Home William KAKINEPNA JOUSE ABEI NUNGIN-I

KAKINEPNA JOUSE ABEI NUNGIN-I

50
0
KAKINEPNA JOUSE ABEI NUNGIN
KAKINEPNA JOUSE ABEI NUNGIN

(Part-I)

By: William Lhonga Madrid.

william kwc writers
william kwc writers

Mihem khat’in ahinkho sunga kinepna aneilou teng, thiding bou agaldot jing ding ahitai kitile kiseikhel dehponte. Ajehchu ven, kinepna inei jeh-uva gentheina ho jouse hi ithoh ham ham’u ahi. Dammona jeh a sum le pai tampi sumanga Hospital jon ho khun, louthem hon eijen leu kidaminte ti kinepna anei jeh-uva ajot’u ahi. Changlei lhou hon jong ipi jeh a ulsa long pum’a changlhei alhou ham itile kachangtu hi hung minin tin, chuteng insung mingaicheng toh lungkitoh tah in nekhom nange tia kinepna anei jeh-uva, genthei tah a changlei alhou ahi. Ipi jeh a Pathen lhacha hon gentheina tampi thoh pum’a huhhingna thupha muntin le lhang tin’a aseiphongu ham itile kathi nung teng, lhagao gam’a Lallukhuh kasan teiding ahi ti kinepna anei jeh-uva gentheina ho jouse jong athoh ham ham’u ahi. Chule lekha simhon jong nikho khat teng sap le leng kahung hiding, chuteng tua kagentheina ho jouse jong kagelmil ding ahitai ti kinepna anei jeh-uva, genthei tah a lekha asim’u ahi. Mihem jousen lunggel inei cheh-uvin, ahinla ilunggel’u vang akibang cheh poi. Hiti ahijeh chun toh le tham jatchom chom ibol’un, lamchom cheh-in ilhaiyun ahi. Ipi igel’uva, ipi na itoh vangun, ithilbol jouseu hi kinepna neiya ibol cheh-u ahithou thouve. Kinepna hi ana umlou hile, gentheina jong koiman kithoh lhung joulou ding ahi. Hiche kinepna hin, ihinkhou akipasah a, gentheina lampi jong eijot galkai sah jiu ahi. Koi ham kinepna beiya thilbol le natong? tin, question kibol’e, “kei kahi” tithei ding mi koima um ponte. Thumakai tobanga hichan chu kasut hintin, anoiya hin thusim simpan tau hite.

Kachunnu mel itobang ham jong kahepon, chule anoitwi jeng jong kana chep khapoi. Ajehchu kachunnun a-oisunga kijil acha kei khankho ding gelna jeh a, ama hinkho ana phal ahitai. Achasen mel jong muman talouvin, kachunnu chun thina gam ana jontai. Anao neina langa kachunnun ahinkho achan phat’in, kajopa chun kani jah-a “nao, nangin boipu hi veo. Achuti loule ken vahhing jouponge” atin, kani koma eina umsah tan ahi. Kani chun ngailut jal’in kei chu eina umpin, khohsah tah in acha bang bangin eina khoukhah in ahi. Butwi nang hole changchim ho einehsah jin, genthei tah in eina sasah in ahi. Chunnu anglum’a samang jal khalou le Chunnu noitwi chepkhalou kahi jehchun golnung jong kapha jou jipon, chule kana lungmol lheh jengin ahi. Kani chu kachunnu danin kangaiton, “henu” tin, kakou jin ahi. Aman jong aseidoh nomlou jehchun “hoi” eina ti jin ahile kani chu kachunnu tahbeh kana hisah in ahi. Kajopan jong ajipul adoulel val jeh in, laidang alengin, jithah anei kittai. Senneova kona kani koma kaum jehchun, kajopa chu kapan jong kagel theipon, kapa ahilam jong kana hetlou tahbeh ahi. Nikhat kalengol ho toh kaki-chep pet’un, kaloi hon “chunnu neilou pa” eitiuvin ahile kalungdong lheh jengtai. Chuin kenjong kadonbut in, “kachunnu koma kaum jing hila” katin ahile einuisat un, kajah-a “nachunnu bon hilou, ama khu nani ahibouve. Nachunnu sot’a thi hita chu” eitiuvin ahile kalaina lheh jengin ahi. Thu tamsei talouvin thipchet’in, inlang kanungjot tai.

Lhase tah in kaumin ahile kani chu alungdongin kajah-a, “Boithang, ipi nati ham? Ipi jeh a, lhase tah a naum ham? Ole, naloi napai ho toh nahung kinah ham?” eitin, chuin kenjong kadonbut in, ajah-a
KEI: “Henu, nang kachunnu nahi hilou ham?” katin ahile phat chomkhat akigel’in, kajah-a
KANI: “Henge boi, nachunnu kahiye. Ipi ti ham?”
KEI: “Kaloi hon, nang chu nachunnu ahipoi. Nani joh ahibouve eitiuve.”
KANI: “Boi, naloi ho chun ahetthem lou jeh-uva, hitia chu aseiyu ahibouve. Gelthemin.”
KEI: “Henu, ahile kapa koi ham? Hoilaiya kapa um’a ham?”
KANI: “Boi, nahung khanlet jep phatle, seipeh nange.”
KEI: “Henu, tun neiseipeh jengo. Kahetnom’e.”
KANI: “Boi, tua aseiphat avat nalaiye. Gaplheng(mantel) chan naphah phatle, seipeh nange. Hungo boi, anne tahite” eitin, chuin an kane lhontai. Kani chun lekha jong eisimsah in, Pathen thu jong eihil jingin ahi. Pathen nikho ni le kei nehding bou an ahon jin, kani chun an angol jin ahi. Ipi jeh a kani chun an angol ji ham kahetnom jehchun, nikhat kadongtai.
KEI: “Henu, ipi jeh a Pathen nikho niseh le, an nangol jing ji ham?”
KANI: “Boi, nang khankho ding gelna jeh a, Pathen koma anngol thabei pum’a taona kamanji ahi.”
KEI: “Henu, nagilkel jilou ham?”
KANI: “Kagil chu akel ji thouve. Hijongle kabolthei sun kabolji ahi.”
KEI: “Henu, nagil akel’e, anne jeng ji tango. An kine jongle Pathen koma kitaomo ding ham?”
KANI: “Boi, taona hicheh jongle, an ngol’a taona man le oiva set’a taona man akibangpoi.”
KEI: “Henu, akibah louna, ipi um’a ham?”
KANI: “Boi, Pathenin asemsa lei mihem te hi, agenthei dingin aphal poi. Hijongle ven, Pathenin ama thua ikisuhgim diu hi adei lheh jenge. Pakai Jesu leiya ana lenlai jengin jong anngolin ana taojie” eitin, Pathen thu eihil’in ahi. Ahinla chapang lungmol kahi nalai jehchun, ipi doinaa asei ham jong kahethem jou jipon chule kahet kham kham jong kamansah loi jitai.

Phat le nikho chal jing bangin, katahsa le kalunggel jong akhangtou jingin ahile lekha simna langa jong class 5 chan kahin phatan chule kakum jong kumsom alhingtai. Kajopa le ajithah nun jong chapa khat anei lhonin, amin Satngam tin aminvo lhon’e. Hiche chapang chu kanao ahilam jong ken kana hephapoi. Ajehchu kakoma kapa jong ahung jipon, koiman jong eina seipeh pouvin ahi. Kani chu sun teng louna tongin ache jin, jan teng lekha eihil kit jin ahi. Kei chu School kakikhen teng invel lah dunga chun vacha kap’in kache jin, nilhah lang teng anhon le twikhai chu kabol jingin ahi. Kana genthei lheh jeng lhonin ahile chapang kahi nalai jehchun, loi le pai ho kivonna le aumchan’u chu kana otcha mama jeng jin ahi. Hiche kum’a chun kani chu hanat in anan, thi dingin aumtai. Alaicha konin kei chu eihin kouvin kajah-a, “Boi…Boithang, nakhankho ding kagel’e kahin lungset lheh jengin, kahin lhalel tangeiye. Boi, ngai lheh jong leng, iba ilo diu ham? Leiset hi kikhen’a gam ahi nalai jeh in, kingai lheh jong leu hen, kikhen ding chu ihi mai tauve. Hijongle kadamlai hinkhoa ngailut jal’a kahilna thu ho nalunga geldoh jingin lang, thilpha vang hin boljingin. Chuti chun bolin lang, umle chun kikhen kit louna gam, Van khopi nom’a chu ikimuto kit ding ahi. Boi, ven kei hi nachunnu kahipoi. Chemasa cheng lenna gam’a, nachunnu jong ana chemasa ahitai. Keihi nang dinga nani joh kahi. Phat sotpia kona najah-a seiding kana tiji le, injole lhase khan nate kati jeh a, kana seidoh ngam jilou ahi. Chule napa jong adam nalaiye. Ven amapa hi kei dinga kau ahin, nang dinga napa ahi. Tua pat’a ama koma naum ding, hepa tia nakou jing ding ahitai. Boi, kei um hih jong leng, lungthoi hih-in lang, lungneona le lhasetnan jong sang hih-in. Lungmong sel’in nanu le napa kom’a umin lang, na Pathen le nachun le jo lungdei lamin hinkho mang jingin. Ven, Pathenin eiteppehna phat le nidan alhingtai” atin, amaiya lonlhi dimset pumin aseiyin, eikoiyin akap kaptai. Chapang kahi nalai jehchun seiding jong kahepon, lungdong tah in thipchet’in kaumtai. Phat chomkhat jouvin kani jong ahailel’in, ahaina hu jong atan paitai.

Kachunnu dan’a kana ngaito jing kani hinkho bei nikho chun, kachunnu hilouva kani joh ahi chu ama kamcheng tah a konin kahedoh bep’in ahi. Chule kani chun ama laigilga mong mong banga ngailutna neitah a eina khoukhah ho chu kagel’in ahile kanin eingailutna chu kidang kasa lheh jenge. Achesa phat hoa kanin Pathen thu eina hil hole lekha eina hilji ho chu kalung mitlhan ahung langin ahile kalhangai lheh jengtai. Gelphah louva kani janmol alep jeng chu kalaina valin, tongdon thei hitalou alongdamsa chunga chun hakan kakaptai. Neosen’a kona “henu” tia kana koujing ahijeh chun heni kati theipon, henu tin kakou nalaiyin ahi. “Henu, inati ham? Nang hitia naum le, kei ikati ding hitam? Henu, nadamlai melin nalang jinge. Kamcheng khat beh a tong neidonlou ding hitam? Henu, hung thouvin lang, kamcheng khat beh in neihoupi tang-em! Chunnu mel’a kamu chule kachunnua kanei nangin, idinga neidalhah jeng hitam? Thina gam jon din melin nalompoi. Nopsahna jong muman louva, idia khulsin nachan jeng hitam? Henu, naki oimong hinam? Khankho nagellou ham? Nunkho nangailou ham? Leiset hi thina gam le kikhen namun hijongle, tu hi aphat ahi naisaipoi. Nangin neidalhah le, koiyin eilamhil’a, koiyin kakhankho ding eigelpeh ding hitam? Henu, tutah a natahsa bonlei soh jeng din vang, kahin phal thei him him poi. Henu, nang kangai nahi, hoiya solam kabanna, kalonlhi hi ipia kathehhul ding hitam? Hiti ding bep’a, idinga leiset mihem’a kahung kijil khoh ham? Keivang kahinnom tapoi. Henu, keijong neihung puiyo. Che khom hitin, lhon khom jing hite” katin, sennao bangin kakap kap jengtai. Kaha ka val jehchun kaluchang anadoh in, katha abeiyin ahile lhonglaiya chun kamoh kijam jengtai.

Kani chu kalhalel lheh jengin ahile kakalai lonlhi chu alongkang thei mong mong pon ahi. Miten ipi thu aseiyuva, ipi abol’u ham jong gelpha louvin, lhonglaiya chun kakap jingin ahi. Chapang lungmol kahi nalai vangin, kanin eikhohsahna ho chu kahethem mama jengin ahile phat chesa’a lenkhom lai nikho ho chu kalungsunga athah thah in ahung lang jing jengin ahi. It aum nalom lomin, ngai aum tangeiye. Hijongle Pathen thilgon, mihemin pelthei hilou thina chu kani chunga hung lhunga ahitai. Nilhah lang ahiphat’in, kani longdamsa chu leiya vuimang dingin, lhanmol langa apophei tauvin ahi. Kenjong kap pum pumin anungu chu kajuiyin, melmu kit lou dinga avuimang jeng diu chu pamai kasa lheh jenge. Hijeh chun ka-it in, “lungset tah in, kani longdamsa chu leinoiya vuimang hih hel’un. Kangai val jeh in, kalha jou him him poi” katin, kaka pumin japi angsunga chun katao tan ahi. Hiche pettah chun kajopa kakoma ahungin, kajah-a “boi..Boithang, hiti chun um hih-in; mi lunghang diu ahi. Hungin keikoma hung kichol’in. Naka kanan, nachol val behseh jengtai. Idinga nalhaset ham? Pathen thilgon banga, ichunguva thil hung lhung ji ahi. Ven, kei najopa kahi. Boi, lungneo hih-in. Ken nakipasah jing nange” eitin, eilhemin ahi. Chuin mipi chun lhahna la asaovin, lhahna la asahchai phat’un, Pathen lhachapun vuilemna kin jong abol paitai.

Kin akichai phat’in, mipi jouse chu inlanga din akinungle kit tauve. Kei chu kani kivuina song chunga chun katouvin, kalonlhi pumin kani chu kahoupin, “Heni, ichung thangvan sang nalhun teng, kachunnun insung thu ho nahin dong teiyinte. Chuteng kachunnu jah-a, insung mingaicheng adam cheh nauve. Ahinla nang le kei puldouna jeh in, lonlhi pumin hinkho amangun, selunghel pumin zaitha anem’un, angui jou tauve tin thimthu ana lel’o” katin, inlanga hung kile ding katitai. Kahung gotle, kamcheng khat beh a kani kavailhah nailou jehchun nopthei kasa pon, hijeh chun hiti hin kavailhah tan ahi. “Heni, kahin ngai ngeiye. Heni, nang ana um hihle chun, hichan hinkho hi phajou ponge. Thil jouse hi nang le Pathen jal ahibouve. Heni, nangai lheh ing ting, kou kou jong leng, hung kile kit thei la nahi tapon, iba kalo ding ham? Damselin chen lang, kachunnu toh Pathen lenggam’a chun, nomin ana lengkhom lhontan. Nadalhah na-insungmi keiho jong nikho khat teng kahung diu, chu nikho teng chuleh, Pa angsunga melkim del’a ikimelmu kit diu ahi. Chuteng kenjong kalunghelna jouse pailhang ting, leiset gimna ho jouse jong hiche gam’a chun milmai tange. Nadalhah singsung mite jeh in lungkham hih-in lang, lungthoi louvin che jengtan. Nagentheina jouse gelmil’in lang, lunglhai selin Van khopi thah a chun vanvouvin leng maitan. Keivang hiche najanglum songa hin, hung kilhem mai maitange” katin, chuin lhase tah in inlang kahin nungjot tan ahi.

Hiche nia kipat chun kanu le kapa komin kahung um pantan ahi. Kapa chu sun teng louna tongin ache jin, kanuno chu inngah a apang jingin ahi. Neosen’a kona umkhom lou kahi tah jeh-u chun, lunggel akibang thei jipon ahi. Chule kanuno chun eivetda lheh jengin, phona ding bou ahol jingin ahile hinkho mandan ahahsa lheh jengtai. Ama sunga peng achapa bou chu angailun, kei chu eithet lheh jengin ahi. Kenvang kanao chu sung khat’a kapen khompi bangin kagelin, kangailu lheh jengin ahi. School kikhen phat le, nao-eh ho eisop sah jin, anhon le twikhai geiyin kei eibolsah jin ahi. Chule insunga tohding jouse chu kei einganse jin, ama akinop umin, achapa bouseh aboipi jingin ahi. Hitia toh le tham jousea kathakhel jing vangin kachunga alunglhai dehpon, kajopa hung vailhun phatle, kajopa koma chun eiseise jingin ahi. Ajehchu kapa thinung teng insung bulpi kahung hiding jeh a chu eivetnom lou ahi. Itobanga ei-engbol’a, kajopa koma jouthua eihehset jing vangin imacha kasei khapon, kachunnu bang bangin kagelin, jabolna lhingset’in kajabol jingin ahi. Kajopan jong kei sangin ajinu joh angailun, ajinu thusei jouse chu anel ngam jipon ahi.

Hiti ahijeh chun kei dingin hinkho man vang ahahsa lheh jengin ahile phat chesa ho lhangaina chu adai thei him him poi. Kamdam onem’a kihouna jong aum thei tapon, eikihouna jouse chu kamcheng ngeilou jeng ahitai. Kanuno phatlou jeh in, mol jong kane jing tan ahile kahinkho chu lhasetna le kanan bou kamang jingtai. Chun le jo engbolna kachan jing phat’in, kaloi le kapaihon jong einoiseuvin, ei-engbol ding mi atam cheh cheh jengtai. Kanuno chu mingol ahi tiding ham ole miching ahi tiding ham kahethei poi. Ajehchu kei eivetda a, ei-engbol jing vangin, kapa hung vailhun phatle, kapa lungholnan akipei khucheng jengin, somai lhaisel’in kapa chu alamto jingin, kamdam onemin ahoupi jinge. Hitia abol jeh a chu kapa lunggel lhasam pa chun ajinu lunggel hepha louva, athusei jouse chu atahsan’a, kei eivetda lo ahitai. Numei phalou ho lunggel hi, pasal ngol hon akhoiphah joulou mong mong ahi chu kapa a konin kahedoh in ahi.

Aban jingle sim kittau hite. Lunglut tah a sim jouse chunga kipathu kaseiyin, Pathenin phatthei naboh cheh tauhen. Kakipah e.
Keima William Lhonga Madrid.
8731974334.

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleKUKITE KHO CHEN DAN
Next articleHEU, KAMITLHI ALONG JINGE

LEAVE A REPLY

Please enter your comment!
Please enter your name here