Father’s special
Heart touching short story
(Fiction)
By: M. Lalcha Haokip
(8730999926)
Khang thusima kisei jing ding vannoi pumpi a hise lang COVID-19 jeh in kumlhunga tohgoun ijakai losap dinga aum ding naban a simlai lekhasim ho dingin jong maban che jom theilouvin mitin COVID- 19 gin jeh in lungleng vaitah in aumin ahi.
Nuikhomni kho ho
Jingkah khat pa Jamthang jong matah in athouvin, phat chesa a insungmi kingailu tah leh kipah tah a nuikhomni kho ho agel doh jing laijin ahetman lou kah in mit a konin mitlhi twi in ahin donbut paijin ahi. Asenji ngaitah nu Lamcy in adalhah kal kum thum ana che ta jong leh ahai tan konna availhahna kamcheng alunga agin jing jeh in vannoi COVID- 19 in boi hen lang , sum le pai chuleh lhaset jachat ijat thoh ding hijong leh adalhah chate cheng, Letkholun @Lulun, Thangminchon@ Chochon chuleh naolhum pen leh insunga numei changkhat Kimneihat@Boineo amaho cheng khonung khankho ding leh themjilna lam hihen ijakai hijong leh loi le pai nung ahin phah tei diu agel thupi le agel khohpen ahi.
Achate jong Pathen jalin nungah gollhang mel pu ngen ahitan, phat chesa a agentheina ho leh loi le pai masanga jum ja athohna ho hung kile ding kinem tah’a khal twi banga anga jing laijin akinepna jouse huilah a changvai kithe mang bangin aum gam tan ahi. Ajeh chu aman angailut jala thil ijakai abol peh jouse chaten hinkho cheset na’n anei doh gam kigo tan ahi.
COVID-19 jeh a lockdown um masang chun lei themjil gelkhohna jalin nei le neilou thu umlouvin munchom cheh a lekha sima achate akoi jeh in phat jousen aum khom thei pouvin ahi. Hinlah Lockdown ahung kipat nikhoa kipat Pathen jalin insunga minu ana um tahih jong leh damlai sung adeh a Lockdown sung kah aumkhom kah sung beh uva achate jala kipana leh lung ol, tha olna aum dem ti kinem tah a anga jing laijin ama kinepna bang ana hita pon ahi.
Jan jong leh ma ihmut pen, jingkah jong leh akima tho pen chuleh aman insung natoh abol lou ni leh bol lou hijeng. Ajeh chu atahpen Lulun PUBG a angol leh anaopa Chochon in a um man louva kholai ava leh chuleh aneopen nu Boineo Fb leh Tiktok a aboi leh hiti ho jeh in pa Jamthang hinkho man hi teh langin amano vangin loi le pai koma thupi tah a seithei hilou chuleh ijat a apho ahil vanga la chaten ipi kisei ahi hethem mongmong lou. Adong manin ama le ama aki oimo in ” Chate kana lungset val jeh a tunia kei eilungset ding umlou ahitai ” tin achangseh in amoh lhiso ji’n ahi.
Father’s Day
Phat leh nikho ahung chalin Vannoi pumpin anit Father’s Day jong ahung nai cheh cheh tan ahi. Lockdown jeh a dei banga Hou in kaina chuleh lekhasimna phat aumtah lou jeh in mitinin nikho chedan leh nidan che dan amil gam kigo tan ahi. Hibang chun Father’s Day ahunglhun jong chu pa Jamthang in ana hetdoh vah lou ahi. Jingkah khat ama jong khosung Hotel khat a ache na ah atoukhompi upa khat in,
Upapa : Pa Thang, nang vang najin nadalha ta jong leh Pathen leh houbung mite mit vet a naki tah naho leh napotthona ga nachate jal khun akimu e. Ajeh chu tuni Father’s day ahitoh kilhonna jingkah whatsapp kahon leh nachate ho status leh facebook a nachaten napachatna thu leh nalim kamu in nang vang nachaten na ngailu mong monge, mihem khat hinan hibanga nachaten nangailut hi kahin otcha e.
Chutia upa pu thusei ajah jah chun pa Jamthang jong pam langa mi mudin kipana maisopu pum leh awnem tah in ” Kakipah e” ativangin alungsung’ah lhasetna dimset pumin koima hetlou kah in anuhgui ahung bingin ahi. Ajeh chu min achate apachat dan leh atahtah a ahinkho man dan u avet leh moh lhaset jeng ahi.
Amajong chutia upapu thusei ajah jah kon chun nilhumin hinkho nopmo tah in aumin, insunga limlui ho chu khat khat in ala doh in phatchesa ho gel doh in achangseh in insungah alhisoh in ahi. Alanglhat ah room chom choma um Boineo leh Lulun jong apa chutia lhaset leh lungleng vaitah a aum chu hephalouvin PUBG leh Tiktok ah kiseimo tah in aum lhonin ahi.
Pa Jamthang jong Bible sim pumin ama leh ama akilhamonin Calendar agah vet leh asenji ngaitah in adalhah kal kum thum lhinni kho chat ana hitan ahi. Chuti chun aman jong nilhah ahung lhun phat in insunga minun adalhah kal u kumthum ahitoh lhonin insung maicham sem dingin ijakai agochai tan ahi.
Lhaset umtah khat chu jingkah langa Facebook leh whatsapp status a Father’s Day wish bol jahjah ho chun nilhah lam ahiphat in koiman Father’s Day ahilam jong ana hepha tapouvin ahi.
Hiti chun insung maicham sem ding agot jing lai un phone a aboi gam phat un koima akou doh joupon ahi. Hinlah vangphat umtah khat chu kolphe meivah umlou pet ahijeh in nom le da leh phone battery abeitah jeh in insung maicham semna mun ahin jong tauvin ahi.
Pa Jamthang jong lhase tah in ahoulim in ” Ven chate ho nangho kana ngailut val jeh in tun kei eingailu ding koima naum tapouve. Kei jong mi banga damthei kahilou jeh in itih chanpi jong leiset a hing ding kahitapon, kadam sung hin insunga nanu u um tahih jong leh kingailu tah leh kipah tah a hinkho iman khom diubou kangai chat ahi. Hijeh hin tunikhoa kahil nahou leh kaphona ho nangai tah hih u jong leh nikho khat teng nahin gel doh tei diu ahi. Nakisih masang un tua kahilnahou leh kapho nahou hi hethem un lang hinkho kitup tah in mang un”. Chutia apa maichama mitlhi longa pona tah a ahoulimna ho jong donse in neilouvin amaho nop le dei bangin hinkho amang jom jing un ahi.
Phat le nikho ahungchal in pa Jamthang jong tahsa dammona ahin nei jingin, hinlah insunga akhohsah ding leh phatah a avesui ding aumlou jeh in adammona kon ahung lel cheh cheh tan ahi. Ama jong damdoi in ah aga kivetsah leh tulai nat gimnei kisei COVID-19 positive ana hitan ahi.
Ama jong thi ding dinmun a aum phat in nikhat doctor le nurse ho komah achate availhah na thu aseipeh nom dan asei jeh in video call ah akihousah un ahi. Ajeh chu ama hi Isolation ward a um ahijeh a koima toh kihou theilou, koima toh kimuto theilou ahi. Ama natna hi COVID-19 positive seh hilouva natdang toh kitho ahijeh in agim lheh in ahi.
” Chate ho tun ijat in kingailu u jong leh kei hi thi tei ding dinmun a kaum tah jeh in kadam sungin jum le ja, gentheina tin cheng thoh ding hijong leh nangho hung mit doh teina dingin kana thoh in hinlah tunin nanu toh kana kitepna lhon…….( asei ding sei chailouva moh lhiso jeng) mol..so…joulou dingin kaum tai. Achainan seilou ding kati ahin hinlah tunia kasei lou leh jing le thai leh kei awso chuleh kamel leiset a avel a namu tahlou diu ahijeh in nasei peh uvinge.
” Tunia gamdang mun danga lekha nasim thei u kei sum le pai holna neilouvin sum le pai hijat lut hi hoiya kalah ham? Thil dang ahipoi ka KIDNEY lang khat kajoh jeh a konna hichan lekha kasim sah u nahi. Hiche chung chonna tulai nat gimnei kisei COVID-19 ginglouva nangho neh leh chah ding kaga holna a hiche natna hi kahin kilah doh khah ahi. Kana ngailut val jeh in tunin kei eingailu ding koima aumpoi.
Chutia pa Jamthang ahoulim chai chai chun doctor ho leh nurse hon leiset a avel a kimut kit talou dingin video call athat un ama jong nikhat jouvin ahinkho abei pai tan ahi. Alangkhat ah Lulun leh anaote jong apa lomgdamsa chunga lungna chima ka ding agot vang un Goverment thupeh dung juijin Doctor le nurse ho tailou koima along op ding aumpon ahi. Amaho ucha thum jong hiche nikhoa kipat chun hinkho thah amang un leiset a anu apa um tahih jong leh achena chan uvah KANGAIPEN KAPA, KANGAIPEN KANU tin Vangama kimuto ding kal galdot in nitin hinkho amang un ahi.
Moral :
” Phat pha le phat hoi inei sung un nu le pa mgailu ute”.
