Home Sasat Baite KAHUNG KITDIU AHI

KAHUNG KITDIU AHI

296
0

BY:Sasat Baite

Mihem tamtah in ihin khouva tijatna ahiloule kichatna itoh jiuvin ahi. Tua isim diu thusim hi ka u Lamlal in ahinkho a ato ahin semthu vang ahipoi.

Chalwa vangkho a khosah a kahiuvin hinla hichi laichun phattamjo joulang ahiloule Theichangkot a kana chen ji u ahi. Theichangkot chu Chalwa kho toh kigam lathim ahijeh chun Theichangkot a kanu kapa hotoh kana um ji un ahi. Hichi phatlai chu keiman vang achen achaiin kahe tapoi ajeh chu chapangcha bou kana hi nalai ahi.

Theichangkot a ka um u chun nikhat kanu ngah Neikhovahpu athitan ahi. Alongchu kakhou va vuiding ahijeh chun pusal themkhat chun talai asem un Chalwa vangkhoa a pohsuh taovin ahi. Kau Lamlal chu gollhang til til ahin hinla school ana kai tahlou jeh chun thagumma na ana tongjin ahi. Chini chun kapan hungkum suh dingin aseiin hinla mithito gojuh to akilhonpi ding kau alenpen pa jong ahung kal theitapon, ahijeng vangin che tei tei ding ahijeh chun akigo mai maitan ahi. Ama akigot chun nisa aleptan ahi. Amanjong Theichangkot chu adalhan Chalwa chu ahinjon tan hinla lampi a chun akho jing dentan ahi. Ama chu akicha in kilhonpi ding chu angai cha lheh in ahi.

Hitia ahungsuh suh le Patleijang ahin phah phatchun ama sanga mikhat che amuin ama jong alungmong jepin ahi. Kilhonpi dingin adel tan, hinla apha jep jipon ahi. Aphah na ding lam som tobang avat jiteng ama sanga chepa jong alep chet chet jin ama chun khosung mi khattou ahi sahin kicha loutah in ahin del del jengin hinla akou le la ahin houpi jipon alung theh in ahi. Ahung hung lhonin ahile Lhangsih kiti munkhat kichol na a kaman na ji u ahin phadeh deh lhontai, Lhangsih chu iso doh a ahile Lamsuh saothim tah ahin koima kinai cha ganman sah nathei ahipoi. Hinla ama sanga chepa chu apha deh chettan anung chet a aumtan Lhangsih ahin phah phat chun aman jong ana kichol intin kipha tante ati. Hinla Lhangsih ahungso le koima amutapon apet a chun ati aphe leuvin akichat val phat chun henu… hepa…. tin asamin Lhangsih a patchun Chalwa kakho u chu alhai lhungkei in lhanmol aphah in ahile mithipa chu ana vui un ahi. Kapa amu a patchun alungna behsat in ima cha seilouvin amoh katan ahi. Aumdan chu ama aki chatval jeh a chu thilhapa ti di ham ipi tidi ham ama sanga che pa chun akithopi ding hidi dan ahe.

Amanjong ji ahinnei tan sumle pai chu invel a holna ding ahahsat jeh chun jou sunglang a aloi agol jo ahiloule kapaneo hotoh sumlo din ache ji un ahi. Jousung lang a na atoh u chun aman jong hito bang hochu ana toh kitin ahi. Amaho hin ting(cane) akai ji u ahin, khatvei kai a lomkhat hobou kikai jou ji ahi. Nikhat ting kai din ache tan ahile apang a chun mikhat che tobang khat amujin ama jong akihei in ave jin ahile koima jong amuji pon ahi. Atwi thal jinao mun alhunin aman jong nidang bangin atwipai(bottle) chu twilah a aphumlut in ahile mini tobang a amun ahi. Ama jong kho helouvin ache pai kittan ating chu ahinkai tan ahile chini chu ipi tiham nidang a tinglom khat nah nah a kikai jouji chu chini chun achanga lomni ahinkai in lel jong alelpon ama le ama jong akidat mo lheh in ahi.

Chomkhat na ahin tong tong un ahile atoh khompi ho jouse chu aban banin ahung dammo pan taovin, in akile gam ji taovin ahi. Ama jong ahung dammo tan, sunle aloihon achanga ada lha jiuvin amama na cheh akitoh ji un ahi. Nilhah lang nisa lhum joutengle alup jina apat chun amitsih in kom lang chu ave jin ahile nungah khat amujin hoisel in ave jin ahile aum kitji ngal pon ahi. Hitia chu aum umjeng in hinla adam chom tapon asot cheh phat chun inlang kile dingjong agel tan ahi. Jankhat a imu tan ahile amang tobang atah tobang in gari gin ahin jatan aman jong aven ahile kailhang(bazaar) muna ana umtan ahi amun chu avetle ama ho umna chu ahingal in hinla kailhang ahi kitjeng chu adatmo lheh in ahi. Mitamtah amun hinla koima mel chu amupon amai u chu akihe doh theipoi ati. Aman jong ave lelen ahile nungah khat amutan ahi. Nungah nuchu aven ahile aman jong ahinve in chomkhat jouvin akhut chal ahin tun khumin ima cha seilou in bus chunga chun alut in ache mang tai. Ama jong ahung khangdoh in ahile aum na mama chu ahitan a imu thei tapon ahah khovah tan ahi.

‌Jingkah a athilmu chu atoh khompi ho koma asei in ahile aloiho jong chun aboi khat um a hinte tin mun chom a aki chon taovin ahi. Ama ho bang a natonga hung milong(naga) ho koma chun asei u vin ahile milong(naga) hochun nathi lou u chu navang pha uve hiche lai mun chu munpha lou ahe, thilha ho dinga akailhang(bazaar) u ahi, keiho jong kana kingah un hitia kadam mo mo phat uva kaki chon kit u ahitai, keiho um a jong chun nilhah sehle gari gin mikihou gin kaja ja ji uve ati peh bep un ahi.



‌ Phat chom khat jouvin aman jong Chalwa vangkho chu adalha in Lhangnom vang kho a khosa din aji achate toh aki chon taovin ahi. Keijong ama koma kapan sa in school kakai in ahi. Ama koma kaum na achai nakum in nilhah khat anneh chaiin lekha simdin kaki gon ahile ka u pachu amoh lhuh tan ahi. Hai louvin sottah aumjin chomkhatle ahung haidoh jin khatvei le akap in henu…. eihung kithopi in….. atin akap ji tan ahi. Khosung miho jong ahungun bolthei chan kabol taovin ahi. Hitia aum chun taona kamang un ahile chomkhat jou chun aphatan ima cha ati tapoi. Photlot louvin ahungkap kittan, khosungmi hon iti alhep vangun abi tapon kanun eiki thopi nompoi, eilungset tapoi atin nuhgui bing leuvin akap tan ahi. Ka u Lun chun ipi ti a ham sei in nanu hilai aumpoi Chalwa lang a aum e kon ipi asei ham sei in ivoh diu ahi ati. Hitia aum aphat phat chun phatah a kaki houlim pi un ipi tai ham tia adoh ule aman jong hitin ahin donbut ne


‌Koubru lang a kon khun sakol lhanei in mi tamtah ahung un insung khosung chu adim jeng um ahi. Ama hon chetao te ati in eijol taove hinla keima kanompoi, hitia kanop louphat chun eiman un eitoupha un ahi. Kalol a atou un adangjo jong chu aban banin kachung a chun atou thop thop taovin, kahai joupon kathi pai ding kahi tan hitia kaum lai a chun kaki hei in kaven ahile kanu kamu in, kanu koma chun henu eihung kithopi in kati le aman limsah in eineipon keijong hibang kilel a kithi tading a kanun eihung kithopi lou chu kalung na valla kaka ahe ati. Chomkhat jouvin kanop lou phat chun thilha ho chun eive un phat khat le kahung kitdiu ahi atiuvin sakol lhanei a chun Koubru mol lang chu ajon kittaove ati. Hichi thuho asei lai chun masang a athilto jo adeh a numei khatin akhut chal atun khumma ada lhah chu agel doh in ahi.

‌ Hitia aumna chu 2013 kum class VI(six) kasim lai ahi. Vangphat umtah in tun imacha ati tapon, aji achate toh nomtah in achengkhom un ahi.

‌Ngailut na neitah a neisim peh jeh in kaki pah e, hitia hi kim khat khatin kichat tijat na ato mong ji ahin mijouse vang aki bang poi.

‌…………beita…………

Previous articleMembership Form
Next articleLUNGSET MITLHI(Part-1)