Home William KAKINEPNA JOUSE ABEI NUNGIN-V

KAKINEPNA JOUSE ABEI NUNGIN-V

64
0
KAKINEPNA JOUSE ABEI NUNGIN
KAKINEPNA JOUSE ABEI NUNGIN

(Part-5)

By: William Lhonga Madrid.

william kwc writers
william kwc writers

“Kikhen ding ahitah jongle, hitia kimoh khen jeng ding vang kagel theipoi” katin, kalonlhi pum’a chun kingaise tah in kaki gelin ahi.

Lunglengvaiya hinkho kamanna kumkho jong asottan, hinla lungsetnu vang khatvei cha jong kakoma ahungkha poi. Kum nga jouvin kagolpa Hahao le Bebem chu keive dingin ahung lhonin, naosen jong ahin kipoh lhonin ahi. Naosen ahin kipoh lhon jehchun, akicheng lhon ahitai chu kahedoh pai jenge. Gelphah louva kagolpa le a-inneipi somai mel kamu chun kakipah lheh jengin, ahinla kei elbaiya hinkho mang kahi tah jehchun lonlhi pumin kana lamtotai. Keikom ahin phah lhon’a chun chibai kabol’in, kakap jengin ahi. Chuin kagolpa Hahaovin eilhemin, kajah-a
HAHAO: “Boithang, ibol’a naka ham? Kap hih-in” eitin, kamaiya lonlhi theng hung lonlha chu eithehhul peh in ahi. Chuin kenjong kadonbut in
KEI: “Hahao, kum hitih chan hitia hinkho kimang tah a, idinga khatvei beh jong neihungvet khahlou ham? Ole genthei chaga kahi jeh a, geldoh kham jong kahilou hitam?”
HAHAO: “Boithang, hiti chun lunggel’in lang, kingaise hih beh-in. Naumna kahetlou jeh a kahungvet nom lheh vanga, kahungvet thei jilou joh ahi.”
KEI: “Hahao, ahile kangai Lilyn damma hinkho aman jing hinam? Chule ipi jeh a, khatvei beh jong kakoma hungkha louva ham?” katin ahile alu akhot’in, eidonbut vahthei tapoi. Phat chomkhat jouvin kajah-a aseiyin
HAHAO: “Boithang, Lilyn jong” atin, aban seibe thei louvin, amitlhi atheh jengtai. Chuin kenjong kadongin, ajah-a
KEI: “Ipi ti ham Lily? Ipi jeh a, nalhi nakitheh ham? Ole kangai Lily hi athi hitam?”
HAHAO: “Athi amang vang ahipoi. Hijongle nang dinga, athi ma ahitai. Miphung dang achangin, cha le nao jong aneitai.”
KEI: “Hao, amonga koi toh kichenga ham?” katin, kamaiya lonlhi dimset pumin kadongtai.
HAHAO: “Koima dang ahipoi. Masanga nana ginmo jing, Lethao chu toh kicheng lhon ahi” eitin, kalhaset louna dingin jong eitilkhouvin ahi.

Kagolpan iti eilhem’a, kalainat louna dinga thu chujat asei vangin, kalungset Lilyn angdang akoi jeng chu kagel’e kapo joupon, sennao bangin kakap jengtai. “Aw lenkhom lai nikho hung kile kit louding hitam? Lungset somai lhaisel chu angdanga chul jeng ahitah le, kei ikati ding hitam? Tua ipi kaki neppia, iti kaki lhamon ding hitam? Kathil jah hi, kajanmang himaileh kanom tangeiye” katin, kalungset Lily lhangainan, kakap jengtai. Chuin kagolpa Hahaovin eilhemin, kajah-a
HAHAO: “Boithang, numei khat jeh in, lhase hih-in. Ama sanga phajo le hoijo, Pathenin nahin gonpeh kit thou thou ding ahinai” eitin, eilhemin ahi. Chuin kenjong kadonbut in, ajah-a
KEI: “Gelpha kit’in lang, chuteng seiyo. Kei hi koiyin deimong monginte neitia, hitia chu thu nasei ham? Kangai Lily bon kakhankho ding gelpeh louva angdang akoitah le, keijong kahin nom tapoi. Hahao, kahinkho hi neilahmang peh jengin. Pathenin jong chonset’in simda maihen.” katin, kalainat val jehchun kahinkho la dingin kagolpa chu kasoltai. Chuin kagolpa Hahaovin eidonbut kit’in, kajah-a
HAHAO: “Numei khat jeh a, hitia lung nagel jeng chu lung-oi mong nahim? Boithang, iti kahin lhep’a, iti kahin lhamon ding nahi hitam?” atin, ama jong akap jengin ahi. Ajehchu elbai hinkho mang pum’a, lungset puldou kathoh chu eivet joulou ahi.
KEI: “Kaki nepna jouse jong abeitai. Kinepna beiya hinkho lamsao kajot jeng ding vang kalungjo tapoi. Kum le lha ijat che jongle kalonlhi la longkang pontin, kagentheina la kile deh tapontin, keivang kahin nom tapoi” katin, kakap jingin ahi.

Nilhah lang ahiphat’in, kagolpa le a-inneipi jong kinungle kit dingin akigong lhontai. Chuin kenjong kagolpa chu kadongin, ajah-a
KEI: “Hahao, Lilyn iti hinkho amang ji hinam? Akeng neina mun’a, lungmong le lhamonga hinkho aman hinam? Lethaovin alungset jing hinam?” katin, eidalhah nungin jong ahinkho mandan ho, kahetnom nalaiyin ahi.
HAHAO: “Henge, damin hinkho amang jingnai. Amavang aloipa khun, asugenthei lheh jenge.”
KEI: “Lily chu lungset aum val’e” katin, thudang jong seibe thei louvin, kalhi kaki-theh jengin ahi. Chuin Hahaovin kajah-a aseiyin
HAHAO: “Lily dingin lungkham kit tahih-in. Ama jeh in nalonlhi jong lonsah kit tahih-in. Ati ti kitin tin, asoh soh kisoh tante. Namalam khankho ding joh gelin lang, tua pat’in kap kit tahih-in.”
KEI: “Gelmil ding vang hahsa lheh jenginte. Hahao, nangni beh hinkho lhungin hung kicheng lhonin lang, chung Pathen vangboh hung chang jing lhontan. Laigilga jong tampi hin nei lhonin lang, mite vetjui thei le kihilna thei insung nom hin semdoh lhontan. Hungji ji lhon’o na?”
HAHAO: “Kipah aum’e. Henge kadam lhon le, hungji ji lhon nange.”
KEI: “Hahao, ahijongle damsel’in che lhonin lang, kipah tah in singsung mingaicheng toh gaki muto tauvin” katin, ngailut vetsahnan chibai kaki bol’un, amani jong kei dalhan ache lhontai. Naosen kavailhah manlou jehchun kale koukit’in, “khatvei hung tadi lhon’o. Kaseihai khat aum’e” katin ahile amani jong ahung kile kit lhonin ahi. Chuin naosen chu kachop’in, ajah-a “Boipu, hung damsel sel’in lang, nanu le napa chule nasingsung mi lunglhainan hinkho hin mang jingin. Naloi le napai lah a vetton thei hung hin lang, na-insung mite kithang-atpi theiyin hinkho hin mangin. Chung Pathenin naumpi jingin tin, nalamlhahna jousea nalhonpi jing tahen” katin, ngailut jal’in kavailhah in ahi. Chuin avel’in khat le khat chibai kakibol kit’un, kaki mukit kahseuva dingin kaki vailhah tauvin ahi. Amaho jong kei dalhan ache tauve.

Kalainat val jehchun an jong kanehnom tapon, guitar kaki pohdoh in, leitol’a chun kajan mao mao tan ahi. Hitia lunghel tah a kaum pet’in, chungthang vansanga konin Chollhanu ahung vah emsel’in ahile masanga Lily toh lungkitoh a thimthu kasut khom lhon’a, kanuikhom lhon lai nikho ho chu kalung mitlhan ahungin ahi. Lungsetnun kamdam onem’a eihoupi naho chu kathin lunga ahung langin ahile kalhasetna;le kalainatna chu angahna dingmun aum thei tapoi. Kalhaset val jehchun kakap’in, “aw thina lhanmol, jon jeng taleng kanom tangeiye. Miten gentheina thoh cheh jong leu, kinepna neiya athoh u ahijeh in, thoh lhung jou nauvinte. Kinepna him him neilou Sangga kei hinkho vang, hinlo jong aum tapoi. Hitia gentheina jeng thoh ding bep’a, kahin hin sangin, thi jeng taleng kanom’e. Lungsetnun la kei khankho ding gelpha louvin, angdang akoiyin cha le nao jong aneitai. Lungmong sel’in mi phungdang achangin, akitepna jouse henasan helou abangtai. Kei lungsunga vang lungsetnu thusei ho aging jingin, lungtoh a lenkhom laini ho lungmitlhan alang jinge. Lamlhung joulou dinga inasei, kagolpa Hahao le Bebem’in bon lungtup molso lhon’a, laigilga jong nei lhon tah a, eini i-iti hitam? Ina lamdoh lungset hinkho le ilelsa thimthu cheng jong huilah a changvai kithe bang bep ding hitam? Kahinkho hi thusim abangin, kagel jiteng gelsao ngam louvin, lonlhin kajunlha jitai. Iti kaki lhep’a, iti kahin miljou ding ham? Ipi kaseiya, iti kavailhah ding nahi hitam? Lungin vang agel’in, tahsan adoujou jipoi. Nangin neilungsetna vang semthu lungsetna ahijeh in, hichanna hin akichaitai. Hijongle ken nang kalungsetna vang lungsetna dihtah ahijeh in, chultih ni aumpon, abang ahi jing nalaiye. Alamdange kahinkho hi, chomkhat kipana chuteng kana, ilam jousen genthei hahsannan eihinlep joe damsung hinkho hi. Lung ngapna ding neilouvin, lenpi bei vabang kavaimoi. Phat le nikho kihei jongle genthei hinkho hi daijou him him lou. Thichanin jong miljou ponge, nangai lonlhi vang kang ponte.” katin, kilhemdam jou louvin, kakap kaptai. Iti kaka vangin kakap chim thei mong mong pon ahile kaka kanan kachol lheh jengin, kamit kamai jong apomdoh leutai. Chung Chollha vahnoiya chun changin hinkho kamangin, lhase tah in kaum tan ahi. Kalainat val jehchun guitar chu kasaiyin, mitlhi long pumin hiche jaila hi ka-oi tan ahi.

  1. Setlei chung hi kanan hinkho kamang, nang vang phungdang nachan lunglhai sel’in, miding kagel jiteng laidip adam, aphat le nikho la kihei jouta. Hinlah phattin lonlhin alongjie.

Kana lungset kana itval jeh in, tahsa bukim louvin hinkho kaman lotai. Hinlah guilhung dehlou kathimthu cheng, kangai Lily hi selung ki-oi naimo?

  1. Chollha vahnoi jansot selung kagel, lungset hinkho ngaiyin kakap jitai. Nunlui nang vang nalaigilga cheng le, nasen-angkoi pa toh nalengkhom tai. Thisan long cheng vangphat nan nei maitan.
  2. Nunlui hita jongle chun aw senngai, nahinkho man thu ho kajah jiteng, naobang pom’a lhamon kanom’e gol, hinlah angdang koi joh nana hitai. Nunlui damtan tilou seiding umlou.

Hiche jan chu keiya dinga kana jan asohtan, jansot samang jeng jong jalthei louvin, kamitlhi toh kaki houlim jingin ahi. Kamaiya mitlhin, “nalungsetnu milding hah lheh jongle, mil maitan. Kalongchim behseh tai” eitin, ahinla kamil theipon, kalonlhi jong kakham thei dehpoi. Ihmut ding katia, maimit kasin jongle ka-ihmu thei dehpon, kalungin Lily bou agel jing jehchun hinkho man vang ahahsa lheh jengtai. Eingailu mi khat beh umhen lang, eithatdoh jengle bou kanomin ahi. Kahinkho asot channa kagentheina jong sotding ahitah jehchun, hin lungin eivul tapoi. Ahinla kei nop thua hingthei le thithei kahi kit lou jehchun, kagelna jouse chu abingin ahile kachung thimthu chu thimpi meipi bang ajing dentai. Mihem khat chu genthei lheh jongle, kinepna anei le, hiche akinepna chu alunggel ngahnaa panga ahin, keivang kinepna him him kaneilou jehchun, lunggel ngahna ding mun jong kanei tapoi. Hitia maimit singmoa, mitlhi long pum’a kagel jing laiyin jinggil bu-al ahung khongin, chomlou kah in jingkho jong ahungvah paitai. Chuin kei jong kathoudoh in, leitol’a chun lhase tah in katoutai

Phat chomkhat jouvin kapaneote jong ahung thou tauvin ahi. Kapaneo chu kakoma ahungin, kajah-a
KAPANEO: “Boithang, ipi nangaito hitam? Naumchan chu nalungkham toh val’e.” eitin, kalungkhampi pen chu nungah thu ahijeh in, kaseinom pon, hijeh chun thudang beh kaseiyin ajah-a
KEI: “Kahinkho mandan hohi kagel jiteng, hamse kakisah ji val’in, ihmumoa hinkho kaman’a jankho atam’e hepaneo. Tujan jong ihmu louhel’a kakigel khovah jeng ahi.”
KAPANEO: “Boithang, aphachom louding pou gel’a, lungkhampi angaipoi. Bible lin hitin aseiye. Nang ho koipen hin lungkham hat vanga ahinkho tong chan ajopbe theiyem? Gentheina ding bep’in, tukal lungkham ji tahih-in.”
KEI: “Hepaneo, lungkhamna le hesohna hi, silpon banga banthei hile sot’in bang tange. Milding lung kahagel channa, khankho lui hohi athah thah a hung langji hileh akilom’e. Hepaneo, keitobanga hamse vangse vang mihem tam ponte na?”
KAPANEO: “Boithang, ilennau setlei jatam laiya hi, nang sanga genthei jo le hesoh thoh mi asang aja um’a ahi. Boi, Chaga crusade umding ahi atiu chuo. Naga jaova pha hilou ham?” eitin, kapaneo thusei kanel nomlou jehchun ajah-a
KEI: “Nangin jaovin neitile, kajao ding ahi maiye. Amonga itihle, Crusade kipan ding ham?”
KAPANEO: “Tuni le kipan ding ahiye. Anneh jou teng, keiman hungthah nange.”
KEI: “Hepaneo, amonga ni ijat hiding ham?”
KAPANEO: “Tuni pum’a nithum hinte. Lasathem ho jong hung diu ahi.” eitin ahile katha anom lheh jengin ahi. Chuin kapaneo chu kadongin, ajah-a
KEI: “Koi lasathem ham? Amin nahet jeng lou ham?”
KAPANEO: “Jeff Akai atiu hileh, akilom’e.” eitin ahile kakipah lheh jengin ahi. Ajehchu lasathem holah a, Jeff Akai kana ngaisang pen ahijeh chun, amel jong kamunomin, live a alasah ngaiding jong kanom lheh jengin ahi. Phat chomkhat jouvin keihon jong an kaneuvin, an kaneh jou phat’un, kapaneovin eihungthah in, Crusade a jao dingin kamin jong kapelut lhontai. Chuin kapaneovin kajah-a aseiyin, “Boithang, pontho tah in hung pangin lang, mi thusei jouse jong phaten hin ngaiyin. Pathen tailou kinepna ding dang aumpoi. Leiset’a thilho nakineppi le, leiset’a kichai kit ding ahi. Amavang Pathen nakineppi le vang, tonsot tonsot’a ding ahitai. Leiset mihem’a hung penga, gospel thupha kisan man louva, ana thi hohi avangse pen chu ahi tauve. Eihon vang phat inei nalaiyun, phatpha inei sunguva Cross thusim ihetthem’uva, hinna thuhing ikisan diu hi thil khohpen ahi.” eitin, ngailut jal’in eitilkhouvin ahi. Kenjong kadonbut’in “henge hepaneo, kajochanin hung pangnange” katin, chuin kapaneo jong kei dalhan, akinungle kittai.

Part 5 hichanna hin chai kit’u tin, aban jingle simjom kittau hite. Lunglut tah a sim jouse chunga kipathu kaseiyin, Pathenin phatthei naboh cheh tauhen. Kakipah-e.
Keima William Lhonga Madrid.
8731974334.

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleNUPA KICHEN KITI HI IPI TINA MONG MONG HAM ?
Next articleBOI, KHAMKIT TAPONGE

LEAVE A REPLY

Please enter your comment!
Please enter your name here