Based on True Story..
KIHIL NATHEI THUSIM
Seiboi Khongsai
I-sim masang un Chapang hijong le chun nusei pasei ngaiya asempa Pathen gingjing chu Pathen in alungset in atao na asan peh jin aumpi jinge. Chule alen aneo Pathen koma na ngaichat nathum nale panpi na nathum na adang dang na thum na hita jongle Tahsan na neitah a Tao ding chule thil thum dan thep angaiyin ahi. Tao kiti man a tahsan na beiya Tao mi chu Pathen in jong atao na asang nadem.*
Ache sa kum 2006/7 lang chu ahi tan Chapang cha kum 11/12 aki hi bep nalaiyin engol laitah phatlou laitah chu ana hi ding ahin. Kaphat lou lai tah kangol lai ana hivang chun insunga kanun eina hahil mama jeng jin insung maicham kasem tengu jong le phate chan eina hil jin Mitoh ki nahlou ding, E sang upa jotho lou ding noise lou ding, Mi thilguh lou ding eche evah na ho a lampi dunga sumle pai emu jongle kilah jilou ding anei ehet le phate cha anei ho peh ding. Lekha esim teng jongle amasa a tao na kiman ding. School in elhung teng jongle tao na man d suhmil lou ding chapang pha chu Pathen in alungset in a tao na jong asan peh ji ahi tia eihil ji in tao na eiman peh jin thilpha tampi eina hil jin ahi.
Hitia kanun thilpha tampi einahil ji ho chu ken jong kaki chin jing tan kaphat lou kangol lheh vang chun Pathen lungset na le kanun chapangpha Pathen ging jing kahi na dinga tao na to tho a eina hil jalchun mito jong kana ki na jipon, mithil guh sumle pai chu le thil dang dang phatlou tiho kana bol jipon ahi. Eingailu pen kachun nun eihil naho kalungin kaki chin jingin katao teng jong Pathenin eisan peh jingin, kache kavah na hoin jong Pathen lungset kachang jing in chule min eimu hih jong le chung Pathenin eimu jing naiti kagel doh jingin thilpha kabol thei thei kabol jin min sille chen von ho pon ho pama niluma aphou na akon na ana kile lhah a tola ana um kamu jongle akile lhah na akon nin kala doh in kaphou phat peh kit jin kavah le naho a kithopi thei thei kanaki thopi jin ahi. Kalungin na thilphabol chu miding chan ding hilou vin nangma chan ding mama ahi tika lungin ahung kilang jin ahi.
Nikhat hi ka school kai na class kilah pet tah in het man louvin ka oi (Stomach) ha nat in ahung nan kahung dammo tan koima la ka oinat lam ahe pha um lou ken jong ki sei chomlou, ka Teacher pa koma phal na (Permission) kilah a inlam che ding chula ki ngap chakit lou. Subject ma aki la ding tam talou kikhen na ding jong anaithou tah jeh chun phal na kaki thum tapon ahi. Hiti chun thoh thei theiyin kathoh tan hinlah ka oinat na ahung khohse dom dom jengtan ka eh kisan jong ahung soh kit in ka imjou mong mong tapoi. _{Hahaha e oi anat a e eh ahung soh tahtah khu koi na toh lel sanga ki lel jo ahi.}_ Chu tia ka oinat le ka ehsoh ahung kitho khom chu ka lekha jih jong ka jih thei tapon Teacher pan ipi aseiya ipi a ajih ham jong kahe thei tapon ahi. Ehtha che ding la Latrine jong ehthah na nom jong umkitlou gahse thim kit nalai twi jong kidop thuding alah nading jong agamlhat jeh chun kache nom pon ahi.
Phat chom khat jou vin kalung sunga Bible chang khat Thum mun kipe ding nahiuve tikhu ahung kilangin chuphat chun kei jong kalungilin aw soh louvin ka kunin tahsan na nei tah in tao na kaki mantan ahi.
_Ka tao na sang jing aw chung Pathen panpi ngaichan nahenga kahung taove chung Pathen kanat na hi nangman na mun nahen kakipah e lungset in katao na aw hi nei ngaipeh inlang neisan peh in kanat nahi kathot joupoi Pakai na thilbol thei na le naloupi na kachunga hung kilang hen lang kanat ho neilah mangpeh inlang damna neihin chan tan Amen._
Hiti chun taona kaki man jou phat chun ka ehsoh na le ka oinat na hochu ahung dam dom dom min hetlou kah in ka hung damsel jeng tan ahi.
Ka nat na ho ahung dam phat chun Pathen komin kipah thu sei nan tao na kaki neikit in hitichun nom tah le kipah tah in kalekha jih chailou se chu ka loipa komin kaki lah in ka copy chai tan ahi. Next class te ni jong ka loi ho bangin thanom tah in kajao thei tan Pathen in katao na asan jeh in damsel chan kikhen chan ka jao vin, ka in mun chan geiya eipui lhung ka Pathen ahi jeh in avelin kipah thu kasei kit in ahi.
Kum le lha jong ahung kikhel in kei jong ka hung khanglen pan pan tan ngollai khang chu kahin dalha tan ahi. Hichun Nokia keypad khat kaneiyin hiche a chun khat vei vei le nom chom chomin kaloi hotoh Fb kaki chem jiu vin ahinlah thil khel hat akihi jeh chun fb password chu kana khel lele jin kaha khel val phat chun ka password chu ka haimil khatan ahi.
Ka password chu ipi hiding hitam tia kahet cha sunsun ka jih vangin khat cha adih aumpon. Kum ijat ham pichu kana boi pin hinla kana boldoh chom deh pon chuphat in acccount dang kaki sem kit in ka account thah pa chun kaki chem kit tan ahi. Phat ahung che chen kumle lha jong achal jing bangin Smart Phone jong nal tah tah ahung um tan ka ute khat in aman lui khat eipen hiche a chun phat gomkom aum teng kaki chem jijin nikhat nom chom chom in kijam pumin fb kaki chemin ka account luipa a password chu hetdoh tei ding hondoh tei ding kahin ngaito tan, ama sa a password ka na jih ho ka het sun chu ka jih jih jeng tan adih a khat cha aum mong mong tapon nikho la lhum pai d hita, kei jong kaki ngaiton ijat ka jih vang inla adih aum tapon tua ka boltheipen katin hetlou na a hetna eipe thei thiljouse bolthei Pathen komin pan pi na kathumin lunglut tah in chom chan tao na kamang in ahi. Katao jou vin kalung gelin password ding dan khat ahung kilang ngal tan ken jong tahsan na neipum chun ka jih in ahi le adih chet jengin ahi. Kei jong kaki pah toh kathanop to ka moh nuinui jengin eihetsah pa Pathen komin kipah thu kasei kit in ahi. Kum tampi ka naboi pi jingin ka boldoh jou pon hiche nikho a Pathen songa tahsan nanei puma ka tao phat in khat vei jih in kahin jih dih chet jeng tan ahi.
Kum jong ahung lhung tan mitin kinep na Christmass jong nom le kipah in aki mangchai kit tan New year jong ahung hi pai tan phatche sa a ebol khel na ho Pathen koma ngaidam thum na phat le ahung lhung kumthah a ima lampi a edei engaichat ho leh kipah thu sei na phat chu ahi kit tan kei jong kum thah a kadam thei na ding le adang ngaichat ho thum nan katao tan ahi. Kei hi midammo nom tah chu kana hin kadam ham iti le kina kanat ham iti le kidam hito bang chu kahi jeh in adeh in ka tao nan kadam thei nadin kum ahung lhunna New Year ahung hiset le Pathen komin tukum beh damna neipen lang damselin neipui tan tin ka na thum thum jin hinlah kana dam deh jipon ahi. Ka nat a kadam ma hitia ka hung um jing phat chun ka tao na le kathum na hi Pathen in eisan peh nom lou hitam katin kana lungpha mo jin ahi. Hiti chun 2019 in jong kana thum kit in Pathen koma tao na kana mang kit in kathum ngai bang chun damthei na kana thumin Pathen lungset in ngailut na sang tah kahung chang khatan ahi. Kavangphat hitam kavangset hitam tukum 2020 mijousen aki chat le gim nei mama Coronavirus nat na hise ahung kithe jal na ahung khoh set na kum hin Pathen lungset na kadongin kana tao jing nale kathum jing damthei na dinga ka tao na ei sanpeh jeh in kadam jingin, damthei na eipe ka Pakai ka Pathen chu kathangvah in loupi nale choiaat na, jouse ama a hijing jeng tahen.
*ACHAI NA DIN.*
Hiche thu hi asun pa kei ma Seiboi Khongsai kahin ipi tuple doiya kisun ham itileh TAHSAN NA NEI TAH A TAO NA MAN DING HI AKI DOIPEN CHU AHI. Chu le ka neo laiya ka chun nun einahil na ho le ka tao na lolhin naho them khat Thusim banga Pathen lou pi na ding le khat lenin phat chom pi na a anei khah jong le tia kahin jih ahin, gel dingin password ho maimai haimil jeh a tao jeng ding chu nuijat jong um ding ahin, hijong le na hahsat na, naboi na, na damlou na ho a na kitho pi jing le lungmon na damthei na napethei chu Pathen bou hilou ham na. Ajih dan jong kathem pon seikhel adih lou aum jong le Pathen min in kingaidam ute. Nule pa ten jong nachateu Pathen thu tahsa thu hijong le phate chan tao na to thon hil jing jengu hite. Chule alen aneo ebon uvin tao na thahat dan le tahsan na neitah a tao jing ding in kahin teme. Lunglut tah a eina sim peh ho jouse chung in jong kakipah e chule Pathen in jong phatthei na hin boh cheh tau hen.
*THE END*
