Home William KAKINEPNA JOUSE ABEI NUNGIN-II

KAKINEPNA JOUSE ABEI NUNGIN-II

39
0
KAKINEPNA JOUSE ABEI NUNGIN
KAKINEPNA JOUSE ABEI NUNGIN

(Part-2)

By: William Lhonga Madrid.

william kwc writers
william kwc writers

Numei phalou ho lunggel hi, pasal ngol hon akhoiphah joulou mong mong ahi chu kapa a konin kahedoh in ahi.

Phat le nikho chal jing bangin, gimbolna le engbolna jong asang cheh cheh jengtai. Ichanna ei-engbol vangun, thohhat tah in kapang jingin, mitlhi long pum’a hinkho kaman’a nikho jong atamin ahi. Kei dinga kaki-lhep lungmonna pen chu Christa bou ahin, leiset chunga lungmonpi ding mihem le lunggel ngapna ding mun him him aumpoi. Nuno nei hahsat dan hi seiya seithem jouhoi ahipon, nuno neihon vang ihetthemsoh kei diu katahsan’e. Numei ching le numei pha ho chu mi nunon pang jong leu, insung asuboi pouvin, hinlah numei ngol hole numei chavai hovang mi nuno’a apan khah leu, alhunnau insung chu phat tin’a aboi jingin ahi. Kanuno phatlou jeh in, kapa jengin jong mithoi mitphan eive jipon ahile keiding chun kiphatlam lam aumin, hinkho man ahahsa lheh jengin ahi. Kanuno chun phat jousea kamitmona bou ahol jingin, kholai dunga jong kaminsetna ding bou avelhi jingin ahi. Kholai miho koma chun “athaset kihetphah louvin, aneh lang vang ahat lheh jenge. Boithang khu Vohcha vah a, kamohvah jengu ahi” atin, eijoh lele jengin ahi. Guhthim’a eiseisetna ho jouse jong kholai miho seinaa konin kaja jingin ahi. “Kon ipi sei hen lang, kahilou nan eingoh jong leu, kei kaphat poule akhoh dehpoi. Thohhatnaa gal kajo ding ahi. Kanun kaminsetna ding bou hol hen lang, kholai mi koma eiseise jing jongle, Pathenin thil jouse amun, ahesoh jingnai” katin, thu kisei ho chu henasan, helou bangin kaumin, kathoh ham hamin ahi. Mihem hinan kalainat kom jong abeida pon, kalhaset val jeh a kamitlhi lon ni jong abeida poi. Hijongle kalainatna thu kamcheng khat kaseiya, kalunghan jongle mol kaneh ding kahet jehchun, ima kaseingam jipon, kalainat naho jong kaselmang jitai. Eikhoto ding mi khat beh jong kaneilou jehchun, kalainat val teng kani janglum song chunga chun kaga kap jin ahi. Hiti chun gentheina hinkho chu mitlhi long pumin kahin thoh jingin ahi.

Kum thum jouvin kajopa chu gelphah louvin hanat in ahung nan, thinglhang damdoi hoa jendam jou hita louvin aleiset hinkho ahungbei kittai. Kanuno selungmol jeh in, kajopan eina gimbol ji jongle, ama jal’a kana pan jou ham ham ji ahin, kajopan gelphah louva eidalhah jengu chun thohdan kathem pon, angol kabang jengtai. Kajopa longdamsa chunga chun sennao bangin kakap kap tan ahi. “Hepa, kanin eidalhah bon chubanga kithohlel’a, ibol’a nangin jong neidalhah kit jeng hitam? Naji nacha khankho ding beh gel’e chun kilom’a, idinga tutah a, janmol lep jeng nahi hitan tem? Hepa, ven naji nachaten itna mitlhi long pumin kahin kapiuve. A-it ding umlou le alhalel ding umlou kei joh hi ana thi hita leng, koi dingin jong phajon tin, kalai lonlhi thehhul ding jong baijonte. Hepa, it naum ngeiyin, ngai naum tangeiye. Hiti dingin kana gel him him pon, khulsin chang dingin jong kahin phal theipoi. Hepa, nang jal’a gentheina jouse jong mitlhi pum’a kathoh ham ham ahilam hi, nahetdoh nailou ham? Tunia nangin neidalhah le, kei ikati mong mong ding hitam? Koi kom kabel’a, koi lungngapnaa kanei ding hitam? Hepa, kana ngaito sangin nang vang naselungmol ngeiyin, nalunggel jong alamdang lheh jenge. Kachunnu le kani mel’a kamu nangin, kumkhoa dia maimit nasin jeng vang keidin athoh hahsa val’e. Hepa hung thouvo” katin, lhepbi jou hilouvin, thonggo bangin kalonlhi along longtai. Kapa thi kum’a chun keijong kum som le thum bep kahi nalaiyin ahi. Keiya din vang kinepna him him aum tapon, thi jeng ding bou lungin avul tan ahi. Nilhah langin kajopa longdamsa chu lhanmol langa kapouvin, kachunnu kivuina koma chun kavui tauvin ahi.

Kajopa aumlou phat’in, kanuno le kanao chu toh kei ho thum bou kachengkhom tauvin ahi. Kanao chu kumnga ho bep ahi nalaiyin, kei chu eingai lheh jengin ahi. Kachena mun jousea juiding eiti jin, “heu, heu” tin, eikouvin, eidel lele jeng jin ahi. Kenjong kanao Lelet chu kalungset lheh jengin ahi. Ahinla achunnu chun kei chu eivetnom pon, kakivop lhon ding jong aphal jipoi. Lekha kasim ding jong anom tapon, kada sasan lekhasim jong eingahsah tan ahi. Kaloi ho simchan sim’a, kaloi ho hetchan hetding kanop val jehchun, lekhasim eingahsah ni chun kana kap jengin ahi. Chapang kahi nalai vangin, hiche nia kipat chun nop le da umlouvin, louna kahin tongpan tan ahi. Natohje ije jong kahe naipon ahile kagenthei lheh jengin ahi. Louna tohna mun’a kona chol le nanga pum’a inlang kahin nungjot teng jongle, an jeng jong ana hon jipon ahi. An aneh lhon nailou ham tia kino tah a an honding kati teng, kajah-a “nang ding bou kihon’o” eiti jin ahi. Aumdan chu amani nucha nehding bou ana kihon ji lhon dan ahi.

Khatvei komle kalung ahang ji thouvin, ima vang kasei khapoi. Ajehchu a-oisunga kijil hihih jong leng, kajopan asen-angkoi khel’a asen-angkoi dia akipui ahijeh chun, kachunnu bangin kagelin, jabolna kape jingin ahi. Aman eithet hen lang, micha bangin eisim jeng jongle, kenvang kachunnun kasim jingin ahi. Chun le jo neilou kahi phat’in, sun chu natoh nan kamangin, jan chu kigelnan kanei jing tan ahile Sangga kei dingin hin nopna him him aum tapoi. Kanuno chula natoh ding jong gelpha louvin, athah in akinungah sah kit’in, kihoisahna le kholailen nopnan phat jouse chu amangchai jingin ahi. Lou natoh kachol val koma, thil khat beh polut louva kache kom jongle “idia thing beh nahin pohlou ham?” eitin, ngailutna le khotona bei hel’in, eihouse ji nalaiset’in ahi. Sun nilhum’a ulsa long pum’a louna tohding, in ilhun phat le, housetna thu bou jah kit ding vang koi dingin jong thoh hahsan tin, doulel um lheh jenginte. Keiho insung vang Pathen to kachen khom lou jeh-un, ngailutna him him aumpon ahile keiho insung thusim seiding chu kholai mi akichutho jengun ahi. Chapang kahi vangin miten houlim nopnaa einei jengu chu kapona lheh jengin, ahinla kachunnu chu kamcheng khatchan jong kanelngam jipoi. Athusei jouse chu dih hen lang, dihmo jongle juiding chu ahimai jengin ahi. Hiti chun genthei tah in hinkho kamang jingin ahi.

Kum tampi achetan ahile keijong kum somni kahung lhingtai. Kanao Lelet jong kum som avaltan, lekha jong asimtai. Kanuno chula dongma abol toh a-i toh alhanglha jengin ahile insung chu anopna him him aum tapoi. Achunnun sol le kol dan’a eibol jing jehchun, Lelet jong ahung khanlet cheh cheh le, kei chu eihin noise pantan ahi. Asanga lenjo kahilam hepha louvin, anop phat le eisen’in, anop phat teng kaminlhingin eikou jingin ahi. Aumchan chu voh vohnom aumin, ahinla achunnu kisonpina jal’a hitia eibol ahijeh chun kahilngam pon, phoh jong kaphohsal ngam jipoi. Ajehchu ngailut jal’in hil ing ting, vo leng achunnu chu kei chunga lunghang kit ding, kitomona bep ahi ding kahet jeh a chu thipchet’a kaum ji ahi. Um olpet le khoh jong kasa deh jipon, chol le nan petle vang behlhuh nom aum ji thouve. I-sanga kumtam jo hon einoise leu athoh dan khat aumin, i-sanga neojo hon eihin noise jiu vang athohhah lheh jengjie. Thachol tah a in kahung vailhun koma eihin noise bol jiteng, kaki timlel jidan chu akidange. Keinao mong mong ahilou chu ama jong vangpha, keijong vangpha chu kahi maiye. Achunnun la hilmong monglou, an anehva’a akisem jolsel jing poule lunglhai jeng, kachapa hi ahung hitipeh le vang manthei hung hiponte tia lungkham mong monglou, lungdon vang aum lheh jeng lhon’e.

Nilhah khat chol le nang pum’a in kahung vailhun le, kanao Letlet chun noise tah in eihouvin ahile kalunghang valin, kabenglhu tan ahi. Aneova kona khatvei jong kana vohkhah lou jehchun, akalai ahaithei tapoi. Chuin achunnu chun kasam buchingin eiman’in, kajah-a
KANUNO: “Najahcha louva khut nalhah ngam ham? Hoilai mong mong navet a, ipi kisonna naneiya chapang khohelou chunga nakhut nalhah ham? Ole nanu athinu chu nakisonpi ham?” eitin, eihouse jah jah jengtai. Keijong kathachol pet le kalunghan pet ahijeh chun kakitim joupon, ajah-a kaseiyin
KEI: “Nachapa phat ding nadei leh, khatvei beh jong chu hil tang-em! Nangni nucha nahi ti lhon jeh a, mijouse houlim nopna bep ihiu hi, tuni channa nahetdoh nailou ham? Neihouset nomle neihousen lang, avelin kanu hin seikit tahih-in” katin, kanel tan ahi. Chuin kajah a asei kit’in,
KANUNO: “Chapang nangin najahcha louva, neihin nelngam ham? Kei hi, nang hilthei kahim? Kanop le nanu athinu ti ing ting, kanop le nani athinu tina vehtang. Chapang chavai hil theilou pho theilou” eitin, akisen jah jah jenge. Kalunghan’a akikhon val tah jehchun keijong kaki tuhtang joupon, ajah-a
KEI: “Ipi sei kisa nahi ham? Nachapa phatlou jeh a, kei hitia chu neigah houset ham? Avel’a kanu thu nahin seikit le vang, kanu tin dem tahih vehtang, ana kivet’o” katin, lunghang tah in kadonbut tan ahi. Chuin kajah a aseiyin
KANUNO: “Hilai in hi, koi in nahisah ham? Gang chel’in napot kigot’in lang, kipotdoh tang.”
KEI: “Koi in sahsa ba nahisah ham? Kapa sahsa in chu ka-in ahiloule, koi in ba ham? Nachedoh nomle, nang chu kichedoh tang.”
KANUNO: “Nang ho in lhanmol khu hichu. Che tang na inin. Na-inkote chenna, lhamol langa khun gacheng tang. Naumsot le phahih vehta” eitin, kavon ho chu leitol’a alehdoh tan ahi. Kalunghan val jehchun behlhuh jeng ding chu kanomin, amavang ima kasei be tapoi. Kamcheng khat kaseibe kit jongle, achunga kakhut kalhah ding bou chu kivat ahitai. Kachunnu tah tah hihih jongle, kajopa jal’a kachunnu ahikit jehchun, achunga khut kalhah nompon, hijeh chun thipchet’in kaum tan ahi. Kei kathip a chun thip taleh kilom’a, koi thip tah sangin, sei louding pou aseiyin, eihouse jah jah jengin ahi. Eihousetna le eibolna ho chu kalha ase val’in, kamcheng khat jong sei talouvin, leitol’a kavon nen dehduh a umho chu kabag sunga kahengin, ka-innu chu kahin dalhatai.

Kalainat val jeh a kahung potdoh jeng vangin, chena ding jong kahe dehpoi. Hijeh chun lhamol’a chun kachen, kani janglum song chunga chun hakan kaga kap tan ahi. “Heni, chungthang vansanga konin neihin vele chun, kagentheina bou mun nate. Kipana le kinepna neilou kahinkho hi, thi jeng ding bou kanomtai. Hi leiset hi gimna gam hijeng jongle, keitobang lom lom’a gim genthei thoh ding vang, setlei jatam laiya amihem’in um ponte. Heni, nangin neidalhah akipat’in, nopna him him nei louvin, thonggo bangin kalonlhi along jinge. Jing kho hungvah kit jongle, gentheina bep hi kit’in tin, lonlhi thehhulna ding kolni soh taponte. Heni, kahin lhangai val jeh in, heni tin namin ngei kahin kouchim thei jipoi. Leiset mihem’a penga penglou ana hita leng, phadinga” katin, kakap kap jengtan ahi. Ichan kaka vangin kakap chim thei him him pon, kalonlhi chulgotna ding imacha aumpoi. In’a kinungle kit dingla kanom tapon, lhamol’a geh khovah jeng ding jong kanom kit pon, hijeh chun vangkho danga cheding tin kaki-gel tan ahi. Chuin kani janglum song chu kahoupin, “heni, najal nagam hi ngai lheh ing ting, lhalel lheh jongle, iba kalo ding ham? Kei hilai vangkho danglha’a vaikon louthei kahi tapoi. Ven kahinkho thusim hi hiti ahi” katin, kamitlhi pumin kahinkho thusim chu kani janglum song chunga chun kasei tan ahi. Kaseichai phat’in, “heni, ana damsel’o” katin, kabag chu kahin kipoh in, vangkho dang jon din, kahung kipatdoh tan ahi.

Jan khosot nungin kho khat kaga lhungin, hiche vangkhoa chun kaki choldo tan ahi. Hiche khoa cheng ho chun akhouva cheng dingin eitem’un, ahinla kei kanompoi. Ajehchu kei ho kho toh akinai jeh a chu kachen nomlou ahi. Jing khovah in kaki patdoh kit’in ahile hiche kho khel langpeh a chun kho khat ana umin, hiche khoa cheng ding chun kaki-gel lhatan ahi. In khat’a chun kavahlut in, seingam lou sasan kahinkho thusim chu kamoh seilhah jengtan ahile eingailu lheh jengun ahi. In le lou kanei kah a, amaho inna umding chun kaum tan ahi. Amaho chu mitamte jong ahi pouvin, minga bou cheng khom ahiuvin, kei pum’a migup bou kahiuve. Keite bep gollhang khat jong aumin, amin chu Hahao akitin ahi. Ama chu toh kakivop ji lhonin, toh le tham ho jong katong khom ji lhon’e. Kagolpa Hahao jal’in nom kasan, kalung jong among lheh jengtai. Amaho in koma chun inneo khat kasaovin, kasahchai phat’un kei kachangin kacheng tan ahi. Phat khat phat khat tengle kalung helji thouvin, ahin kagolpa Hahao jal’in hinkho mandan vang anopjep tai.

Leiset chung hi nopna tah tah aumpon, neh le chah ineiya, ichan chunga lung oisel’a ium le hiche chu anompen ahijenge. Sun le janin Hahao chutoh kakivop lhonin, louna katoh lhon jongle katong khom lhonin, jan teng akham khamin nungah ho in’a katouji lhon’e. Nungah deichatna le hoisahna phat jong ahunglhung tan, ahinla neilou chaga kahi jehchun nungah kiti mong mong kahel kha naipoi. Nungah dang jouse sangin Lily chu hoi kasan, kadei lheh jenge. Kalungsetna thu akoma kaseidoh ngamlou vangin, lungguh in kagel jingin, kana thipideh deh jengin ahi. Akoma kaumlou teng asomai mel kamunom jin, ahinla akoma kaum teng jachatnan kadimset kit jin ahi. Kalungset lheh vangin, kalungsetna thu akoma kaseidoh ding chu ahahsa lheh jengin ahi. Ajehchu kagentheina le kachagat chu achomin kikoi jongle, akoma kaum teng kajachatna chun kalunggel jouse eigelmilsah ji ahitai.

Part 2 hichanna chun chaikit’u tin, aban jingle simjom kit taute. Lunglut tah a sim jouse chunga kipathu kaseiyin, Pathenin phatthei naboh cheh tauhen. Kakipah e.
Keima William Lhonga Madrid.
8731974334.

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleMASANGLAI KUKITE CHONNA
Next articleJOBEI LE JEMNA

LEAVE A REPLY

Please enter your comment!
Please enter your name here