KACHUNNU LUNGTUP (1)

Kilungset na dihtah thusim tah tah ahi

Crosby Haokip

PART 1

Kapan eina dalha ta jongle kanu in kalekhasimna dingin gunchu tahin na atongin school einakai sahin ahi. Kanu phatna leh gunchuna jalin 2009 kumin Class VI S. Ideal High School ah admission eibolpehin chuleh ka insung dinmun u Headmaster pan ahetthem jehin eilungset in kumkeh khat jen tuition fee free in einakaisah in ahi. Hijeh chun kanun S. Cananvenga insan in eiumsah in aman kakhouvah genthei tahin tupeh in lou akalin, hol alhutin, thinglhang changlei abolin kichol manlouvin na atonge.

Kanu genthei na ho le agimna ho chapang cha kahi vangin kahethem in gunchu tahin lekha kahin simpan tan ahi. Themjilna kangai lut jehin jalen golnop hon kana lunglut pon kalekhasim bou kaboipi tan ahi. Henge, sum le pai kanei pon kaloi ho bangin vonhoiyin jong kakivon joupon, kadei dei kanei joupon, hijongle kanun eingailutna kagelji tengle hicheng thilho chu ima ding kati pon ahi. Keima tup le doi chu kanu lungtup guilhun sah ding hi ahi. Ajeh chu kanun eina thumopna thupipen chu, “Boi, nanu hinkho hi kadamsungin kipa sah jingo,” anatin hichu kalung sungah thu sangsom kisei abangin kapona lheh jenge, ahinlah ipi aseina ahi kana hethempon, “Kanu hin kahunglet tengleh IAS officer kahi ding adei hinte,” katin lekha gunchu tahin kahin simin ahi. Vaicha genthei kahi lhon jehin tuition fee leh kalekha ho bou anah nahin kakisuh to theibep jin kadei-kangai nei le gou vang chu keidin agamla lheh jenge.

Hitichun genthei tahin kahung kimangcha in kanun sum eihin thot kham kham chun kahung kimangcha toupeh tan ahi. Pathen panpi jalin exam tengle class topper in kapang jingin, kanu kahetsah tengle mitlhi pumin kipathu asei jin ahi.

Nikhat hi Headmaster pan eihin kouvin kache le JNV Entrance exam kabol kalolhinna thu eihin sei pehin kakipah valin kamai chu lonlhin achup tan ahi. Ajeh chu JNV a kakai leh kum 7 jen FREE a kakai ding ichan hamkhat a kanu katha olsah ding kakinemin ahi. Kanu koma kalolhinna thuguh hetsah ding kal kangah lel in insan a kaumna inneite phone mangchan kanu kahetsah tan ahi. Kanun kalolhinna thu ajah chun akipah behsehin mitlhi longin taona eimanpih in, “Thil jouse hi Christa jal ahi,” atin eitilkhouvin ahi.

Pathen lungset jalin JNV CCPur ah kathemjilna banjom dingin kana kalsongin kanun eihung thah tan ahi. Kenvang ima poh ding jong kanei pon, kaloi hon vang sil le chen, neh le chah thilkeo lhingset in ahinkipoh un hijongle kanun kalungneo nalou dingin Bible chang khatin eithumop in, Psalms 37:5 “Nalampi Pakai jenga lhunglut in, Ama jenga kingaiyin Aman nabolpeh nante.”Hiche Bible chang jalin kalung among in ahi. Kanun taona eimanpeh in eitilkhouvin akile ding konin sum chengnga(Rs 5/-) eipen, “Boi nahahsat tengle naman dingin kikoiyin,”atin kenjong ka-trunk box sunga kakoi tup chet in alouthei lou dinmun a bou man ding katin ahi.

JNV a themjilna kabanjop a kanu ichan ham khat a katha olsah vangin kaumna mun chu sana meiya kipatep bangin keidin themjilna lamtou jot dinga kipatep chu kahung hitan ahi. Ajeh chu janseh le seniors hon eihouse jiuvin mol kane ne jeng tauvin, ahah ngeiye, ajeh chu kaneova pat’a kanu le kapan bon eihouse kha louva kamitmo jeh a mol kaneh na la aumpon kagel ji tengle kalungneo go jin ahinlah kanu dinmun kagel kit tengle kathoh ham ham tan ahi. Themjilna ngailu dingin thohhat angaiye, patepna thoh joulou din losapna alen e. Genthei na jouse thoh tun tun in class XII kahin chaitan ahi.

JNV a class XII kahin chai vangin aban degree course simna ding in sum le paiyah kalung kham tan ahi. Vaicha genthei kahijehin College thupi pin kakai joupon hijeh chun CCPur College ah admission kakibolin kakai pantan ahi. Ahinla kanu ahung ha dammo tan hijeh chun lamka langah kapui dohin Tuibong a insan in kaum lhon tan ahi. Jingkah nilhah in tuition kabolin hichea kon chun ka-college kaina le neh le chah chohnan kamang lhonin ahi. Kanu von kachoh peh khah lou jehin nikhat college kikhen in sangkhol khat kachoh pehin in kalhun chun kanu jah a,
KEIMA: “Henu! ”
KANU: “Ipi ham boi, nahung lhun hitam?”
KEIMA: “Henge henu, nang dingin sangkhol khat kahin cho e,” katin kapen ahile anuhgui abingin alhisoh tan ahi. Chuin room lang ah alutin akap tan ahi. Kanu ka kavet leh kaponan kalhi soh soh tan ahi. Chuin kanu jah a, “Henu nakipa lou ham? Nadei lou ham?” katile, ahung kiheiyin,
KANU: “Ahipoi boi, kakipa val jeh a kap kahiye.”
KEIMA: “Henu, lungneo hih’in, nagenthei nahahsatna hihen nadammo pet hijongle kaumpi jing ding nahi. Naboi na jousea ding dingin kaume,” katin kalhamonin, chujouvin kipahtah in an kane lhonin changpah me chu keini nucha dingin ahsa me abangtan ahi.

Kanu dammo jehin niseh in sum ahung ngaicha tan ahile nikho thaa sumlo na ding kakiholtan niseh a college che jouta louvin mi insah naa na katongin nikho tha nikhat a 200/- kalo tan ahi. Jingkah le nilhah in tuition kabolin sunle nikho tha in sum kalo in hitichun kanu toh kahung kimangcha lhonin ahi. Ka genthei naho kanun amu tengleh apona in, abang komleh jinei dingin eijol jin kanompon ahi. Jinei leng kei teni nucha keo hilouva mi chanu jong kagenthei sah lo ding kahet jehin kanu thusei kananom pon kanu koma, “Henu, lungneo hihi’n, nalungtup kamolso thou thou ding ahi,” katin kalhem lungmong in ahi. Hitichun genthei tahin insung vet le lekhasim kahin koptan ahi.

‌Nikhat insah namun a nakatoh pat’in nungah khat ahung in, kajah a, “Heu, chadon o,” atin ken jong, “Kakipahe nao,” katin kakilahin kadon leh twi joh anahi in chuphat in amajong hanuiyin ahung nuiyin kajah a,
NUNGAH: “Heu, nalung hang a?” tin eidongin tang louhel in achuti nui tan ahi.
KEIMA: “Kalung ahang poe. Ipi bola ba kinei nahim?”
NUNGAH: “Heu, guhthim a kahin vet leh natoh napot tho valin tin le kalung naset vala nadon dinga twi kahin dop peh ahiye. Heu, neingaidam ta o kahin engbol chu.”
KEIMA: “Akhoh hihe, kei mi gentheiyin hiche ho katoh louleh an kingol ta dinga.”
NUNGAH:“Heu, hiche in kisa hi keiho in ding ahin, kasah chai phat uleh room khat a naum ding chu o,” atin eidaiyin, “Heu namin ipi ham?”
KEIMA: “Nao, kamin Minlal ahiye. Nangmin la le?”
NUNGAH: “Heu, keimin Lhingboi ahiye. Heu, na insung thusim kanu le kapan asei asei jengin tin kapohnat dan o, kanu le kapan jong nalungset dan, lungset tahin nathusim neisei peh o.”
KEIMA: “Nao, sei ding kahe hihbeh e. Kisonlel sah a keipen tahchu, nanu le napa chungah kakipahe,” katin milungneo chu kahet loukah in kamitlhi anapot mantan kakiphat lam ahet phat in amajong akihetmo sahin
LHINGBOI: “Heu, lungneo hih’in nahahsat naa kapan pi thei chan in napanpi nange. Ahivanga nikhat leh nathusim neisei peh thou thou ding chu o,” atin eihin daiyin ahi.

Lhingboi mel kamu nia pat’in kamitlhan akilang jing in amelhoi na, aphat na leh akam o nem dan ho kagelleh guhthim in kahin lungset doh tan ahi. Hitichun lungset hekha loupan jan khovah vahin Lhingboi kahin gelpan tan, jingkho avah a natonga che ding kal kangah lel jitan ahi. Na katohna muna Lhingboiyin cha eihin dop peh ji in totna ho kasei khom jilhon in kanui khom khom lhon tan ahi. Katoh khompi kaloi hon eitot jilhon in, “Min, nang vang nabol thei mong mong bouve,” tin eidaiyun kanui nui jeng un ahi.
LHINGBOI: “Heu, na hatoh hih ta o, kahin vejou jipoi. Na genthei valin kahin lungset lheh jenge. Nom nomin tong ta o heu.”
KEIMA: “Nao, kakoma naum phat leh lel lam jong kahe hih e,” tin kadaiyin ahile anuiyin,
LHINGBOI: “Henge, kaum jing ding ahi,” atin amailhai sel selin ahi

Jingle aban anasim ute. Ngah lel lheh jongle chun anagel khel hih in. Jingle aban isim diu ahi.

©2020, Crosby Haokip, All Rights Reserved