Home Lahkhom Naocy Haokip KALAIGIL GA-I

KALAIGIL GA-I

136
0
KALAIGIL GA
KALAIGIL GA

(Heart touching story)

Minun acha angailutdan

Arrange By:- Naocy Haokip

Kapa S.Lien MLA ahung hijou kum thum ho bep ahinalaiyin kei le ka-Upa Gogou jong metric exam hoitah in kahin chai thei lhontan, rank sangpen lah a jong kapang pha lhonin ahile kanu le kapa chun eikipapi mama jeng lhonin ahi.

Kanu Tinnu hi social worker khat ahijeh-in aboi jingin nomin jong kaum khom manji pouvin, anneh pet, jan ihmut kah chubou kanu le kapa toh kaum khomnau ana hijin ahi, kum 15 bep chapang kihi jongle selepha chu akihetan, kanu hi miphatah le numei nunnem tah ahin kapa hi kam cheng khatbeh a jong anel jilou ahi, hijeh chun kapa injong kanu chu alungset lheh jengin ahi, ka-Upa Gogou jong gollhang mai mai ahitan, phat tamjoa kanu le kapa toh kaum khom theiji lou jeh chun ka-Upa Gogou chun eilungset lheh jin, kachena chanin eichepin eikivoppin kalungnopmo ding aphalji pon ahi.

Kapa MLA ahijeh ham ipi jeh ham vang kahepoi, haosatna langa chun kahaosa mama jenguvin neh ledon ho jong atui a-al jeng kaneuvin, hijongle kiletsah tiho chu kabol pouvin, school sunga kaloihon jong eina ochat mama jiu ahi, hijongle kei le ka-Upa jong kiletsah louhel’in mi jouse toh kakivop ji lhonin agenthei behseh, tichu school a admit card kilahdoh joulou mi ijat ham kakithopiji lhonin ahile mi tampin eingailu lhehji lhone.

Kapa jong atohna a agamsung mipi hon apahcha thei lheh-un, kanu jong chutiman kiphal theng tahle kipumpeh a gamsung mipi dinga na atoh lhon jeh chun mi jouse seiphat achang jing lhonin ahi.

Ka-Upa toh metric exam kajo lhon phat’in college ka join pan lhontan, chutia college life ahung kiman pat phat chun ka-Ugou chu aki gollhan sah lhehtan, nungah dang dang loi le gol akilhenin kei chu eipuile ji vangin college sungin eikivoppi ji tapon ahi, chutia ka-Ugou toh kakivop lou phat chun midang numei pasal college kakai khompi ho chutoh kahung kivop jitan ahi.

Chutia kakivoppi ji ho lah a chun keiho classmates hilou asangjep lang ho mi khat jong keiho lah chun ahungjao jin, kaloi dangho toh akihou jiuvin ken vang kahoupi khapoi, ahin kahung kivop sot jep jep phat’uvin adang jouse sangin keitoh kahung kihavop jo jitan, eisanga class sangjo hijongle college sunga chun gol khat bangin kakivop jing lhone.

Umna ho kakidoh to lhon le koidang hilouvin kei ho venga chengho mama anahin, ka inu jong kenga chephahna muna um ana hiuvin ahi, hijongle kei chu amaho ina kache khapoi, amajong ahung vahlut khapon ahi.

Phat ache jingin ahile Usiemboi te jong mihaosatah khat ana hiuvin, amavang ucha pasal li jen hiuva numei neiloute ahikit uleh, Usiemboi hi aneopen chunga ahin, apa chu sepai officer lentah atuh ahi, Usiemboi Upa pasal ni chun ji anei lhonin government natoh neicheh ahijeh-un munchom cheh a posting ahileu Usiemboi le anaopa Lalboy toh anu le apa toh bou umkhomu ahi.

Chutia Usiemboi le ka-Ugou toh nomtah a khosuh khosah helouva nomtah a kakivop jing laiyu chun Usiemboi apa chu Agartala a posting din aumtan, abonchauva achetei diu ahung ngaitan ahi.

Chutia Usiemboi le a insung mite Agartala a achedoh phat’u chun thomhao tah-in ka-Ugou toh keini bou chu kahung kivop jing lhontan ahi, ka-Ugou chu akham khama aki gollhansah tah jeh chun phat tamjon nungah hotoh akivop jing tan ahile kei chu kaloi ngaipen Usiemboi la aumtah lou jeh chun loi beiyin kaumji tan ahi.

Lunghel tah a loi beiya kaumji jeh chun kati anom theiji pon, bu jong kane nomji pon, kaloh asohjin, imacha kabol nom him him pon adamlou bangin kaum jingin ahi, hinla chapang kum som le gup (16yrs) ho bep akihi nahlai jeh chun lunghel jeh a hindan nomlouvin bou kakigelin kanun eiumpi teng kaphadomjin ahi.

Phat ahung che jingin lha nga (5 months) ho ahitan, katahsa kahindan anom thei tapon, hijongle nisehle ka-Ugou toh college a kache jing lhonin ahi, college sunga chu lekha hethei tahle mi seiphat pen kanahi jing jeh chun ka teacher hon jong eilungset theiyun eihomtho thei lheh-un ahi.

Ni khat hi college a che dingin kakigon kavon college uniform chu kakivon le aneojep tobangin kahen, athao la kahipon ka-oi chu apoh jep danin kahen, ka-oi kakhoi khoi le ahung chat jap jap’in ipi ahijong kahepon alang khat’a kakichan ahi.

Katahsa hi ngouset’a gong thim kahin, ka-oi jong pasit set jeng ahi, chutia niseh a ka-oi acha cha jengji phat chun kalung athi thei tapon jan ka-ihmut nop lai lai jongle ka-oi ahung chatjin ihmu mon kakhang jitan ahi.

Hijeh chun nilhah khat kanu ahung vai lhunin kanu komin:
Henu, ka-oi sunga ipi ham alum khat aumin achat chat jeng jie, katile kanu chu amit koujap’in ka-oi chu athamin jing le hospital che hite, atin ahi.

Ajingin hospital kache lhonin ahile doctor nu chun kei polam’a eisoldoh-in kanu toh amani bou aum phat’in kanatna ho chu asei lhonin inlang kahung kile lhontan ahi.

In kalhun lhon phat’in kanu in ka room a eipui lut’in thu eidongin hitin aseiye.
Kanu: Boi, ipi dinga hitia nakisah jeng hitam? Nanu napan hitia umdia kana gelphah lhon lou chapang nahi nakihet lou ham?

Kei: Henu, ipi kabolkhel um ham? Bolkhel kaneile nei ngaidamo.

Kanu: Boi, tua nao navop ahin, nao navop hi koicha ba ham?

Kei: Kakap tan kichat tijat toh thon kadip alhan “henu, ipi tia nao kavop ding ham? Ji jong kaneipon, pasal kiti toh jong kaumkhom kha poi.

Kanu: Ibol’a jouva nei lhep ham boi, ken hitih chanin nang kahin jou lhep khapoi, aboi thei thil ahin aboi masangin koicha ham neiseipeh-in, kichensah ding hijongle nakichen doh diu ahi.

Kei: Henu kahe mong mong poiye, itih a pasal toh kaum khompoi, jou kaseipoi henu kahe poi, tia aka toh kanu kakol’a kasei jeng phat’in kanu jong alung dongin ahi.

Kanu: Boi, kalung akhame, napa hin hinhedoh le inucha lhona ipi eilo lhon ding hitam? Napa hi milunghang theilou ahin alunghan khah ding kakichat ahi, napa alunghan le kho amuji poi, amatkhah khah thilpha asoji lou ahi.

Hitia kanu toh lunggim le lungdong tah a kaum lhon laiyin kamaiso lhon lhai theilou chu kapa in ahin hetan.
Kapa: Nang ni nucha tukah hi ipi nati lhona mailhai theilou nahi lhon ham? Ipi ham nalung himona lhon.
Kanu: Imathu ahipoiye Ulien lungnom tah-in natoh ding kitoh jingin keivang phat chomkhat hi natoh ka-ngah a kakicholdo ding ahi, kalel behseh-e.

Hitia kanu in eilungset val jeh a thuguh a im Im jong chu dih akisa kit tapon nao kavop kahetdohna lhon hapta khat jouvin kanu in kapa seipeh ding ageltan ahi, ahin kanu in kapa hetding chu akipalou dingdan ahen akichan alou theilouva seipeh angaitah jeh chun aseipeh dingin kei komin jong aseitan ahi.

Nilhah khat kapa hung vai lhunin kanu in phatechan analem’in, kapa jong akipah lheh-in kapa lungdam le kipah a aumphat chun kanu in hitin aseiye.

KANU: Ulien thil khat kasei thei ding ham?
KAPA: Seiyo Tinnu khat bou hilou nadei jat jat seiyin, chateni Gogou le Boinu hoiya um ham?
KANU: Boinu room a aume, Gogou ball kichema che ahi, Ulien lunghan nan vang sang hih-in, kalung boina hi asangtan nakoma seilou thei kahipoi, naji kahin chate hinkho nakom tailouva seina ding kaneipoi.

KAPA: Tinnu ipi thu ham? Boinu damlou dan ham?
KANU: Henge! Boinu adampoi, nao avop’in lha nga ahitai, doi le kao bol hikhat ham ajipa koi ahi kadohle ahe mong mong poi, ajou asei ham tia kakhol jongle ajou poi, diary a athujih jouse jong kasimin amajong ngol go leu ahitai.

KAPA: Ohh! My God this is unbelievable tin insunga konin apotdoh tan ahi, jan anneh phat’in jong ahunglut tapon achangin car atol’in hoilang ajot ham jong kahe lhon tapon ahi.

Kahinkho chu kagel le kakideimo behseh jengin kanan bou hinkho kamang tan ahi, koi pasal toh itih a kaum khoma hitia nao kamoh vop jeng ahidem! Tia kakigel gelna chun ka-ngoldoh go tan ahi, kanu in eilhemin boi, kap kap datan ipi chu hijongle napa hin ipi ahin sei ding ham, napa kamcheng ngah mai tahite, keijong hi itih a napa kamcheng hi nel khalou hel kanahi, kum som thum lang kakichen lhon tah vanga napa thu kanel khah lou ahi.

Koi cha koinao ba hija hitia micha chunga khotona beiya kichemse ham? Boi, nachihna, nathepna, namelhoina ho jeh a nahin velel hon doi le kaova nabol jeh a koicha ahi nahet lou ahi, lungneo hih-in, thunin thudih kihe hih jongle phat khat teng hung kihedoh nante, tin kanu in eilhamon jin ahi.

Kapa in ipi ahinsei ding ham tia dip kidop puma ka-nga jing laiyun, jingkah khat chu insung common room table chunga sum lom khat ahin seplhan ve jong eive louvin

Tuni le abortion anabolpeh tauvin, apa koi ahijong kihelou, sumangun,” tin hichan bou chu aseiyin anungjui ho toh inauguration program adin achedoh tauvin ahi.

Kanu in eihinven akap’in keijong hitih chanpi genthei tamtah thoh a kivop dohta ahe ding jousen hekit ta, abortion bol ding chu kagel thei mong mong tapon, ka room a kot kakikam khumin lhasetah-in kakap tan ahi.

Chutia lhase tah-a kaka laiyin kanu in kot akiuvin eikou kou phat’in kot kahongin kanu komin kap pum pumin
Henu, nangin kei neilungset bangin kenjong kasunga um naocha kalungset’e, chapang kahin koicha ahijong kahepoi, hijongle henu kasunga hitih chan uma kipahtah-a kichom lele jengta ahing laiya tunia einin itha jeng ding chu na ngam hinam? Kasunga um itha ding le keijoh kithat tange, tia kaka leh kanu in insunga um jouse polangin potdoh-un, tin mi jouse asoldoh tan ahi.

Chuin kanu in eikol’in Boi, kenjong nang nahin nasunga um naocha ahin kalungset lhone, hijongle napa thu nelthei kahipon chen,, hospital jon tahite, atin mitlhi akitheh-in kabanin eikaiyin car sunga eison lut tan ahi, insunga lhacha lea pang hon jong mitlhi pumin eiveuvin ahi, chuin hospital jonin kahung lhontan ahile ka-oi sunga naocha chu aha cha cheh cheh jengin kap pum pumin kanu khut chu kalan ka-oi katham sahle kanun jong mitlhi vachut chut’in aven ka-oi chu ajut lele in ahi.

Chutia kahung kitol jing laiyun John Guite in asah

“Pathen thilgon najal’in
Mihemin kahung kijil’e
Hinla iti vangse kahim!
Chunnun neiphal poi kapen ding
Na laigilga kei suhmang na ding
Khansetna ding bou nagel iti nat hitam!

Nei itlou haimo nacha keihi
Heno nei suhmang got hi
Naki oi hinam nalunggel cheng
Heno keivang kanom poi.
Heno keijong kahin nom’e
Nang banga kahin nom’e, heno

Dama hinna neipeh le
‘Heno’ tin nakou jing nange
Nat leh sat toh jongle chun
Na gentheipi nange nachan
Hamset, vangset hunglhung jongle
Phattin nakom umingting,
Na dalha ponge.

Nei itlou haimo, na laigilga
Heno nei suhmang got hi
Naki oi hinam nalunggel cheng
Heno keivang ka kichai.

Heno keijong kahin nom’e
Nang banga kahin nom’e, heno.

Hichela hi kalung laiya ahung gingin, kitim jou talouvin kakap doh tan ahi, chuin gari tolpa chu kakhamin lampama kalhai doh-in hakan kakap tan ahile kanu in eilhamonin kenjong kanu komin la thucheng ho chu kaseipeh tan ahi,

Hiche pet’a chu phone jong kapa bouvin keypad Nokia ho achoi hinalai anahin, tulai banga smartphone jat chom chom kisemdoh nailou ahi.

Hospital kalhung tauvin lungdong le maimoh mitlhi le naptwi puma kagalut lhon le gari tolpan eihinjui lhonin hinla kanu in polanga umdin asol’in keini bou kalut lhontan ahi, kanu in doctor pa komin naosen suhset lou dingin athumin hijongle hospital a kona lekha avaigei ahitai, abortion akibol le anu hinkho jong beitha ding ahitai, tia lekha eisempeh lhon din aseiyin ahi.

Atahbeh-in jong abortion phat chu ana kikhel tan kei le kanu chu kana guh kipa lheh lhonin ahi, doctor pa akonin lekha ho kahin kilah lhonin inlang kahung kile lhon tai, in galhuna kapa kamchenga ipi hung pot ding ham hichu kicha tah-a ngah kit ding chu kahimai lhontan ahi.

To be continue next episode II

NOTE:
Lunglut tah a neinasim chaipeh jeh-in kakipah-e! Aban jingle simkit taute.

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleSAMANG JALKHOM-SA VAILOU KON KHOMSA-II
Next articleMIDANG DINGA HUNG LONG DOH KITI HI IPI TINA HAM?