Home Lahkhom KEI SELUNGMOL JEH AHI-IV

KEI SELUNGMOL JEH AHI-IV

508
0
kei selungmol
kei selungmol

Insung kitoh lou chu leiset’a Damun ahi”


Writer: S.Lien.
Arrange: Naocy Haokip


(Episode-IV)


Chetobang message chu kamu phat’in, ka lungchang tenga kisun bangin anan Kanu chung’ah kalhajong asen chapang kaa a kaa jeng ding chula pasal khat’a din anom pon ka lonlhi chu kham joulouvin along kit tan ahi.

Tu le tun ki boipi leh asalumlai ahi jeh-in Mercy inkote jong lunghang val nalai dingu ahi jeh-in oljep leh ngaito din kakoiyin, ipi chu hileh Mercy koma athudan beh sei masat ngai kasan, message thot ding chula aphone hinman chu koija ahi kihe louva, ajou leh A inkote a ahi khah ding kitija kit, kicall tho hen katin ka call leh, ki pick mong mong talou, vei thum ka call a abep bep ahi phat’in, asoh soh soh hen katia message ka thot jeng leh reply hung kit ta bihbeh lou, hapta khat lang ka chuti bol vanga athip beh phat’in kalung dong lheh tan ahi,

Nikhat ka duty na’ah messege tone ahung gingin eihin reply hitante katia kagah vet leh Ka-ULhinga ana hi,

Boisen, Suty nahin ngaito kit mai ngaidi ahi, ajeh chu Henu aloukon na’ah lamlhang achon lhan kol’ah akitangin, agim lheh e, tua hi hospital a ka umpiu ahi, ahin ti tai.

“Pharap beh!! Gah kitileh kanom deh chet’in ahi”

Kei: Oh !! Akhoh tave He-U, kho ahet hinam, Henu chun katileh.

Aman: Umm, kho vang hoitah-in ahe e alung chu apil’a pil chat theilou ahi, Doctor pan hitin aseiye, Thisan bottle thum le li beh khai ngaiding ahi atin, chuleh dam vang damintin atinggu (spinal code) ata khah ahin cha loh lele vang boi tante ati chu o.

Ke: Ash !! A khoh tave, He-U achutileh nop, noplou thu umlouva na umpiu ngaita chula na.

Ama: Ibol’a kida dingham hiti khel khel louva jong damsela umkhom thei hija…….
Pathen thilgon ahi tidi ahi maiye Boi.

Kei: Aleh, tua chu nahin houji hinam? tu geiya jong chu nahin hou loulai ham leh?

Ama: Hehe,, eihouji naiye akama ima asei lou vangin alunggel vang khejep hitante imulou kah leh amitlhi akithehji a, Kalungset jidan dan chu, Janhia jong lou choa kache kah-a amachang ka dalhah a kaga lut leh, ana kap intin, Henu, ipi dia na lhiso ham, Kei ka umnai, katia ipi pi ham alhamon na thei ding ka het kham khama kasei peh leh ima seilouvin mitlhi doh niuneova kakhut ahintuh intin, kakipa toh ka lhajong asen milah-a chu jachat lang jong kahepoi keijong kakaa jeng leh, mi hung lhaikhom sao saovintin amaho chun, ipi hamkhat ti hinte atiu hidi ahin, miho jah’ah keiman Kanu imacha atipoi, chebang mifel mihat tua chatloh mohel’a aum jeng pihi kagel leh kalungset val’a kalhase ahi, katileh amanjong munchom lang angan akap’in ahi.

Na hungphat phat leh adang chu ol’in seitaute Boisen, hapta khat jouleh inlanga jenthei din eiseipeh uvin, inlang kalhun phat beh uleh nahung ngaidi ahi o atin, net hoilou toh akija chen thei beh tapon Ole He-U katileh ajah ham ajah lou ham line atan tai.

Ka-uLhing vang pha kasa mong monge tulai Mou lah’ah amabang aum kikhat lheh inte, Kanu jong chu aka agah muleh alhase jeng nan ama jah’ah kasei nom pon, (Kanu kaa jong chu ama chun athilbol kisih ham atijeng ahin) hijong himo pontin, keivang chun kanu aka jong chu abolkhel ho kisig hipontin alunggot banga aum thei tahlou ding jeh-a ki iplel’a kap hiding ham, kalungthimin kati nalaiyin ahi ūüėā

Sap pa koma suty kaga thum kit leh, kasap pao chu Kol lah-a jong ha KOL a kol Suresh kiti khat Subedar ahin, mitpot let lut’in eihin ven,

Ipi thu hikit ta?? Ahin tin

Kei: Sir Kanu adampon accident jeh-in aki ha suhkhah lheh-in, ahe Sir, kati leh
Kol hohi kilungset, ki khoto nalanghi eiho sanga vatjep ahiuvin,
Che in eihin ti diham kiti chu

Sap pa: Thudang jong sei louvin, Nang Doctor na?

Eihin tin, donbut didan jong umlou, kajah jong achan, ka lhajong ase leuvin ahi, paolou beh-a chomkhat kadin changpet jongleh ima aseilou phat’in kisonlel na khat jong chu kanei thouvin, lhakhat na kitong kit panbep ahijeh chun, Sory Sir, na phal lou leh cheda tange katia pot kagot leh kotbul ka phah-in, eihin kouvin
Hapta khat (7days) a na hung lhun kit di ahe, eihin tin, Thankyou Sir, katin thumu kisa deuchun kahung pot doh tan ahi.

Kanu Damlou chu, apha e, katina vang hilouvin Mercy kamu nom mama jeh chun akile jen thep thup vanglah-in ahi.

Ajing mama a cheding kahitan kavon pohdi tamlou chakhat bag a semtup san kakoiyin jan 9:00pm donin Ka-ULhing ka call in, kache ding thu chu kaseileh akipah lheh-in,
Aman: Boisen tulah net akisuh lou jeh-in kahin call doh jou jipon, apha-e, neihin call chu, Inlanga kaumu hita chu o, Henu jong themkhat aphadom tai ahin tin.

Kei: Umm, apha-e He-U achutileh jingkah matah-a ka kitho ngai ding ahin, lum tange Mangpha cheh-ute katitai.

In kagalhun leh Mercyn mailhaisel’in kanu keng anasil peh-in, Wauuu…Ka-U ahunglhunge ahin tileh kidang kasa val’in, Umm Kahung lhungtai kagahtia kipah tah-a ka lhailut tho jengleh kot phung’ah kakipal lhun kahung kingkhang phut’in, kajet kavei chu kave le the thu in kamit kanoi chui chuiya kahung hadoh leh ka Bag chu kagahmun ahi.

Atah ham tia kipah tah-a kiuma chu kajan mangjoh anahin, lungin ahagel val jeh jong hinte katin ahi
Mi mulou kah chun ka ehche nui chep chup’in pung kavet leh 4:00am ahitan lup kit naman ahilou phat’in kaki suthengin khovah ding ngah-in kaumtan Window parda chu kahoh doh-in kagah da lele leh Solang mol chunga Jingvalpa emsil sel chu kagah muleh Kaneo laiya Kanu toh khovah masanga Bu poa loulanga kache ji lhon chu kahin gel doh-in Kanun iti ei bol jongleh Kangaina chu abei thei pon, akisuh khah chun eina dalha pai henlang kiki muto kit talou ding hileh…. tiho kahin gel khom leh ka kihet doh jeng louvang chun ka mitlhi ana pot manin , kane ana soi pot pot jengin ahi.

Kho vah lhah-in Lenna homlou khah dingchu kakichan emargecy a ticket mantam tah-a kila jong chu athupipon, ka suty sung chom toh ka inlang thu toh katin, taxi khat kakouvin Indigo khat’a chun Imphal chana din kahung kipan doh tai.

Imphala konin Lamka Winger ho khat’ah kahung kit’in Vajing kahin phah khun Ka-Uten eihin call uvin Henu alel kit thimin Distric Hospital’ah ka umpi kit’uve inn galhung phot inlang buneh jou leh hungin, a serious lom lom ahi sampoi atiuvin, asei dan danu chun kaumin nilhah in Hospital chu kajon tai, kaga lhun leh Ka-ULhingin Kanu keng anasil peh-in kanu jong chu kaginchat khel’in ana hal gihgeh-in anamai lhaiselin ahi, ipi pi hamin kahoulim uvin Ka-ULhing chu inmai langa chomcha aga pot doh jong leh Kanun Lhingboi chula-em atin aholji in, kakipana chu bulhing jep hih jong leh kakipah mama jeng thouvin ahi,
Nilhah pung 7:00 lah-in accident ahi atiuvin nungah chapang ni ahin polut uvin a serious lheh uvin khojong ahe pouvin ahi, kagel leh, cheho jong hi tomo hilou ahi, tiho ka ngaiton Kanu houtheiya aumchu vangpha kaki salheh-in ahi.

Chomkhat jouvin Nurse Mel-hoi sisel khat hi ahung hai lut thethu-in,

Mercy Kimneihoi sungte na om uhia?

Ahung tin ka kindot-in donbut jejong helouva kidangsa tah-a kaumuleh, Paite pao helou hiuvin te eiti hidi ahin,

Mercy, inkoho naumu ham? ahin ti kit’in akhel lang tah-a mikhat’in Henge ipi ham Sister agah tileh, ama chu kintah in RIMS ah pouvin alhoh a thisanlut ahe ahinti leh, Kabon’uvin kaki veto uvin seiding jong kahe pouvin ahi, a inko hou chu akisa boi chei choiyuvin kagah vet leh Mercy Upa chu kagah mu tahbeh-in, ken amin kibahpi ham kanati ahi, kahet chen phat chun kati akithingin akoma gache ding chula eihin hedoh leu alunghan pet tah-u ahikit leh hospital sunga kiboilo inte katin hiti chun thip beh-in kave ve jeng tauvin ahileh, Kanu jong chu a tahsa alel vanga alungthim pil keo ahin keiho lang chu ahin nung ngat’in akun chah kheh tai, pohdoh dinga akisah jinglaiyu chun thakhat’in ahung kapjah jah jeng tauvin, Doctor ho leh Nurse ho chu insung dimin ahung lut uvin a-op lah chu ason son uvin chomkhat jouvin Doctor pa chu ahung dingdoh-in jachat melpu tah-in I’m sory ahin tin Nurse hon ajuidoh tauvin ahi,
Kanu leh Ka-ULhing chu akikol to uvin mijah a la kapdoh ngamlouvin lhase tah-in akap lhonin kei chu angol bangin kamoh um jengin kati achah-in kapao theipon ahi, Kanu’n Lhase tah-in Mercy, Kimneihoiūüė≠ūüė≠ Nang sangin kei che jonge Boi kahin phal poi, Na-ULingboi toh Nangkoma Ngaidam thumding bat kanei ahi, neingaidamna thu changkhat beh eiseipeh louva neidalhah ding hamo Boi, “KEI SELUNGMOL JEH AHI” ati chu kajan akhel chu ka khohet na akem hei heiyin …chom khat jouvin kho kahin hekit’in ahileh Oxigent kibul’in kakhut ngong a Glucose khao toh special ward sunga kanaum tai………

Kakom kavel lah chu kavet lele leh kasenji Mercy mel alangin ve ngamlouvin kamai kahei mang leh mundang kavetna jousen jong Mercy mel bou alangin kap theilou sasan kakap’in kitimlel sasan kakitimin phat chesa chomcha hijongleh noma kaum khom lai lhon kagel doh-in, “Ohhh…! Kalungset Mercy, hiti ding melin nalom poi Boi, nasomai lhaisel mu ding kinema ka-ngalel jing hilouham? Ikah-a boina le kihet themlouna tampi nakoma sei ding katiho tua koi koma kasei ding hitam? Boi kahinlha joupoi hung thouvo, nang tailou monna ding kavaimo e, tin kinuh dut dut’in kakap’in ahi.

Hiti ding lam anahe masa hileng o, kache a chu kana kipui pai ding ahin tun vang keidin phat jouse akikhel tai, Lhase hih-in Boi, “KEI SELUNGMOL JEH AHI” tun nangla tongdon thei nahi tapon, nikhat teng nakoma kahung ding ahi, nakoma kahung kahsen nahin sumil ponge Boi, lhase louvin einangah maitan, tin kalungset pen Mercy chu kalupna a konin kavailhah tan ahi.

Hiche jouva kon chun kalungset Mercy chu kamaiya ahung lang kit tapon ahi.

(BEITA)

MORAL
Insung minu vaihom atheplou leh insung akeh nome, dam jingdin kigel hih-in, mihem hinkho hi muman louva kikhela bei jeng thei ahi, phat chomcha damlai sunga insung ki-ngailu tah-a chenkhom hi leiset’a Vangam ahi.”

KEI SELUNGMOL JEH AHI” Part I-IV chu hichan hin akichai tai, abul’a pat lunglut tah-a sim jouse chungin kipathu kaseiye, asim jouse Pathenin phatthei naboh cheh-u hen, apha lah theilai kilah utin kihilnan anamang cheh-u te…….

Copyright©NaocyHaokipJuly2020

Previous articleKUKI CHANU ANA HILE CHUN-I
Next articleO, KAHINKHO-IV