Home Thilha Thusim KANAONU DOLLY

KANAONU DOLLY

305
0

Thilha thusim

Story by -Lelen Kipgen

Kanaonu birthday nin kapu in Dolly khat present in apen ahi. Kanaonun jong dolly ijat anei vangin a-birthday nia kapun apeh dolly bou chu adeiyin, jan teng a-imut phat jong le akom a a-imut sah ji’e. Hiche dolly chu mihem bangin abol jin, aloi bangin ahoupi jie; amin jong ‘Dolly’ tin akou jin ahi.

Kanaonu hi chapang cha ahi vangin room chom a achangin ageh jin, kei jong room khat a kachangin kaimu jin kanu le kapa room chom a a-imu ji lhonin e. Ka-in uhi veng pam lang ahin lhanmol toh kinaicha ahiye.

Kapu hi tehse ahitan, kanaonu birthday present a dolly apeh jou lha gup(six month’s) jouvin anatna umlouvin phulou helouvin ahinkho abeitan ahi.

Kapu ahinkho abeijouva kipat chun kanaonu chu agong cheh cheh jengtan, sun le a-imu nilhum lhum jin ahi. Chutia asun imut jing phat chun kanu le kapan “ipiti nahim? nadam lou ham?” tia adoh jing lhon vangin ima aseidoh thei pon, aumchan vang chu ipi hamkhat seinom a seithei lou bang khun aum ji’e. Kanaonu room le kei room chu kinaicha ahijeh chun jan leh aroom a ipi hamkhat husan kaja jingin, “kanaonu hin ipi hamkhat abol hinte,” tin donse injong kaneipeh ji pon ahi.

Hitichun phat ache chen lhakhat lam alhingtan, nilhah seh le kanaonu room a husan(thilgin) chu kaja jingin, jan seh a kajah phat chun kalung anomthei tapon jan khat hi “ipiti mong mong ham?” tin thimvet ding kahin gotan ahi. Kanaonu room kot chu ahom neocha khat aumin hicheva kon a chu room sung neokhat bou kimu thei ahi.

Jan nidan12 vel hin kanaonu room a husan chu kahin jatan, keijong thimchan kathouvin kanaonu room lang chu kanai pheiyin ong-hom neokhat akon chun room sung chu kavetan ahile kanaonu chu jalkhun chunga atouvin, mikhat toh tangkhap(pillow) a kisepto bangin aum lhonin, tangkhap a amasang chu ase ji le ama jong ahung kile se ji in, kavet na ong hom chu aneo jeh in akichep khompi pa chu akimu theipon ahi. Chuin kanaonun kipahtah in nui pumin “Dolly, nang naum hi anom val e,” ati le light ho ahung phe jep jep in chuin phulou helouvin kavetna ong hom a chun mitchang alet a len khat hin naicha a invet kamu chun kakin valin ka room langa kajamlut in, pon kakikhu khumin jan khovah in imu thei louvin kaum khovah keiyin ahi.

Ajingin kanu le kapa koma kaseile eitahsan lhonpon, kanaonu adoh lhon jong le ima katipoi atikit in eitahsan lhon lou phat chun ima kaseibe nom tapon ahi. Kanaonu vang chu agong cheh cheh jengin natna khat nei hile akilomin atahsa jong vet thei ahitapon ahi.

Chutia atahsa jong agop cheh cheh phat chun kanu le kapa jong alung dong lhontan, amanin jong velkhat khat le kanaonu room a husan chu ahin jah jap jap lhon phat chun alung lhon adongtan nikhat hi Kol Thempu ho vetsah ding ahinsei lhontan ahi.

Hitichun nikhat hi Kol Thempu ho koma kache taovin ahile Thempu hon jong aveuvin, chuin Thempu khatpa chun kanu le kapa jah a “Nachanu birthday nia apun dolly apeh chu agan a gang’a thu toh kitho’a meiya igovam’u ngai ahitai. Achuti lou le nachanu hinkho hi kihuh joulou ding ahitai. Hiche dolly sunga chu lhagao phalou lut a jan seh le nachanu akicheppi jia, ahinkho suhset tei agot ahi. Tu mama a icheuva, tu ma ma a ibol’u ngai ahitai, achuti lou le ivaigei khah diu ahi.” Hitia aseiphat chun Thempu ho toh agang gangin ka-in lam’u kahinjon pei taovin ahi.

In kalhun uvin a room sunga chun phui asam uvin, insung suhtheng na anei uvin chujouvin kanaonu dolly chu meiya kagouvam un ahi. Hiche nia kipat chun kanaonu room a husan ima jong kaja kha tapon, kanaonu jong atahsa ahung kido doh in masanga bang bangin adamsel tan ahi.

THE 🔚

Previous articleNUNGAH KHAT KIKHAI LIH NA MUN!
Next articleHEPA NA MANTAM E-I