Home Lahkhom KANA KALSONG’E -I

KANA KALSONG’E -I

122
1
KANA KALSONG'E
KANA KALSONG'E

KHAAL TWI THENG
presents

(THUSIM-1)

Arrange by: St kuki
(7085383639)

HETDING: Hiche thusim hi keiman lunggel suhto a kahin jihkhom ahin, isim sung uvin ageltoh anakop ute.

“Leiset khang adia gal lenpen nina(2nd World War) khang 1945 chun eiho ichen nau Manipur sung jong british ten analo tauve. Hiche doudal nading chun keijong einam adin gam leh go huhdoh nading gelnan sepoy in kana pang’in hiche phat sung chun German ten amaho gamma din kithopina ahin ngaichauvin manipur lengpa thupeh nadungjui chun keiho jong agakithopi ding phabeppi kana kuondoh tauve.”

Hiche phat laichun German te jong hahtah a British te toh ana kisat ahiuve. Hijeh chun amahoa kon thupeh khat kamu uchu “keiho lang gal ijo pou-pou uleh kahung kithopi diu ahi” tihi amaho kihahsiel na khat ahi.

Hijeh chun keiho jong chenna gam thinglhang gam dalhan agakithopi ding chun ahung kilheng dohho lah a kana jao tai. Keijong kana kal suong’in Germany chan lhun nading chun huikong a eihung latauve.

Hiche mun Germany gam kaga lhun uchun, amahon jong kavon diu leh kachoi diu meipum hou jong eipe uvin gal sat ding chun eino lei tauve. Hiche phattah chu British hileh America sepoy ho kitho khom laitah anahi.

Keiho lah a alamkai ding chun kalah uva atah pen pu otkhokai chu ahin lhengdoh tauve. Ama gal lamkai nachun keiho chu kahung kivaipo uvin gal munlang kahin jon tauve.

Galkhoh nalang mun kahin jot uchun German truck convey thumma hung kitol kahiuvin gal khoh nalang mun kahin jot uchun, hetman loukah chun gal akon chun British sepoy ho chun amanchah u ahoi theijeh chun artillery machine mangchan kahung tou nau truck convey masapen chu ahin kap pohkeh tauve.

Kajot nau jong lhung mannai louva hitia ahung kipat pei kit phat chun keiho jong katou nauva pat chun kachom lhauvin blank fire kamoh bol jing tauve.

Ei thinglhang mi ima helou lai akihi jeh chun thilsoh hochu kavet leh tijat leh kichat kakop jing tai. Hinlah ahung kuon doh kahi tahngal jeh uchun ka lamkai diu pa chun op uvin ahintin lamlhang nala lah’a chun kachom lut loiyin keijong kalu kasip in thalcha kap thei talouvin kachuti kisip tai.

Hichun kachung vum uva thal ahung leng mat chet jing’in gal akon chun British sapkang ten automatic thal ahin lha jing tauve. Hijeh chun keihon panmun dettah kakisem thei tapouvin athi amang kahung umjing tauve. Hitia chomkhat setpi idip kidopma akium jing phatnin phat jong anagei sang tan, nilhang kei daplai kumlhun kon ahijeh chun kho anajing mantan, khojin changeiyin eilap dan tauve.

Kho ahungjin lhah phat chun thalgin jong ahung thip jep tan, keiho din neokhat jamdoh nathei ahung hitai. Hijeh chun keiho amun munna umcheng chu German sap holah a khat chun “Retreat” kiti khat ahin sap jing’in keihon ipi kiseina ahi chu kahe pouvin hinlah keiho lah a lekha themjep tia keiho lamkai ding’a kilheng doh Onkhokai chun ahung kinung khin uvin ahin tiphat chun keiho cheng jong kang-kang chun, kakinung thol tauve.

Gal lai ahivang chun kichol na phat tobang’a jan ho dung’a thal gin thip domma ami ami cheh’in ama-ma panmun(bunker) cheh’a themkhat beh anneh, twi don abolji mong ahi.

Hiche phat kah lah chun keihon jong kajot nadiu mun lang lhun ding gottei nan kahung kisukhom kit uvin sunkah a anathi ho chu truck a kahin heng doh uvin janthip kah chun kahin jampi tauve.

Nah changsal chun kajot nadiu munchu kalhung tauvin, keiho lang seh-seh a buoi ham kiti chu kalhun nau mun chu ana khoh sedeh set kitnin, kalhun uvin amaho lah alamkai khat chun, “ibola nahung hiti gei uham?” tichun eile themmo uvin, hichun keiho eihin lamkaiyu German Colonel pa chun asap pa jah’a kahung nauva lamkah’a buoina kato houleh, ijakai ahung thiden a atahsa/athilong hinkipo ho chu avetsah’in ahilchen jou chun, keiho lang ahin ngan kajah uva, “tunin veuvin galkhoh lai ahijeh in nang ho jong chingthei tah’in um unlang gal umsung’a nomma kichol thei kahipoi” tihi geldoh jing uvin eihin tiuve.

Gal umlai leh kigin jing dia umding chu eihin seipeh uvin, chomkhat jouvin keiho jong kapan mun nading lang uchu kapum mei kakimat uvin kache tauve. Kagalhun uvin nasatah in kikaptona ana um jing tan, america leh british kitho ahung hitah jeh chun ahin hano lheh jing tauve.

Kei jong bunker sung’a kaop in thalcha kap ngam talouvin kakisip den tai. Hinlah kaloi kahin kilhonpi ho chun athi ho chu akhel uvin nasatah in akikapto tauvin kah lah lah leh bomb ahung kilhah jing jeh chun dadoh ding jong tijat umtah ahitai.

Hjtichun keihon jong kaha lethuh jing uvin, jingkah, nilhah, sun khen louvin kapang tauve. Kahung kikap nau leh gal kibolna ahung sot thoutan keiho panpi lang German te chu ahung nop cheh cheh jing tan keiho mi sang som thum kakitol doh uchu amoh cheng ahing nalai mi sang khat jong kapha tapouve. Hitia ahung kinop peh ding phat chun keiho lah’a lamkai Onkhokai komma lunggel kasei khom uvin, “hiche hi kijou tapon te kithopi na akimu jou kai tapoi” tichun lunggel kahin nei sousou tauvin aguh a jam doh ding chu kahin ngaito tauve.

Europe gamsung’a kium ahitah jeh chun ima hetna akinei pon, kaum nau gammang lah’a pat chun kahung kipat doh uvin kahung thim jam tauvin asun ajan chun gammang lah lampi um nalah chu kahin jot jing uvin lamkah a ima netalou vin kahai kham-kham nadiu twi kahin donpa jijiuvin, hitia hahsatah a kahung lamlhah jing lai uvin nikho phabep ahung che mantan achai nakheh in twipi pam lang khat hi kaga lhung tauve.

Hiche twipi pam kalhun uchun lunggel aban nading dang umlouvin kakimoh vetden to tauve. Hinlah lunggel thuh tah ahung kineiyin keima ho dol kham ding kuong(jahas) kahin sem tauvin ni phabep jouvin kahin jou tauvin twipi chung’a lampi helouvin twiyin eihin nono nalang uva kahung peh tauve.

Hitia athi anang’a phatsotpi anneh twi don umtalouva kho helouva kuong sung’a kakijam den uvin, twi chun eilhoh phei+ nalang ding chun kaum tauve. Hitia ima cha nelouva akium peh phat chun kathau ahung lhasam tan, thajong kanei tapouve kakho hetnau leh kamit kaha sahsah theiyu bouchu ahitai.

Hitichun twi chung’a lam kahin jot peh jing tauvin ahile phatsotpi chu ana chetan, kakuong uchu ache be tapoi. Hichun iti hitam? tin thaneilou sunsunin kadah doh uvin kavet leu muol pang khatna kana kinga tauve.

Twipi kinong chun moul leh lhang hetphah lou nakhat na eina lhut tauvin keiho jong kahung khah uvin kavet lele leu koima kamu chom deh kit tapouvin hichun keiho jong katha nei sunsun uvin kahung toi tho jing tauvin thingphung lim nuoi khatna kakichol uvin , anneh twi don umlouva nikho tampi twi chung’a kahung lamlhah jeh uchun kathau achao ma+ jing tan, anneh twi don ding ngai chan thingphung nuoiya chun kakimoh jam den tauve.

Ajeh chu hiche twipi hoa twi chu kidon thei kit lou chuleh neh theiya kimu thil khat jing jong kimujou lou ahitai. Hitia anneh twidon umlouva kiella thiding kahiu tam? tia inlang ngaiya kaki lhangai jing lai uvin, vangphat umtah’in akidan nakhat chu kakichol nau gal jep lang achun mi phabep ahung chu kamu uvin hinlah keiho chu koima apeng but jong kaum tapouvin kamitna kaga muphah ham-ham uchu ahitai.

Kamit jong ahah but behseh tapon, kakhot bou chu kajap lele thei nah+ in ahi. Hiche mi kamu hou chun kamit keiho komlang ahinjot phat uchun keijong kho helou chun ka-imu lhutai.
Phatchom khat ache jouvin kahung khah doh leh kaum na chu thingphung nuoi hita louvin bi inna kisa insung khatna kana um chu kahe tan akikhe lheh’e lel sasan kathou doh’in lungdong tah’a akiman chah hou kavet jing leh alah uva chapang khat chun eihung mudoh’in eimu mu chun polang a alhei doh jellin tehse pu khat komma amaho pao chun, “athou doh tauve” tichu report ahaosa pu kom uva agapeh dan anahi.

~to be Continued ..

Aban teng, “khosung mite kithopi najalla inlang kahin jot theiyu” ina simkit diu ahitai.

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleSukte/Pawi Gal in Haokip Bulpite Khopi CHAHSAT Meiya Ahalvam
Next articleKAHIN NGAI LE KAHIN IT VAL-IV

1 COMMENT

Comments are closed.