Home Lahkhom Naocy Haokip KEIJONG NEI PUIYIN HE-U

KEIJONG NEI PUIYIN HE-U

10
0
KEIJONG NEI PUIYIN HE-U
KEIJONG NEI PUIYIN HE-U

(Short Moral Story)

Written By:- Naocy Haokip

(Sapkangte chanu melhoi minthang tah le vaichapa hinkho thusim)

Motto: Lungset dihtah hi tonsot geiya ding ahi.

England gamsunga hin sapkangte chanu melhoi minthang tah le lekhathem, chule lasathem minthang ahiban’a games langa jong bolmo behseh neilou, talent neitah nungah khat anaume.

Amunu hi Pathen helou le Pathen houlou anahin, ahinla kiletsahna vang aboltheina ho gel sangin akiletsah behseh pon, mijouse toh kihouthei anahi nai.

Nikhat England gamsunga khopi minthang tah mun khat’in kipa golnop kin loupitah agongun, amanu chu lasa ding le alam ding, amelhoina vetsah ding, (show bol ding) chule mipi kipa thanopsah a mipi sulim din akou tauvin ahi.

Amanu jong mihaosatah le mibolthei ahijeh chun anungjui (bodyguard) jong pasal thahat cheh mi tampi akoipeh-un, hiche anungjui pasal thahat cheh mi gup chu akipuiyin akounau munin achetan ahi, amun agalhun chun mipi sangsom, sangja awgin kithongin analem’un, nom asalheh jengin ahi.

Mipi lah a ahung dindoh chun mijousen khut bengin ahung aovun ahile Ohe! Paradise a umding dan rehearsal bol abang jengtai, mipi masangin athepna jatchom chom avetsah-in, a awngei dan dan jong chu alasah kichai ding jeng jong mipin ahomtho leu jiuvin ahi.

Hiti chun nithum sungin jinjaum kikou ho, leng ho le milen milal jouse sangin mipi jousen sapkangte chanu melhoi minthang nu bou chu avetnom’un, adeisah-un, angaisangun, akipapiuvin ahi.

Kin jong thupitah in manchai ahung hitan, hinla amanu umna mun jouse chu a-ongkah beihel’in mipi akitit cham jeng nalaiyun ahi, amanu jong agilkel jeh chun hiche kin kamanna khopi sunga dinga restaurant thupipen chun nehthei nea kivah dingin achetan ahi.

Mipi nasat behseh jeh chun anungjui pasal thahat cheh mi gup ho chun phatah-in avengtup’un, ajet avei, anung ama in achingtup’un ahi.

Thupitah a hotel room nomtah sunga akivah lai chun mi genthei neilou chaga le apdih deh jeng, avon ho jong kidah-um, khoinom umlou hel, pasal khat ahunglut gotan ahile nungahnu nungjui ho chun alutsah nom pouvin, kot jong ahonpeh pouve, itobanga nodoh ding ativangun anodoh jou pouvin, aloje ahetlou phat’un nungahnu jah a agaseipeh leu amanjong agilkel khat tou hinte, hinlutsah tauvin atitai.

Ahunglut thei phat’in pasal pa chu akipah-in, nungahnu komin kipathu aseiyin ahi, chuin nungahnun jong adongin;

Nungahnu: Ipi nadei ham?
Pasal: Imacha kadei aumpoi, thilpeh kapeh nom joh ahi.
Nungahnu: Ipi ham neipeh nom chu!
Pasal: (Adipse sunga konin lekhabu neocha chu apen) hiche kapeh nom ahiye.
Nungahnu: Keihi lekha helou dana nei gel ham? Course jouse kachai soh ahitai, neipeh hi nangin kilahjon ken nang lekhabu kadei poi.

Pasal: Ahipoi, course jouse nachaitah vangin hiche lekhabu hi nasim khapoi, lungset tah-in kilah-in, chule anasim tei teiyin.
Nungahnu: Ohh! tin lekhabu chu alan agah vet le “Holy Bible” tin akijih-e,
Pasal: Kakipah-e! Kathilpeh neisanpeh aban le kenjong seibe nom kaneiye.
Nungahnu: Tun kiletan, kapotdoh ding ahitai, nidang phat dang le kimuto taute, tin lekhabu chu anungjui pasal khat chu apen hotel’a konin apotdoh tauve.

Nungahnu chun in alhunin hiche lekhabu chu alupna koma table box khat sunga akhumtup’in phongkeh louvin akoi tan ahi.

Phat le ni ache jingin lhakhat alhin nungin nikhat hi mun thupi lai laiya avale laiyin sapkangte chapa melhoitah khat toh ahung kimito tan, akihoulim lim lhon le amani jong hinkhoa din ahung kilungset doh pai lhontan ahi.

Nikhat thupitah a kimuto dingin ahung kitem lhontan, chule athupi lhondan kivetsah to ding changeiyin ahung kihou lhontan ahi, ani lhonin anungjui jong atam theipen, atouna gari jong athupipen pen, avon lhon jong amantam pen penin kivonin ahung kimuto lhontan ahi.

Chutia thupitah a atoukhom lhon laiyin vaicha genthei pasalpa chu nungahnu komin agavah lut kit tan, nungahnu kengbul’a bohkhup’in hitin aseitai.

Pasal: Boinu ken nang kahin lungset’e, kalungsetna hi hinkhoa ding ahi, neilungset pou poule phat jousen nakom um jinging ting nadalha ponge, tonsot geiya kaumpi jing ding nahi.

Nungahnu: (Agollhang deipa toh atoukhom laitah a hitobang vaichapan thu asei chu alunghangin) Heyy!! Nang koi nahia ipi boltheina neilegou sana dangka naneiyem? Kakoma neiumpi jinga ipi neipeh got ham? Ole kanei kagou ho hi eikikop pinte nati ham?

Pasal: Ahipoi! Ken nang neilegou halsi jong kilah ponge, ajeh chu nang nei sanga tamjo kaneiyin, khut’a sahlou sana thengsel khopi lentah kaneiye.

Nungahnu le akoma toupa chule akimvela um jousen anuisat tauvin ahi.

Nungahnu: Hoilai ham nangin khut’a sah lou sana thengsel khopi nanei chu neivetsah temin!

Pasal: Aphat alhin teng ivetkhom ding, ichenkhom ding gilkel dangchah, genthei hahsatna um talou, nilelha vah ngailou, asun ajana kipahtah a lenkhomna mun ahi, tunvang muthei pon nate, ajeh chu hichemun chu mi jousen amusoh thei ahipoi.

Nungahnu: Kakoma konin chedoh jengin, nang tobang mivaicha genthei nelou chalou ipia neivah kigot ham? Ole keihi uicha ngol khat touva neigel ham? Tin asohte akouvin khopi pamlam geiyin akaidoh tauvin ahi.

Hiche nikhoa kipat chun mivaicha genthei pasalpa chu anung mu kit tapoi, sapkangte chapa melhoitah adeima ma jengpa chu sun le janin agel jing jotan, akilungset aki-ngaina lhon jong asangcheh cheh-in, phat sot nailouvin lungtup molsoa kicheng dingin ahung kitem lhontan ahi.

Mi melhoitah gel ahilhonin, mihaosa gel, miching boltheina sangtah neicheh ahilhon jeh chun ahepha jousen pha asauvin akipa piuvin kilom asa theiyun ahi.

Hijeh chun married bol nikho teng jongle vannoi chitin namtin khom dingin akitem toh tauvin ahi.

Hiche nikho hung lhun ding chu mitinin angalel peh-uvin, amanin jong angahlel lheh jengin ahi, iti ngahlel jongleu anikho asuchom theipouvin lung kinemin angah jinguvin ahi.

Aphat lhinna ding nikho som bou avat tan, akhosungu chu mi adim deh deh jengtan ahi, hiche pet chun nungah melhoi minthang tah sapkangte chanu chu nat phut’in ahungnan, hatah-in ahung dammo tan ahi, adammo jou nithum alhin nikhon alujanga aput kon le asam jouse akihet chai bangin ahung pul chaitan, anili lhinnin atahsa chunga aphe hoilai jouse abeiyin agukeu bou aumtai.

Alim amel kihe theilou khop’in ahung dammo tan, England gamsunga louthem aithem doithem jouse akhomun hinla anatna hedoh le ajen thei koimacha aum tapoi, hitia aniseh a akikhel tul tul’a vet thei jong ahitah lou phat chun alungset pen sapkangte chapa chun adei tapon, amatoh kichenna dinga phat gontoh sa chu Japan nungah melhoi khat toh ana molso jotan ahi.

Nungahnu chu koimachan ahing dinga agel tahlou phat chun anungjui pasal thahat jousen adalhatan, alungset penpanla angdang asangtan, akoma atoupi ding mi khatbeh jong aum tapon, masanga mipi sangsom sangja lah a lam le nu chu tunvang aroom sunga akoitup’un, avil ding le atoupi ding, akihoupi ding jeng jong koima aum tapon, aumna mun jeng jong chu hoilai ahi hettheilou khop’in mihem achele avahle mu ding jong aum tapoi.

Hitia lungthim natahle thomhao puma ki-ngaise tah a aumlaiyin masanga mivaicha genthei pasalpa chu ahung vahlut kit tan ahi, amapa amu phat chun kidang asan, hinla pasalpa chun ahin houvin, alhamonin hitin aseiye.

Pasal: Boinu lungneo hih-in, phat jousen nakom um jinging ting nadalha ponge, tonsot geiya kaumpi jing ding nahi.

Nungahnu: Ven kei koima deilou pen le kidah umpen kahitai, masangin mi sangsom sangjan einalemjin tunin kihoupi ding cha jong mihem husa jahlouna munthip a deimo le paidoh in kaum tai, ibola nangin neiumpi ding ham?

Pasal: Boinu Lungset dihtah hi tonsot geiya ding ahi, ken lungset dihtah kachan nang bou nahi, lekhabu kapeh chu nasim chai hitam?

Nungahnu: Kasim khapoi, kachun tup’in table box sunga kakoitup tai,

Pasal: Chenlang gakilah-in, tua nadam lou hi nadam doh ding ham nadam lou ding ham vang ve hite.

Nungahnu jong achen lekhabu chu aga kilahtai.

Chuin amasapen dingin, talent kihoppeh pasal mi thum ho thuguh chu aseipeh-in ahil chenin, Bible akoitup chutoh atekah peh tai.

Abanin Jesu Christan thil kidang abol ho aseipeh-e.
Mithisa ahinsah
Mitcho kho amusah
Paomo apaosah
Lhagaoboh anodoh
Elbai lam ajotsah

Hiti ho jouse chu ahil chenin aseipeh-in ahile, nungahnu chu alung kidang lheh jengin ahi, chujouvin damun meidil thudol aseipeh-in, alungla thimo, ameila mitmo (Mark 9:48) damun meidil’a mihem sangsom sangja lut’a vangam noma vang mi lhomcha bou alutdan ho hiche thudol ahil chen phat’in nungahnu chu ahungkap tan ahi.

Abanin Jesu Christa ahungkit tengle ama nungjui chengse apuitou ding, khut’a sahlou sana thengsel khopi nomtah a um ding, tonsot tonsot geiya gentheina le nat le sat um talou ding ahidan aseipeh-in, amajong Pakai Pathen koma chekal ngahlel ahidan aseipeh tan ahi.

Chuin nungahnu chun Jesu Christa tahsanna ahin neitan, phat chesa ahinkho ho anungvet le mipi sangsom sangjan analemji laiho chu lhagao lungmit’a gela amuchun damun meidil’a um anahidan ho ahin kimu chenin akisih-in akap tan ahi,

Chuin pasalpa koma chun “KEIJONG NEI PUIYIN HE-U,” nangman khopi nanei sana thengsel khut’a sahlouna munin keijong kahung nome, neidalha hihbeh-o, ajeh chu alungla thimo ameikongla mitmo damun meidil’a chun kache ngam poi, ven katahsa akemtul tul jengin ka-lhagao damun meidil’a aumin genthei thoh-in huhdoh ngaichan apeng penge, nei huhdoh-in, “KEIJONG NEI PUIYIN HE-U,” tin akap kap tan ahi.

Hitia lungkisihna ahin nei phat chun pasalpa chun pastor khat akouvin nungahnu chu baptize achansah-in, chonset lungheina le Pathen cha ahina melchihna aphongdoh tan ahi.

Baptize achanjou hapta khat jouvin anatna ho ahungdam theng hoi hoitan, houina kikhomin achen, nisim niseh-in Bible sim le taona amangjin, nasatah-in Pathena ahung kipetan ahi.

Huhhingna kichentah anei nungin mivaicha pasalpa chutoh tonsot geiya kikhen taloudin kichenna ahin nei lhontan ahi, tahsa a chun vaicha le genthei melin aum lhonin hinla Jesu Christa haosatna jouse amania ahijeh chun genthei kisahna him him neilouvin hinkho amangkhom lhonin, lhagao mang ding mi tampi apuikhom lhonin huhhingna thupha aseipeh jing lhonin, masanga mivaicha genthei pasalpa chu alim amel kisemthu mai mai anahin amavang chu ajinei jouva ajinu masanga ahung kiphondoh a akisemthuna tehse lim le avon kidah umtah ho ahinkhel chun mabanga melhoi dang aumding tahsan aum mo helin ahi, nungahnu jong mitin deimo le hot’a aum jouva alhagao hinkho ahung kisemphat’a huhhingna akisan phat’in masanga amelhoina sangin ajatli jenin ahoibe tan ahi.

Hichu
Jiphatah akimu
Huhhingna akisan
Missionary na atoh
Adamsunga Pathen natong dia kipedoh hichengse ahi.

Chubanin ajipan lungset dihtah hi tonsot geiya ding ahi, atipeh chu ahin hethem theitan, ajipan alungsetna chu kidang jong asan, hijeh chun ajipan alungsetna sanga sangjoa aman ajipa alungset dingin akitep’in, anupa lhonin lungsetnaa sangjo ding akitet lhon laiyin amani din kilungsetna asangcheh cheh-in, ateh thini changei lhonin akilungset lhumkei lhone.

(Athinung lhonin jong tonsot geiya akilungset lhon ding tahsan aumin ahi)

MORAL:

Hinkho khat suhset kiti hi ahahpon, amavang hinkho khat semphat kiti hi ahahsatdan tepi ding umtalou ahi.
Lungset dihtah kiti chun itobang mun hijongle alungsetna alhaso theipoi.
Pathenin boltheina talent hoitah eipeh ho amin loupi phondohna dinga naman nom loule nikho khat le na talent chunga nahindel ding ahi.
Pathen phatsah ahiloule mihemin ipi thilgon nei jongle alolhing theipoi.

Thusim isimnauva kona jildoh thei phabep kahin gol ahi, seinom tam jongle chai tange.
Aphalai kilhen’utin kihilnan neiyute.

NB: Thusim hi atah tah ahipoi, lunggel suhtoa kihilna ineitheina diuva kahinjih ahi.
Chomcha sunga seikhel aumkhah jongle iki-ngaidam diuvin temna le taona kahin neiye.

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleLHOMI NUNGAHNU THUSIM
Next articleHUHHINGNA HI MANTAM TAH MANBEIYA IMUU AHI

LEAVE A REPLY

Please enter your comment!
Please enter your name here