Home Crosby Haokip KACHUNNU LUNGTUP (III)

KACHUNNU LUNGTUP (III)

449
0

RECAP:

LHINGBOI: “Heu, na gentheina kave joupoi. Lung gim hih’in kati hilou ham? Pakaiyin nakithopi dinga kei le kanu eimanchah ahi, tin sangin. Heu, na mitlhi lon kave jou jipoi. Heu, lunggim hih’in nanao kei kaumna e,” atin eilhamon tan ahi. Lhingboi nu in kanu kijenna sumlut jouse apen hitichun Hospital a konin kahung pot tauvin ahi.


(Part-III)

Lhingboiyin kagentheina ho ahet jehin aon seh leh eihung kithopi jin insung a toh thei thei chuleh kongsop vonsop in jong eihung kithopi jin ahi. Nikhat Lhingboi kain uva ahungin, “Heu, tuni le twitha a vonsop in che hite, keiho vonsop ding jong atamin, nang le henu vonjong sop nange,” atin keijong kanomin vonsop dingin twitha lam kajon lhontan ahi. Kalhun lhonin vonsop toh houlim katho lhonin,
LHINGBOI: “Heu, masanga kanasei bang chun nahinkho thusim nei seipeh ta o kangainome.”
KEIMA: “Nao, leiset hi keidia deikip lelna leiset ahibouve………,” katin kahinkho thusim jouse abonchan kasei peh tan ahi. Kahinkho thusim ajah chun apona in amitlhi along tan ahi.
LHINGBOI: “Heu, nahinkho gentheina hohi kavet leh nang kahin suh lhaset khah ding kati aja e, ajeh chu napap kipo thei ahiye.”
KEIMA: “Umm um, hiche jeh-a chu neisuh lhaset lou ding hichu o. Nakisei khah mong mong e. Ahivanga nangma man neihin suh lhaset ding kamu sa ahin,” tin kadaiyin ahile,
LHINGBOI: “Heu, atah tah kasei ahiye, hibanga a nakilungset a ibola kahin suhlhaset ding hammo? Nang kasuh lhaset leh ken jong nom kasah ding ngeitah a.”
KEIMA: “Ahile neilungsetna chu ipi lampanga neilungset ham?” tin tot tobang tah tobangin kadong in ahile ajahchan,
LHINGBOI: “Ash heu, nang vang hi o, moh lunga kalungset nahiye, ajeh chu nagenthei intin, naphat intin chuleh (kabilkol a olchan a hinseiyin) hoi kahin sah a…”
KEIMA: “Cho, kijon pachat angai hihe,” katile akhut jetlam in eihin chum in,
LHINGBOI: “Tah tah ahiye heu, nangin kei iman neigelhih jongle chun,” tin ahung kilhaset hamin,
“Heu, nangin kei nei lungset a?”
KEIMA: “Nakilungset deh ta la, kalungset jeh-a kanao banga nakingai to a,” katile ahung nuiyin von kasop chai lhonin munkhat a katoukhom lhonin ahi; ajah a “Nao, kei henu dinmun la seithei ahitapon eidalhah nungleh kahinkho man dingdan kagelle hahsa kasa e.” Chuin kakhut a tuhin
LHINGBOI: “Heu, thil jouse kahethem sohkeiye. Hijongle lungneo hih o, ken na kithopi jing nange,” atin kalengkouva akingaiyin,
KEIMA: “Nao, ahile iti nei kithopi ding ham?”
LHINGBOI: “Heu, na lungmonna dinga kaumpi jing ding nahiye. Heu, kahin ngai ji vale ipi kati hitam? Nikhat namel mu louvin kaum thei tahihe.”
KEIMA: “Nao, nahinkho kahin suhgenthei khah ding ham kati ji e, ajeh chu kilungset hinkho hi kamang ngam hihe. Ajeh chu nikhat leh keidia losapna lampi hikha ding ham kati ji e.”
LHINGBOI: “Heu, chutin gelhih tango, thil jouse hi eiman iti imanchah ham eikhut a kingam ahibouve. Heu, kilungset hinkho iman vangin nalekhasim suboi ponte; keiman ijakaiyin natilkhou ving ting nakithopi jing nange. Heu, kilungset hinkho mankhom pi lou dingin vang neigel hihbeh in ken iti hinkho kaman ding ham? Kei nang jal’a bou lungmong kahibouve. Heu, na??”
KEIMA: “Ahile aphat phatin potan te na?” katin kalungset na kaseinom loujeh in akap in,
LHINGBOI: “Heu, ahinai, kei ima kahilou jeh-a kakinepna jong ima ahipon, kagentheina ding bep a lungset kahin chan khah nahita e. Nahin dan le nachon dan ho kadei jehin chuleh na gentheina ho kavet leh kaponan hijeh chun seidoh theilou lungsetna kahin chan kha e; chutia kilungset hinkho neiman khompi nomlou jongle akhoh poi. Koiyin ba eitobang mihoi mo ima hilou hi alungset ding ham?” atin kap pum pum in akipat doh tan ahi.
KEIMA: “Nao, kalungset louvin gelhih in nang hinkho gentheina joh hi ding ham, kati ahi.”
LHINGBOI: “Kei genthei ding nakichat chu ahile kilungset hinkho mang khom le hen neitha ding ham? Heu, genthei keiman napul hin dou mai tange. Nang jong nalungdei mi kiholtan. Ahinlah nahet ding khatchu keima kiseiphatna ahipon kei banga nalungset ding koima umponte. Keiman nalekhasim kasuhboi khah ding ham, tia na lung gim ahin keiman Nang henu koma, ka-u Minlal keiman hasem’a kakisem ding ahi, tin kana seiye. Chutia nang in nang suboi dinga nei ginmo jongleh kei chetange heu,” atin akap’in inlam ajontan ahi. Iti kakham vangin anompon, kalungsetna kasei dohlou kagelle kakisih in ibola hibang loma lungneo kahim? Pasal lungneo dingin achan diu aumpoi, tin kagelin kakisih in kalhi along mantan ahi.


Hicheni chu kei dinga Black Day abang jengin kipana hinkho kamang thei tapon ahi. Lhingboi koma che a ngaidam thuma kalungsetna thusei ding bou kanom tan ahi. Nilhah khojin konin kingaito pum a kanatou pat’in Lhingboi nu ahungin,
LHINGBOINU: “Minlal, Lhingboi hoiya um ham tuchanin ina ahung kile hih laiye,”atin Lhingboi nu thusei kajah chun kalungdong behseh in Lhingboi kana suhlhaset chu kakisih val tan ahi. Kalungsetna kasei dohlou jeh-a chu kalungset louva agela alhaset valjeh a ina kile nomta louva munthip lahkhat a kap ahitai, ti kahin hedohin kakisih lheh jengin ahi.
KEIMA: “Henu, von kasop chai lhona chu aman inlam ahinjot hiya….”
LHINGBOINU: (Lunggim le lhisoh pumin) “Minlal, in chan nahung thah ji ding chula min khubanga nangaiya nalungset a tua hoilang ihol ding hitam? Ajole thilse toh kha le ong.” Kalungim valin Lhingboiyin toset ahin tokhah dingbou kakicha tan hitichun anu toh Lhingboi hol dingin kakipatdoh lhontan ahi. Kaginmona in jouse kahol lhon vangin kamu tapon chuphat in ken jong, “Henu, nangin kani te inlang holin lang keiman kavonsopna lhon lang gahol inge,” katin kei jong ka vonsop lhonna lang kagahol tan ahi.


Kache leh munthip lah a Lhingboi ka ogin kajan kache le kalungset pen leltah a ana ka chu kamun kapona behseh in kapomin, “Nao, lungset tahin neingaidam o, kahin sugenthei valtai. Kahin lungset nalom lome nao. Lhingboi, hichana neilungset dingin katahsan poi nao, ken jong kahin lungset e. Kithouvin cheta hite,” kati chun Lhingboiyin kei eimu phat in akap in, “Heu, kahin ngaivale. Kahin lungsetna asange. Nei dalha hih o. Heu, kilungset hinkho neiman khompi o.”
KEIMA: “Henge nao, ken jong sot a pat’a kana lungset nahitai,” katin ahile akipah valin ahung nuiyin olchan kabeng ahinchop in inlang a kahin domphei tan ahi.


Lhingboiyin eilungset val jehin anule pan jong hoitah a kavet tup dingin eijol lhonin ajeh chu kasuh lhaset kit le ama le ama kimoh tha khahin te, tia kicha lhon ahin ahi. Lhingboi, hichan a kasuh genthei khah vangin kalungsetna ahetchen phatin akipahin jalkhun a lum kanu ahung boipi jin, asilin, an aneh sah in hitichun genthei tahin aboipi jin ahi.

Insunga hahsatna tampi kahin toh in inchen vaichat jehin kanu koma, “Henu, Delhi langa company natongin che tange. Ajeh chu igenthei val lhon tai,” katile kanun, “Boi, nang umlouva iti hinkho kaman ding ham? Kagel thei hihbeh e. Kei keo hilouva Lhingboiyin iti hinkho aman ding ham? Lhingboi ding kagelle ahahsa e boi.”
KEIMA: “Henu, kei le Lhingboi kikah chu keiman phaten seipeh tange lung gim hih’in.”
KANU: “Chutia Lhingboi toh nakihou toh thei leh ibola kada ding ham?” Kanun eiphat sah phat in kakipah in Lhingboi koma kache tan ahi. Kache le achangseh in anaumin,
KEIMA: “Lhingboi!”
LHINGBOI: “Kaume heu, hunglut o. Kakipahe nahung, achuti loule nangkoma kahung got hiya.”
KEIMA: “Lhing, inchen hahsat jehin Delhi langa company natong in che tange. Hitia hinkho iti kaman ding ham? Hijongle ana lungneo hih ta o.”
LHINGBOI: “Heu, ahithei lou ding thu sei hihin, henu damlou khu namoh dalhah jeng ding ham? Chuleh ken jong hibanga nakingaiya namel mulouva iti hinkho kaman ding ham? Kanom mong mong po e heu.”
KEIMA: “Nao, nei lungset ken jong kahe themin, Ken jong kahin lungset e. Hitia kingai mai maiya hinkho mangthei ihilhon poi. Lungtup imolso theina dinga ken jong natoh na khatbeh kanei ngai ahi. Chuleh kache a natohna phatah kahin mutengle kahung kile ding hinkho a dinga kakipui pai pai ding nahi tai. Henun jong kajinei ding angah lel tae. Chuleh henun jong nangaiyin nangaicha lheh jeng jie. Hijeh chun kei natohna ding holin cheng ting kahung kile tengle nangle henu lungtup kasuh bulhit ding ahi.”
LHINGBOI: “Heu, chuti ding ahijongle anangah mai tange. Natohna hinhol loiyin lang namu mu leh neikipui kom tango. Ahivanga napot nungle kahin ngai dingdan hi o.”
KEIMA: “Henge nao, natohna kamu mu leh kahung kile ding kei, nang le henu nomtah a ichenkhom diu ahi. Kache nung tengle henu hoitah in anavesui tango.”
LHINGBOI: “Henge heu, nache naa hung vangphan lang kei le henu neihin sumil lhon hih ta o.”


Kache ding Lhingboi jong anop phat in Delhi a che dingin Train ticket kakikah tan ahi. Kache ding konin Lhingboiyin eingai lheh jongle hoitah in kalhamon in, “Nao, henu toh taonan neihin geldoh jing tao. Chuleh lungtup molso ding galdot pumin einangah jing ta o.” Kache ni dingin Lhingboiyin Imphal chan eihung thahin kilhalel tahin kei jong Dimapur jon dingin Blue Hills a katou tan ahi. Lhingboi kangai lheh jenge hijongle malam hinkho ding gelnan kei jong natohna holding in Delhi tolpi kajon tan ahi. Bus chunga kalung ahel valin kinungle dingbou kathanom tan ahi. Hijongle malam hinkho ding gelnan ngai jongle ngailou kisan Train in Dimapur a konin Delhi kajon tan ahi.


New Delhi train station a kaloipan einangah in keini jong Munirka ka jon pai pai lhon in, kaloipa toh kaum khom tan ahi.
KEIMA: “Lun, ipi na katoh ding ham? Ipi toh thei thei aumdem?”
LULUN: “Min, toh thei ding atame, hijongle Delhi a eimi hon alhangpia itoh theipen u hi Call Center ahi jenge. Kigong o tunilhah le Gurgaon langa interview natou ding ahi. Company manager patoh kakihou sa ahitai. Kisonlel na ding ima aumpoi, English pao natho thei pouleh ahijenge.” Hitichun kaloipa toh room khat’a kaum khom lhonin call center a na katong khom lhontai. Ahahlheh jenge nilhah nidan 8 in kakipan jiuvin jingkah nidan 6 phat leh kahung kile jiu ahi. Hitichun kaloipa toh na katong khom lhonin inlanga kanu leh Lhingboi ngainan hinkho kamang mangtan ahi. Phone kanei lhon lou jehin inlanga Lhingboi toh kakihoumat theipon adam dam nadem, eingai dem, kanu jong adam dam nadem, tin kakingai to to jengtan ahi.


Hitichun lhakhat lhingset kahin tong lhontan ka-salary san masa pen in Nokia keypad khat kachon Sim kakito in Lhingboi nu no kakoi chu ka type kinchel in ka call tan ahi. Ring a che in Chujouvin, “Hello,”ahung kitin Ken jong, “Henu, Lhingboi uma,”katin ahile, “Heu, Lhingboi kahiye, nadam dam hinam o. Neihin call gei na lom lom e o. Heu, kahin ngai nalom lom e,” atin akipah valin thusei naman phat eipe tapon Chujouvin ahung thip chet in chujouvin ahung kap in,
KEIMA: “Hello! Nao, ipi nati ham? Ibola naka ham?”
LHINGBOI: “Heu, henu dinmun… Heu, Henu…!” atin thusei theilouvin akaptan ahi.
KEIMA: “Henu ipitiham? Damlou ham?”
LHINGBOI: “Heu, henun nang o kamcheng bou anga ahitai. Keihon kabon uvin kalha tauve. Nang nanga hinte,” anti chun kapona valin nao kan kakap tan ahi. Kaloipa bath room a pat in ahung chomdoh in, “Min, ipiti nahim?” tin eidongin ahin adonbut ding dan kahe tapon ahi.

Jingle aban anasim taute. Asim jouse Pathen in phatthei boh tahen.

©2018, Crosby Haokip All Rights Reserved

Previous articleTHE HIDDEN PARADISE (3)
Next articleNACHONSETNA HON NIKHATLEH NAHIN MAT DING AHI- 1.