KACHUN LE KASEN GOLNGAI(2)

Crosby Haokip

SIMMUN 2

Kanu le Lhingboi kamu chun kamitlhi katuh tang jou tapon polanga kapotdohin kagakap tan ahi. Lainat nan kadimin polanga kiphou towel a kamitlhi katheh in ahi. Chuin Boithem ahungin kajah a, “Heu, insung a hung lut o kanin nahou nome, ” ahungtin chuin keijong kalut tan ahi.

Bench a katouvin kakoma Boithem nu atouvin ahi. Chuin kanun eihin houvin kajah a,
KANU: “Boi, ipi nabol hitam? ”
KEIMA: “Henu, Churachandpur College a lekha kasime. ”
KANU: “Apha lheh jenge. Ahile nanu le napan ipi abol ham? ” ati chun kalha ase lheh jenge.
KEIMA: “ Kaneo laiyin kanule kapa anaum lhon tapoi. Hitia hi hung seilen kahi jenge. ”
KANU: “Lungset naume. Kachapa mel din nakilou vale,” atin alhisoh tan ahi. Chutah chun keijong kalung sunga kakap tai.

Hitichun kakihouvun, chuin Boithem in cha a-omin ahi. Kenvang kanao Lhingboi bou kave ve tan; kaneo lai lhon kageldoh in koukit theilou ahi chu hahsa kasalheh jenge. Kanu kavet le kamitlhi alongin kanao Lhingboi kavet le kangaiyin ahi. Chuin kakoma Boithem ahung touvin ahile atot un, “Minlal hi natupa din kikhao khi kom o. Gollhang phatah jong ahin nachapa bangin kisin jengin, ” tin Boithemnu atot un ahi. Chuin Boithemnun aseiyin, “Katupa dinga um hita hi. Itu ichan kikisem tah ta, ” atin anuiyun ahi. Hichun kakoma tou Boithem ajah cha lheh jenge.

Chuin kanao Lhingboiyin keiho jah a, “Ka-u Them chu avangpha nalom lom e gollhang hoitah akimu, ” tin ahung tot in ahile Boithem ajahcha valin akun lha jeng tan ahi. Chuin kakihou lim un ahile kenjong kanu jah a,

KEIMA: “Henu, kapa hoiya um ham? Nao chu nang cha ham? ” katile lhaset melso tahin kajah a,

KANU: “Boi, napa aumlouna asot tai. Pasal khat kananeiyin kakoma aumpoi. Amahi kanaopa chanu ahibouve. ”
KEIMA: “Nachapa toh nakimu khah lhon talou ham? ”
KANU: “Kakihou kha lhon poi. Hoiya um ahi kahe tapoi. Ahin kakikhen jou lhon lha nga jouvin athitai ti thu kajan tuchan a hi apul kadou ahi. Kamittah a athi kamu lou jeh chun katahsan thei hih laiye.”
KEIMA: “Ale nangai ji em? ”
KANU: “Boi, koi acha ngailou um ding ham? Tuchan hin kamil jou pon kageldoh komle kakap ji e, ” atin kanun kei eingaidan ho asei chun kalai analheh jenge.

Hitichun Boithem te koma kahung um tan ahi. Chule kathanop na tah khat chu ahile kolbu neh phat laitah ahin; Boithem ten kolbu lei abol’un niseh le louva kache jing lhonin ahi. Kolbu lei laiya kaum lhon petin Boithem in kajah a,
BOITHEM: “Heu, tuchunga kakhouva nahung hi kakipah vale. Nang naum jehin kalung among e. ”
KEIMA: “Nao, nakhou nop danhi kasei theipoi. Kadalhah jou lou ding ahitai. ”
BOITHEM: “Heu, ikingai lhonhi kainkote akipa thei dan-u. Ajeh chu kaute numei jinei doh ho vangse theival uva, tua keiya dinga nang naphat jehin akipah lheh jenguve. ”
KEIMA: “Achutile ikingai jing ding tina ta chula na? ”
BOITHEM: “Henge heu, nanglou lungset dang kanei poi, ” atin kolbu kakigo lhonin ahi.

Boithemin eilungset lheh jenge. Ajeh chu ainkoten kakingai lhon aphat sah jeh ahi. Chuleh kaum khom jeh uvin eilhakang khapoi. Chena ding jousea kache khom lhonin, kane khom lhonin ahi. Chule keini dinga hinkho nom chu nilhum kon natoh kichaiya inlam hinjot khu ahiye. Ajeh chu anule pan keini anhon dingin eimasol jilhonin, in chan lungset thimthu kasei lhung kei ji lhonin ahi. Chuleh lampia kakiphei tot peh ji lhonin Boithemin eikipoh sah jin ahi.

Nikhat sunlaiya na katoh pet un Boithemin kajah a,
BOITHEM: “Heu, itih le lungtup imolso ding ham? ” atin alungthim nommo toh abangin ahi.
KEIMA: “Nao, ibola kichen ding thu nasei ham? ”
BOITHEM: “Heu, ajole kikhenna hung umkhante katin numei hinan kalungneo ji e. ”
KEIMA: “Nao, lungneo hihin. Kahin lungset na hi nanga din alhasam aumpoi. ”
BOITHEM: “Heu, henu khu ve tem o. Lungset aumdan khu. Kajinei nungleh koiyin avet ding hitam? ”
KEIMA: “Nao, ibola hiche ho pouva nalung kham ham? Ven, eini iumlhon hila em? Einin ivet loule koiyin eivet peh lhonin te nati ham? ” katin ahile akipah val jengin lhisoh pumin eihin nailutin eikoi jenge.
BOITHEM: “Heu, kei khankho keo hilouva kanu khankho chan geiya nakhoh sah jehin kakipah vale. Heu, kahin lungsetna hi moh a kemmang thei ahitapoi. Kamakhoa hung lhung thei ding kanahinkho neiman sah hih beh o na? ”
KEIMA: “Nao, ven, henu dingin lungkham hihin. Ajeh chu eini khut a um jeng ahin, hisang chun henu khu lhamon inlang kipasah jing ta o, ” katin ahile akipah lheh jenge. Chutah chun Boithemnun sun an nedin eihin kou lhonin kache lhon tan ahi.

Nilhah khat Lhingboi te ina kholai lengin kache tan ahi. Insung kalut chun kanao Lhingboiyin insung anasuthengin eimu phatin kajah a,
LHINGBOI: “Heu, hung touvo. ” atin keijong katou tan ahi.
KEIMA: “Nao, henu hoiya um tam? ” katin ahile aseinom pon ahi.
LHINGBOI: “Heu, tua umhi keidia kani joh ahiye. Kei kanu sot laiyin abeitai, ” atin ahile kapona lheh jengin ahi. Ajeh chu kaneo laiya kanakikhen u chu kanung mu talouva athilam jong kanahet tah lou ahiye.
KEIMA: “Nao, ahile hepa hoiya um? ”
LHINGBOI: “Heu, hepa jong abeita e. ”
KEIMA: “Ahile koiyin nahin vetsuiya hinam? ”
LHINGBOI: “Heu, kani hin eihin vetsui ahiye. Kanule kapan eidalhah nunga ama hin eilhamon jala lungmong bou kahiye. ”
KEIMA: “Henge nao, chaga gentheite Pathen aum nai. Lungneo lou ding ahiye. ”
LHINGBOI: “Heu, nang henu le hepa hoiya um hitam? ”
KEIMA: “Nao, kaneo laiyin kei henu le hepa jong anaum lhon tapoi, ” kati chun apona lheh jenge.
LHINGBOI: “Heu, keibou agenthei ham tin kanagelin nang jong nagenthei ding katahsan e na? ”
KEIMA: “Nao, mihem hinan akijo lel kom aumji e. Hijongle Christa jala ilungmon diu ahiye. ”
LHINGBOI: “Heu, keijong neilhamon ji ji tango. ”
KEIMA: “Henge nao, ” katin akipahin ahi.

Chujouvin ading dohin cha a-omin tuitahin kadon lhonin ahi. Chuin aman kajah a,
LHINGBOI: “Heu, ka-u Boithem toh iti nahung kihetdoh lhon ham? ”
KEIMA: “Lamka langa kanakihet lhon ahite nao. School kai hiya akoma kagache ji e. ”
LHINGBOI: “Nakingai lhon ham heu? ”
KEIMA: “Henge nao. Kalung genthei pettah chun kanajolin ahile anomin kakingai lhon e. ”
LHINGBOI: “Heu, apha e. Ka-u khu numei phatah ahiye. Adehin anu kipa dan khu nakingai lhon hi. ”
KEIMA: “Ahile nao, nangin la dongma nanei tam? ”
LHINGBOI: “Heu, ken dongma moh nei ponge. ”
KEIMA: “Ibola ong nao? ”
LHINGBOI: “Abei ding konin kanun eina vailhahin kajah a, ‘Boi, khatvei leh na-u Minlal toh nakinung mu tei tei lhon ding ahin chutengle anakichen pi tei teiyin o. Nani hi nanu bangin gel inlang achapa toh hung kicheng tei teiyin, ’ tin einavailhah e. Chuleh nikhat leh achapa toh kinungmu tei ding kinemin kanin jong kinepna lentah aneiye. Chutengle kani chapa toh kakichen ding ahi,” atin keithu asei ahi kahen kalungset lheh jenge. Ama chu kahi tia kiphondoh jeng ding kanom pon kahina kakisel tan ahi.

Ahin chomkhat jouvin Lhingboi kahin lungset doh tan, chom loukah in Boithem sangin kahin ngai jo tan ahi. Ahinla Boithem alhaset ding jehin kahetsah pon hoitahin vang kakivoppi e. Adehin Lhingboi koma kaumle kaneo laiyu kageldoh in kalung amonge. Amel jong ahoiyin kagel sangin hatahin amel ahoiye. Atahsa jong alenin avouso asan langin achen ahi. Niseh le Lhingboi le kani koma kache jin ahi.

Nikhat Boithemin anu jah a,
BOITHEM: “Henu, ka-u Minlal in nahin lungset dan hi, nikhat le henu einin ivah ding ahi tin aseiye, ” atin ahile anu jong akipahin ahi.
ANU: “Boi, na-u Minlal hoitahin kilungset pin lang sulhase hih tango. Ajeh chu amabanga eingailu lhon ding um pontin, gollhang pha jong um ponte. ”
BOITHEM: “Henge henu, aman jong eilungset mong monge. Amabou numei hinan kalung aneo teng aman eilhamon ji e. ”
ANU: “Hoitahin kilungset lhonin lang kipah tahin hinkho mang lhon tang o. ”
BOITHEM: “Henge henu. Kalungset bangin aman jong eilungset nai, ” atin Boithem kipana asangin ahi.

Nikhat Boithem toh louva che din kakigong lhonin ahile Lhingboi ahungin kajah lhona, “Heu, keijong neipui lhon o, ” atin ahin Boithemin nommo asan ahi. Ahinla anun kajah lhona, “Boi, nanao jong pui lhonin, ” atin kabonun kache tauve. Ahinla keiho kikah a kihetthem louna ahung um pan tai. Ajeh chu Lhingboiyin eingai kahin hedoh tan chule amani ucha kivet dan jong ahoi tapoi. Hijongle thupha thuse ima seilouvin kaumin ahi.

Lou kalhung tauvin tucha kakimat cheh un hampa kalhou tauve. Ahinla kakoma bung ding akichu thim lhon kamu doh tan ahi. Chuphat chun khat kajet khat kavei lama kabun sahin hampa kalhou tauve. Chuin Lhingboiyin kajah a,
LHINGBOI: “Heu, tunilhah le kolbu kihon utin janle nekhom ute, ” atin ahi.
KEIMA: “Nanop lhonle ikihon theiyu ahi, ” katin chuin Lhingboiyin a-u Boithem jah a,
LHINGBOI: “Na heu? Tujan le kihon ute na? ”

BOITHEM: “Kihon thei ahiye, ” atin chujouvin kolbu kaheh un nilhah le hon dingin kahin kipoh tauve.

In kahin jon tauvin ahile Boithemin kakhut jet lam atuhin ahile Lhingboi maiso alhai tapon ahi. Chuphat chun Lhingboi jah a, “Nao, nahin kaiyinge, ” katin akhut kalan kakaiyin ahile anuiyin akipah lheh jenge. Kaven ahile amani ucha kikah a kinahna hung um thei ding kamun akinah lhon nalou din thakhat tahin kakivoppi lhone.

Nilhahin kolbu kakihon un kaneuvin anom lheh jenge. Lhingboi te ina kakihon un ahi. Kolbu kaneh laiyuvin Boithemin kajah a, “Heu, inlanga che ta hite,” atin kakhut akaiyin ahile Lhingboiyin nommo asa tan ahi. Chuin Boithem jah a,
KEIMA: “Nao, ibola inlang che ding nasom ham? ” katile kino thimtahin aumin,
BOITHEM: “Heu, ina kache nom ta e, ” atin chutah chun Lhingboiyin a-u Boithem jah a,
LHINGBOI: “Heu, heu Minlal tujan hilaiyah ge densah ta o, ” atin ahile akinah lo lhon tan ahi. Chuphat chun anitah lhonin kaphoh lhonin ahile Boithem akap’in in ajon tan ahi.

Chuin Lhingboiyin kajah a, “Heu, tujan hilaiyah geh den ta o, ”atin chuin kenjong ajah a,
KEIMA: “Ibol ong nao? ”
LHINGBOI: “Ka-u Lhingboi bou nalungset a kei neigel phah lou chula. ”
KEIMA: “Nao, nani lhona kahin lungset hila. Koi kalungset lou um ham? ”
LHINGBOI: “Heu, ka-u toh nahinkho man lhon kathangse ahiye. ”
KEIMA: “Nao, na-u toh kakingai nahet chula, ” katin kalhamonin inlam kajon tan ahi.

In kalhunin insunga Boithem anakap tan ahi. Akoma kachen ajah a, “Nao, ibola naka ham? Ding o kap tahih in kahung tai, ” katile eihin ven kajah a,
BOITHEM: “Heu, iti hinkho kaman ding hitam kahe tahih e. ”
KEIMA: “Iti ham nao? ”
BOITHEM: “Heu, kanaovin jong nahin lungset doh danin aum tan, hung kingai kha lhonle chun kei ikati ding hitam? ”
KEIMA: “Nao, ken nang jong kalungset, nanao jong kalungset. Ahin eini akingai ihi lhon chula. Nanao chu chapang hiya ihetthem lhon ding akipa pa na ding ibol peh lhon ding hichu me. Itileh eini ikikhen lou ding ahi, ” katin kalhamonin ahile amajong alung mong tai.

Tahbeh mongin keivang lungkham nan kadim tan ahi. Hijeh chun nikhat Lhingboi koma kachen ahile kong anasop in ahi. Kei eimu phat chun touna ding ahinlan katou tai. Chuin kakoma ahungin kajah a, “Heu, neipom o,” atin eikipom sah got in kapom tan ahi. Chuin kangong akoiyin kajah a,
LHINGBOI: “Heu, kahin ngaiye. Eini kicheng tate, ” atin ahile lungdon le tijat nan kadim tan ahi.
KEIMA: “Nao, ibola hitia chu thu nasei ham? Dongma nei ponge. Kani chapa kakinga ding ahi nati hilou ham? ”
LHINGBOI: “Heu, ngahdoh jou taponge. Nang kamu le angol pei ding kahitai. ”
KEIMA: “Nao, ahithei lou ding ding seihih o. Ajole na-u Boithem lhase ding ahi. ”
LHINGBOI: “Heu, ka-u nalungset bangin keijong neilungset tang o. Kenvang kahin lungset mong monge,” atin kalung adongin thusei ding kahe tapon ahi.
KEIMA: “Nao, kanao banga kahin gel a kahin lungset hila. ”
LHINGBOI: “Naji banga neigel a neilungset ding joh kadeiye. ”
KEIMA: “Nao, kumlha to ajole mi hungle anom thei hih e nao. ”
LHINGBOI: “Heu, tun naji bangin neigel jongle chun khoh kasa poi.”
KEIMA: “Nao, che chu hithei talou chu, ” katin kapom lhan che dingin kakipat doh tan ahile kachunga akikhaiyin kamasang lama patin eikoiyin akap tai. Chutah chun Boithem ahung sunglha chet in ahile seiding helouvin tijat nan eilo tan ahi.

To be continued

©2019, Crosby Haokip All Rights Reserved