LALPU LOTJEM
Ka insung umdau hou kavet a, kagelji tengle
kipana sangin lungneo na ding jeng ahung hitan ahile, kigellhah ding dan ana hah lheh jenge. Insung nom tah sum le pai ning lhing tah a, kimang cha hileu veng kei dinga jong lunglut na um thei ding ahin; hinlah kanu le kapa in ahol thu hunna aumle ne, aumloule ngol te akihi phat chun; ka lekha sim ngah ding, kanu le kapa kitopia anung lhon jui ding in kahung kigel ji in ahinlah; kanu le kapa in vang boi, Nau teni lah hiti khun angol ngol in aum lhontan, ama ni chunga khu kinepna jouse bei ahitaie, tua nang bou nahitai. Nang in lekha sim nangah a kanung lhon najuia ahile, toh lam in kijang khai nante; ahinlah keinin katoh thei lhonpet, kasem thei lhon pet in lekha joh chu ha sim in kisim inlang; mikhat hina ding hin ngaito jo in; napa le kei hi kahinkho lhon jong atamjo chi ahitaie, phat chom cha kanei sung lhon hin, khonung a keini umlou nunga nauteni hin iti nasem lhon ding ham. Boi, lekha lam joh in nalung umsah in; hicheng asei jou chun, keijong pasal kahi vang chun kakitim jou pon kahung kap doh tan ahile kanu in ; eihung lhem in boi, kap hih in idia naka ham, nalung neo na dinga kaseipih ahipoie, nalungletna dinga kaseipih nahi boue, nalungtup namolso takah in; thil dang in boui hih in eiti in, ama ni jong natong ding in achilhon tai.
Keiho ucha hi mi thum(3) kahiuvin, numei bei kahiuvin pasal thum, keihi aneopen kahe.
Kauteni hi aneoa kipat seingai lou ahilhon jeh chun, kanu le kapa in amani chunga, kinepna ana nei lhon jouse chu mang gamma ahitaie.
Keihi chapang cha kahi vang chun, kanu le kapa hin kauteni kihoupi thei ahilhon lou phat chun; kei kom in abon in alunggel lhon asei ji lhon in ; alhaset nalhon, akipa nalhon, imajouse asei ji lhon in keivang chu chapang cha kana hijeh chun, kana hethem thei behseh jipon, hijongle; athu seilhon ho vang kalunga kon in amang theipoi.
Lekha lam a hin, michen kaphah joulou vang chun; akham cha bep in khosunga dingin; athem loiyin, kapang jing in ahile; ka khosung mihou chun; eina pahcha lheh jeng jiuve.
Khosung mihon chutia eipachat, vang uchun; ka insung uva kanu le kapa ; tilou kaute ni hin nga jeng tan; akan nalou ding, sum pamaisah eina tiji lhon in; hinlah ken vang, cheng khat in jong kana donbut jipoie. Ama ni hi nisa lam ju, ganja, no. 4 neh thei jouse hi ahinneh lhon ahijeh chun; amani hin kanu le kapa kom a hi sum athum jilhonteng, kanuteni in nanao pa lekha sim na dinga; kikoi ahi ati lhon na ana pih jilou ahijeh a chu, keikomma ngatan eiti jilhon ahie.
Phat jong ahung chal challin ahile; B.A kahin chaina ding kum khat (1) bou akivat kum hin kaupa alenpenpa, hi aneh aval phat chun, ahung dammo tan ahile, jen man jong hilouvin, aleiset hinkho abeitan ahile; kanu chu aha ka lheh jengin: ken jong kanu ka chu kaven ahile, kapona in kanu kom chun; kachi in ” Heno ipida naka pipi ham” Aneh aval jeh a thi chula, ahol lin amui kiti chula, katia ahile kanu chun eihin ve in; Boi Nau hi, kalaigilga masapen, leiset mihemma ahung kijil nia patna, kana kineppi, kana lungmonpi, imajousea amasapen ahin ama hitia eidalhah jeng uhi kapoh jou lou ahe. Hichun ken jong seidi kahetlou phat chun katou namun chun, pao poh louvin kamoh um den tai.
Kanu le kapa in, kau akineppi dan chu kagellin ahile, kapo joupon; midang jong insunga apeng masapen, nu le pan akineppi didan ahethem lou ho kagellin aile; anu le apa in apoh nat dingho kagella ahile, hah kasa in, hichun ken jong insunga alenpen iti umta jongle, keibeh in ; kanu le kapa kakipasah ding ahi, katin kalungin; nikhat kanu le kapan ulsa lounga, nisa noui, dai noui, go nouia, kei ding gelna athoh hohi; moh seh a kakilesah lou ding ahitin; kalungin kaki kol chah beh tai.
Phat chi dung juijin, ken jong B.A kahin chaitai.
Master sim ding ahitan, coaching jong ahung ngaitan ahile; Coaching lah nading sum la kaneipon, hol na dingla kahe tapon; kanu le kapa koma sei dingla; ka collage chi na ding, bon hahsa tah a eihol pih honna katile ima kasei ngam tapon, hiti chun kamoh umtai.
Natonga kachiji in; ka Coaching lah na ding beh ato jongle, kati ji in; miloua ahiloule, toh na thei mun kahol ji in, kamu muna in katong ji in: sum them2 ma kamu ho kaki khol jinga ahile, coaching nga ding kham ahung hitan, hichun ken jong ; coaching kapan tai. Kiman chah dan vang ahah salheh jenge. Midang in, coaching class chu asotthim jijeh chun, sum aval val in, ahin kipoh jiuvin; kei vang chu ahilee, akitoh chet chet a kimang cha kahi jeh chun, igil kiel, dangchah teng jongle ana kithoh ham ham jia ahijeh chun, kei din kipana mong mong ana umthei jipoie.
Kanu le kapa in eina hil na bang in, ken jong kalungim, lungkham najouse; abon in taonan Pathen kom in, kalhut jing in, Pathen in eihin ngaito pih nan te katin hiti chun kaum jitai.
Vangset umtah in, kei chung chetna pa jong chu, aneh val phat chun; ahung hadammo tan ahile, phat sotpi jong bouipi man louvin, eida lha pai pai taivin ahile kanu le kapa ateh lhon naban in ; kaute ni jeh in, aka nalhon atam in ahile, atha hon alhsam lheh jeng tai.
Kanu deh deh hi atam jole, kaana jenga hinkho ahinman ahiin; kipana ananei beh jipoi.
Kei ding in jong lung lhah na ding ana tam lheh jengae, hijongle; ken vang kana kitepna kamolso kah lhadai ponge, kati jeh chun hah lheh jongle kana thoh ham ham jiae.
Kanu le kapa ; ateh lhon phat chun, na jong atong thei beh lhon tapon, hichun ken jong atamjo le college chitalouin, neh ding hollin natong in kachi jitan ahile, kanu le kapa hin eipoh nat pih lheh hon jenge. Alang khat in, akipah in alunglhai lhonne kachungin.
Kanu atahsa hung lel cheh cheh jengtai.
Kau athi jou kum khat joua hi kanu jong hin eimol lem san lhon ahitaie. Kapa toh keibou seh um kahi lhontai. Kanu hin athi masang in; kachang in alupna mun chun eikouvin, Boi, naute ni chunga kakinepna jouse abeitan, hijongle nang in vang kakinepna jouse nahin molso ding katahsanne. Boi, nanu le napa lhasam kahi lhon in, genthei , vaichat jeh in; nadei bangin lekha nasim theipoi, hijongle nanu lhasam beh buh jongleng, kapathei boh navang lhasam lhinglel lou hel ding ahe. Tunin nanu kei itih le kathi ding kahe tapoi. Hijeh a chu, Phathei boh dinga kahinkou nahe.
Hichi ahin sei jou chun; kei jong kakitim joupon, kanu kom chun kakap den in; Heno, idia nei da lhah lhon ding ham, nadam doh ding ahe, kati in kakap min ahile, kanu chun eihin koiyin, Boi, nabol, natoh, nalam jousen, hung lolhing inlang, chate dinga kineppi um mipa, aji dinga lungmon um, miding a kipa na hung hitan ati, in chi asei jou chun, aleiset hinkho abeitai. Aleiset hinkho abeiya eida lhah vang chun, hakan kakap tapon, kakisih in, kanung kou tapoi, ajeh chu adam lai nikhoa, kana kipasah, athu kana nun jeh chun,kisihna imacha kanei tapoi.
Kapa toh kei seh seh kahiphat chun, kalunggel in kagellin ahile, kanu la nom in kaumsah man tapon, kapa jong kaum sah man ding hinam, ti bou kagel gel jeng tai.
Ahin phat chom khat jou in; Pathen kom in kataotai. Ajeh chu kalekha sim jong kasim jom jou ding katahsan lou ahitai. Kasim loua ahile, kanu le kapa kinepna ; kamolso lou ding ahijeh chun; kei dingin, ahah val jeng tan, hijeh chun kitao le Alam lam umtan tae, katia Taona a kalhut ahi. Pakai, kanu le kapa kinepna kacha hung len intin, nikhat le milo lhing khat hung hintin; nom in eikoi lhon ding ahitia, ana kinepna lhon ; ken jong molso tei ding tia, kaki hambol najouse , kataona jouse idia heloua naum ham. Kanu le kapa noma kikoii nailoua tua kanu nang in nakilah. Ka lekha sim jong aban iti kajop ding, insunga neh ding kahol ding ham, kelekha sim na ding kahol ding ham.
Ima jouse boltheipa nahilou ham, imajouse neipa nahilou ham, achate Taona ngailhi jingpa nahilouham, ale idia kagentheia katao naho nakihetmo sah ham. Hepa, kagenthei, kahahsat nnajouse abon a nahet ahin, hijeh chun, lungsettah in, nathil boltheina kachung uvin, hin kilah sah in.
Kum khat lang pi mohseh tabang a kamah thah nung a hin, nikhat hi thil kidang tah khat, kainsung uvin ; ahung kilang tai.
Pathen koma katao jou, lha ni jou thilsoh ahi.
Neh le chah hol jeh a , dei banga lekha sim theiloua, lungneo tah a kaum laihin, ka khosung uva hin; ka kho Haosapu hi, kain uvin kholai leng in ahungae.
Ama ahung hin hiti hin ahung seiye; Boi, Jing nikho akipat : Collage phatah a nachi ding,, coaching lah na di jong ken, alut di jouse kapoh doh pih ding nahie. Chule, neh le chah ajong nang lui boui ta hih in; nalekha sim na lam in bou nalung umsah in; ken anchang le mae ding ho abonna kapih lhon ding nahie, hichi thucheng kajah jou chun, kamang ham , atah ham; kakipa val jeh chun, kakap den in amun chun kamoh tou den tai. Kapa le Haosapu akihou lhon in; kapa chun kipa thu aseiyin, ken jong kakipa val jeh chun kaseichim mo jengtai. Lungdong , lungkham, tah a kaum laiya, hitobang thu kajah chu, kataona jal ahi kahin hedoh in; Pathen kom in kipathu kaseitai.
Haosapu in aseibang chun neh le chah aman abonin; eibouipi lhon in, ka collage lam a abon a alut jouse, jong aman eipoh doh pihtai.
Hiti chun kei kiham bol najalle kapa taona, kanu Phathei najal chun; Army officer khat kahung hitai.
Hichi thusim chom cha kahin sei nachunga, jih khel seikhel aum khah le ; neihin seipih ding uvin kahung taove. Lunggel seinom nei aumle achung a kipe contact number akhu call ahiloule whatapp a ikijah mathei u ahie😊😊😊.
