Jingkah Devotion
Dr. S. Chongloi
July 4, 2020 nikhoa sim. Ding: Philippians 3:4-8; Galatians 2:20
KEI KOI KAHIM?
Craig M. Watts, First Christian Church, Illinois Pastorpan thusim khat ana seiyin,
“Pasal lunglhasam khat hi ajingtho le avon koina ahetji loujeh in aboiden jin, jingtho a boi ding lunglelnan jan imut ding gei chun akikhoto in ahi. Nilhah khat pencil le paper aladoh in alup konin avon asut lhah jouse bannei chan akoina mun to ajihtha cheh in aimutan ahi. Jingkah ahungtho thon alekha chu aladoh in Sangkhol, akoina ajih avet le ana umchet tan, Toka jong chutobang chun ana umkit tan, avon jouse phatechan ajih bang bang chun akimu soh keitan ahi.
Alup masanga lekha a ajihdoh cheh jeh a avon jouse phate cha akimu chu pha asa lheh in ahi. Hinla chomkhat jouvin aman, “Kavon jouse kamutan ahile keila hoiya kaum hitam? Hoilaiya kakimu doh ding ham?” tin ama le ama chu akihol pantan, ajonan hapenin ahung pengin, “Kei chu hoiya um tam? ” tin akiholmo tai” ati.
Tujinga iseinomu chu, ilah uva mi tampi ijingtho tengu le thildang tampi bolding igelun hinla Kei koi kahim? tihi ikidong nom behji pouve. Ikidoh nomji lou vangun koi ihiu ikihetlou teng ibol itoh kicheh lou chule ki gammangpaji ahi tivang ihiuve. Hijeh chun ihinkho pumpiu kipatna ding hi koi ihi kihetna akon bou hidin kagel’in ahi.
Chunga Paul’in ama hinkhoa eihilnau ivet le Paul hi ipi ham khat hia kigel ahi tihi kicheh tah in Phil. 3:4-8 isimle akimudoh theiyin ahi. Chulai chun Paul koi nahim? kitile, Lengphunga peng, niget nia cheptan, Hebrew mi, Pharasee, Danthua nolna bei, Juda hougut le tomngai tiho tampi aseiteidin tahsan aume.
Hinla Damascus khopama Jesu to akimuto jou hin Paul’in masanga akisonpi ahina jouse chu apum dei tapon abon chan EH tobangin bou kagel tai ati. Hiche jouva chu Paul koi nahim tin kidongle, Gal. 2:20 a asei, “Christa toh thingpela kikhetbeh tha kahitan, kei hinga kahitapon Christa joh keisunga hing ahitai” ahin titah din tahsan aume.
Hilaiya kihilna thei chu, Jesu Christa itahsan masang seuva Kei koi kahim?” ti thudoh hi kidonbut dih theilou ahin, Jesu itahsan jouteng le ama sunggila iumnauva hi koi ihiu kicheh a kiseithei bep ahibouve. Christa sunggila hi koi ihiu ikimudoh uva ihinkhou hi ji inei jouteng ijito hinkho imankhom banga Jesu Christa toh kihingkhom ahitai. Amajoh chu isunga chenga Kei deibolna hinkho chu hitalou tua kahin hi kasunga cheng Jesu deijoh bolna dinga hinga kahitai tina ahi. Chuteng, Kei koi kahim? ti thudoh chu, “Keihi Pathen cha kahi” tia idonbut thei diu ahitai. Koi nahi nakihet chet hitam?
