KACHUNNU LUNGTUP (IV)

Thu, April 23, 2020 by Crosby Haokip

RECAP:

LHINGBOI: “Heu, henun nang o kamcheng bou anga ahitai. Keihon kabon uvin kalhah tauve. Nang nanga hinte,” ahinti chun kapona valin nao kan kakap tan ahi. Kaloipa bath room a pat in ahung chomdoh in, “Min, ipiti nahim?” tin eidongin asei dingdan jong kahe theitapon kapona valin kaloipa thilsoh umdan jouse kasei peh tai.

(Part-IV)

Chujouvin Lhingboi in kajah a,
LHINGBOI: “Heu, henu aha dammo kal hapta khat alhing tae. Thu kahin hetsah nom un ahinlah kihoumat nathei ding aumlou jehin Delhi KSO ho phone kabol uvin hijongle nang hekha mi aumlou jehin amahon jong nahin holdoh jou pouve. Henu natna asan val jeh a Dr hon jong ajo joulou ding phat a ina kanung poh uva kamoh toupiu ahitai. Chuleh henun nang min bou apha pha jenge. Agim genthei val jehin keihon noma kichol dingin kalhah tauve. Hijeh chun tua hi nang kamcheng bou anga hinte. Henu ahung ha dammo a pat’a kenjong henu kachenpi tho ahitai. Noma akichol theina din henu hi lhadoh tan,” atin Lhingboi thusei chu adonbut ding dan kahe tapon ahi. Kalung gim valin Lhingboi kamcheng ho itidonbut ding ham, kahe tapon ahi. Leiset hinkhoa kimuto kit talou dinga kanu iti kalhah ding ham? Kasei thei mong mong poi. Seinom jong leng ipia pat’a ipia chai ding ham kahepon, Kalung gim valin kamoh ka ka tan ahi. Chuphat’in Lhingboinun eihin lhamon in hahsa lheh jongle kanu kalhahdoh din eijoltan ahi.

Chuphat in hahsa lheh jongle leiset a kinungmu kit lou dingin kanu kakam o chengin kalhahdoh in, “Henu, tuhin kapa koma nache ding kon hita jongle nangkoma thu themkhat kasei nome. Kaneova pat’a neihin lungsetna le keidia gim gentheina nahin thoh na jouse nangkoma kipathu seidingin kakam o cheng le ka lonlhi kahin sole. Tahsa melin nahinmu tahih jong leng neilungsetna vang kamitmua konin kisel mangjou ponte. Henu, lungmongin kapa kom jontan, neingai lheh jongle chun tunin kapa koma che dingin kahin teme. Nacha keima gentheina hinkho hin mang ponge lung gim hih’in, ajeh chu tahsa le lhagaova eitilkhou thei ding chuleh kalhaset kaka nikho jongle eilungmon sahthei ding Pathen in nangkhel in Lhingboi eipe tae. Nangvang lungmongin kapa koma din anache tan. Nikhat le keijong kahung ding chutengle kei, nang le kapa thinan eikhen jou tapouvinte. Chuleh henu nalungtup molso na dinga eilungset jing Lhingboi hi kakipui a lungmong taha kaumpi jing ding ahi. Kahinkhon itih hijongle amaiya lonlhi anapotsah ponge,” katin mitlhi long pum pum’in kanu kalhahdoh tan ahi. Kanu kangai valin kakap tan ahi.

Chuleh kanu kadalhah kakisih lheh jengin kanu umpi jingleng thi jongle amel kimu man dinga chuleh akamdam onem jong kija dinga, tin kanu pul kadou doutan ahi. Kaloipan kaum chan ave joupon eilhem lhem tan ahi. Kalung genthei val jehin kalel in matahin kaloipa toh kaihmu lhontan ahi. Lhingboiyin kanu adamlou sunga dalha louhela kanu aumpia ajen kagelle kalungsetna asang cheh cheh in achung a kakipana kasei joupon ahi.

Kalel val jehin kana imu lhu pai tan kahung khah le nilhah nidan 4 anahitan ka-phone kavet leh missed call anadim jengin ken jong Lhingboi ka-call in ahile phone a laina tahin ahungkap kittan ahi.
KEIMA: “Nao, henu ipiti hitam?”
LHINGBOI: “Heu, henun eidalha tauve, tun lenkhom kabol uve. Heu, henu pul hindou hihbeh o, lung gentheina hinkho naman ding kanompoi. Namit a kona lonlhi apot ding jong kanompoi. Henun nadalha jeng ta jongle na lungmon sah dingin kei kaume. Heu, hung lhisoh hihbeh ta o. Nalungset keijong nangjal in kamitlhi long cheng hi theh hul tange. Nalungmonsah henun nakipasah jing banga ken jong kakipasah jing ding nahi. Chuleh ahithei dingle heu, nangkoma kataona nompen hi, lungset tahin neisan peh tango,” atin ahi. Lhingboi jalin kalung ahungmong domin keijong pasal jep tidan in kakilhem bi nah nah in, kalung genthei nunga eilhamon sahthei ding eilungset Lhingboi kanei hi kagelle kakipahin ahi.
KEIMA: “Nao, kakoma na lunggot chan seiyin, hitih chan henu genthei taha nahin boipi hi kei dingin namantam nalom lome. Nao, ipi nasei nom ham?”
LHINGBOI: “Heu, inlanga hungin lang lungtup molso ta hite. Ajeh chu henu beiya hinkho naman ding chu kagelle nom kasa theipoi. Ken naumpi jing ingting nalhamon nange. Chuleh i-inkoten jong ikichen lhon ding aphatsah uvin akihoulha tauve. Tua hi nang nahung bou angau ahitai. Heu, ahithei le akinthei pen in hung o. Namelmu ding kangah lel-e o,” ati chun kakipah valin kamai kipana mitlhin achuptan ahi. Kanun eidalha ta jongle Lhingboi jalin kalung among tan ahi. Chuin kaloipa koma,
KEIMA: “Lun, kei inlang kile tange.”
LULUN: “Ahijongle Min, thil jouse hi Pathen thilgon ahibouve. Lungmongin umin, alouthei lou ahitan thaini le cheta o. Jingle bang dingin von tampi nachoh peh inge,” atin kaloipan jong eilungset lheh e, kagentheina ahethemin eilhamon jinge. Tua kadalhah ding kagelle kaponan ahi.

Ajingin kaloipan von tampi eichoh pehin ken jong Lhingboi dingin Sarojini Market ah von tampi kachoh pehin ahi. Thainia che dingin fly ticket kakikah in kaloipa toh kilhalel tahin kaum lhonin, “Min, nahung kile kit tei tei ding chu o,” eitin ken jong,“Henge Lun, kahung kile kit tei ding ahi. Natohna hoitah tah anahol o. Hiche call center a toha mi lhep lhep ding jong kanom tahihe,” katile anuiyin, hitichun kilhalel tahin kaloipa toh jingkah khovah kangah lhontan ahi.

Jingkho avah phatin kaloipa toh IGI Airport Terminal 1 kajon lhon in kilhalel tahin kaloipa toh kakikhen lhontan ahi. Akile ding konin kaloipan, “Min, nahung kile tei tei ding chu o, nahung kile tengle hilaimun a kananga kit ding nahiye,” atin ken jong, “Henge Lun, kahung kile tengle vang kachang kana hi tah lou ding kanungjui umding ahitai,” tin katot in ahile ahung nuiyin, “Henge henge, nahung lhon tengle keima mong mong in kalop peh lhon ding nahiye,” atin kanui lhonin ama jong Munirka langa akile tan ahi.

Kei jong Manipur jon dingin Delhi a pat’in Indigo in kahung kipatdoh tan ahi. Keijong inlhuna Lhingboi mu dingkal ka ngahlel in lungtup molso a nomtah a chenkhom ding gelpumin kaihmu in ahile kana ihmu lha tan ahi. Kahung khahdoh chun window a konin leiset kavet leh mol le lhang ho nom kasa lheh e. City thupi tah tah jong aumin thinglhang tah tah jong akimun ahi. Meichunga leng kahijeh uvin lenna polam vet katha anomlheh jenge. Lhingboi jong huikonga tousah tei ding katup tan ahi. Lenna polam kavet vet le kanu kahin geldoh in lonlhin eichup tan ahi; “Kachunnu lhaolha, chungleng va bangin hung lenghen lang eihung ville kanom ngeiye. Tua kanitah lhon a vanthamjol a lengle le kahitei lhon ding ahin; henu, nacha keima hi kalenna vanthamjola hin neihung lhem tem o. Kaka na mitlhi thonggo banghi einem in lang neipui galkaiyin kei jong Salem gamnoma. Tun nangla Pakai gamnom, Langkachah khopia kapa toh kimuton nomin lengkhom lhontan natin; keijong lungmong in kasenngai kom jon tange,” katin kaihmu kittan ahi.

Pathen lungset jalin Imphal Tulihal International Airport kalhung in kahung pot doh tan ahile Lhingboiyin eina ngah in eimu mu in eikoiyin akap tan ahi.
LHINGBOI: “Namel damsela kamu thei hi kakipah val in Pathen kathangvah e. Heu, keiding nene nahin choh hinam?” atin ahung kisen sahin ken jong,
KEIMA: “Kalungset ji tah hi o,” katin abeng olchan kameh pehin ahile ahung nuiyin,
LHINGBOI:“Heu, ken na-bag kakhai ding,” atin akipa valjehin kada sasan ka-bag gihtah chu chemo helin akhaitan ahi. Chujouvin keini jong Checkon Tribal Market lang kajon lhonin Winger counter ah ticket kakikah lhonin Winger a katou lhontan ahi.

LHINGBOI: “Heu, nang Delhi a kona hung sum nahou ding hiya chow neichoh peh o,” atin ken jong FAST FOOD a chow plate ni tuitahin kaneh sah in ahi. Lhingboi mel kavet chu akipadan chu amel jong ahoi chom chom in kalungset lheh jenge. Chujouvin Ccpur jon dingin Winger in kahung kipatdoh lhontai.

In kalhunin kei eimua akap lou koima aumpon ahi. Kanu setlei noiya nomin kichol ta jongle insunga a um dingin kagel in amel kamu lou chu na kasan ahi. Kache nachan a Lhingboiyin eijuiyin ajole kanu ngaiya kaka khah ding ham, tia eichin lhih jing ahi. Chujouvin Lhingboi room langa kapuiyin von kachoh peh ho kapeh le akipahvalin alhisoh in,
“Heu, nang vang hi napha na lom lom e. Von neichoh peh hohi kadei theivale heu,” atin kanah(nose) kangchan ahinmeh in akipadan kavet le lungset set aumin ahi. Chuin Lhingboiyin kavon ho eikhel pehin kaki suhthengna dingin kisilna ding eigon pehin hitichun kei chunga akisaboi den tan ahi.

Nilhah anneh ding konin an eithuh peh in an le twi ninglhing set in eikoi peh in kakoma eitoupin ahi.
KEIMA: “Nao, an naneh nailou ding ong?”
LHINGBOI: “Heu, nangin hin ne masan, ajole ken ne nange. Ibola nang anneh donlouva nomtah a kaum ding ham? An naneh chai kahsen avat vat navet peh nange. Heu, tuitahin nen,” atin ka chunga thilpha abol ahijehin ima kasei tapon eilungset eikhoto dan kavet le mantam kasa lheh e.

Nilhah in kainkoten maicham eisem peh uvin tilkhouna eineiyun chuleh lungneo louva lekha kasim dingin eithumop tauvin ahi. Chuleh kanun abei kona kainkote anathulhah bangin kei le Lhingboi kichenna ding thu jong aseiyun hitichun nikho khat atep tauvin ahi. Jingkah matah in invel lah kasuthengin ahile kalel in nomtah a kakichol le Lhingboiyin eihin kouvin cha ahindom in,
LHINGBOI: “Heu, chadon o lel val tan nate.”
KEIMA: “Nao, kakipahe,” katin kadon got le twijoh anahin ama jong hanuiyin ahungnui kit in,
LHINGBOI: “Heu, nang vang lhep nop naum vale. Kahin tot chanin katha anom cheh cheh e. Lunghang hih ta o,” atin tanglou helin anuikittan ahi.
KEIMA: “Nao, nang vang natot them mong mong e. Nang nuina thei ding ahipou leh khoh kasa hih e,” tin kale daiyin, “Nao, henu lhana che hite.”
LHINGBOI: “Heu, iche dingle nalhi napotsah theilou ding chu o, achuti loule kapui lou ding nahi chu. Ajeh chu nalhisoh ding kaphallou ahiye.”
KEIMA: “Nao, lhisoh ponge. Henu lhah nia la kipang jouta louva alhan beh kagamu loule henu lhase ding ahiye,” katin Lhingboi anop phatin lhanmol langa kanu lhan vedingin kache lhontan ahi.

Kanu lhan kamu chun kangai behsehin kanuhgui abingin kap lha dingin kaumtan ahinlah Lhingboiyin kalhiso ding aphallou jehin kakitim nah nah in ahi; “Henu, leiset gentheinan nitin in eibom jongle lhasam ponge. Ana lung gim hihin ong? Nadam laiya niseh a neitao pehna ho hin sumil ponge. Tun nakicholna jalkhun kahung mutan, nang jong kipahin natin nacha hinkho jong vangphatnan hinlo tante. Henu, Pakai koma einangah jinglhon o kapa toh,” katin Lhingboi mitmua kalhi apot louvangin kasung lang seijou louvin akap kap tan ahi. Chujouvin inlanga kahung kile lhonin kakisutheng lhonin ahi.

Kainkote lhon kiphat sah dungjuiyin keini kichenna dingin programme asem uvin thupitah hihih jongle insungmi le houbung miho toh keini kichenna programme kamang tauve. Wedding dress thupi tahin kikivon jouhih jongle eiho traditional dress mangchan Pakai koma kichenna theng kabol lhontan ahi. Koima akipah lou aumpon houbungmi le insungmi hon eikipa piuvin niseh a kipathu seiya hung mi adim jingin ahi. Lhingboi toh kakichen lhon jouvin kanun masanga eina thumop na lenpen, “Boi, nanu hinkho hi kadamsungin kipa sah jingo,” ati chu ipi aseina ahi kahin hechen pane. Kei geldan a chu kanu hin IAS officer kahi ding adeisah hinte, tin kana gele. Hichu ahipoi, tunvang kahe chentai. Kanun hiche thu anasei lona pen tah chu ahile, acha keiman jipha tah kakimu ding, hichu kanu dinga akipana sangpen tah ahin ahi. Tulai officer tam tahin ji akilhen khel gamtan anu le apa dingin kana le lhisona asohtan ahi. Nanu le napa chu nang service nei jeha lungmonga kipah ding ahipon, jipha tah nakilhen khah a nanu lungset le kipana boldoh thei numei chu nanu le napa dinga chanu mantam pen ahi. Hiche numei chu MINU NUNNOM akiti. Bible in, “Numei jipha tah kon akimudoh jou ding ham? Hitobang numei chu sanapah jem jouse sanga hoijo ahi. Hitobang numei hin ajipa chu thilpha abolpeh in, ahinkho lhum keiyin ajipa setna abolpoi,” ati. Hiche thuman tam hi Proverbs 31:10-31 a namu dingu ahi. Ahin pasal dingin Hitobang numei hi taona louvin amu joupoi.

Pathen mapuina jalin keini kichenna programme lolhing tahin akichaiyin keini jong Delhi langa natong dingin kakile lhontan ahi. Masanga chu kachangseh a che kahin tunvang Pakai jalin lolhing tahin kainneipi toh Delhi tolpi kajon lhontai. Thohhatna nei pumin kalsong jingin chutile Job neile gou kile banga Pakaiyin phattheina boh ding ahi. Keini jong Imphal Tulihal Airport a konin huikongin Delhi kajon lhontai. Kalhun lhonin kaloipan Airport a einangah lhonin, “Min, navangpha mong mong e numei melhoitah nakimu khah hi. Tunilhah le vang nomtaha ilop diu ahitai,” atin kipahtahin Munirka kajontauve.
Kakipahe hichanin Lhingboi toh kathusim lhon akichaitai. Muntin a asim jouse Pathenin phattheina boh tauhen.

The End

©2018, Crosby Haokip All Rights Reserved