Home William KAKINEPNA JOUSE ABEI NUNGIN-VI

KAKINEPNA JOUSE ABEI NUNGIN-VI

80
2
KAKINEPNA JOUSE ABEI NUNGIN
KAKINEPNA JOUSE ABEI NUNGIN

(Part-6)

By: William Lhonga Madrid.

william kwc writers
william kwc writers

Kenjong kadonbut’in “henge hepaneo, kajochanin hungpang nange” katin, chuin kapaneo jong kei dalhan, akinungle kittai.

Phat chomkhat jouvin keiho jong Pathen thu kaki hilpan tauvin ahi. Hiche Crusade a chun chaga katam lheh jengun, akeh khat chu tahsa bukimlou kahiuve. Amitcho loi, akhut akeng lhinglou loi, anakhang kisuhlou loi kaum’uvin ahi. Amasapen nikhoa chun Pathen lhachapun Nang ho Christa mi nahiuve ti thupia amangin, Pathen thu ngeitah chu einahil’un ahi. Pathen thuhing chujat kangailhah vangin kalungkot akihong theipon ahile thu kiseiho jong chu kajah vangin kahechen theipoi. Amonga jong ju le sa nelou, mi thilgu khalou kahi jehchun pengthah nailou kahi vangin, apengthah danin kaki gelin ahile Pathen thu chun kalungsunga na atong theipon ahi. Pathen vahchoila jong kasauvin, Bible chang ho jong kasim khomun, hiti chun Pathen thua kaki mangcha khomun ahi. Ni khat achetan, ahinlah kapengthah naipoi. Ajing nikhon Pathen lhachapun Pakai mitmun kisunem’un ti thupia amangin, “Kiletsahna hinkho pailhah a, chapang sen ho banga lungtheng putding ahi. Achuti loule, vangam nalut louhel diu ahi” atin, Pathen thu eihil kit’un ahi. Hiche nikhoa chun nom kasan, Pathen thu kisei hole vahchoila kisa ho chu kangainom lheh jengin ahi. Ahinla hiche nikho jong chun, kapengthah dehpoi.

Jing kho ahung vahle, Pathen thu kakihil kit diu, hichea jong kapenthah deh loule, apengthah louding chu kahi maitai. Hijeh chun keijong kisunem’in, Pathen koma taona kamangtai. “Pakai, nami ngailutna hi, kahethem theina dingin, kalungkot neihonpeh-in. Kahinkho thusim hi, sei louvin jong nangman nahesoh keinai. Kinepna ding neilou kahinkho hi, kinepna thah kaneikit na dingin, nangman neikithopin” katin, Pa hengah guhthimin kataovin ahi. Jing kho ahung vah in, keiho jong Pathen thu kaki hilpan kit tauvin ahi. Hiche nikhoa chun Pathen lhachapun Natonsot mun ding hoilai ham? ti thupia aneiyin ahi. Gospel kipana thupha tampi asei jouvin, “Hi leiset hi eiho dia indet ahipoi. Ikholjin namun’u bou ahin, tonsot in chu ahipoi. Idia leiset thil hoa, iboi diu ham? Tunia konin itonsot in diu, sapan tau hite. Sopi, tu hin thile chun hoilai mun najon dem? Tonsot vangam nalut dem? Ole tonsot meidil joh nalut dem? Khut’a sahlou innom’a lut dia, got chaisa nahi hitam?” tin, question eihinbol’un ahile seiding kanei tapoi. Kei koi kahi kahin kihetthem ni chun, kakap jengtai. “Chonse kahi Pakai nei ngaidam’in. Alhinga kaki-gel nalai tah hi, kalhinlelna le kalhahsamna joh ahi. Apengthah dan’a kana kingaito jeh a, neingailutna hi kana hetthem theilou ahi. Tun vang kahethem’in, kamuchen tai. Pakai kei chonset jeh a, hichan gentheina nahung thoh a, ngaidam kachanna dinga, Calvary cross chunga thisan long pum’a neihung lhatdoh hi, keidin amantam’in, aloupi tangeiye. Tua pat’in cross thusim jachatpi taponge. Kachonset thina chu, kathenna ahitai.” katin, Jesu Christa kei jeh a thina changeiya gentheina tincheng ahung thoh ahi kahetchet phat’in, kisihna mitlhi long pumin kakap jengtan ahi. Keibou kahipon, kagol kapai ho jong chu akap’un, kisihna mitlhi long pumin atao cheh-un ahi. Hiche pettah chun pu Jeff Akaiyin, hiche vahchoila hi mao jel’in ahin oilhan ahi.

  1. Loupi Pakai lalnunnem chaga gentheite dia, van tonsot kemtih neilou khopi nom neigonpeh chu, aw itihle kalhung tadem leiset gentheina hi dalhan?

Tu hin insung boina hole dammona hi thohgim jong leng, chaga gentheite Pakai Pathen ahung tengle gimna jouse nuse tange, tonsot’a choldo dingin Pan eipui tante.

  1. Tun vang Pakai kahinkho hi, nangdin kaphaltheng tai. Kipan’ing ting kabol thei sun taona beh in hung pang tange. Dammo jalkhun chunga kon hin, nalenggam machalna dingin.
  2. Alungsetna lhalim noiya leng dia eihungpui teng, chua iham kagin nahlai ding? Gim gentheina beisoh tading, chung vangam’a lhatsate toh tonsot Pakai vahchoi tading.

Thu le la ahung kithoa, kalungsunga Pathenin thu ahinsei chun, kathepmo naho chu aban banin kahin hethem’in, chule Pathenin eingailutna agildan chu kahin muchen tan ahi. Pathenin ichanna eingailut ham kahethem’a chule keima jong Pathen’a kahung kipetlut phat’in, lhagaova kadim’in, nom kasa lheh jengtai. Chuin Pathen lhachapun eihin koukhomun, Pathen koma taona eimanpeh-un ahi. KAKI NEPNA JOUSE ABEI NUNGIN Pathen kahin kimun, kinepna thah kahin neikit tan ahile kahinkho chu kei le keijong kidang kakisa lheh jenge. Pathen’a dinga kahinkho kaki phaltheng phat’in, la kasah jongle atuitan, thu kangai jongle atuitan, taona kaman jongle atuitan ahi. Chemasa ngaicheng ho lenna khopi chu lungmit’a kagaldot le aw anop ding dan chu seithem jouhoi ahipoi. Hinthing pahna gamlei sana khopi chu, kipanan abomin hintwi theng alonge. Chugam a chun lungdon, kana, natna jong aum tapon chule kel le chah jeh a lungdonna him him jong akisei tapoi. Thipi ngam dinga Pakai bou kalhen phat’in, Sana le dangka chule leiset loupina ho jong, imacha ding kati tapoi. Pakai vaipohna kemlou tonsot tonsot’a, keijong nikhat le kapakaiyin eihung puitou ding chu kinemin kangah jingtai. Pathen lungset kachanna hou jal’in, Crusade jong lolhing tah in kachai tauvin ahi. Mijouse vang apengthah pon, hijongle mitamjon kalungu kaheiyun, Pathen chu kahuhhing pu le kalengpa dingin, kakisan’un ahi. Hiche nia kipat chun kenjong “kabolthei sun taona beh-in hungpang tange” katin, aphat tinin taona kamang jing tan ahi.

Kaphat neisunin Bible kasimin, Pathen vahchoila kasan, taona jong kamang jingtai. Kalungsunga Pathen achen phat’in, kasah ding le kasei ding Pathenin eihil jingin ahile mite ngailutna jong kahung changtan ahi. Miten eiseisetna hou le eimusetna hou jong thohdan kathemtan, thilse jong thilphaa lethuh dan kathemtai. Mibanga chihna le thepna neilou, haosatna le boltheina neilou kahi vangin, ijakai neipa kanei phat’in, olmona ding him him kahe tapoi. Ajehchu thil ijakai neipa kaneile, thil ijakai chu keiya banga kagel jeng ahitai. Miten “elbai le chatmo” eiti jong leu, ka Pakaiyin “nalhingpoi” eiti dehpon ahi. Tun leiset’a mite muset chang jong leng, kakholjinna gam hi kadalhah teng, khut’a sahlou van khopia chu vanvouva kaki khel’a, tahsa bukimsel’a kaum’a, chuteng hilei gimna jouse jong kamilsoh kit ding ahitah jehchun, lhunkal kangahlel lheh jengtai. Hijongle Pathenin eiteppeh phat le nikho lhin kahsea, athu le alaa kimangcha jing dingin kakigel jingin ahi. Tahsa gam a katoh phatman ho, lhagao gam a kasan ding ahijeh chun kabolthei sun kabol’in, Pathen thu jeng bou kagel thupipen tan ahi. Kagolpa Hahao le a-inneipi Bebem jong kakoma ahung ji lhonin, Pathen thu le la hoa khat le khat ngailut jal’in kaki tilkhouto jiuvin ahi. Amani kamchenga konin, Lily hinkho mandan thuho jong kaja jingin ahi.

Elbai le chatmo kahi vangin, Pathen thua kaki manchah chu agiloupan eina velel lheh jengin ahi. Hijeh chun lhepna jong jat jat katoh in ahi. Hijongle akhonni geiya pangdet jing dingin, lhepna ho jouse jong kathoh ham ham’in ahi. Mitlhi long pum’a hinkho kamanna nikho jong atam’in, kingaise tah a hinkho kamanna nikho jong atam’e. Pathen gin hi chihna le hetna bulpi kipatna ahijeh in, Pathenin chihna le hetna jong eipen, mingol hon vang chihna le hilchahna asang pouvin, chang jong achang pouve. Keivang hatlou le lhasam kahi vangin, ijakai neipa kanei phat’in, kasei ding le kasei louding jong kahethem tan, kabol ding le kabol louding jong kahethem tai. Ni khat lungmongsel’a Bible kasimpet’in, kanao Lelet le achunnu ahung lhonin ahi. Kagel phahlou laitah a amani kamu chun, kakipah lheh jengin ahi. Kanao Lelet jong ana gollhang tan ahi. Chuin kachunnu chu akap’in, kakoma ngaidam athumtai.
CHUNNU: “Boithang, lungset tah in, phat chesaa kakhelna ho jouse chu nei ngaidam’in. Nachunnu kei selungmol jeh a, hichan gentheina hohi nathoh lo khah ahitai” atin, akap jengin ahi. Chuin kenjong kalhem’in, ajah-a
KEI: “Henu, achesa phat ho jeh a, ka angaipoi. Kap tahih-in. Tu hi kaphat ahi tapoi. Nuikhomna phat joh ahitai.” katin, kachunnu chu kalhemin ahi.
CHUNNU: “Boi, nachunga hamsetna hunglhung hohi, nachunnu ken kana gelkhel jeh ahi. Ngaidam chang dinga lomlou hita jong leng, lungset’in nei ngaidam’in.” atin, akap jingin ahi.
KEI: “Henu, nacha keiman kahin ngaidam’e. Ikhelna hou, Pathenin jong eingaidam maiyu hen. Henu, iti hinkho naman lhon’a, iti naki manchah ji lhon hinam?”
CHUNNU: “Boi, neingaidam jeh in, kakipah-e” eitin, eikoiyin akap kaptai. Keiho dinga kipana nikho ahivangin, kum sottah melmu lou nunga kimelmu kit kahi jeh-u chun, kipana mitlhi dimset pumin kaki koiyun kakap cheh tauve.

Kachunnun chun kapaneo koma aseiyin, “nao, tuni akipat’in, Boithang hi keiman umpi kit tange.” atin, kei chu umpi dingin eithum tan ahi. Kachunnu thusei chu kapaneo jong anomin, hiche nia kipat chun kanu le kanao Lelet komin kaum kittai. A-oisunga kona kijil kahilou vangin, kachunnun jong amacha tahbeh bangin eigeltan, acha tah tah kalou vangin, acha bangin eisimtai. Kei dinga jong kachunnu tahbeh ahilou vangin, kachunnua kagelin, kachunnua kasim tan ahi. Tunvang lungmong le lhamongin kacheng khomun, khat le khat ngailut jal’in kaki sangto jing tauve. Masanga kanao Lelet in jong eina noise lheh vangin, tun eijabol’in aupa bangin eigeltai. Pathen thu le la hoa jong kaki mangcha khomun, hatmo lhasam kaum kom jong leu khat le khat kaki tilkhouvun, kaphat neisun’un Pathen kavahchoi jing tauve. Keivang kahinkhoa jinei louding chu kahi maitan, hijongle Pathen kanei tah jeh in, khoh jong kasa dehpoi. Katahsa hinkho akichaiya, lhagao gam a kalen teng, tua kagentheina hohi geldoh kham jong ahitah louding kahetchet jeh in, hilei gimna hohi, iman kasimpoi. Kahinkho hi abei teng, monmang thei katahsa bou kadalhah ding ahipon, kagentheina jouse jong kadalhah a, lhatsa mithengte toh chung Vangam a kalenkhom diu chu lungmit’a kamun, aphat tinin kagaldot jingin ahi. Chugam’a chun kipana jong achamkim’in, sun le jan jong akisei kit tapon, nat le sat jong akisei kit tapoi. Lhatsa mithengte toh tonsot tonsot’a chimtih neilouva Pakai kavahchoi jing diu chu kagelle, lhunkal kangahlel lheh jenge.

BEITA.

Thusim kasut achaina lam jong hung hitan tin, ipi hile achaina geiya lunglut tah a eina simchaipeh jouse chunga kipathu kaseiyin, Pathenin phatthei naboh cheh tauhen. Kakipah-e.
Keima William Lhonga Madrid.
8731974334.

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleKUKI TE CHONDOL’A GOLCHA KITHANGKHONG THU
Next articleWHITHER THE KUKIS?

2 COMMENTS

LEAVE A REPLY

Please enter your comment!
Please enter your name here