KACHUNNU LUNGTUP (II)

Crosby Haokip

RECAP:

LHINGBOI: “Heu, na hatoh hih ta o, kahin vejou jipoi. Na genthei valin kahin lungset lheh jenge. Nom nomin tong ta o heu.”
KEIMA: “Nao, kakoma naum phat leh lel lam jong kahe hih e,” tin kadaiyin ahile anuiyin,
LHINGBOI: “Henge, kaum jing ding ahi,” atin amaiso alhaiyin vetnom nom aume.

PART 2

Kahinkho agenthei vangin Lhingboi jehin kalung ahung mong pantan ahi. Guhthim a kalungsetna la sangma ma jeng, ahinlah kalungsetna seidoh ding kanom kit pon ajole kalekhasim boikha ding ham katin ahi. Kalungset na vang kasei dohpon loi le paiyin kahin kivoppi tan ahi. Lhingboi nu le pan jong eilungset in abang leh nilhah natoh kachai phat uleh an einehsah jin Lhingboi jong kiseimo tahin eikisah boipi jin ahi.
LHINGBOI: “Heu, nahahsat na ipi um em seiyo. Na kithopi inge.”
KEIMA: “Nao, hahsatna ima kaneipoi,” katile nopmo asan,
LHINGBOI: “Min alungset a akithopi got leh nakiletsah na lom lom e.”
KEIMA: “Nao, kakiletsah ahipoi. Boina ima kanei hihe,” katin che dinga kaki got le nehthei, Bread khat eihung pen,
LHINGBOI: “Heu, nathusim neisei peh nomlou vanga nang HENU chu damlou chuna. Kahet hichu, hiche nehthei hi kei hin nahin peh ahi, tin lang nikhat ka on phat phat leh kahung vet ding nahiye, ati anati ta o.”
KEIMA: “Kakipahe nao, hibanga neikhoto a nei boipi jehin.”
LHINGBOI: “Ash! nangtah jong hi kiphat lam jival hihin lungset set naum ji e,” tin eihin daiyin kei jong inlam kahin jontan ahi. Niseh le nomtah in Lhingboi toh na katongkhom jilhon in phat le nikho che lam jong kahe jipon ahi. Lhingboiyin nehthei kanu dinga eihin pohsah chu kanu kapen ahile akipah lheh jeng in ahi.

Vangset umtahin kanu ahung dammo kittan ahile natong in kache thei tapon kalung agimtan chuleh Lhingboi melmu lou ding chu hahsa kasa lheh jeng in ahi.
KANU: “Ahipoi boi, Pathen in alampi hin gong nante, phat ichan hinkho kaman nahlai ding ham kasei theipon hijeh chun nanu kadam pet hin jinei tan,” atin ahile lungkhamnan kadim tan ahi.
KEIMA: “Henu, lungkham hihin, kati hilou ham? Na genthei na le nahahsat na jousea keiman nave nange,” katin kalhamon kittan ahi.
Kanun jinei dinga eiha jol jehin kalung akham in ahilou le jinei leng kanu akipah in ahinkho anom jodem, katin kakingaito to tan ahi. Ahile Lhingboi kamoh jola anop leh kanu koma kamoh puilut jeng ding tam, kijol hen lang hungda kha leh koipa jum le ja kithohsah kit ding ham, tin kaki gel gel tan ahi.

Natonga kache louna asot phat in Lhingboi nu le pa jong alungdong tan ahinlah kijahmat na thei ding lampi aumlou jeh chun natong a kache kit anga tho lhon tan ahi. Kei lunghel keo hilouvin Lhingboi jong kei eimu louphat in among theipon anu le apa chunga akiphin phin tan ahi.
LHINGBOI: “Henu, ibola ka-u Minlal natonga hung jilou hitam? Dammo hintem? Ahiloule anu ha damlou ahidem? Henu, tunile gacheute. Henu, ipi kati ham tulah hi ka-u Minlal kangai doh tae. Amatoh kakivop leh nom kasah jidan, thilse thilpha lou la nelou, neh le chah a kitup tah a aum khu kangai sange.”
ANU: “Boi, na-u Minlal migenthei ahin nulepa seingai tah chuleh Pathen hetah gollhang pha ahiye, anu dammo nunga aman genthei tah a ahin boipi ahin anu damlou jeh-a hung theilou hinte. Ken jong na-u Minlal kalungset lheh e, hijongle alekhasim suboi hihin, lekhasima agunchu be na dingin tilkhou jin lang lhamon ji in ajeh chu migenthei ahijeh a kipana hinkho aman khah lou maithei ahi. Tulai nungah gollhang ho akingaiyu leh hinkho le lungthim setnan anei lo un nangni vang chuti louvin hinkho kisem dohnan mang lhonin. Kilungset na hinkho theng mang lhonin lang nama lampi lhon Pathen dong jing lhon in, chutile bou nakilungset na lhon lolhing ding ahi,” tin atilkhouvin ahi.
LHINGBOI: “Henu, adihvale nathusei chu. Ken vang agenthei naho kavet leh kalungset jenge. Mi dingin ima hihih jongle ken vang kangai sange. Mithupi mihaosa kademna jong ahipon genthei chaten khankho nunkho ahe gil un ka-u Minlal vang miphatah ahi athusei aumchan a konin kahe doh e. Henge henu, ka-u Minlal katilkhou jing ding keini kilungset na sanga alekhasim na kaboipi ding chutile lolhinna anei tengle kilungset kichen chu amacham in hung um tante,” atin ahi.

Lhingboi jong nungah phatah leh mikhoto themtah ahi. Nehl e chah in akitup in tulai nungah gollhang atamjon khamna thei chom chom; ju le sa, talab, jalda kuwa, shikhar, khaini, chuleh adang dang tanglou hela aneh u hi kagelleh kadip kalai ana in ahi. Lhingboi vang hicheng a kona akikangse jehin kangai sang ma ma jeng in ahi.

Nikhat lung gim taha kanu kana toupi pet in Lhingboi le anu ahung lhonin
ANU: “Minlal, nanu damlouva ibola nei hung hetsah louvu ham? Nahahsat nagentheina aumleh hinsei jin, tia kanasei peh hilou?”
KEIMA: “Henu, kakiphat lam jeh-a……,” tin kaseiyin ahile Lhingboiyin eihinven anu jah a,
LHINGBOI: “Henu, veta! veta! kipan kit tahi. Kiphat lam lam jeng hi, kaden, henu hi nang kiphat lam jeh a dammona thohsah sah ding, nati ham? Nalungmol nalom lome, henu hospital ah puiyute tu maman,” atin ahile kakiphat lam kitin chuleh Lhingboi nu in eilungset lhon dan kagelle kakipah valin kanu hospital a admit dingin kahin pui tauvin ahi.
LHINGBOI: “Heu, ibola hibanga hi kiphat lam ji nahi ham? Keikoma nakiphat lamna ding ima aumpoi. Ven, henu hi kalungset vale, genthei na hinkho aman hi sotpi hiding tahi. Heu, ipi kati hitam tulah natonga nahung lou chu kalung aheldan, kan ngaiji dan o. Nang in la neihe phapon natin; michate hi akilungset leh kiletsah ji vehtau,” atin anoh in pam langa apot tan ahi. Lhingboiyin eilungset na asange. Hijongle numei ahijeh a ken lungsetna thu kasei masah ding anga jing ahi. Kalungset lheh vang in kalungset na kasei doh ngampon, ajole kalekhasim boi leh kanu LUNGTUP kasuh bulhit lel khah ding ham, kati ahi. Nithum sung in kanu Samaritan Nursing Home a kaumpiu vin Lhingboi jong genthei tahin kanu nithum sung in aboipin ahi. Chuin kanun Lhingboi akouvin, asam ajutin ajah a,
KANU: “Nao, nachunga kakipah vale. Nikhat nehthei neihin thot jong chu tuchan in kakipana mitlhi ahulthei poi. Ven, na-u Minlal hi mi miphat lamse ahin hethem in, aman jong nangthu kakoma asei jin nangaisang na leh nalungsetna ho abon in kakoma aseiye. Hijongle kalekhasim boi ding ham, tia nangkoma vang imasei ponte. Keima vang kadam jou ding kakigingcha tapoi,” atin mitlhi long pumin Lhingboi koma akipana thu aphongin ahi. Kanu thusei chu polanga pat in kagaljah in kapona in kalonlhin eichup tan ahi.
LHINGBOI: “Henu, damjou ponge, tin sei hihin, nadam kahsea keiman kaumpi jing ding kanun jong nadam tokah a kadalhah lou dingin eithumop e. Lunggim hih in henu, chuleh ka-u Minlal hi keiman tahsa le lhagaovin tilkhou ji nange. Itijongle alekhasim vang suboi ponge, alekhasim na a katilkhou ding alolhinna lampi joh kavet peh ding ahi. Bible in, ‘mivaicha khoto pa chu anunnome, genthei nikho le Pakaiyin ama chu ahuhdoh teiye,ʼ ati banga ka-u Minlal in lolhinna ahin nei tengle aman kachan dia lom eibolpeh nante. Henu, lungmong in kei kaumnai. Ka-u Minlal hoitah a kakisem ding ahi.”
KANU: “Henge boi, na-u Minlal khankho ding kagelle kalungkham jie. Pathen in nikho khat le phatthei naboh lhon in tin insung a neile gou jouse nangnin hin kai khom lhon in,” atin ahi. Chujouvin kei jong kagalut in,
KEIMA: “Henu, ipi naduchat um a?”
KANU: “Boi, kaduchat aumpo e. Boi, Lhingboi hi anasu lhase hihbeh ta o,” atin ahile Lhingboiyin eihin mitlhap in olchan kajah a, “Nakihet na a tua chu,” atin chuin kanun aseiben, “A thilpha bol hohi nangin nikhat le achunga thilpha nahin bolson ding ahiye.”
LHINGBOI: “Oh henu kakiphatlam bouve, tikit tang o heu,” tin eihin daiyin,
KEIMA: “Nao, kakipahe genthei keini nei kithopi……,” kati laitah in,
LHINGBOI: “Kipan kit tahi!”
KEIMA: “Ahile ipi ba kasei ding ong?”
LHINGBOI: “Heu, kakoma kipathu jong nasei ngailou, ajeh chu nakipa kahetsa ahin kiphat lam na jong nanei ngailou ajeh chu…….! kaden kasei doh talouve,” tin ahung nuiyin, “Henun nikhat le kei chunga thilpha nahinbol ding, ati chu iti nabol ding ham hinsei ta di o heu,” tin eihin dai kitin, ken jong,
KEIMA: “Kahe hihe,” katile ka op olchan ahin chum in,
LHINGBOI: “O mi kiletsah!” atin eihin tot in polanga ache doh tan ahi.

Lhingboiyin guhthima eilungset jong kahe nan ahinlah kalungset nathu sei ding jong kalung opkai nalaiyin ahi. Akamtah a aseidoh lou vang in lungset na thu ama koma kasei doh loujeh in nommo asan ahi. Pathen lungset jalin kanu jong adamtan potdoh thei dingin kaum tauvin nurse numei khat in kanu kijenna bill lekha eihinpen ahile sum 8000/- alut tan ahile kalung agimval in kitim joulouvin guhthim in pam langa kakap tan ahi. Na kasa valin, “Pakai, ipi kati ding hitam? Nanglou belding kanei poi. Pakai, vannoiya thil um jouse hi nanga ahisoh keiye. Pakai, lasempan, ‘Aneipa nanei tengle ijakai nanga hinte,’ atibangin tun nei kithopin kanu kijenna sum hoilang a kalah ding hitam? Achate dinga it nei lou Pakai, Nang chunga kalung gimna seplha tange,” tin Pakai koma mitlhi longin kataovin chuin kadah dohin ahile kamasanga Lhingboiyin mitlhi longpuma einavet a anadin kamun chuphat in kakihet mosah in,
KEIMA: “Nao, henu pha hinam?” katile mitlhi long pumin eiven,
LHINGBOI: “Heu, na gentheina kave joupoi. Lung gim hih in, kati hilou ham? Pakaiyin na kithopi dinga keile kanu eimanchah ahi, tin sangin. Heu, na mitlhi lon kave jou jipoi. Heu, lung gim hih in nanao kei kaumna e,” tin eilhamon tan ahi. Lhingboi nu in kanu kijenna sumlut jouse ape in hitichun Hospital a konin kahung pot tauvin ahi.

Jingle aban anasim kit taute. Asim jouse chunga kakipana thu kahin phonge.

©2018, Crosby Haokip All Rights Reserved