Home Elkay Mate KANGAI CHULLOU ZOUZAM-III

KANGAI CHULLOU ZOUZAM-III

143
2
KANGAI CHULLOU ZOUZAM
KANGAI CHULLOU ZOUZAM

-Elkay Mate

Elkay Mate, kwc

Ollha nisim somni le ni jingkah matah ahin, kaemut nakom a eithoukhang dinga phat bih kakoi chu ahung ging tan ahile phalbi dap ahijeh chun tho ahahsa ma² jengin ahinla kakitep nalhon banga Zouzam toh kimuto ding kahijeh chun kangal lel pon, light kavah in chomkhat jalkhun chunga katouvin taona kamang in ahi.

Hichu jingkah lam nidan li ahin ah masa akhong in ahi. Keijong kathoudoh in mei katih in chuin kaha kanot in kakisuthengin ahi. Hitia kacha gin chu ka chunnu in ajah hintin, ahungthoudoh in naval Lou ham boi ol che hiu in eitin ahi. Keijong henu ahung kile ding kahijeh in kama chenlou boui ahi katin ahile aphai cha nahin om pih Inge atin keijong henge henu nehthei jong neisem peh o themkhat jong kakipoh ding ahi katin ahile henge atin eisempih tan ahi. Kanu nehthei sem tah chule hotel jong kanabol jeh un nehthei sem tamtah ahe in hijeh chun hiche nikho a Kanu nehthei sem chu kangai Zouzam poh peh teiding kanom in ahi. Chule kaneo a pat kham nathei bol le kisa ngol kahilou le insunga Kanu kapa sei ngai kahijeh in kanu le kapa chule ka u kanaote eingailu lheh in eitahsan lheh un ahi. Chule lekha sim a gampam a sot tah kaum jeh in in kahung pot a kaloi kapai toh kimuto dinga kakigot kasei chun koiman ema aseipon kanu in aphatchan hung kile in atilou koima aham poh jong aumpoi. Alangkhat a kajo ngaitah kapa keidia kaloi ngaitah tobang ahikit in ahi. Midang in apate akichan ahin keivang ema ase kabol Lou jeh in kapa kom a kadei kangai kakisei theiyin atmajon ama koma ipi kabol dingham tia kadoh jile keiho khangle nangho khang akibang tapon nalung thim in ipi asei ngaiyin lang bol in ahin nahet ding khat chu mi lungthim suhnat nading le jou kiti seihih beh inlang bol jong bol lou ding ahi tin eina hil jin ahi.

Kanu’n cha ahin om min in nehthei ahinsem chaitan keijong ka bag a nehthei themkhat kakihet in ahile kapa ahung thouvin kanehthei kigot chu amun boipu themkhat beh ne inlang chi in atin ahile keijong hepa kaneh dhe kaloiho adia themkhat kapoh peh got ahi katile oh chutiham achutile poh peh tang achuti tailou imacha dangla poh pih ding nanei pon atin ahi. Chuin kapan atoka sunga pat sum sanga ahin ladoh in chihi nanga dia tukum christmas le kumthah kah a nakiman chah nading ahitai. Nanao teni sum hol ahin nanaote ding jong ahol lhon ahin ahi hina a nakimanchah ding ahitai atin ahile keijong henge hepa chapang kahitapoi von thah jong kangai chapoi, kaute nin ahin nangho nahin lekha neisimsah uhi keidia akal val aumpoi. katin kipah tah in kakilah in ka sakgao a kakihet tan ahi. Hichun kapan jong ahung kisutheng in cha kadonkhom un kadon chai uvin kapan taona eihin manpeh in aman chaiyin kanun gari ol ol in tol inlang aphat chan in hung kile in atin keijong henge henu katin kahung Kipat doh tai. Jinglam nidan nga vel ahitan, kho jong avah hoisel thou tan ahi. Hi hun keijong phailang jon in kino thim tah in gari kahin tol in ahile Phai kahin phah chun pung get le keh ahitan keijong jonom sot louvin Checkon lang kajon paijin Nute keithel koma garineo chomkhat kakham in Zouzam ka call in ahile call ahin pick ngal in keijong kaum na kasei in ahile amajong alungdongin ipiti nachunga tukah a phai nahung lhun ham? Tua hung kikithou pan bep a atin ahile keijong nang toh kimu ding katha nom val a kahung lentho jeng ahie katile noptah a nahung di chula kei hoija kache chomding nahisah ham atin chuin ana um in kahung di ahie atin phone athat tan ahi. Keijong hitichun chomkhat kangah tan ahile phat chomkhat jou hin ahung peijeng in nungah khat toh ahung kilhon kamun kakom ahung lhun in nahung nahung nalom e uhencha Phaisung dap toh dukan bol ho no g kithou naipon te atin keijong henge kagel sanga kahung malhun e katin chuin ahile Zouzam nahin kilhonpi hi koi ham katile aman jong kanaonu Ngaiching ahie atin chuin kei injong Ngaiching na u sanga nanu ngah tah hila katile anuiyin hichun chibai kakiboh lhon in Ching nau in nang chu afel a fel ahie atichula kagah tile kei sanga ama feljoh ahie atin hichun chomkhat kagah dai in ahi.

Hitichun gari neo kakham un dukan koma kadalha un kihoulim toh walking toh tho in adaplheh vangin lampia chun kahung phei un ahi. Hichun phachompi kahung pot un hichun kahung kile un lampam a sa kijih na kahin phah un bongsa kg2 kahin cho in ahile Zouzam teni ucha adaplheh in chuin kahin la nah nah in a inlam u kahin jon taovin ahi. Keijong ka garineo kahin lapa in amani nung kahin jui in a gate sungu kahung lut le kakin jengin kiphatlam Nan kadim tan ahi. Inpam a chun Bolero akang akinga in akoma Swift Car khat jong akingan chule Activa honda jong akingan ahile a in compound sung ujong pahcha phatah in akitu in anop dan chu a insungu lut ding Jong kajah acha tan ahi. Hichun keijong Zouzam koma nao kahung hi Napa le nanu in amah louding hinam katile kanule kapan insung nahung lut lut chu interview nabol ding ahi kigingin atin eidaiyin ahile anaonu Ngaiching in ima tiponte uhencha ahin ka in uva ka u in aloi ahin puilut masat pen nang nahi nalaiye atin ahi. Ngaiching thusei chu ka nervous cheh cheh jeing chuin in kalut ule Anu ana kithou tan hichun a insungu chu anop lheh jengin touna hobjong sofa ngen ahin, hichun anun boinu hoija nagache lhon ham chule nang namin ipi ham boi eihin tin ahile Zouzam in henu walking a kagache lhon ahie amahinkau hencha ahin Tengnoupal langho ahie khatvei langa kasei chu nahet a tunile von kichoh a kache got u ahie amajong akho uva pet hunga an nehchaile bazar a kanaotoh kache diu ahi atin chule kahin sachoh uchu avetsah in sa jong ahin cho e henu atin ahile anun jong ipi khohtah a sa nahinchoh nah nah uham atin ahile Ngaiching in henu kisei a nomlou, tuitah in hin hon o ipihile tuni chu sa ineh diu ahitai atin cha na om hitam Ma atin chaksang lang chu ajon tan ahi. Hichun keijong kaneh theilou chu kahin geldoh in Chingnu nao nehthei kahin po kanun asem ahie cha toh me in katin kape in ahile wow it’s gonna be fun today atin kipah tah in an hon nalam ajon in keiho jong katou taovin ahi.

Zouzam jong a room sunga alut tan keile Anu bou katou lhon tan ahile kakichat chat chu ahung kipan tan thusoh eihin dong pan tan nakhomi u ipiham boi chule napa min ipiham chule ipi na atoh ham? tin aban ban in thusoh ahung kipan tan keijong kanu le kapa Thinglhang natong ahin kakho min u chehlep ahie katin aban ban in kahin donbut tan ahile Zouzam pa toilet a che chu ahung kile in kakihou lhon chu angaijin ema asei pon ahile athipchet chu kakicha cheh in ahi. Hichun ahile boi nang in ipi nabol ham lekha ijat Nasim hitam atin keijong Delhi University noiya Political Science Honour a graduate kachaiyin aban master simding kangaito ahin tupet hin imacha kabolpoi katile apa ahung touvin hmm atin namin ipi ham boi atin ahile hencha ahie hepa katile amajong Political Science nalah chu aphae coaching ho la inlang civil services bol in atin ahile kinjong henge hepa keijong hichu kadei ahin kajo ding hinam katin ahile pasal in bol tange itile ipiti kijo da ding ham atin chule Zouzam jong Geography alah ahin ama Jong hi Civil service thanom ahin graduate ahin chaile delhi a coaching alah a exam abol ding ahi atin ahi. Ahile Zouzam hotoh ipiti nakihet uham atin kagah pao masangin Ngaiching in Ma cha amin tai atin nehthei toh ahin choiyin ahile Zouzam ahunglut toh akitoh chet apa thudoh kasei got chu aman ahin man tan in masanga Tengnoupal langa kaloinu Chonghoi ute ho ahie hepa atin ahile aman jong aban ima aseibe tapon cha kadon u ahile apan nehthei chu koi in nasem uham Chingnu nang sem ham atin ahile aman jong ahipo Pa kau hencha in ahinpoh ahie atin hichuba hinte atuidan chu achombeh e atin ahile keijong kanun asem ahie hepa katin ahile nanun nahin pohsah na atin henge katile ama Jong nangho pi hi phatah a kihedan nahiu bahi la atin ahile Zouzam in umm atin ahile kabon un kanui un ahi.

Cha kadon chaiyun Zouzam pa in chess nakichep theiyem atin ahile keijong henge katin ahile Chess ahin ladoh in Chuin in Chess kakichem lhon in ahile Zouzam nun kin an hin hon Inge atin Zouzam jong akithopi din alut lhonn in Chinngn in uhencha kapa chu Chess kichem jing ahie chingthei tah in kichem in atin ahile keijong ivet tah Lou ding hei katin ahile apa na confidence thouve atin kaakichem panlhon tan ahi. Kaginchat sangin Zouzampa mipha ahin officer ahivangin kiletsahna ima cha aneipon kalungthim in kakipah lheh in Zouzam in hitobang pa phatah anei jeh a amajong aphat ahi phaatah in akillang in ahi. Chess kakichep lai lhonin call ahung jin amanjong “Excuse me” atin call apick jin English paovin apaojin ahi. Hitichun kakichep chep lhon le hoilang langa pat call hung ham kakichep lhon asuboui thouvin ahin. Hichun checkmate kapeh le amajong alung dongin, kaginchat sangin nathem nabouve atin kakithah chep got lhon le an amin tai an kinehdoh hiote keijong kapot nading aume tin Zouzam nun ahinseiyin ahile Zouzam le Chingnu jong an ahinsemin an kane taovin ahi. An kahin neh chaiyun Zouzam pa Jong nangho hoilaiya cheding nahiu ham atin ahile Chingnu in keiho bazar a kache diu ahie. Hepa jing le thai Christmas holita dinga von neichohpi lou ding ham atile kahung kile phatle gache nao hite atin ahile Chingnu in Pa nehthei choh nading neipe o atile nanu koma ana kilah in atin ahin Zouzam in ima aseipon ahi. Zouzam a ham beh pon a hindan ivetle mi unu ahi keo hilouvin mi kamtam behjong ahipon ahi. An kaneh chaiyun Zouzampa akigongin office a achetan ahi. Achekon in nei nga jou ule neina ngah un tuni last day ahin kahung kima le ditai atile Zouzam in hepa chenading chom jong kanei uve atin ahile apan Naham dan uhi nei na ngakai pouve atin gari a thouvin apot tan ahi.

Ngaiching in uhencha kei kaloiho khat hung ding ahin Anjou lamle bazar a kimuto tao hite nang ni ana chimasan atin hichun keile Zouzam jong Paona bazar langa chedin auto kahin manlhom in kahung lhontan ahile Zouzam in uhencha tuni hi ipi choh ding nati ham atin keijong nang in nadei dei kachoh peh ding nahie katin ahile kadei dei na? atin henge katile kin kadei chu nang atin ahile ijat neipeh ding ham katin ahile amanjong naman ijat ham atin keijong kaman chu neilungset le free ahin achung chon a lifetime warranty katile kalungset e atin hitichun auto chunga nom tah in kahung kihoulim lhon in ahile chomlou kah in last stop kanalhung lhon in hichun paona bazar kahin Jon lhon tan ahi. Christmas kon ahijeh chu mi atamlheh jengin keini jong kakhut lhon kakituh lhon in hitichun Kingailutah a bazar a kava lhon chu anom lheh in ahi. Mi atam val jengin chule ipi choh ding ham jong kahechom lhonpon hitichun chomkhat pi kava jou lhon in Keng koh kijih namun khat a kalut lhon in amading Keng koh kahin velhon in ahile kengkoh khat adeiyin hichu kahincho lhon tan aman kapeh le anom pon kapan sum wipe nai nang sum kikoi tup in eiti in hichun keijong Zouzam nakeng koh chu kachoh joupen ding ahijeh a kasei chuo katile aman jong achutile Anjou langle kadei khat neichoh peh in atin keijong henge tin kahung phei kit lhon tan ahile sangkhol lum kijoh nakhat a ‘Queen, King’ kiti sangkhol pair a kijoh chu kahin kichoh lhon in chomkhat kichol hite choh ding jong aumpoi tin kahung phei lhon in park a katou lhon in ahi.

Keijong nao keiho kholanga christmas mang in hung ngap o christmas mangkhom lehen nop ding ahie katile amajoh in nangjoh keiho koma hung mangin ajeh chu kei numei kahin nangho kho a kahung dingchu ka nule kapa in eiphal lhon louding ahin nangjoh hung mangin atin ahile keijong seiding kahepon ahi. Henge naseichu keijong kanom e nangtoh manlhom ding kanom e nao ahinla nanu le Napa in agelkhel ding ahijeh in tu tadia hi hiti hin mangcheh taite na katin ahile amanjong henge achuti dingdan ahitai atin ahi. Hichun akhut katuh in Zouzam nao ven ikihetna naicha hijongle kalungthim ah vang nang kamu nia pat kalungthim a onglai abangin kalung Mong lheh e katin ahile aman jong keijong hitobang chu kahie uhencha atin kakoma ahung kingai in ahi. Zouzam janlhah a tunile kasei dhe nati chu seijin angaidia gonsa kahitai katin ahile kamai ahinven akunlha kit in ahile amaijouse asam in akhu in ahi. Hichun keijong asam chu olcha in kahoidoh in “hung kiheiyo Zouzam” tia la kasah le ajahcha in ajachat man in aluchang in ka-op tah ahin tat in ahile kei injong chuti hih o anjoule kalung tat keh kha in nate katile ahung paovin hoilang lang ipi naseidoh hitam nang kom a akium le thil thah thah kijajingin anom e atin ahi. Kinjong chance kala in thil thah thah nahet be nom em katile henge atin achutile lungneo hih in ikichen teng thil thah thah najil ditai katile ikichen masanga kahil nom ahi atin hitichun thutam tah kasei doh lhon in ahi.

Keijong park a mi dang ho umchan chu kave lele in ahile Zouzam in Namit singin ahin tin ipidia ong kamit kasin katile numei dang navego e atin keijong kanuijin chuti ahipoi golhang nahin ve ho kavetsal ahi katile Namit singin kati ahie Namit singin atin chuphat in keijong ahile katin mit kasing tan ahi. Chuin nakhut hinlan atin kakhut teni atuh in keijong ipi nabol got ham katin ahile paohih in nakam tam e ka nervous e atin keijong ahile katin kapao tapon ahi. Hichun ahung kikhen naiyin kabil kol koma olchan janlhah a kasei nom ho chu kasei got ahi phatah in ngaiyin atin ahi. Keijong henge hinseiyin katile aman jong ol tah in uhencha tua kasei got thucheng hi mitam tah dingin imacha hihih jongle keidia kahinkho a apat na le achaina dia kasei ahin lungset tah in kakinep nale kataona ho hi neimolso peh inlang kadoh cheng lungthengsel in neihin donbut in atin ahi. Hichun keijong kakha kasudet det’in henge katin ahi. Hichun thudoh eihin neipan tan amasapen a eihindoh chu ahile – neikichenpi ding hinam atin kinjong henge kichenpi dia kakingaipi nahi katile aban in ikah lhon in bouina tampi hung um jongle thina tailou keitoh kikhen loudia nanop hinam atin ahile henge Nao nangdia kitah tah a pangjing ding kahi katin ahile hichun ajo napen a kasei nom chu ahile atin aban asei tapon keijong ipiham sei in nathusei kajapoi katin ahile hung kikhen nai hiu in atin keijong kaki khen naiyin ahile ka kol kom cha in I love you uhencha ahinti in ahile keijong love you too kagah tile kana ha sei hiu dan hintin kakam ahinsim in ol pao in min ajahding ahi atin ahi. Hichun keijong kaha thei hitam katin ahile henge atin hichun kahung hahdoh in ahi. Kahinkhoa kamit ikisin sah a thudoh eikidongmasa pen ahitai katile aphai kadoh chengse kakhut natuh a nakitep ahin itih chan hijongle nasuhmil lou ding ahi atin kinjong Sumil ponge neisinglel hih in katin hitichun katou lhon in ahile call ahungin Zouzam in avetle Ngaiching ahin hoilaiya naum lhon ham tum in a kahung kipatdoh e ahin tin keinininjong henge kana ngah lhon e nahung lhun teng neihin hetsah lhonin tin hitichun katou namun lhon a katou lhon in ahi.

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleWHITHER THE KUKIS?
Next articlePATHENIN AMA KIN BOL DINGA NASEM AHI

2 COMMENTS

LEAVE A REPLY

Please enter your comment!
Please enter your name here