Home Crosby Haokip KACHUN LE KASEN GOLNGAI-IV

KACHUN LE KASEN GOLNGAI-IV

52
0
KACHUN LE KASEN GOLNGAI
KACHUN LE KASEN GOLNGAI

Lungset um Thusim

Story and Narrated by
Crosby Haokip

(Contact number 7085168510)

Crosby Haokip kwc
Crosby Haokip kwc

Amanu chu kaphei chunga achuti ka phat chun kavel a ho alungdong thei lheh jeng tauve. Chule keijong kajah acha valin akap chu Lhingboi ahiding kahet jeh chun ajah a, “Nao, ibola kanung nahin jui ham? Kap hih in, ivel lhon a mi hijat um hi namu lou ham? Jachat aum vale,” kati chun ahung toudoh in kajah a, “Heu, kei window langa chun neitou sah o,” atin kakikhin doh in ama katou sah tai. Chuin kenjong Lhingboi jah a,
KEIMA: “Lhingboi, ibola kanung nahin jui ham? Gari kham ing ting kumtan gamla tah ilhun masang lhonin,” kati vangin ahung kihei tapon ahi.
LHINGBOI: “Heu, nakile tengleh nanung kahin jui pai pai ding ahitai, kanati hilou ham? Nangin ka-unu bou nalungset a, vetang, tua ka-unun nahin jui mong hinam? Nakoma ajou asei ahi nahet lou ham? Kenvang hoilai muna che jongle chun kahin jui ding nahi.”
KEIMA: “Nao, kalung agim tave ong? Mibangin nu le pa kineileh eihethem ding umding ahin, tua kanung nahin jui jeng hi kainkoten jadoh leh insunga eilutsah tapon te.”
LHINGBOI: “Heu, pasal nahilou ham? Ibola hiche ho them a chu lunggim nahim? Jum le ja toh gentheina ithoh khom joh ding ahiye.”
KEIMA: “Kanung nahin jui ahitah leh iche ding himai tan te,” katin chuin amajong ahung nuidoh nah nah tan ahi. Hiti chun Ccpur jondin kache lhon tan ahi.

Tuibong a kakum lhonin in a chelut jeng ding chu kakichat jehin Kingkin a kani Nengcha koma kalut lhon tan ahi. Kanin eihinmu chun imajouse kaseipeh in ahile amanjong eilhamonin, “Nahin kipuilut ahitah leh apha ahijenge. Tehse hon, ‘Selchal chaga le pasal chaga nikho khat leh akile doh teiye,’ atiuvin chaga hijongle chun naji nalungset a gunchu tah a inchen nasem khom lhon leh nainchen doh lhon thou thou ding ahi,” atin kani thusei chu kakipah lheh jengin ahi. Chule Lhingboi jong kanalungset jingsa ahijehin tun Minlal kahi hehih lai jongleh kipanan kadim e. Amabou Boithem in ipi ahin geldem, tibou kalung akham e. Boithem chu iti jongleh tua Lhingboi toh kicheng kahitah jehin ama kasuhmil angai tai.

Jinei kiti chu akisel thei ahilou jehin ajingin in kalut lhon tan ahi. Chuin kapaneovin eihin dong paiyin, “Amachu koiham?” tia lunghang tah a ahinsei chun kaseidoh vah thei tapon ahi. Chuin kenjong kasei jengin, “Kahin kipui ahitai,” kati chun alunghang behseh jengin, kajah a, “Kinchel in ganung thahin. Hoilanga chu mingol banga naga va le le a tua aphat louva numei khat nahin kipui lut jeng ham, najahcha lou ham? Hitih chan a hi ima seilouva naum chan kahin thim vet vet ahin tun kivet in, insunga nalut thei lou ding ahi,” atitan ahi. Chuin kanuneovin kajah a, “Ipiba kisei ding ham?” atin chuin Lhingboi masanga chun kaminin eihin kou kha tan, “Minlal, nanghi namalam hinkho ding phatah a kavet peh nahin tua jinei dinga nahung kigellhah jenghi nakison pouleh apha jenge. Pasal i-jinei theileh iji icha kivah jou nante, tia kisonna nanei ahin thinglhang a ulsa longa naji nacha navah ding ahimaiye. Nangol behseh jenge ong,” atin alu akisip tan ahi. Chuta kanuneovin Minlal, tia eihinkou khah chun Lhingboi ahung kiheiyin hoitahin eihin ven kajah a, “Heu, henuneo chun koi Minlal asei ham? Kenla namin Seiboi ham katileh Minlal joh hidan ham?” ahinti chun ajah a, “Kanuneovin deisah tah a Minlal tia eikou ji ahibouve. Ajeh chu hiche min hi ngei asah ahibouve,” katin kalep doh kittan ahi.

Kapaneo vang alungdam thei tapon hiti chun keini kikhen ding thu bou aboipi tan ahi. Kiphong in jong ache tapouvin, hijongle inlanga Lhingboite insung chu mipha ahijeh uvin alunghang pouve. Ipi le ipi kisuto hitam, nikhat kapaneovin kajah a, “Inlanga chen lang nain nalou gakisuh tup in, nasuhtup jou phat leh hung kilen lang najinu hung kipuiyin, tua toh kathu nangailou leh kasuh khen lhon ding nahi,” tia eigih gih phat in Lhingboiyin kajah a, “Heu, ikikhen lhon louding ahipouleh hepa thusei chu ngai jeng hite, lungneo hih in, nahung kile anangah jing nange,” atin eilhamonin ahile keijong kakho lang u Thinglhang gam lang kajon tan ahi. Hiti chun kain kalou kagoltoh soh keiyin Lhingboi puidin Ccpur kahinjon kittan ahi.

Kalhunin kanuneo koma, “Henu, Lhingboi hoiya um ham?” kati vangin iman eidonbut tapon ahi. Kache kit in kapaneo jah a, “Hepa, Lhingboi hoiya um ham?” tia kadoh kit leh amanjong eidonbut deh tapoi. Avel vel a kadoh phat chun ahung kiheiyin, lunghang tahin eihinsen in, “Ibola chu Lhingboi nahol hol jeng ham? Michanu chu ipi nalo got ham? Thip chet in nalekha kipoh inlang college kiche tang,” eihin ti chun kalung ahang behseh jeng tan polanga bucket kitung chu kakenga kapeh jengleh vutvai asoh jeng tan ahi. Chutah chun amajong alung hang valin mol ahin kilah in kachuti kidello lhon tan ahi. Kenvang kakhut kalha poi, eibolnau chu kalai anaval in ahi. Chutia lunghang tah a kapotdoh chun kaloipa Lelen toh kakisuto lhonin aman kachedoh nunga thilsoh jouse eiseipeh soh kei tai. Kache nunga chu kapaneovin Lhingboi chu ainkote koma agathah doh dan ahitai. Lhingboi ada sasa a asol doh thu kajah chun kalai anaval jengin insunga kalutin kavon le kathilho kakipoh doh in kache mang tan ahi.

Lhingboi jong B Vengnom a anite koma aumtan ahi. Kap le lhisoh pumin hinkho amangin kei eihol hol tan ahi. Kakho lang u lampi mi adongin ahinla koima ahe aumlou jeh chun ache thei pon ahi. Chule B Vengnom, Mary Kom Road a khu Sugnu bus kinga ji, kipatdoh ji a hung vailhung ji ahijeh in niseh leh kei eimu khah leh, atin bus hung vailhung ho chu ave jin ahi. Ahinla kakito pel khah lhon jehin kakimuto lhon tapon ahi. Chuin nikhat Tuibong bazaar a kadon va va laitahin kaloiho Thethem kiti khattoh kakimuto kha lhonin kajah a, “Minlal, tulah Lhingboi chu kamu ji chu o,” ahintin ahileh kadong paiyin, “Hoiya em?” katile aman, “Keiho inkom chet a khu hung um chu o. Kenla nahet ham kitia,” atin apet pet chun kagolnu toh chun kache lhon tan ahi. Kalhunin inneinu jah a chun, “Henu, kanao Lhingboi hilaiya um ham?” katile amanjong, “Henge, ajou chet a chu Pallel langa che dia kasol tah chu o. Ale nangla koi nahi ham boi?” atin kenjong kamin le thil umdan ho kasei jouvin New Bazaar winger parking kadel pai tan ahi. Kalhun chun Winger jong akipat doh chet in gari sung kaven ahile Lhingboiyin ihmu puma earpiece a la angai chu kamun window kikhah chu kachup chup vangin aja tapon hiti chun Winger jong alhaimang tan ahi.

Kalung amongmo valin munkhat a katouvin kamoh lhiso so tan ahi. Kahinkho man hahsa kasa valin kakingaise lheh jenge. Thiding bou kanom tan ahi. Lhingboi kalungset ma ma jeng tan, kangai tun tun jengin ahi. Chomkhat cha jong nomtah a hinkho mang khom thei louva lungset helou insungmite jeh a hichan kaphah lhon kagelleh hiche pet tah chun insungmi neilo jong aumpoi, kati tan ahi. Anungthu kajah danin Lhingboi jong akap kap jenge, akitin ahi. Kapona lheh jengin hahsa kasa ma ma jeng tan ahi. Lhingboi jong in agalhung tan ahile kanutoh akika lhon tan ahi. Hitichun keini chu akikhen bangin hinkho kahin mang lhon tan ahi. Chule thu lamleng toh kakimuto chun kajah a, “Lhingboi ajinei tai,” eitipeh in ahile kalai anavalin kakap jeng tan ahi. Lhingboi ajinei tah leh akhouvah kiche jongleh pha chom tapon te; lunghel kiholsah bep ahi, katin kakoma thu lamlengin thu ahung sei chu katahsan tan ahi. Hijeh chun che talouvin kaum den tai.

Moreh a kani khat aumin ama chun eilungset lheh jenge. Kaneova pat a aman kadei kangai eina bol peh jing ahi. Christmas tengle Moreh von ho eihin poh peh ji anahi. Hiti chun kanin eilungset jalin kaloiho otcha louvin kanaum jinge. Chule kei le Lhingboi thu ajah chun anapona lheh jenge. Ajeh chu kani chun Lhingboi koi ahi, anahetsa ahitai. Kapute chanu ahijong anahet sa ahitai. Hichun Christmas konin amajong kakho langu ahung ding phatin Lhingboi te khoa chun ahung kibangpa tan, Lhingboi aholdoh in akihoupi tai.
KANI: “Lhingboi, kei neihet em?” tia adoh chun Lhingboi alungdong lheh jenge.
LHINGBOI: “Henu, kahin het lou chu o, koi pen chu nahitam?”
KANI: “Boi, kei nani kahi. Naneo laiya na-u Minlal toh keiho louva nahung kon ji lhon chu nahet tah lou ham?” ati chun Lhingboi jong akingaito ton ahin geldoh tan ahi. Chuin Lhingboiyin kani jah a,
LHINGBOI: “Heni, ka-u Minlal hoiya um hitam? Dam dam hinam?” atin alunghel lheh tan ahi.
KANI: “Boi, na-u Minlal jong adam dam e. Aman nahin ngai lheh jengin, akoma nahung ding kal angah lel e,” ati chun Lhingboiyin jong lungnommo tahin,
LHINGBOI: “Heni, ka-u Minlal ngai lheh jongleng kei angdang koisa kahitan, kei nungah kahitapoi. Ka-u Minlal chu aphat phat nan analhamon maitan.”
KANI: “Boi, hilai muna chomkhat hung um a nalungset val jeh a bus chung kisan a nadellut a najui, chule ainkote phat lou jeh a nalungset pentoh nasuh khen u hiche nalungset penpa chu na-u Minlal ahi,” ati chun Lhingboi jong achom mang deh chet tan ahi.
LHINGBOI: “Heni, atah tah ham? Ka-u Minlal ham amachu. Kalungset nalom lom e heni. Akoma neipui to,” atin akipah valin amoh ka tan ahi. Hiti chun kani hung thu ajah u chun Lhingboi inkote jouse acheuvin kanitoh akimutou chun akihesoh keiyuve. Phat chesa geldoh in kanu le kani jong akika lhon tan ahi. Chule kanin kanu koma keihi achapa kahi aseidoh chun kipa leh lhaset akop tan ahi. Hiti chun kani chu ama nop le da umlouvin ageden sah tauve.

Keijong kalungmon mo val jeh in nikhat kakho lang uvah kachen Christmas anaitah jeh chun kain kaga kisuh theng tan ahi. Chuin kalou kagave lhan chule nilhah lamin inlanga che dinga leltah a lamtou kajot laiyin kanunga bolero khat ahung lhaiyin kakom ahin phah chun ahung kingan lungdong tah a kavet laiyin kani kamun, chuin kanin kajah a, “Minlal, gari sunga khu koi um ham gave tadin?” eitin kenjong gari kot kahongin ahile Lhingboi ahung kiheiyin kei eimu chun eikoiyin akap tan ahi. Lhingboi toh kakimuto chun chaga noimu kabang jengin ahi. Kamang ham, katin ahinla Lhingboi mai hoisel sel kajut chun kamang anahitapoi. Kakipah val jengin amai hoisel sel chu kameh peh in kaka sah lo tan ahi. Kipah tahin inlam kajon tauvin, gari chunga Lhingboi toh katou khom chu Solomon lengpa laltouna chunga atoupet kabang jeng tan ahi. In kalhun un kei le Lhingboiyin jong kain u kajon lhon tan ahi. Chuin Lhingboiyin kajah a, “Heu, ka-u Minlal nahiye, katileh nada keiya tua kahin matdoh thou thou,” atin anuiyin ahile kenjong kale tot in, “Nang banga mimat hat ho hi lungset dihtah neimi ahiuve, ilungset khat chu achop toh amattoh tho ding mong ahi,” katileh anuija valin kipah tahin insunga kalut lhon tai.

The End


©2019, Crosby Haokip All Rights Reserved

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Thusimbu mobile app ki install nom hon Google playstore a “thusimbu” tia search nabol u le namu lei diu ahi.

Previous articleEIMA CHANG KINGAILUT HI CHONSET AHIPON AHI.
Next articlePathen na kon chun chonset abol jom jipoi

LEAVE A REPLY

Please enter your comment!
Please enter your name here