu seilou ding hichu.”
KEIMA: “Kisei deh ta!”
THEMNU: “Heu, seilou ding ahiye, kati chu. Dongma neingai lou pi chu.”
KEIMA: “Dongma kinei doh kom ta,” tin ka-enghouvin ahile,
THEMNU: “Heu, kenvang dongma moh nei ponge. Dongma neidingin ka-chapang nalaiye,” atin, dongma anei nomlou chu kagelle, kihel jongle nom ponte, katin kalung aneo tan ahi. Ahinla kalungsetna asang cheh tan, umje touje kahe tapon ahi.
Chujouvin van ahung thimin ahile, go ahung ju tan ahi. Thingphung noiyah kaum lhonin, ahinla go ahahjuh val tah jehin thingphung noi mei meiya umna thei ahilou phatin agal lou laiya buh um chu kajon lhon tan ahi. Chuin buh sunga kalut lhonin kasang khol kasut lhan Themnu kapen ajah a, “Nao, nasam kitheh got o, akot vale, ajole dammo khan nate,” katin ahile, akilahin kitheh nan amangin ahi. Chuin ajah a, “Nao, dap nasah ham?” katile, “Heu, adap thouve,” atin, chuin buh sung kaven ahile, ponsil khat anaumin ama kasil peh in ahi. Chuin aman molle lhanglah aven keivang kaham nom tapon ahi. Ajeh chu dongma anei nomlou thu asei chu keiya din ahahsa lheh e.
Chujouvin kakiheiyin buh thingjola meiholin, “Lanu, lanu, tin kap jong leng; haiyo heu, hinti ponte,” tin athu lhang lhon kajihin Themnu jah a, “Nao, hiche hi sim tadi o,” katin, chuin ahung kiheiyin asimin kajah a,
THEMNU: “Heu, nangjih ham? Ibola hitia chu najih ham?”
KEIMA: “Nungah khatin kalunggel ahet them hih a le kajih ahiye.”
THEMNU: “Koiyin’em heu?”
KEIMA: “Nang la?” katile-
THEMNU: “Hett, che ho chu seilou ding ahi, kati hichu. Nanao thu jong ngaidom dom tang,” atin, kalungsetna iti sei ding ham, tia kakigot vangin hahsa kasa tan ahi.
Romantic thulang akoma kasei pou poule “hett” atin eiphoh phoh jeng tan ahile, ajo jo nan “hett” ati chu kangainom doh tan, kale engtot ji tan ahi. Thukhat kaseiya “hett” ahinti tengle kanui jin ahile, amajong amoh nui jeng jin ahi. Kenjong Themnu jah a, “Nao, khatvei ‘hett’ hinti tadi o,” katile anuijan, “Heu, ibol a ong?” atin, kenjong, “Kangai nome nao,” katile anuijan ahi. Chuleh thu khat kaseiya, “hett” ahinti tengle kangai nom ji valin, kale dai jin ajah a, “Nao, kingai ta te eini,” kati jile, aman, “Hett, heu, che ho chu seilou ding hichu. Ka-upa nahibou chu,” ati jin ahi. Hitichun “Hett” ahin ti ding ngeinom nan kaphin phin jeng in ahi.
Chutia kalungsetna thu kasei vangin aman kajah a, “Heu, hiche ho chu seilou ding ahiye. Kei nanao nu kahibouve,” ati phatin nikhat akomah kaseiyin, “Nao, ahile, kanao bangin nagel tange. Masanga kathusei ho chu iman gel hihin. Kahin tot mei mei nahibouve,” katin ahile, aman lungnom mo tahin, “Heu, hiche kasei vanga chu nalung hang ham? Neilungset tah tah hijongle ken dongma kanei nomhih laiye. Kathusei ho chu iman gelhih o. Kachunga Nalunghan a neidon louleh ken “heu” tia kou ding kanei lou ding ahiye,” atin eilungsetna vang aumkit e. Ahin aman eilungsetna vang chu ucha kilungsetna bou chu ahitai. Hiche phat chun avelin akom’ah lungsetna thu kasei tapon, chuleh hou louvin kaumin; numei dangho toh kahung kivop pan tai. Numei dangtoh kakivop in ama enghot hot nan kaum tan, lamkah tukah lah a eihin hou jongleh thuchang khat le ni bouvin kadonbut in amai jong velouvin kache pei ji tan ahi. Hitia ka-engbol chu keidin jong anom chom pon, niseh le kangaina le kalungsetna akibe jon ahi.
Ahin nikhat kakhou nungah khattoh thingphung noiya kanatou pat lhonin Themnu ahungin kajah a, “Heu, kain-uvah hung tadi o. Thilkhat kabolle kajo hih a, nangin neihung bol peh o,” atin, chuin kenjong anung kajui tai. Insungah kalut lhonin ahile, kajah a,
THEMNU: “Heu, insunga khun lut tadi o,” atin, chuin asei bangin kalut tan ahile, kanungin kot eikam khum tan ahi. Chuin kot kasun ajah a,
KEIMA: “Nao, ibola kot neikha khum ham? Kot neihung hon peh tem o,” katin ahile, bangah akingaiyin kajah a,
THEMNU: “Heu, kanun, ‘Kei lungset Them,’ tin eikou jin, nangin iti neikou ding ham?” atin, kenjong ajah a,
KEIMA: “Nao, tia kahin kou ji chula.”
THEMNU: “Hisanga chu min ngeijo kanei lou hitam?” atin akap in ahile, kalung ase lheh jenge. Chujouvin kajah a, “Heu, changa hinkho mang, penpi neilou le ule nao neilou kahin, nangbou “Heu” tia kahin kou ji nahiye. Kahin kineppin kapenpi ka-u bangin kahin gel e. Ahinla tua ipi neilo got hitam? Tun neihou nom tapon, kakomah jong naum nom tapoi. Iman neigel tapon nanungah ho bouseh toh nakivop in kei iman neigel tapoi. Hitia neibol ding ahile, “Heu” tia kakou ding khat neihol peh tan,” atin lhase tahin akap tan ahi.
KEIMA: “Nao, kot hong pou pouvin, chutilou le kanao bangin nagel taponge.”
THEMNU: “Ahile, nanao bangin neigel tang o,” atin chuin kot ahin hongin ahi.
Chuin alhi katheh pehin ajah a, “Kanao banga kalungset koima aumpoi,” katin kalhamonin ahile, ahung nui doh nah nah in ahi. Chuin Themnun kanung ahin juiyin kain-uvah kache lhonin ahi. Chuin kanun kajah a, “Boi, navon kigop tup loiyin, jingleh Sugnu a iche ding ahitai,” ahintin ahile, Themnu ading denin lhase tahin eiven alhisoh abang tan ahi. Chuin kajah a, “Heu, jingle nache ding hitam?” atin, kenjong akhut katuhin, “Um, jingle kache ding ahitai. Tunile keiho inah an nekhom hite,” katin, hiche nilhah chun keiho inah an kane khom lhonin ahi.
Jingkah matahin kanun eihin thouvin, hitichun kapot kakipoh in kakipat doh lhon tan ahi. Khosung kadalhah ding konin Themnu te in kaven amaho akithou hih laiye. Kache masangin khatvei beh Themnu mel mu ding kanom lheh e. Lung ngui aumin, lunghel aumval jenge. I-lungdei khattoh melmu lou, kivailhah louva potdoh ding chu hahsa kasa ma man ahi. Itih tah le Themnu ahung potdoh dem, tin ainlang-u kave ve jengin ahinla thou loulai hintin, kanun kajah a, “Boi, chen che tahi te,” ati phat chun kakiheiyin kache tan ahi.
Aban Part 2 anangah jing ute. Asim jousen Pathenin phatthei boh tahen.
©2019, Crosby Haokip, All Rights Reserved
