Home Thilha Thusim KAHIN GEL JINGE-1

KAHIN GEL JINGE-1

463
0

Published by Thusimbu

Crosby Haokip Convenor KWC

Momoi thusim

Kanu le kapa aum tapon, hijeh chun kanin kaneova patin eihin vah khangin eihin seilet sahe. Hijeh chun kenjong kaninu chu kanu bangin kagelin kalungset lheh jengin ahi. Aman jong eilungset in chaga lam helou khop in eina kipasah jinge.

Jingkah khat kanin eihin thou khangin kajah a,
KANI: “Minlal, tuni beh College a che tang o,” atin ahile kangap cha hih beh jengin, chuin keijong kaponsil kakikhu khumin kani jah a,
KEIMA: “Class bon hoi taha kila jilou. Che ponge heni.”

KANI: “Boi, in-a namoh um um sangin class ga jao mei mei le chun nang dinga phachom ding ahi.”
KEIMA: “Aphachom poi. Kache nom poi heni,” katin; college che ding chu kanom mong mong tapon ahi. Hijongle kanin aha sei val jeh chun keijong phun pum pumin kakigongin College kajon tan ahi.

Chuin keijong auto a katouvin ahile Tuibong’a nungah khat katouna auto ahin khamin ahung kaldohin, kakom taha ahung tou tan ahi. Kenjong amel kaven ahile hoi kasa lheh jengin, vet nom nom aume.

Kakoma ahung tou khah chu kakipah lheh jenge. Amel chu kavet nomin, ahinlah kavet ngam lou jeh chun guhthim in auto phatvet a konin kave ve tan, aman jong eihin le vet chun kajah acha valin kakihetmo sahin kakihei mang tan ahi. Ahin guhthim a anui chu kamun ahi.

Chuin New Bazaar Traffic post um namuna kakum lhonin kihou lou behin kahung lhon tan ahi. Houpi ding chu kanom lhehin, ahinlah jachatna kadim jehin kahou ngam pon ahi.

Chuin College sunga kalut lhonin, keivang chu toilet langa kachen, amavang hoilai class a lut a, chule Semester ijat ahi jong kahe pon ahi. Hijongle amel chapang cha ahijeh chun kei sanga class atam joh ding vang katahsan pon ahi.

Chujouvin College bell ahung ging tan, chuleh Class kajao masat ni pen jong ahijehin ka-class room u kahe pon, chuti chun ka-class room holin kavah le le tan ahi. Kamu joulou phatin jilkung khat kadongin ahile, aman jong eisei pehin, hichun keijong class room kalut tan ahi.

Class kache masat ni ahijeh chun jahcha pum pumin class room kalut tan ahile, madam nu jong anaum tan, chuin kenjong, “May I am coming Ma’am,” katile, Madam nun jong hoitahin eihin ven, mijouse ahung nui tan ahi. Hichun kajachat dan chu aseije kahe pon, kamai asan leovin ahi.

Chuin keijong kache lutin mun khat pen pen a katou tan ahi. Chuin class kala tauve. Ahinlah koima kahet lou jehin jachat nan kadimin, koima mai jong kave ngam pon ahi. Chuin Madam nun kaloite ho masanga keima le keima introduction kibol din eihin kou doh tan ahile kajachat dan chu aseije aum tapon ahi.

Chuin keijong kadah dohin miho lam kaven ahile, auto a kahung tou khompi nungah nu chu kamun, nui seu seuvin eihin ven ahile, nervous nan kadimin thu jong kasei thei tapon ahi.

Chuin kajachat val jeh chun kinchelin kamin le kaumna khomin kaseiyin katouna mun kakijot tan ahi. Chujouvin nungahnu chu guhthimin kahin ve ve tan; kaha vet chanin kavet nom cheh cheh tan, kihoupi ding kanom lheh jengin ahi.

Jachatna kadim jeh chun keijong thip chet in class kichai chan kakitung tan ahi. Hijongle kakoma toupa toh kahung kihe doh lhonin, kahung kingai lheh lhon tan ahi. Chuleh class kichai chan geiyin guhthimin kenjong nungahnu chu kave ve tan; aman eihin le vet tengle kakihetmo sah kit jin kamai kahei mang kit ji tan ahi.

Chuleh pasal adeicha lou koima aum pon ahi. Free time phat le akoma pasal ho atam jin, aguhin kalung ahang hang jin ahi.

Keijong amanu munom jal chun college kache jing tan ahile kani alung dong lheh jeng tan ahi. Hijongle thanom taha college kache thei jalin kani jong akipahin ahi.

Chuin nikhat nungahnu kalungsetna ho kaloipa koma kaseiyin ajah a,
KEIMA: “Kam, khuche nungahnu khu kavet nom dan, chuleh aman ahet lou vangin kalungset lheh ta-e.”
KAMMIN: “Min, chutia nalungset le ihel tah hih ding ham?”
KEIMA: “Hel ding kati jongle jachatna le kisonlel nan kadimin, ima kabol thei hih e.”
KAMMIN: “Lunggim hih ta. Keiman nahin jol peh nange.”
KEIMA: “Henge, guhthim a apul kadou dou sangin, keiya dingin jol hite,” katin; kaloipa toh amanu jol dingin kahung kihou toh lhon tan ahi.

Chuleh kaloipan keiya dinga ajol masanga ken khatvei beh kakihoupi ding adei jeh chun, amanu toh kihou theina ding phat lem chang kahin ve ve tan ahi. Ahinlah keivang amanu kalungsetna asang cheh cheh tan; thua kibol kabang jeng tan ahi. Chuphatin kaloipa ajol dingin kano loi loi tan ahi.

Nikhat hi keijong college kachen ahile, nungahnu chun lampi koma kolju twi anadonin, chuin kenjong kolju heh pa koma khon khat ka-order tan ahi.

Chuin kenjong nungahnu chu kahoupi nom val jeh chun jahcha sa san ajah a, “Tuni college nache ding ham?” katile amanun jong eihin ven kajah a,
NUNGAHNU: “Henge heu, nangla najao ding ham?”
KEIMA: “Keijong jao ding kati ahi. Imoh um um sanga class ijao le nom a,” katin ahile anuiyin, chuin kolju twi adonna man ape gon ahile kenjong, “Nao, ken pe nange,” katile anom pon,
NUNGAHNU: “Angai hih e heu, keiman kipeh nange.”
KEIMA: “Ngailou chu. Keiman pe nange,” katin, somni kala dohin kolju heh pa kape tan ahi.

Chuin keinin jong college kahin jon lhon tan ahi. Chuin aman kajah a,
NUNGAHNU: “Heu, kakipah e,” atin ahile kenjong ajah a,
KEIMA: “Kipa thu seina kham jong hilouva, eini kikah a ikihet to na ding ahi bouve.”
NUNGAHNU: “Chuti ahi jongle kakipahe heu.”
KEIMA: “Nao, namin ipi ham?”
NUNGAHNU: “Heu, kamin Momoi ahiye.”
KEIMA: “Kakipahe tunia ikihet to lhon hi,” katile anuiyin,
MOMOI: “Heu, keijong kakipah e,” atin; chuin kajah a, “Heu, college nahung kai gei na lom lom-e, iti ham?”
KEIMA: “Insung boina chom chom jeh-a kahung ma kai thei lou ahi.”
MOMOI: “Heu, class nahung kai masat nia chu kahin houpi got le kajahcha,” atin ahile kenjong ajah a,
KEIMA: “Nao, jachat angai poi,” katin; chuin class room kalut lhon tan ahi.

Hiche nia pat chun hoitahin kahung kihou lhon tan ahile, kipanan kadim jeng tan ahi. Chuleh class room sunga jong guhthimin ajat jatin action in kakiphin to ji lhonin, chuleh break teng jongle munkhat’a katou khom ji lhonin, hitichun loi le pai hi nan kahung kingai lheh lhon tan ahi. Chuleh kenjong kalungsetna asang cheh cheh tan, ahinlah hel ding kati jongle kangam kit pon ahi. Chuti chun guhthim puldou kahin tho peh tan ahi.

Nikhat college kikhenin kenjong Momoi dingin letter kajih kaloipa kapeh sah tan, keivang kajachat jeh chun kakisel mang tan ahi. Jing nikho a Momoi melmu ding chu kakisong lel lheh tan, letter thua chun ipi bep ahin sei ta dem, tin lunggim nan kadim tan ahi.

Ajingin keijong college kache kit tan, Momoi mel kamu ngam lou vangin, guhthimin kahol thou thouvin ahi. Chuin keijong class room kalutin Momoi kaven ahile, aman jong eihin vet toh akitoh chetin ahile ajahchan akihei mangin; ahinla guhthim a anui chu kamun, kakinepna asang lheh jengin ahi.

Chuin break patin Momoi koma kachen ajah a, “Moi, janhia letter kahin peh chu namu em?” katile me seu seuvin eihin ven kajah a,
MOMOI: “Heu, ipi nahin jih ham, tuchan hin kasim nai poi,” atin ahile, lungnop mo nan kadimin, chuin kenjong ajah a,
KEIMA: “Ibola nasim lou ham? Keiya ahijeh-a nasim nom lou ham?”
MOMOI: “Heu, chuti ahipoi. Kaboi val jeh-a kasim man lou ahi,” atin; kalung anommo lheh jengin, chutah chun madamnu ahung lut tan kenjong katouna mun kajon tan ahinlah kalung anom thei mong mong tapon; College kikhen a hoitaha Momoi kihoupi ding kanom lheh jengin ahi.

College kikhenin kenjong Momoi nung kadelin, kakilhon khom lhonin ahi. Chuin kenjong Momoi jah a,
KEIMA: “Nang koma thusei nom khat kaneiye, kasei thei ding ham?”
MOMOI: “Heu, ipi thu ham seiyin,” ati phatin kenjong jahcha pum pumin kalungset dan kasei tan ahi. Chuin kenjong ajah a,
KEIMA: “Kahin munia pat chun kahin lungsetna nitin-in akhang jinge. Kalung thima kapoh joulou phat a kahin moh sei jeng ahi.”
MOMOI: “Heu, kahin lungset lou jong nahi poi. Lungset tahin nei he themin, dongma kanei tai,” atin; kathusei ding jouse abeiyin, kakinepna abei jeng tan ahi. Chuin kenjong ajah a,
KEIMA: “Nao, nahin lungset tam nan te. Nangin jong nalungset tam nante. Hijongle kenvang kahin lungsetna hi aseije kahe poi.”
MOMOI: “Heu, lhasetnan nei dan lang nei he them o. Loi le pai bangin um jo hite,” atin; lhasetnan kadimin, chuin keijong lungnommo tahin ka-in u kajon tan ahi. Ahinlah Momoi kalungsetna vang asang cheh cheh tan, angol kabang leo tan ahi.

Ajingin keijong college kajon kit tan ahile, College phah masangin Momoi kamun, chuin kenjong kadel pheiyin kakilhonpin ahi. Chuin kenjong ajah a,
KEIMA: “Nao, lungset tahin kalungsetna hi nei san peh tang o.”
MOMOI: “Heu, dongma dang kanei tai kati hilou ham? Nungah tampi aum nai lungkham hih’in.”
KEIMA: “Moi, tam nante. Hijongle ilungset khat um hi chula.”
MOMOI: “Heu, neingaidam in. Kenvang kadet thei hih e,” atin; kalungsetna eisan peh nom tapon ahi. Chuphatin lungnom mo tahin kaum tan, ima jong kabol nom tapon ahi.

Chuin thilsoh um dan jouse kaloipa kasei pehin ahile aman jong nommo asa lheh jenge. Hijongle lungneo louva hinkho kaman dingin eitilkhouvin ahi. Amasa tadin nom hih jongle keivang lung lhadai louvin Momoi kahel thou thou tan ahi. Free phat le Momoi koma katou jin; kahoupi jin, kalungsetna thu akoma tang louvin kasei sei jeng tan ahi. Hijeh chun aman jong eithei chim lheh jenge. Hijongle kenvang nga deh louvin akoma katou tou tan ahi.

Chuin Momoiyin kajah a, “Heu, lungset tahin nei suboi ta hih o.”
KEIMA: “Moi, kalungset jeh-a kahin sei ahi bouve. Chutia kahin suhboi jong ahideh poi.”
MOMOI: “Dongma kanei tai kati chula. Dongma kanei he ngal a neihin hel tei tei leh ikiboi khah ding ahi,” atin eigih tan ahi. Hiche phat chun kakiphat lamin kathusei kanga tan ahi.

Nikhat hi kenjong Momoi peh dingin letter kasunin, college kalhunin kaloipa kapeh sah tan ahi. Ahinlah Momoiyin eihin donbut ding kinem taha kanga jing laiyin jilkung khat ahungin aseiyin, “Thangminlal Haokip and Lhingneimoi Haokip, please go to principal office,” ahung tin ahile keijong lungdon nan kadim tan ahi.

Chuin keini jong kihou lou helin Principal pa office kajon lhon tan ahi. Chuin keini jong kalut lhon tan ahile principal pan eihin koh-in kajah a, “Tell me if you had written this letter?” atin; Momoi dinga letter kajih chu eihin vetsah tan ahile jachat nan kadim tan ahi.

Chuin kenjong principal pa jaha “Sir, It’s me,” katile kachunga ahung lung hang tan warning eihin pe tan ahi. Chuleh aman aseiyin “Bring your parent by tomorrow. I will discuss about your habits with your parent,” atin ahile lhasetnan kadimin, chuin kenjong ajah a, “Sir, please forgive me for my behaviors. I will never repeat again. And my father and mother were no more since my childhood,” katin; Momoiyin eihin ven, chuin principal pan kajah a, “Then, bring your guardian,” atin eihin soldoh lhon tan ahi.

Chaga milungneo chu amuna kalhisoh den tan ahi. Chuin keini jong kahung doh lhon tan ahile Momoiyin kiphat lam tahin, “Heu,” tin eihin kouvin, ahinlah bonbut louvin kache tan ahi.

Chuin class room kalhun lhonin ka-bag kakilahin ka-madam nu koma, “Ma’am, I have to go home now,” katin; kahung potdoh tan ahi. Hiche nia pat chun keijong college che talouvin kaum tan ahi.

College kache lou phat chun kani jong alungdong tan, ajeh eidong dong tan ahi. Hiche phat chun kenjong kaseiyin, chuleh parents call kamu dan jong kasei tan ahi. Hijeh chun kei le kani jong college a principal pa kimupi din kache lhon tan ahi.

Alang khat’a Momoiyin kachunga lungnop mona aneiya principal pa koma eiheh vangin; chaga kahi ahet phatin athilbol akisih lheh jeng tan ahi. Kakoma ngaidam akithum nom lheh jengin, ahinlah kei college kache tah lou jeh chun nommo asa lheh jengin ahi.

Chuleh kaloipan jong Momoi ana house tan, kahinkho thusim ho anasei peh tan ahile kiphat lam nan adimin, akisih lheh jeng tan ahi.

Chuin kei le kani jong College kajon lhon tan, chuin song kitunna muna katouvin, principal office a kani alut tan ahi. Chutah chun kaloipa ahungin kajah a, “Min, ibola school nahung kai tah lou ham?”
KEIMA: “Kammin, kajah acha valin kahung kai ngam ta hih e.”
KAMMIN: “Mithang nu jong athilbol chung changa kisih lheh dan ahi. Nangla hung talou; kakoma ngaidam ahiti thum thum jeng ta hi. College hung kai kit tei tei hen, akoma thusei nom tampi kaneiye, ati e.”
KEIMA: “Phachom tapon te. Eihin suh jum kit ding ahi.”
KAMMIN: “Min, Momoiyin na-phone no athuma kanapeh ahi, tunilhah le nahin text meithei ahiye. Hoitahin hin kihoupi o,” atin; chuin kani jong ahung kile tan, keinin jong in lang kahin jon lhon tan ahi.

Nilhah in Momoiyin WhatsApp in eihin text in kajah a “Heu, lungset tahin neingaidam o. Kathilbol kakisih lheh jenge. Heu, chaga nahi ham?” atin; ahinlah ka-reply pon ahi.

Chuin nilhah in hut khatin kahung dammo tan ahile, ka-inkote akitho khom uvin District Hospital a admit eibol tauvin ahi. Chuin ajingin Momoiyin ahin call tan ahile kanin alan dammoa hospital sunga kaum dan ho aseitan ahi.

Chuin chom khat jouvin kaumna hospital a Momoi ahungin ahile, lhasetnan kadimin, chuin aman kajah a, “Heu, lungset tahin neingaidam o. Kabol khel mong mong e,” atin; kakoma mitlhi long pumin ngaidam athum tan ahi.

Chuphatin kakiphat lamin kenjong ajah a,
KEIMA: “Moi, nang themmona ima aum poi. Kalhin lel lam kihet doh louva nakoma lungsetna thu kahin sei jeh ahi. Avelin hinsei ta ponge.”
MOMOI: “Heu, chutin gelhih o. Lungset dihtah nei chan ahipou leh kanom-e,” atin ahile kidang kasa lheh jengin, chuin kenjong ajah a,
KEIMA: “Moi, ken lungset lhem kanei ngeipoi. Nalungset lou toh nakingai sangin, tua nakilungset pi toh chun hoi tahin kingai lhon jeng o,” kati le kakoma ahung kikhin naiyin kakhut teni atuhin kajah a,
MOMOI: “Heu, tahbeha seiyin dongma kanei naipoi. Kanei nom lou jeh-a dongma nei dana kakisei ji ahi bouve. Hijongle tunvang nang kahin lungset doh ta-e.”
KEIMA: “Moi, ka-letter jih bon sim nom louva.”
MOMOI: “Heu, kasim na-e. Avel vel a kahin sim chai ahitai.”
KEIMA: “Moi, chutia neilungset leh nei lhamon ji o. Ajeh chu chaga genthei kahi jehin lhasetnan kadim e.”
MOMOI: “Heu, nasu lhase taponge. Kahin lungset e,” atin; chuin keinin jong kilungset hinkho kahin mang lhon tan ahi.

Chuleh Momoi jong college che talouvin sun nilhumin eiumpi tan; kanui khom lhonin, hitichun kipah tahin kaum lhonin ahi.

Nilhah langin hospital a konin discharge eihin bol tauvin ahile, Momoiyin kajah a “Heu, jingle college hung tei tei tang o. Nom tahin college kai khom hite,” atin; keijong kanomin, chuin ama jong ache tan ahi.

To be continued

Previous articleKANAO BOILHING(3)
Next articleKAHIN GEL JINGE-2