Keiman jong kana to khah khat hin seiying e.
1993 kum bul lam chun Singer barrel(meithal) secondhand khat kainkoten ei choh peh uvin, aban kasei masang in, kei hi gollhang til cha kana hi vangchun, gamva/gamlen kiti ho hi kathanop na lam tah khat anahiy. Hijehchun mi meithal pou kana kikhel jin
sachang in gam kaga leng ji e.
Ole abul lang a isei bang un, meithal kahinnei tan niseh in
nilhah ni kihei phat leh gamleng
ka che jing in, sohlhu ga, vaopah
(thingpah chikhat) Sakhi (Deer) in alo namun ho kaga hol le le jin, alo nanung aum le kal (touna dinga thing kido) kahin
do jin, ajing nilhah ham khat’a
ga tou na ding in kado jin ahi.
Chutia kal kado jina munkhat pen a chun nilhah khat
hi kaga tou tan ahile, nisa chu alhum nading banchan bep sao tobang ahi nalai bep me. Hitichun chomcha kagah tou kilem bep ti mai ding hin tin, nidang banglou tahin husa gin kagah ja jap tan kavet le le leh
Sakhi chal tungtun vom heuhou
jeng khat katouna bulnoi tah
a anading kagah mutan kathal kangchan kahei doh in atuhkhuh
tah ka doi jin ka mehpel
le kathal aging tapon, nivei
thumvei kameh phat kit nung
in jong agingdeh tapon, hiche phat chun ama jong ol chan ache pheiyin molpang a chun alep suh tan ahi, alep suh jou jou chun, katouna thing chu olchan khatvei ahung kiling in, imachan jong kagel beh pon, sadang jong hung kit dinga kakinep jeh chun kameichang kakhel in katou pha kitin ahile, katouna thing chu kang kangin ahung kihot pan tan ahi, aha kiho cheh cheh jengtan, katimul ahung kilip sousou jeng in, kameithal kaleng ah kabat in kakum kigot leh amel kimu lou chun ei dom toukit jin, thingbah kakituh in ahileh kakhut leh
thing kikah a chun ipi ham khat ahung ki henglut in kakhut thingbah katuh na chu ahin keo lha jin thing chula aha kiho ling cheh cheh jengin katuh nalang lang tuhthei jin eilha tapouvin, thing phung noi don tah a chun nupi khat ahung kap pan tan ahi. Chule tol a chun nathu
ho chu achat sau sau jeng uvin,
hampa lah a chun husan gimnei
tah tah naosen ka gin leh adammo thiding taova tao hut hut gin ho kagah ja tan, hiche lai tah chun nisa mol ah alep dehchet tai, kavella thingna hui jin ahin mut linga kitat to ho chu kana kol a chun thih leh thih kitat to abang jeng in kabil kolngeh ana jeng e. Agin chun (kangkang)
ati jeng in, aha gin dan dan chu seibe ding aumpoi.
Hiche phat laitah chun nisa alhum mang tan ahi. Kho ahung ngui pan tan. Kakhohet na ahung
bei hoi hoi dana kakihet phat chun hapen a kahung penleh
tol kalhun aki toh
chet jeng e. Kipat doh a jam loi ding kagot le kakal kasep
but ta pon, kakenga songtum
kikan beh hile kilom leovin
agih e. Kakom kavelnai cha cha a chun nupi khat ahung kap kit ji nalai set e. Eivel le le jeng in katha alhom cheh cheh jeng tan, kho la ajing pai tan, kagil
hung kelin kadang hung chah tan kei jong kahung ki pasal sah tan nupi ka namun lah dung chu katha nei sunsun
in kathal chu kadom nah nah in kagah kap jeng tan ahile chephat chun kalhang jep a chun vohcha kidot lih tobang khun ahung peng in, hiche a chun ei dalhatan ahi.
Hiche jou chun inlang jon ding in kahung tan ahile gam gil laitah kahin phah pettah in ka-torch bulb ahung kang kit tai, khojin dan chula mitchang kipai atiu
chu kibang jeng ta, van lang ka ven, van vah a chun kahung tan ahile, Gova bil lah kahin phah phat hin,
(Sun lai tah a jong hichelai mun chu miel
khepkhup jeng ahi), ni danga um
khalou thinglong len tah khat
lampi khahtan nin ana kivai jam tan, kapel doh kigot leh pel doh thei ahimong monglou phat chun
achunga kal doha che pai kagot
laitah in ahung dingdoh tan, (Ka kal doh namun chu joumi lengkou lah anahi dan ahi) ahung din doh chun, Vo henu!
Burma phaicham a electrict vah
ho jouse kagah musoh hel jeng e. kati jat val behseh jeh hitam kahung hangsan doh jeng in ahi. Ka o nei cha sun sun a hapena kapen jengle, kapaneo le kajol pa Lun to kanao keihola hung chun eihin donbut uvin, hiche phatnchun tola eiselhah chu kathilo deh chet e.
Hiti chun thi deh
chatin jan nidan 11 in in kakivai lut
nah nah uvin ahi.
