(Thusim ijat kasimdoh vangin tuchan geiyin kangaisangpen ahi jinge hiche hi)
“Neo, inko ten hitobang thil gon ahi nei u hi nalung lhai hinam? Nalung alhai kai hih beh e..ole chomkhat beh kho ngai ding nanop nalai ngap ham?” tia kicheng dinga kaki tep pi sa Chonghoi koma kasei chun, amai amon lha jengin, “amasa a pat a kasei hilou ong? Phat chom khat nei ngah in, kaki gel lhah thei lou na atam e kati hilou ham?” ti in eihin donbut in, lungdang agel hiding kaginmo hijeng jong le kalungset val jeh chula hi intin, thudang kapan pai in, hiti chun, kho sah lam a phoilah a chun kavah le lhon e.
Chonghoi toh kaki ngai kal kum khat hung nai lam chu ahi tan, BA sim lai hijeng jong le, keima service musa kahi tah jeh in, ama inkote ahi in, kei inkote ahi in, kaki chen lhon ding ama no lheh uve. Hinla. Chonghoi koma hiche thu kasei seh leh tuni a eidonbut bangin ei don but jing in ahi. Aning khat a pona tah a kaum jing vang ahe pha poi. Kum nga val a ki khe kahi lhon jeh in, ama loi hotoh te ding in kahan kimu ma ma jeng tan, hijeh tah tah jeh chun lungpi kang lou thei lou kahi kit e. mel lang chule kivop pi dinga adeilhen joh kei sanga mi tampi aum chu kahe them lheh in, ama khang tohtoh mo leu a kivon dan chule chon dan tampi in eikhen lhon ahi jong kahe in, hinla hicheng jou in jong kakhen thei deh poi.
Hapta khat jouvin, keima service bol na a kile pai ding kahi tah jeh in kimu to ding in kakou in ahile. “Keisanga nalhun masat leh nei na hethem in, kahung tei ding ahi. Itih chan kahin lah ding vang kahe poi. Hijeng jongle tu in jong kahin ngai pan tai, kahung lhun kah se a kahin ngai jing ding nahi” ti in, sms eihin thot in, kalungchang koi na ding kahe tapoi. Kimu to seh leh hiche sms chu eihin thot ji a, kitep na sanga gei jo a hung lhung tei tei ji chu ahi. Ahung lhun lhun in, ima dang sei lou lai in hiche thu achun kahouse pai tai. “I ati le, aphat seh a hiche thuthot chu neihin thot ji ha? Aum dan chu kahin kou seh leh midang toh naum khom a kei lhamon na dinga nahin thot ji hiveh ta aw na…”tia kapat pai le akun chah kheh in, amitlhi ahung long lha in, akinung hei in akile tai. Kalunghan hu san chun kakile pai ding jeng jong gel doh talou in, nung kou ding cha jong kagong tapoi. Anung lhai pet chun akhot a thilpeh ding khat achoi chu kamu in, ipi ahi jeng jong dong deh lou in, hiche jan jeng a jong chun phone cha a jong kihou lou in kaum lhon tan ahi.
Ajing nikho in, kanatoh na ding mun jon ding chun ka um tan, airport lam jonna kache kon chet in, Chonghoi loi nu in thilpeh khat ahin choi in, eihung pei. Ken jong anikho masa a kaki nah lhon jeh chun khen na ding hitan te ti in, hong jong hong ngam louvin, kaki choi chah khehi n, airport lam chu kajon tan ahi. Nilhah lam in Kolkata khopi chu kaga lhung pai tai.
Kakitim nah nah vang in kalunggel jouse chu thilpeh hon ding seh seh chun alo dim jing in, kakitim joulou phat in, kahong doh in ahile, asung a chun vaipho (umbrella) khat aum in, khat vei cha kihong lou lai ahichu het doh pai jengin aume. Vaipho noiya chun lekha kilhep lui tah khat aumin, ken jong kalan ahile, anoiya chun apeh neo khat kamu kit in, kahong doh in ahile, “Heo, keima to dinga jong natah san lou maithei chu ahi. Lekha thot jong ahipoi. Thil sun thei jong kahi lou jeh in, masang jep chun kaloite khat kana kisut sah in, hinkho a dinga neilungset mong ahitah leh kathusim nahet ding jong kanom e” tia kisun chu kamun, ken jong apeh len jep pa chu kala in, kalupna chunga chun katou in, kahin sim pan tai. Class 11 simlai kahi jeh in kajah acha in, ponve vet kha lou beh nu in phai sunga kasim jeh a ponve kave chu koiman ei het peh lou beh vang in kaki ja pi lheh jenge. Lhakhat lam kahung kai nung uvin, ka umna Canaan Veng akonna gamla thim tah a um Konung Mamang lam a tuition kahin lah ding in ahung um tan ahi.
Jingkah matah chule nilhah lam khojin konna kache ji angai jeh chun kachang in ahah sa lheh jenge. Hapta khat hamkhat kahin lah nung in katah sa in ajou mong mong tapon, college a leltah a kache na ban a tuition kache kit ji chu hah kasah lheh jeng tan ahi. Jingkah khat ngaplel tah a kahung kitho a tuition lah na lam kajot jing lai in, vengsung lampi achun auto khat ana kinga in, asunga golhang pasal khat ana tou chu kamui. Kenga che kit ding kangap lel val jeh chun hoiya che ding kagah dong in ahile, “nang hoiya nache got ham?” ti in eihin dong pai in, “konung mamang” tia kadon but chun ima dang jong sei be talouvin, auto chu ahin pat in, kache pai lhon tai. Chuche ni apat chun jingkah seh leh ana um jing tan, aman jong jingkah seh leh kin anei hinte ti in kijen kasah lheh jeng in, hiti chun niseh in eihung thah jing tan ahi.
Eihung thah tiil chun kaki hou kha lhon pon, nitthum ni li ahung che jouva pat in kahung kihou pan lhon tan ahi. Saikul a Molkon ho ahi dan asei in, alim chula chapang cha ahi in, hinla aham dan apao dan vang chu apilhing lheh jeng tai. Hitichun ken jong kaum naho kasei peh in, loi cha phatah bang in kaki houthei pai lhon tan ahi. Nikho ahung che jing in, hapta ni lhing deh eihung thah a pat chun sum jong eila ji tapoi. Nikhat nilhah langa tuition kalah ho kasei a kalel dan ho kasei le, ken nahung la ji nange ati in, kada kei vang chun kalah phat eidong in, asei ma bang in nilhah tuition kichai chun eina ngah pan ngal tan ahi. Sum pe lou hel a hitia eikhoh sah chu kaki phatlam in, nikhat changmel in, “ibolla hitia hi nei kithopi jeng ham?” tia kadoh le, “Chong, lekha simthei in la kaum tapon, asim ho kaki thopi chu kei dinga kabol thei sun ahitai. Keibanga micha agenthei ding kadei pon, kei tobang a khat in jacha tah a mi toh ngam lou ho kum chapang cha a pat a atoh ding kanom poi. Ven.. mi upa kahi in, kanao te school pha in kai jou hih jong le akham kham a milah a alhat nathei diu ahi pou le tia auto katol a sum kahol jeng ahi. THEMJIL NAHI AJIL HON AGIL DAN HETHEM PONTE. KEI TOBANG AJIL JOU LOU HON KAHETTHEM BEP U AHI” tin ei donbut in, kaki phatlam na ban a sei ding jong hetalou hellin Hencha hinkho man ding dan chu kagel in, chuche nilhah chun thip beh in inn lam kahin jon lhon tan ahi. Veng sung kahung lhun lhun lhon in, ka number aki lah in, “kiphat lam ngai lou ong….naloi pa ngaitah in naki thopi dan in gel inlang…..ole ba na loipa ngaitah jong kahi lou ngap ham?” ti in eihin hou in, ken jong “nahi ma ma e” katin, kaki nuisat to lhon in, kaki khen lhon tai.
Chuche ni a pat chun Hencha toh kaki vop dan chu ahung nom cheh jeng tai. Tuition la a kache teng le lampi vel a chun nehthei kane pa ji lhon in, kanui khom lhon in, gol le pai phatah kahi lhon chu ahitan ahi. Tuition lah keu hilou in, veng sunga kahung umna asot tah jeh in, houbung a jong kahung kimang cha pan tan ahile, Hencha toh kaki vop na phat chu ahung sao cheh tai. Lhathum lha li ahung che nung chun tuition lah phat jeng hilouvin, ama a on nile kailhaang a kache ji lhon in, keiding in inna konna gamla tah a um chu ahung nom chom lheh tan ahi.
Nikhat college suti kahi jeh un, Hencha komma chun a inn chabi kathum in, ajeh ahindoh chun, “ka inna mi atam ji val e. nang inna kana um di he” kati in, sun nilhum chun Hencha umna inn chu kahe theng peh in ahi. Aki man chah dan chu kavet le akitup chet jeng in, kham nathei ima abol lou chu mudoh in aum jeng in, lekha sim lou hijeng jong le kaja na asang chom lheh jenge. Nilhah lam a ahung kile chun bu min sa in kana koi in ahile, alungdong lheh jeng in, achuti kiphat lam jeng in, “thipbeh chun hung kineh aw…. Ahon ding naki mu kah a chu kahon mo ham?” ti in kadai in ahile, ama jong amoh nui jeng in, bu kahon chu kane khom lhon tan ahi.
Hitia kahung kivop jing lhon lai in, class 12 kahin sim tan, college a loi le pai jong kahou lheh tan ahi. Hitichun ka tuition lah na a jong kachang kahung hi tapon, kaloite pasal khat toh kahin lah khom tai. College a kaloi pa toh kalah khom ding ahi phat chun, ama gari neo a che jeng thei chu ahitan, veng naicha a um kahi jeh uchun kijen kasa lheh jengin, ama jong che thou thou ding ahijeh chun jingkah nilhah a Hencha suhboi jing sangin kijen jo tan te kati in, ama toh kile khom ji ding chun kahung kigel lha tan ahi.
Jingkah khat angai ma banga tuition kache got chun, polanga Hencha in mailhai sel in eina ngah in, kakigel lhah na sei ding tia akom kagah jot leh, kaloi pa chu a gari neo a ahung lhai lut pai in, kenjong phate ajong sei man lou hel in, “Hencha… tuni a pat in ama toh che ji tange ong..ama in jong keilah namun a chu alah ji hita a, nang suhboi jing sangin, kijen jeng inte na” tia kasei le amaiso akikhel jeng in, hijeng jong le mailhai apu go tei in, “ahijong le na…akijen jenge” ati in, kei jong gari neo chunga chun kakal doh tai. Hencha umna kakhel kon lhon chun kakinung hei in amalam chu kave in ahile, akhot a nehthei achoi chu kamu in, keini nehkhom dinga ana choh ahiding chula kahe ma ma jeng in, amaiso amon deh jengin, kiphatlam na in kadim jenge. Hijeng jong le kabol dinga lom khat kabol ahi tin kaki gel in, nikho che dung jui in hung pha tante tin, ima jong kagel sao tapoi.
Chuche ni a pat chun jingkah nilhah in kaloi pa toh chun kaki le khom jing lhon tan ahi. Tuition a eihung thah hih jong le phat dang le ki kihou jing nante tia kana gel vang chun, kaloipa toh kaki lhon pat a pat in, Hencha in ka call jong ala kha tapon, veng sunga jong kamu kha tapon ahi. A inn kache seh leh kot akikhah jing in, ipi hamkhat vang um ahitai. Nopmo asah ahi ti chu kahe them tan, kihou pi a sei cham tei ding kahin gong tan ahi. Nilhah khat ka tuition kichai chai in, Hencha chu a inn mai a kangah jeng in ahile, jaan khang kon lang in dap sa tah in ahung lhung in, akithing chul chul jenge. Eimu mu chun kihetmo sah tah in, akot ahong in alut pai jeng in, ken jong ima dang jong gel det det louvin ka jui lut pai jeng tan ahi. “I ati le, tulah hi naki letsah nah e. ipi lungnopmo na nanei hija..ka call jong le na pick lou…kahin houpi got jong le namel neiki musah lou…” ti in, ka eu jah jeng in ahile, oltah in eihin ve in, ima jong asei deh poi. “sei tango..”tia khatvei ka eu jah jeng kit le, atouna a kon chun ahung ding doh in, “kalunggel nahet mong mong am? Kalunggel nasei ding nadei mong mong ham? Kei dinga kalunggel sei ahah dan nahet lou ham? Khat tou in, auto tol pa in aloinu midang toh tuition ache ji phat in nopmo asai ati ding chu nadei lheh ham?” ahi ti in, keijoh sei ding hellou in, kading thip bet tan ahi. Ahin jop pai in, “nang toh kivop dinga jong lhing joulou a kigel kahi in, hinla chutih chan ikivop nung lhon chun ngai na nei hih hel inte tia nagel ham? Genthei lheh jong leng kami ngai na mang lou, ka pohnat na bei hideh lou pi… keisanga ching le them, neijo khat, naki vop pi dinga kilom tah khat toh nai golchat chu kakipah e, hinla aning lang khat a pohnat na pa vang kapai thei deh poi. Kahin ngai doh ding kana kicha in, kahin lungset doh ding kaki cha in, hinla hitia ium sung in, nang bei a hinkho man ahah ding dan kahin kihet doh bep seuve.
Chutia kalunggel henom mong nahile, nahin sei peh jeng inge. Kahin lungset e. kahin ngai lheh jenge. Kei jaolou na a midang toh nidan khat hinkho naman khom ding jong kadat thei lou ahi. Hinla nang in kei lunggel bang nahin gel ding kadei deh poi. Kei sanga hoijo pha jo, ching le them jo toh lungset hinkho mang khom ding joh in kahin dei lhen e”ti in ahinsei in, hicheng ahin sei chai chun ipi jeh ham chula kahe pon, kamit a mitlhi tui ana long doh man tan, kitheh ding jong gel lou hel in, kati mul akilip jeng in, hoiya kaum ham ti jeng cha jong kihet lou hel in, Hencha kom lam chu kanai in, “chubang se a mi nangai le ibolla kidal se jing kei nahi ong? Nang seh seh na genthei nahi sah ham? Kei jong agenthei lou a nei gel ham?” ti in kasei doh jeng in ahile, kei lam ahin ve pai jengin, “kasei tah chula..nang ding in kalhing jou poi kati chume” ahin ti in, “kei a dinga chubanga lhinglel chu ibolla chubanga mi naki ngai sah ong? Nang seh seh mi ngaithei a naki gel ham?” ti in ka kiphin tho jenge. Masanga kaki niel lhon banga amo ding sang umlou hel a, kaki niel tho kit jeng lhon lai in, kakom lam chu ahin nai in, eihin koi chah kheh in, “Chong, koi suhkhel ahi sei da jengo. Koi jeh hita jong le, hitia I um hin eini kikah agamlat sah ji in, kathoh jou ji poi” ti in, amit lhi aki theh in, kenjong kakoi chahkheh in, “kenjong” kati.
Chuche jan chu kani gel lhonna dinga kaki pa nipen lhon ahung hitai. Ajing nikho chun hitobang thu ho sei ding jong apan doh vah thei ding pen umlouvin, thudang dang kasei lhon in, alang khat a ken jong tuition lah na khel ding kahin gong tan ahi. Kaloi kapai koima in alah lou na munkhat kaki hol in, kaki mu mu chun, ajing jingkah apat a Hencha kithah sah ding chun kaum pai ngal tan ahi. Ama koma jong sei lou hel in, ajing jingkah in matah in kaga thou doh in, “masanga naloinu bon nathah thah leh, tua na dongmanu nathah nomlou na?”ti in dai toh gom in kasei in ahile, ahung nui in, hinla tuition lah namun kakhel thu ahet chun nommo asah lheh jenge. Hijeng jong le, kaum khom jing thei lhon na dinga kabol dan thu kasei chun “nang nu mong mong hi” ahin ti in, kenjong “naki ngai da veh ta” tin ka nui in ahile, aman jong ima dang sei talouvin, nidang sanga nom jo leh kipah jo in tuition lah namun chu kajon lhon tan ahi.
Hencha toh lungset hinkho kahin man chu kei a dinga jong ama a dinga jong ama pen cheh ahijeh in kaki ngai lheh jeng lhon e. loi le pai pha pen chule aki lungset pen chu kahi lhon in, keini kaumkhom lhon pou le kipah jeng chu kahi lhon in ahi. Auto chunga katou ji teng lhon le, khatvei vei le koima umlou hijeng jong le amalanga ama koma tehchiit in kaga tou ji in, aman jong, “naloi hon namu le najahcha lou di ham?” tia ahinsei teng le, “ipi kajachat pi po…nangin neilungset banga koiman la ama ho lungset lou a, thangse jo diu hichu” ti in, kiletsah tah in kasei ji nalai in ahi. Khatvei vei le anung langa kaki khai ji in, eipho toh ei nuisat toh akop ji in, leiset chunga koima otcha lou hella hinkho mang chu kahi lhon tai.
Kipa nikho achom e kiti bangin, kahet man lou kah in, kaum khom nalhon ding ni hung kichai ding chu ahitan ahi. Ken 12 kahin chai ding chu ahi tan, kachai toh kilhon a gamchom a aban jom a che ding chu kahitai. Canaan Veng dalha a, Hencha da lha a munchom a che ding chu kadat thei mong mong lou chu ahijengin, kache masang in jong Hencha pul kadou pan chu ahitai. 12 exam kachai le, inn lang kache a tua kaumna mun a hung kile lou ding chu kahita in, 12 exam kachai nilhah un, mitin in amun mun a nehthei akisep khom a kilhah na asep jing lai in, kei le Hencha jong kilha lel tah in, aumna mun achun sei ding jong helou in, mitlhi long deh deh pumin katou lhon e. thipchet a sotpi katou nung lhon in, Hencha in, “Hiche ho jeh tah tah ahi kana kisonlel ahi. Hinla tun vang nahin lha jou taponge. Kon jong ikingai atahsan ding ham? Atahsan hon jong einuisat lhon bep ding hinalai..hijong le nang in nei lungset jing pou le nilkhat le vang Pathen in eihin kan khom teilhon nante” ahin ti in, kaki khen lhon ding toh kahin gel tha a, nilhum lhum a kivop jing teni phatchutih chan kimu louva kahung umlhon ding chu pojou talou in, kamit lhi ahung long jengin ahile, Hencha in kamitlhi ahin theh in, ama mit a konna jong mitlhi hung long lha kamu chun, “I nati a namitlhi long ong?” tia oltah a kasei le, “nang nanui le kanui ding, na mitlhi twi long jouse keimit joh a kalonsah nom nahet lou ham?” ti in ahinsei in, ken jong ima dang sei lou hel in, lhakang ding jong kicha pumin, kaneo a pat a hatah a kingai ding agil dan eihin hetdoh sah Hencha chu kakoi chah kheh jenge.
Hitichun Imphal a kaumna kahin da lha in, inn lam kahin jon tai. Inn kahung lhun apat in phatdang a toh kibang lou hel in, kakipah thei mong mong tapoi. Kavet na jouse chun Hencha eingai sah in, angol tho kabah chu ahitai. Asun ajan in phone a kaki hou jing lhon in, hinla masanga banga kaki vop thei lhon tah lou jeh chun kipana avaat lheh jenge. Ahiding ma bangin 12 result ahung so so in, inna umnom lheh ing ting, masanga bangin Hencha toh umkhom nom lheh jeng jong leng, umkhom thei talou dingin, Delhi lam kana jon tan ahi. Kache masanga pat kaum sung se se in, Hencha ngai louni kanei kha pon, aman jong ei ngai lheh ding dan kegel in, kei banga agenthei lou a, phatah a anatoh atoh jing thei nading chun kataokop jinge.
Innlang hung ahah sat jehin, kumni kijom in kahung doh tapon, hijeng jong le Hencha toh kaki ngai na vang adai chom deh poi. Kaloi ho in kathu lhon ahet uchun alungdong lou koima aumpon, einuisat leu jong aum da poi. Hijeng jong le keini kaki hetthem lhon poule apha ahijenge ti in kagel in, mi in ipi sei jeng jong le ima in kagel peh ji poi. Chutih chan kingaitah a kimu to ding ngah lel a kaum nung lhon in, kei in che phat ahung lhing tan, kimu to ding chu kahi lhon tai. Kimu to ding thu ngen kasei jing lhon tan, phat itih chan che jeng jong le kingai tah a um jing ding chule kisonlel to lou ding tia kitem teni dinga kimu to nading ni hung lhing chu ahitai. Kenjong kahung konnin Hencha ding thil choh ding kati in, iti kalheh vanga kamu lou phat in, masanga kaki vop ji lhon lai a nisa ha sat ni hihen, gojuh ni hijong le vaiphoh beiya ahung ji a, kaki khuh khom ji lhon chu kahin geldoh in, mesiu pumin kikhuh khom kit ding kal ngah lel pumin Vaipho khat kahin cho in ahi.
Kachanga kache jeh in imphal airport kallhun lhun le Hencha in eina nga a, kakimu to lhon ding in kakitem lhon e. kahung lhun lhun chun airport a Hencha mel him him kamu tapoi. Milah a chun kavah le in, kahol jing lai tah in, KEISANGA NALHUN MASAT LEH NEI NA HETHEM IN, KAHUNG TEI DING AHI. ITIH CHAN KAHIN LAH DING VANG KAHE POI. HIJENG JONGLE TU IN JONG KAHIN NGAI PAN TAI, KAHUNG LHUN KAH SE A KAHIN NGAI JING DING NAHI. NEINA NGAH HAT O. Ti in sms khat ahung kithot in, thu kisut dan chu kalung adong lheh jengin, kilamto na ji a pat a chun kahung pot doh in, lampi kom lang achun ka thil ho kahin kichoi in, munkhat achun katou in Hencha ahung ding chu kangah tan ahi. Pung khat pungni ti in phat ache in, Hencha mel him him kamu tapoi. A number ka call vangin ala mong mong pon, kinkhat anei khoh hinte tia kanga jing lai in khojin kon ana himan tan ahi. Kho ajin mang ding phat in, CCPUR lam jon gari khat a kahung kal doh in, lungthi deh pumin innlam kahin jon tan ahi. Keisanga thupi jo cheh kin anei hinte ti chu kaki gel lhah na ahi in, jaan kisan a ka phone alah lou phat in vang kalung adong lheh jeng tai. Aloi ho kahet sun sun in jong ka phone ala tapouvin, eihaimil got hitante ti in jong kaki ngaise man tan ahi. Imu mo mo sa in, kana imu lhatan ahi. Ajing jingkah kahung tho in, ka phone kavet le, “Chong, phone hinbol tho ding jong asei je kahe poi. Janhi chun Hencha in nang toh kimu to nadingin kei bike ahin mang in ahung in, lamkah a toset ana toh in, ana damdoh jou tapoi. Tuhin Saikul lam kajon uvin, keihon jong nommo kasah lheh uve. Hijeng jong le iba I ilo diu ham? Leiset mihem ihi nah lai jeh u ahi tia iki lhamon mai diu hitante” tia Hencha loipa in sms ahin thot chu kamu in, ka phone kasep lha jenge. Katahsan nompoi.
Nuiseu a kimu to a, masanga banga kipah tah a kimu to ding kati lhon hilou ham? Hiti ding a kaki tep mong lhon em? Tin kamitlhi jeng cha jong along doh thei tapoi. Kahin nahu kilah mang peh kabang jengin, masanga kahinkho lhon jouse kahin gel doh in, aneo apat a genthei tah a hinkho ahin man a, tua kei ngai najeh a genthei athoh kit…akipa ding kontah a idinga hiti ham? Kana kihet lhon lou chu hita leh, kei la in hung pontin, chuche ni jingkah a chun Auto a tou ding ana khohsah hih leng tukah in ahinna kilah mang peh ponte ti in kagel in, kalung amo den jenge. Nomtah a kaum khom nilhon lai banga kaum khom kit lhon teng le kaki khuh khom lhon ding tia kahin choh Vaipho chu kala doh in, kave in, kanop len lai nikho lhon gel pumin, kaki ngaise den jeng tan ahi. Chomkhat jouvin kho helouvin kalhu den jeng tai. Kahung khah doh chun insunga khosung mipi tampi ana um in, eina loh lele jeng uve. Twi eisun khum nauvin kalhop deh jengin, chubanga mi lunggim lah lah laitah chun Hencha kahin geldoh in ahile tunvang kamitlhi in eihin donbut thei tai. Ha jong ha kaa joulouvin, kamitlhi jeng jong theh lou hel in, taang lou hel in along lha jenge.
Chuche ni apat chun inn da lheh di jeng jong lunggel kanei thei tapon, gamchom a che kit sangin kitha ma kadat thei jo tan, imphal mama ah BA kathah sim tan ahi. Hijeng jong le lungmon na kanei thei deh poi. Kanu le kapa komma ima la kasei thei pon, imphal a kaum sung in, kavet najouse chu Hencha toh kalhat khom lai eigel doh sah in, sun nipi laitah jong le loi le pai toh hijeng jong leng guhthim in kamitlhi kaki theh theh ji e. Hencha ana umna pindan jong michom in alo tan, kamu sehleh ve jong ve ngam lou, nai lut ngam louvin, gal a konnin kave ji in, mitlhi inbou eidonbut jitai. Jingkah seh leh angol bangin kathou ji in, Hencha toh kalhat namun jouse achun kaga che jin, nehthei kaneh ji lhon namun achun nehthei kane ji in, ipi kabol vangin lungmon na dihtah kanei thei deh tapoi.
Chutia lungmong mo tah a kaum lai in, jingkah khat kaga va doh le lampi vel a koima jong umlou lai chu ahi in, kanunga Car khat ahung kinga in, “boinu hoilang che go nahim?” ti in eihung kidong in, eihin houpi chu kavet le aham dan chu Hencha toh kilou kasa lheh jengin, kenjong “konung mamang” tin kahet lou kah in kana seidoh man tan ahi.
Chuche jingkah a pat chun car a tou golhang pa chun eihung vil jing in, kaki hatchet cheh lhon chan in, Hencha toh akilo na chu kamu doh cheh cheh in, akisin sah dan, chule eihoupi dan ho chu lamdang kasa lheh jenge. Kana lungset tah khat mel a kamu thei jeng pa in lungset thu ahin sei chun keijong kana dathei tapoi. Hencha mildeh hih jong leng leiset mihem hina a itobang thil soh jong leh malam jot a kalson nading kalbi khat kakimu kabah sah jeng chu ahitan ahi.
Achunga kissun cheng, Chonghoi in inmun kadalhah ding konna eihin thot lekha a kisun ho cheng kamu chun kalung akidang lha jengin, det det ngai louvin, Chonghoi chunga kalunghan naho adih loudan kahin hedoh in, kangai na akipeh cheh cheh abang jenge. Apet tah chun sum ijat lut ding hijong le ti in, Imphal jon ding Flight ticket kahin kikah pai jengin, ajing ma ma in inlam kahin nung jot pai tai. Chonghoi kom kajon pai in, ahinkho thusim ho kahet nung ahijeh chun kamu nom na asang chom lheh jenge. Eihin peh Vaipho chu kala doh in gojulou, nisa hasat lou hijeng jong le kakikhuh jengin, ka call in, ainmai uva kimuto pi dingin katem pai tan ahi. Ahung doh a amel kamu chun kamit a konnin lonlhi ahung longdoh jengin, Chonghoi in lungdong tah a eivet a adin den jeng phat chun kanai phei in, “Boi..keima thepmo jeh ahibouve.kahin hetthem lou ahi. Nei ngaidam in ong…” ti in kakoi jeng in ahile, “heo, ima sei angai poi” ti in, eihin koi chah jenge. Hitichun ngah sot talouvin lha li jouvin, Chonghoi toh kiengnei na thupi tah kana nei lhon tai. Kaki chen lhon chu akipa mama jeng kahe in, hijeng jong le khat vei vei le lungnom mo tah in achang in munkhat touva ana tou jin, ajeh vang doh louva kahet ji chu ahitan ahi. Hencha bei nikho a pat a alhan cha jong vet ding ana da jing hijeng jong le, lhan a iki lhah doh teng le lungmon na khat aki nei tei e ti kana hetkhah jeh chun, kaki chen nilhon apat ahapta kit chun Chonghoi toh Hencha kom jon dingin Saikul lam kana jon lhon tan ahi. Amun kalhun lhon chun, masanga vengkhat ana umkhom piu Hencha ute nupi khat in eina lamto lhon in, eimu lhon chun kaki chen lhon ahet hitan tin, “chong, Hencha lha in jong nahin kipa pi lheh inte. Lungpi naken a kipah tah a naum ding chu aman jong nahin deipeh ding ahi” ti in alha mon in, chomkhat jouvin, lhanmol lam kajon tauve.
Alhan mun kalhun jou u chun lhan a konna gamla deu a chun kading in, Chonghoi le Hencha ute nupi nu chu lhan kom a chun adiing lhon in ahi. Chomkhat thipchet a adin nung lhon in, Chonghoi chu ahung dilsu in, lhanchung chu a angkoi in, akinuh den jenge. Hiti chun sotpi aumin, chomkhat jouvin a bag a apoh pahvui chu ahin ladoh in, lhan chunga chun akoi e. Hichun ahung ding doh in amai akitheh in, Car kingah nalam chu ajon phei tai. Kenjong lhan lam chu kanai in, Vaipho kahin choi chu lhan chunga chun kakoi in, “golpa, Ken kalungset sanga sang jo a jong Chonghoi na nalungset joh jeh in kaki pah e. tunin umkhom thei lhon tahih jong lechun lunglen kenga lungmong sella hinkho aman jing thei nadingin, pa komma hin taokop jingo” tia kahin dalhah got le, Pahvui lai don tah a lekha a thil kisun chu kamui. KEISANGA NALHUN MASAT LEH NEI NA HETHEM IN, KAHUNG TEI DING AHI. ITIH CHAN KAHIN LAH DING VANG KAHE POI. HIJENG JONGLE TU IN JONG KAHIN NGAI PAN TAI, KAHUNG LHUN KAH SE A KAHIN NGAI JING DING NAHI. NEINA NGAH HAT O. Nikhat teng le pakomma vantil banga chamdel a, lungmong sella lenkhom nading ni ngah a um jing ding chu ihi tauve. Tuni nikho hin, cha pasal hoitah khat kanei lhon in, Chonghoi jong lungmong sellin hinkho amang tai. Leiset hinkho a to dinga lom tampi um intin, hiche hahsat naho a konna iti thah din ding ham ti bou thupi a gel ding chu ahi.
BEITA
By, EricMangneo Haokip
