Heart touching short story……
(Fiction)
By : M. Lalcha Haokip
___________________________________
Lun, apha e nang nakimu ji teng lunglhai lhai aum ji e. Phatmasa lai a kipat houbung hihen khosung hijong leh nakiman chah naho lha ngai aum ji e. Suty nahungna sot hitam? Nilhah khat a chuba napi’n Boilun, kamang ah kamu e atia nahung ding hi amang mat hinte ” tia Pa Manglal(Houbung head deacon) pan jingkah Hou-in kai kikhen a hou-in varendah a adoh chun Boilun jong kipana adimset in ahi.
Boilun :(Kipana maiso pujing puma) Kipa aume hepu nangho taona jeh in kei jong Pathen jalin kadam jing e. Tuchung suty kahungpot hi kei jong kigoman louva kahung ahi. Ajeh chu KASHMIR gama posting kalhah ding phat a lamkai hon hapta khatbou suty eipeh jeh a in lang kahung phah ahi. Chuleh mi dingin imacha hihih jong leh keiho Batallion sunga thal kap kitetna a akhatna kahin lah insung mi le houbung mite toh kipa maicham semkhom tei ding kanop jeh a kahung nahnah ahi.
Chutia nomtah a akihoulim lai lhonin Boilun a dia penpi sopi khatseh anei Mercy ahung in…
Mercy : Heo, henu’n nilhah maicham a nehthei chohna ding nang kom ah chun sum galan tia eihinsol ahi. Hepa, nang koma jong hung ding kati ahin, ka utoh nana umkhom ngal leh nilhah maichama hung pang tei dingin kahin tem e.
Nilhah in Boilun in amaho Batallion sunga thal kap kitetna a 1st ahin lah maicham semna kipah tah in asem un, chuleh sepai hinkho amanna sunga Pathen a akingai jing jeh na ban a Insung mite le Houbung mite taona jal a Pathenin thina thei tampi lah a konna ahoidoh ho kipana mitlhi long pumin ahoulim in ahi. Chuleh pute pate hoa konin jong tilkhouna thu tampi asei un mipin kipana jalin
in- nei ten asem u cha le nehthei kipah tah in adon un anekhom un ahi.
Phat le nikho ahung chal in Boilun jong asuty phat akichai tah jeh chun insungmi, houbungmi, khosungmi chuleh loi le pai ijat in ngai jong leh chelou theilou ahi jeh in KASHMIR GAM jon dingin ijakai akigut chaitan ahi.
Boilun leh Mercy hi insung mipan khulsin achanna kum som ana che tajong leh leiset adia angailutpen lhon anu in genthei hahsatna tampi ahin kimaitopi nunga Boilun jong sepai hung pang doh a chuleh Mercy jong BA achai jouva anu umkhompi toh goma khosunga private teacher a na atoh ahi.
Hiche ni jingkah chu lunghel aumlheh in ahi. Chuleh chungto nisa hong nidang sangin angui chom lheh ahi. Ajeh chu India gama dia galguhbol tamnapen loi a kihe chuleh sepai ijat ham khat in ahinkho ana chan namun
” KASHMIR GAMBOINA ” mun jon dia angailut tah anao Mercy le anu dalha Boilun kalson ding ahitai. Hiti chun vaikonna maicham asem un, nu Lhingbem in jong achapa dingin mitlhi long pumin Pathen hengah taona aman peh in ahi.
Anu : Boi, hoilai mun ah che jong le chun na Pathen vang hinsumil hih in. Nalhun navaikon seh leh Pathen geldoh jingin lang, nalhaset nagenthei ni teng jong leh ama bel jingin. Kei le nanao in jong kajo chan lhonin napa anadam lai a taona nikhoa inaman jingu Sunday ni jingkah seh leh nanga dinga taona kahin man jing lhon ding ahi. Naloi napai lah a nalhat teng ching thei tah in hinkho mangin lang, mi kingolsah jong leh nangin vang na Pathen nahin gel doh jing ding ahi. Hiche Bible hi nachena chan ah kipoh in lang, hiche mangchan Pathen toh jingkah nilhah seh leh anakihou jing lhonin.
Boilun : Henge nu, nachan nasei jouse hinjui kimsoh dingin Pathen le nangni masangah kakitem e. Anjo khat leh kei a ding hung ha lunggim val in nate. Doctorho thupeh banga lunggim lungkham kiti ho toh nanatna kitoh
Lou ahi. Damdoi neh dia napeh ho chu aphatchan ana ne ji in lang keiya dingin hung ha lunggim hih in. Nangni joh tulai gamsung huinun dan aphat tahlou jeh in phate ten anaum lhonin lang aboi ima aum jong leh hin hetsah lhonin.
Mercy : Heo, Christmas suty nahung teng smart phone hoitah khat nin choh peh o.
Boilun : Henge nao, phate ten ana um in lang masanga hepa kijenna interest a sumpa ina lah u ahung kisah doh doh teng kachohpeh tei ding ahi. Ahin hiche sah doh masanga vang nei hetthem ding kakinem e.
Ijakai akigut jou toh lhonin KASHMIR GAM BOINA jon dingin angailut anu le anao dalhan Tulihal airport a konin huikong ah leng tou pan tan ahi.
Phat le nikho ahungchal in Boilun jong KASHMIR gam alhung tan ahi. Thu le la boi jeh in alhun a kipat bu jong aphatchan ane jipon chuleh gam dap ahijeh naban ah melma ahat jeh in a-ihmutlou ni atam jo ahi ji in ahi.
Nikhat duty apohna mun ah phat chesa insung mite toh kipahtah a ana lenkhom lai u lim ahinmu doh chu lunghel nan abomin ahi. Hichun nilhah lam pung 5 ahitoh lhonin raidio agah hon leh Thadou programme akipat toh akitoh chat in ahi.
Aman jong kinloi tah in channel chu kichih jap a akijah thei nadin aboipi in ahileh nah nah in programme kichai kon chat in ahin holdoh in lunglen ladeilhen ni toh ana kito jeh chun Benny Khongsai in asah “Chung chollha na vah noiya ” kiti la akichai kon chat ana hikha in ahi. Aman jong homtho tah in angai in akit a Thadou programme hung dingkal angahlel lheh in ahi. Ajeh chu kol le vai lah ngen a aumjeh a eipao a la kisa thu kisei ajah chu lunghel mama ahi.
Chutia lunghel tah a aum jing lai in gojuh bangin mol chung langa konin thal ahung kikap in ahi. Aman jong AK -47 achoi chu load abol in thal hung kikap nalang chu agal kap pei ngal in ahi.
Hiche nilhah chu Boilun in apet pet in lethoh hih leh amaho umna mun chu galguh bol bailamtah a ahin no khum diu dan ahi. Ajeh chu ijakai gontupsa akoi u ahi. Chuleh hiche pet a chu mi ijat ham khat ROP a dinga anavai kon doh jouchat ahi.
Thil umdan ho CO pan ahin hetdoh phat chun Boilun chu pachatna sangtah ape un chuleh Batallion a dia thalkap kitetna a athempen ahijeh chun lamkai hon akisonpi mama un ahi.
Anun maicham a ana vailhahna bangin aman jong phat ong anei seh leh Bible sim le Taona anei jingin ahi.
Nikhat galguh bolho aum uve ti Intellegent hoa konna thupeh aum jeh chun amaho nokhum dingin Boilun lamkai nan mi 20 meithal, meichang chuleh adang dang ninglhingset in akigut un ache tauvin ahi.
Alang khat ah in mun a adalhah anu vang masanga anatnan ahin phah jeh chun hospital ah anao Mercy in aumpi jing lai ahi. A upa anu dammo hetsah ding tia phone achuti bol vangin a call doh jou mongmong pon ahi. Ajeh chu aupa galkap a ache ding jeh a phone switch off a akoi lam ahetlou ahi.
Mercy jong anu dammo toh aupa a call doh joulou jeh chun lunggim leh lungdong tah in aumin ahi. Chutia aum jing lai in eimitimes agah veh leh headline ah ” KASHMIR GAMBOINA JEH A GOVERMENT SEPAI HO LEH GALGUH BOL HO KIKAH A NASATAH A KIKAPTONA ANA UM ” tia kisun amu chun alungkhamna le alunggimna akibe Chomin ahi. Aman jong phatah a asim suh leh kikaptona mun chu a upa posting lhah namun ahichu kichih tah in ahedoh in ahi. Chuleh athi amang jong umdan in akisunin ahi. Alangkhat ah thusoh chu anu hetsah ding ati leh ajo khat leh lunggim val in te ati jeh chun hetsah louvin aumin ahi.
Anu adammo naban a aupa akijahmatopi theilou toh sum le pai holna ding ahetlou toh mohlung in alungkhamin, mi mulou kah kah leh guhthimin amit a kon hungva lha mitlhi akitheh ji in ahi. Chutia aum jing lai in kot koma phone charging abol chu avel vel in call ahungin, nivei thumvei chutia ahung phat chun aman jong agah vet leh aupa anahitan ahi.
Hichun aman jong ale call pai in ahileh ” The number your trying call is currently busy ” tia kisei ajah jeh chun aupan ahin le call ding khaltwi bangin achuti nga jeng tan ahi.
(Cal hung)
Mercy : Hello heo !
Boilun : Hello, boi nadam dam lhon hinam? Tujan kamangin kahinmu lhon e henu la damdam hinam?
Mercy : Heo, nangla naphat phat hinam? Janni langa KASHMIR lang boina thu kajah jeh chun na phone kahin call vangin kahin call doh joulou toh kana lunggim lheh e. Chuleh henu jong masanga anat nan ahin phah jeh in tutu hin Christian Hospital ah kaumpi e. Ahithei dinga ahileh sum nahin thot ding ham heo?
( Boilun in jong thil umdan ho abonchan anaonu aseipeh soh in ahi)
Boilun : Henge boi, nang le henu taona jal in kathina thei tampi lah a konin Pathenin eiveng jinge. Tuni lhalo hunglut ding ahin, sum le pai chu ana lunggim hih in sun lang leh kahin thot ding ahi. Kaboi kit ding ahitai boi henu chu ahung oldom teng kaki houpi nome aphat phatnan ana boipi in.
Mercy : (Aupa dama aum ajah jeh chun koima hetlou kah in ahung nuilha in ahi) Henge heo nang jong um nop tan.
Phat le nikho ahungchak jing toh lhonin Nu Lhingbem jong adammona a kon ahung oldom toh lhonin Hospital a kon ahung potdoh tan ahi. Hinlah
” KASHMIR GAMBOINA “ nitin a phatna lam mano sanga thu le la dinmun akhoh cheh cheh jeh chun Boilun jong anu damdoh teng khatvei beh kihoupi ding ati jong atamjoa gamnoi thing noi a aum jeh in akihou doh theipo vin ahi.
Amaho company umna mun chu galguh bolho hat namun laitah ahijeh in sun le janin meipum toh kichat louvin aum un ahi. Chutia in mun a um anu le anao ngaiya aum jing lai in galguh bol ho toh ahung kitoh kha tauvin nasatah in kikap to aumin ahi. Ama le aloi mithum hin galguh bol ho anung lama konna ahin kap u ahin chuleh adangse hi agal lang khat a pang u ahi.
Hiti chun guhthim in ahin naiphei un, galguh bolho umna mun kom ahin phah kon chat un ahin nung le kap un ahileh aloi mini apet pet in athi in chuleh aloipa khat jong nasatah in akitong kha in ahi. Boilun vang vanphat um tah in Bomb halneo khat in akeng akhah chu ahi in chuti chun akiha toh khah pon ahi.
Aman jong hangsan tah in achangin apangin chutia akikap to jing lai un melma ijat ham khat jong akap lih in ahi.
Hinlah vangset umtah in gal lang khat a pang Captian pa chu galguh bol hon ahin kap kha un, apet pet in athi pai tan ahi. Boilun le aloi ho chu galguhbol ho nung lama kon ahin kap jeh u chun Captianpa kap kha pa chu Boilun in jong phatah a adoi a akap leh a op lhang tah akhah jeh chun hiche galguh bolpa jong chu apetpet in athipai in ahi.
Alangkhat ah KASHMIR GAM BOINA chu news tin ah ahung kiso in, India gam ahotling soh in ahi. Nu Lhingbem jong alunggim lheh in ahinlah abol theipen Pahen anga ah jingkah nilhah in taonan alhut in ahi.
Kikapto na aki chai nungin alang alang ah athi le akitongkha aumin ahi. Security langa Captianpa athi jeh chun galguh bolho chu lolhing akisah mama un ahi.
Amaho lah a lamkai khat lungthim phalou kengmi khat aum jeh in Captian pa thi chu Boilun in akap lih dan in aseijin ahi. Ajeh chu Boilun le aloi mi thum ho chu melmate nung lama kipat ahin kap u ahijeh a chutia asei ahi. Chuleh Boilun chun apankhompi aloi minin thina toh hen lang chuleh aloipa ana kisu kha tajong leh hangsan tah a gal akap chu rank ahung kal be ding leh kipaman sang tah asan tei ding chu ama het jeh a thangthip a chutia chu case ahilou lou a abol ahi.
Gal mun a dia Captainpa nouichat ahi jeh chun apet pet in mona neilou Boilun chu achung thu khol dingin aman un jail alhut un ahi.
Alangkhat ah in lang adalhah anu le anao in Boilun chutia aum chu ahepha lhon pon ahi. Hijong leh ni ijat ham khat aki jah matto thei tahlou jeh u chun lungdonna le lungkham nan abom lhonin ahi.
Boilun jong thil jouse agel a angaito jing lai in, ahina lou beh a akingoh jeh a jail sunga gentheina tampi ato ho chu agel in chuleh in langa anu le anao khankho ding jong agel ji teng mit a konin tanglouvin mitlhin ahin donbut paijin ahi.
Jail sunga aum laiya ala jih :
SEPAI HINKHO :
___________________________________
Singsung gentheina ho kile sah din,
Chun le jo ngailheh in tin ;
Loi le pai cheng melmu nom jongle,
Kana jon tai Kashmir gam boina ;
O ! Sepai hinkho.
Chunnu taopehna jal in ;
Melma khut’a konin Chung Pathenin
Eiveng bit jinge ti kahe in ;
Kakipah e chunnu nataona jal in ;
O ! Sepai hinkho.
Hinlah gelphah louva loi le pai ;
Thangset jeh a hitobang kato hi,
Lei mihem hinan athoh hah lheh e ;
Hinlah kadingin Pathen aum jingnai
O ! Sepai hinkho.
Sun gilkil kato ji teng ,
Chunnu bu hon lha ngaijin kaum e ;
Hahsat gentheina kato ji teng ;
Chunnu vailhahnan eitilkhou jinge ;
O ! Sepai hinkho.
Itih tah leh bolna vangkhoa ;
Insungmi ngaicheng toh ,
Kipah tah in kalengkhom kitdem tin,
Nikho le phat kasim jing e.
O ! Sepai hinkho.
Chutia jail sunga genthei athoh jing lai in achung thu kholgilna neihon kholna thei tin chengah akhol un, hiche kikapto nikhoa apankhompi ho chu ahin hol un ahileh aloi khat anakitoh khah chu ahin hedoh un, amahon jong hiche akitongkhapa chu thil ijakai adongun ahileh Boilun chunga ngohna thu kisei jouse thulam leng joh ahidan hetchet ahina ban ah amajeh a aloiho tampi hinkho achan diu ahuh doh jong ahin hedoh un ahi. Hichun amahon jong apetpet in Boilun chu jail a konin aladoh un, Boilun ahina lou beh a ana ngohpa chu ahinkhoa suspend dingin order asoh pai ngal un chuleh ahinkhoa jail a tang dingin jong thulhahna aum tan ahi.
Phat le nikho ahung chal in achung changa boina jouse jong ol-ol in ahung kilham pan tan ahi. Chutia ahinkho phal ngam a agam le anam a dia gal akap chu news jouse ah mijouse kihoulimnan apang in ahi.
Nikhat anu le anao phone abol in..
Boilun : Hello, nao henu nakoma umlou ham? Nadam dam lhon hinam?
Mercy : Henge heo Pathen jal a kadampet lhon ahinai. Henu chu tuchat a chu pam langa pot doh hichu o !
( Mercy in jong pam langa um anu chu akou in )
” Henu ka u Boilun in phone ahin bol e “
(Anu jong kinloi tah a hung lhai)
Anu : Hello boi nadam dam hinam? Tua naumna mun KASIMIL (Kashmir) gam nopnop hinam?
Boilun : Henge nu.. Pathen jal a kadampet ahi nai. Kanao chu khatvei hinpe ta di o nu..
Hello nao, good news kha kaseipeh ding ham?
Mercy : Ipi good news ham heo?
(Tot toh tah goma)
Ole ka unu ding chu nailam hitam?😁
Boilun : Henge henge😁 chuleh flight ticket jong date 25 a dingin booking kabol chai tai.
Mercy : O ! suty nahung ding hitam heo? Kangahlel val e nahung teng amasa kasei chu nin choh peh o.
Boilun : Ahipoi, kei kahung ding ahipoi nang le henu joh New Delhi a nahung lhon ding ahi. 26 nikho khu Republic day ding ahin, hche nikho leh award kasan ding ahi. Hotel ijakai booking kabol soh ahitai.
Mercy : (Kipah val a koima umna lam hepha louva kichom) heo, katha anom val e…
Boilun : Henu chu khatvei hinpe kit o nao.
Hello henu, kanao komah chun tu chun ima jouse kahinsei ahitai. Tarik 25 teng New Delhi a nahung lhon ding ahi. Ijakai kanao chu ana dong kom o nu, ka sap hon eikou ta koi tai hite nu.
Chutia achapan ahinkhoa anaphah khahlou namun chuleh amanga jong amat khah lou hel Delhi tolpia nahung lhon ding ahi ti ajah jeh chun akipah lheh in ahi. Hinlah leiset chunga angailutpen asenjin adalhah kal kum som val anache tajong leh hitia Boilun in Delhi a ahin kou jeh chun ahin gel doh in mitlhin ahin donbut pai in ahi.
Phat leh nikho ahungchal in Delhi che nading nikho jong ahunglhung pai tan ahi. Hiti chun Boilun in Delhi airport ah ana ngah in damsel in akimuto tauvin ahi.
Republic day nikho jong ahung lhung pai tan mitin chu hiche kin a jao dingin nasatah in kigutna anei un ahi. Alangkhat ah Boilun jong medal sang ding ahijeh chun ahoina thei chan in akivon in, programme umna ding mun ajon tauvin ahi. Boilun in jong mun khat ah atou nau taxi chu ahin kham in..
Anu : Boi, hilai tah hi ibol a iki kham u ham? Programme ilep diu hinam?
Boilun : ( Hung me jap) henu, ilep diu ahinai lungkham hih in. Mikhat inga diu ahi.
Chomkhat achuti nga jing lai un Kimboi le aloinu Hatneo jong ahunglhung pai lhonin ahi.
Boilun : Kim, hiche hi henu chuleh nao Mercy ahi. Nakoma kana seisei jeng chu ahi.
Kimboi hi Boilun in nungah melhoi ijat in tamjong leh hinkhoa dia Christian insung semkhompi dia ana deilhen ahi. Hinlah anu le Mercy in aupa thilgon chu ana hetphahlou ahi. Nu Lhingbem in jong Pathen in pha asah leh amou nu ding mel amu jeh chun kipana adimset in koima umna lam hepha louvin amoh nuinui jin ahi.
Hiti chun chibai akibol un ijakai kihoulim toh gomin programme umna ding mun kipah tah in ajon un, chomloukah a programme akipat toh lhonin Boilun jong mipi asang aja masangah chun hinkho phal ngam a gal ana kap jeh chun mi hangsangho chandia lom tah kipaman chu ahin kisan tan ahi.
BEITA.
NB : Thusim nasimna a kon ngaidan nanei leh kiphalam lou hel a noiya kipe no. a konna ajihpa
M. Lalcha Haokip(8730999926) houpi jeng thei ahi.
